ديوان الشاعرة / قمرا سماه

اريام عذرآ.. !!!

	(اريام) مانقبلك في داخل الحفل ضيف=لك اعتذار السعودية وسكانها كل شارعن له من الفوضى حدود ورصيف=وحدودنا راكزينه قبل سيسانها انتي ماتدرين كيف الوضع فعلن سخيف=يوم الجماهير لحضورك نقص شانها جيتي تجرين موالك ولا لك نصيف=وزيارتك ماعرفتي طرق بيبانها (ياشيخنا) ياسندنا يالطليق الشريف=فعلك فخر راجحن بكفوف ميزانها فعلك يوقظ قيمناّ مثل همال صيف=لاجاه برق الحيا وانتعشت اغصانها بديارنا مسجد القبلة للاوطان ريف=ومسجد رسول الله الخاتم لإديانها حنا بلاد الحجاب وستر عقلن عفيف=بناتنا ماتغنت داخل اوطانها اسلامنا دين عدل ودين وافي حنيف=ورسولنا من تفاهات العداء صانها حنا للاسلام جند ارواحنا حد سيف=واخلاقنا تقتدي بسلوم جدانها وشيوخنا آمره بالحق وإلها نضيف=الطاعة اللي ربينا داخل احضانها وانتي وشرواك مانستقبلك بالمضيف=وشيوخنا طز في إلحيّ من هانها اريام عذرآمانقبل بالمبادي رهيف=لك اعتذار السعودية وسكانها

لعيووونك ,,.. !!!

	ياراكب اللي سرعته له تهادي=مهادات شيخن في جموع المصلين زوله تقل حرن بوقت الهدادي=لاشاف جول الراهيه بالجناحين مراتبه مثل حرير الوسادي=تاخذ نعومة من لحاف العروسين فردن طوى اللي بيننا من بعادي=تقول صاروخن تفنن به الصين سواقه اللي يعتمده اعتمادي=مطنوخ ذرب وعارفن للقوانين من منطلق حرصي وزود اجتهادي=سلمته المظروف من بين كفين للفاتنه اللي تحددّ حدادي=اللي سرق قلبه غرام المحبين نصيحتي من قلب مخلص وهادي=تجاهلي حبن بليا عناوين إلا اذا روحك خذاها العنادي=في درب حب ابن الرجال السلاطين توكلي على مجيب العبادي=قادر على زرع الغلا بين قلبين (العمر) مايذرب خطاة الولادي=اللي جمع طيب ونزاهة مع الدين اللي دلاله للمراجل تنادي=ماصار درباوي ولاصاحب الشين خلود تفداك الحضر والبوادي=ياعين حرن من نوادر شياهين لعيونك اروضّ بيوتن جدادي=تستاهلين القاف ياناظر العين

اعتذر لقصور ابياتي وعذرآ للغياب لظروف صحية
حبي لقلوبكم

الليل والقمراء !!!

	الليل والقمراء وضيقات الابدان=والصبح واشراقة ضحى والهوايل والعين والدمعة واغاريد الاجفان=وضحكة امل من وضعها الفم مايل والغيظ واحساسي معك صاروا اخوان=لو كان صدري رافضن كل عايل والروح تشكي من معاناة يافلان=وجرحك مزج دمي وبالجسم صايل حبك تسرب طق بيبان جيران=تطور وطال الغلا جبال حايل عليك ياللي تهت في كل وديان=مثل السفيه اللي طلع من حمايل مجنونتك ارفق بها كيف ماكان=اهمها جامل وجاز الجمايل طيفك سرى بي مثل زخات الامزان=عايشت لحظاته وشبت فتايل تحولت ردات فعله لدخااان=واحرق بجوفي مابقى من حصايل وين انت وقتي للقاء حيل ولهان=عزمي تردى والجفا رمح طايل ليلي ظلام وبارق الوصل ماحان=والصبر مر وذاب مامن صمايل والعين كن الشوك في موقها لان=كن الاديرع في جفونه تهايل فرقاك مثل الموت لاشال الانسان=لاقفى وجرحه بالمعاليق كايل بس اختلافه في ترانيم الاحزان=ذاك اقتنع وهناك لليأس حايل وانا وقلبي للمهمات مسكان=لو انثنينا باقين من نخايل سحابة الاخلاص توفي للازمان=لابد مانضرب مثالآ لقايل

جيتك امل !!!

	جيتك وانا ماقدر لهجرك أكمل=لافاد بالقوة ولافاد بالطيب جيتك وانا تعبان بيديني أحمل=شوقاً غمره الجرح فتقلي الجيب جيتك امل ادماه ضيق التأمل=ينزف على باب الغلا خشية العيب جيتك بقايا روح ذابت تحمل=بين الرجاء والموت ضيعتها سيب جيتك وله جيتك غلا بي تجمل=قبل فوات العمر واحلامنا تخيب

لهفة عشق !

	يااول غلا ياآخر غلا يانهايه=لهفة عشق عايشتها وخدعتني ياارق وألطف من جنون الحكايه=لحظه عظيمة وقفت واذهلتني صكت شبابيك الهوى من ورايه=راحت ومن ضيم الجروح انصفتني كبتّ ورود الشوق خلف المرايه=شالت صناديق الغلا وجهلتني عانقتها واهديتها من عطايه=لحفتهاّ عمري ولا حاسبتني لهفة جنون العشق صارت روايه=كتبتها بدموع صمت وقرتني اثريك ياليل المعناّ بدايه= لو ابتعد قاصي نجومك ضوتني ياليل ياليل الشقا والغوايه=وين السنين اللي مضت واحتستني وين الغلا وين الحبيب ودوايه=بعده ملاهيف الضلوع اوجعتني وين الليال اللي سهرها معايه=في ضحكته خطوة فرح وافهقتني حجرّ على قلبي بصك الولايه=وعينّ جروحه بالصدر واحكمتني يلعب بقلبي لعب حمال رايه=لامالها صلف الهوى واخضعتني سقاك ياذاك الغلا من حشايه=برد وسلام ودمعتن عاتبتني تقطف لك الذكرى ورود النهايه=لو انها في عمق جوفي كوتني

جديدي الى قلوبكم المرهفه ,, ودي

محتاج حسه

	قلبي نبض محتاج ياناس حسه=تشبعّ بدم الجسم واكسجينه سيالة اعصابي لشوقه تمسه=ترسل عبر مخي للافكار وينه ليا غفى طرفي بالاحلام جسه=تشفع له اطيافه ونظرات عينه وليا سهرت عيني مكاويه دسه=بالضلع الايسر واتجه في يمينه حبك بروحي بالمعاليق رسه=تعبت ادور لك عذر ياسنينه عس الخفوق اللي تحديت عسه=لاتتركه ينزف وجع ياضنينه

انكسار الغلابه !

	الليل حب الليل جن وغرابيل=الليل موت الليل شوق وكآبه الليل وحشه للغلا والتعاليل=لاجت حظوظآ بالموده تشابه لاجت امانيهم على كيف ماقيل=واحلامهم نامت بحضن السحابه الليل هم وجرح كتلةٍ بهاذيل=لحباب ناقصهم تواصل قرابه الكل منهم يندب الحظ ياليل=يشكي عليك البهذله والغرابه تسامروا على نجومك مواويل=عشق وشرف لكن بلون الضبابه شربوا من جروح الليالي شخاليل=والحب ثابت بالقلوب الغلابه ياويلهم من ظلمتك يااسود الليل=تضيق فيهم من سوادك رحابه حيثك مورد للشقا والتحاليل=لادك ضيمك بالصدور ومشابه النوم عن عيني ورى نجمة سهيل=ودمعات نجلي ورد خدي هنابه من لوعةٍ اشكي بها لاقبل الليل=كني على نارن وتحته صلابه شبابها دايخ على دلة الهيل=زاد الحطب واستوقدت كل مابه ياليل لاتوحي جنون المهابيل=نفسي من الافراح ياليل طابه تعبت ادور بالدورب القناديل=وألبسّ اشعاري عقود المهابه ببقى لكم قمرا ليا روحّ الليل=لاني تعودت انكسار الغلابه

لقلوبكم مع الحب القدير

Stop ياخالد !!!

	ستوب ياخالد وخل الميامين=ابعد عن اهل الدين لاتطرق الباب خليك مع شلة نواقص مغنين=هذا مكانك بين جرذان واذناب حنا هل الذمة للاسلام حامين=اهل القيم عاداتنا تفتل اشناب حنا هل السنه بكل الميادين=اتباع سيف الله بالحق ماخاب دون العريفي تطرف العين بالدين=ودونه ترا ياخالد تقص الارقاب حنا ليا مسواّ هل الدين بتعينّ= مثل المغلثّ نشرب الدم لاطباب باسمي وباسم المملكة والقوانين=وباسم الطنايا والقرايب والاجناب ستوب ياخالد ترانا مجانين=حب العريفي في شرايننا ذاب

مامداني انسى !!!

	البارحة جرحي عثا بالمعاليق=نزف صديده بعد ماني نسيته تقول جالس بين ضلعيني طويق=حزني سرابي وانجبرت وسريته ابكي ودمعي حابسه شدة الضيق=قهر قهر والجرح فاح ورويته نقضّ جروحه وحدتن من مطافيق=الله لايغفر ذنوبه وميته وش جابك لدربي وانا توي افيق=سابع سنه مرت وانا ماهتنيته جيتي بعد هذا ياقل التوافيق=تستسمحين الجرح في عقر بيته مامداني انسى وارتوي ناشف الريق=جروحكم لاعلى قممها رقيته لفقتيّ اضرارك بكذبن وتلفيق=وزرعتي اشرارك وانا اللي جنيته ودارت ليال الوقت من غير تعليق=وتانيب جوفك ماجفاك وشكيته واليوم تبغين الصدق والمواثيق=ماسامحك لو دمعتك ماثنيته بيني وبينك رب كافل مخاليق=ربن مجيب وحافظ اركان بيته في يوم وقت الغرغره والتشاهيق=اذكركّ بحقوق ناسن خذيته عساك تشكين العنا باللواحيق=وتنزل بك البلوى وتوحي شميته وش جابك لو منتي موارث مطافيق=بعد السنين اللي مضت مانسيته

من يشتري قلبي

	من يشتري قلبي ويخلي مكانه=ويحط قلبآ باردن بالتدابير تعبت من نبضه وراهي حنانه=دقاته اللي تحتري له مشاوير ضعيف مغرم يحتويني جنانه=عاصي قرار ونظرته للملا غير يرخي على عقلي ويكرب عنانه=يلعب بحسباتي بليا معاذير ليا ركدبي يهتويني ضمانه=وليا شلع كنه مثل شلة الطير يبي الذي خالط شعوره رزانه=اللي تفنن في عذاب الغنادير ابيه يعطيه الحنان وآمانه=ويعاقده صفقه بليا مخاسير حيثه تعذب من مساوي زمانه=شاف العجايب وانعثر بالمحادير شاف الالم وجروح ظلم الخيانه=شاف القهر لاقبل بليل المصادير شاف الكبر لاطلق حدود الاهانه=وتدفقت داخل عروقه نوافير شاف التجني والغلط وامتنانه=وتعلق بصدق المنى والتعابير اذا عجبكّ القلب بكسب رهانه=وبقطف ورود الغلا والنواوير واذا تشوف البعد عنهّ ميانه=اترك لي اوراق الشقا والمحابير يلقى بدربه من يحفظ الامانه=لو طالت سنينه برسم الاساطير هذا قليب الشاعرة وهذيانه=وهذيك صدمات العمر والمغاوير

جديدي الى احبتي