ديوان الشاعر / نهير النمش

يابـــري حالـــي !!!

	انا تراني احبك واعشقك كلك=ادوخ من كثر ماتطري تفاصيلك اموت بك حيل ولاني قادر املك=شفني ادور عذر واجيك وابديلك يابري حالي عليك وياحلو دلك=اخشى على شفتك ناعم مناديلك ماعدت انا افرق اليشموم من فلك=ارجوك ياشوق لاتبطي مراسيلك الله يحفظك بترحالك وفي حلك=ياللي بقلبي مداهيلك مداهيلك متي تبي تختلط بلي على بلك=انا على الوصل تغريني مواصيلك ومازلت انا ياحبيبي اعشقك كلك=وشلون لاصار تغريني تفاصيلك

نحمد الله على ماأنعم به على بلادنا من امطار ونسأله سبحانه ان يجعل فيها بركه
اتت هذه الابيات دون سابق وعد اتمنى ان اتنال استحسانكم

ســــج القــــدم!!!

	يازين جو المملكه بين الاوطان=فوقه مراديم السحايب تهلي بامر الذي يعلم تفاصيل الاكوان=الواحد المعبود فوق متعلي يازين مطلاع الخلا عقب الاذان=وضحيّ وانت بمرقبٍ مستقلي في ديرةٍ يطرب لها كل شفقان=عقب المطر شوفه لقلبك يسلي ماداج به ياكود زينات الالوان=ذيدان بدوٍ بالبراري تفلي يتلون براق الحيا وين ماكان=والكل منهم للمرابع يدلي نبعد عن الضوضا ومايغث الابدان=ونترك سواليف العرب والتبلي ماغير شذب اعراض ومعاند اديان=بين العرب صارت علومٍ تعلي نبي نفارق قول كاسب وخسران=ومفارق الوجه القبيح المغلي سج القدم ومدتك شوف الاعيان=تسوى رصيد الراجحي وآبا مجلي واخير منها حافظٍ خمس الاركان=والفرض لامن حل وقته نصلي هذي طراة النفس ياراعي الشان=والعمر لا بده بيومٍ مولي

تغريــــــــــدات 1

	الله يسعد مسااء سيد المزاييني=اللي عليه المحااني جالهن حنه احب اداريه وهو دايم يداريني=ضنه على هقوتي وانا على ضنه لامن تكلم يداعبني ويغويتي=اضيع بحكااه وبسلوبه على فنه ارجوك قول اللي بصدرك لغاليك=اللي يحسبك قطعتآ من فؤده يبغاك دايم في سعااده ويغليك=مايحب لك درب الشقاء والنكاده بعض البشر ياجماعه شوفته راحه=ارتاح لامن تبسم ثم حياني كل الحلا والدلع متقلد اوشاحه=القد والطول وجسمه حيل روياني توقعي انك بميه على ميه=في حسن الاخلاق والتقدير والحشمه الاسم يلوق لك وانتي سنافيه=والله كفيل الخلايق يعطي القسمه ودي اسلم عليكم واحدٍ واحد=وانشد عن الغايب اللي غاب له مده واقول طول غيابك ليه يالجاحد=وانا احسبك علينا تسرع الرده

كثــر التطــور!!!

	الوقت يامعود مهو وقتنا العام=ارفع مقامك يارفيقي عن اللآش ابعد عن اللي دربهم كله اوهام=شوف البشر ياصاحبي كيف تعتاش كم واحدٍ روّح ضحية غوى اعلام=غير مساره كل خاين وغشاش هذا الزمن فيه انقطع وصل الارحام=فيه القطاعه بنكها يصرف بّلاش لو الورق يشكي جفا حبر الأقلام=يمكن تموت اقلام ماتبري الجاش الورد عمر الورد عايش للأحلام=والطيش عمره ماتهقوى ولا عاش وأنا براسي طير حرٍ ولطام=أجامله بالهرج والا خذا كاش فيك الخطاء موجود ياراع الافلام=المرجله ماهي وراء لمع الأفلاش تدري وش اللي غير الناس ياغلام=كثر التطور بدل الصلب بقماش واليوم يامعود مهو وقتك العام=يعلو مقامك يارفيقي مع اللآش

المعذره منك يابو فهد الرد ماهو اللي بالخاطر وانت شاعر فحل
وارجو منك قبولها ولو انها ماهي قد مقامك الله يرفع مقامك لكن اسمك يجمله

http://www.nshama-shmr.net/vb/showthread.php?t=28192

قصيدة مسندها على الشاعر الكبير سطم بن فهد الخليل !!!

	يابو نمش القاف ياجاك مسبوك=يبي منك هرجٍ مفصل ومشروح عجّل علي عطني جوابك وانا خوك=عطني خبر وشو سبب غيبة الدوح ماهي بعادة بابه اليوم مصكوك=العادة انه دايم الباب ومفتوح وانا اخـْبر الخميس للدوح مملوك = في مجلسه هذا يسلّم وذا يروح ربعن وكن صدور هم خزانة بنوك=ماتصرف إلا مايعالج به الروح يابو نمش مايلحقن فيه مشكوك=لاشك ابا اسأل عل مافيه ساموح اسألك يوم انك على الطيب ربوك=يأخو الهيافا عطني العلم بوضوح يامسندي الوضع بالحيل مضنوك = يعني تصور مادري وين بتروح ان قلت اروح البر0 للبر مشبوك = يعني طلوع البر ماهو بمسموح

ردي على الشاعر القدير سطم بن فهد الخليل !!!

	يابو فهد ياعل مايصيبك ادروك=يامعاشر الاخيار يامبعد الشوح جاني سؤالك باجزل الشعر محبوك=وتقول عطني وش سبب غيبة الدوح ابشرك تر غيبته مابه زنوك=بأم القرا وابشرك خير وفروح في طاعة الرحمن عسى لك شروك=ياللي علومك بالجزايل لها فوح سلمت من شر المهاليك والشوك=وسلمت يامشكاي من كل مشفوح ولاهنت ياريف الخطاطير لاجوك=دايم وبابك للمطانيخ مسفوح تبري تعبهم من عنا كل داكوك=لامن لفو وانين من عقب لافوح ياعل يفداء شاربك كل صعلوك=اللي عن الخلان ماهو بداموح والدوح يملك قمة المجد بصكوك=بصدورنا يملك عمارات وصروح وعساك ماتفقد رجالٍ يحبوك=وعساك دايم بالطويلات لك ضوح والبر فعلاً ياسطم كله اشبوك=هي مهزله والبوح كالسم ذابوح

تغريدات 2 ..

	توجيه ياللي سكنت القلب لاتطلع القلب=خلك بوسط القلب هذا محلك ارجوك لاتستخدم النهب والسلب=خلك مؤدب وارفق بقلب خلك احتفال احدٍ ليا منه طرالك على البال=كل المشاعر وقفت تحتفل به والله بس مشاهده يبري الحال=ياليت لو يمي ركابه لفت به ضياع الجادل اللي على قلبي لها سطوه=هي هيمنت بس مأعطتني ولاحاجه انا والاحساس لعيونه ترا فدوه=اضيع بحكاه لامن ارخت حجاجه ظروف ياصاحبي كل ودي شوفت عيونك=بس انت ياللاسف ماتسمح ظروفك اصير مفتون والا صرت مجنونك=السالفه كل ابو ها ودي بشوفك الرياض من ثلاث ايام وانتي يالرياض=يتمسابك سحاب ويتصبح بك ضباب وتعرفين انك على كل البياض=سالفة عشاق يبغوون اقتراب حائل عرووس الشمال ودلعه رب الارباب=غطتها الثلوج وداعبتها السحايب جميله وغريوفه وبه سحر لللالباب=على حسنها الجذاب زين الهبايب اعتراف اعترف اني مقصر يالله الخيره=واعترف ماني موفي كل الاصحابي ياكثر في غيبتي . ما جابو السيره=بس انا لو غبت ما يطول غيابي ليتني عند الحبايب نسكن بديره=كان ما ذقت السهر وعذف اهدابي

الأميـــر / عبــدالعزيز بن تركــي الكبيــر

	سمو الأمير / عبدالعزيز بن تركي بن سعود الكبير آل سعود تبرع لمزاين شمر بـ 500000 خمسمائة الف ريال وقلت هذه الابيات كتعبير وسموه اكبر من الشعر.. مرزوق يكون اخوي مرزوق ياشوق باه الخد زاه الوشام=ياتاج راسي وظله من لهيب السموم بلغ سمو سيدي مني جزيل السلام=يدوم عزه وراسه للمعالي يدوم تبرعه للطنايا من كبار العظام=يفدا سموه ملابيد الرجال الرخوم انا اشهد انه يفك الضيق عند الزحام=للطايله سيدي حاضر بوقت اللزوم عبدالعزيز ابن تركي من رفاع المقام=للحق منصاف وللباطل يدوس الخشوم اسمٍ لمع عند اهل العلم وايضا العوام=والناس تذكر هل الطولات واهل العلوم الفعل يظهر ولا يحجبه كثر العسام=كالشمس ماتنحجب لو حال دونه غيوم كم فك راسٍ من السيف الحدب بالنظام=وبالجاه والمال يبذل ماترده عزوم هيلعٍ لاتكلم قص صلب العظام=كلمته ماترد ولا تنخا جزوم خواله اللي يفكون العرب والجهام=عيال زايد لهم بالطيب قدرٍ وسوم والمدح يزهاء لبو تركي عريب العمام=حكام كل الوطن بالدين وجزل السلوم

خــذهــا صريحـه

	هاض القريح وزان بدع الجدايد=والدايم الله والبشر ماتدومي المرجله تحتاج بذل وسنايد=والرب سبحانه كفل قوت يومي القل مايحجب عليك الحمايد=لاصرت من ناسٍ كرامٍ قرومي وماكل حرٍ ياهل العرف صايد=كل الطيور تطير وايضا تحومي ياكود حرٍ ابلجٍ حيل نايد=حرٍ عن طفاس الطبايع يشومي خذها صريحه دون كسب وفوايد=يافلان جنب عن طريق الرخومي انا خويك بالرخاء والشدايد=مادوّر الاعذار وقت اللزومي ماني من اللي يشذبون البدايد=مالي ومال مقطعين الهدومي اخاوي الصلفين وساع البنايد=اللي بهم تفخر سمان العلومي ماحب خوض القول ناقص وزايد=واحب راع الطيب جزل السلومي والحمد لله بأمره الامن سايد=اطلب رضاه وله صلاتي وصومي

ياااااااااااااا... نهيّر نمش !!

	قصيدةٍ عنك تقصر يانهير نمش=عزالله انه عن سلوم العرب قاصرة عقلك وصبرك وفوقه يالسنافي بشش=وطيبك وفزعتك وحمياك متناصرة كنّك بطبعك تنفذ قول رب العرش=(ولو كنت فظاّ غليظ القلب) حتى آخرة حبيت أسلم على شرواك لين انتعش=من كثر عشقي لراع الطيب ومجاوره دقن زماني وصابن من ظروفي طفش=وأقرب قريبٍ وطاني وطي في حافره أول شبابي غرابيل وخداع وغشش=واليوم والحمد لله حالتي خاثرة يعني عرفت ان من يضعف يشوف الدفش= ويشوف من له قوى عدوانه تناصره ماللضمير بغياب أهل الضماير نعش=يجيلهم مايجي يتيمةٍ ساهرة جواهر الحقد.. تخفيها مظاهر دبش=مبدأ [تمسكن تمكن] توخذ بظاهره ياصاحبي من عرف شرواك مايبتلش=منّك تعلمت أفوّت ضحكةٍ ساخرة!

رد على الشاعر الكبير مطلق البخيتان

	حي الله الشاعر اللي غيم شعره يرش=بجزل المعاني علينا ضافيٍ ماطره يفداك ياطير شلوى كل خبلٍ يحش=ويفداك من يجحد المعروف مع ناكره انت الذي يالفاك الضيف وجه يبش=لانه لقاله بشاشة عز ومفاخره الضيف ياجاك قلت اقلط تفضل تعش=يطيب فاله ويبدا ينسمح خاطره واللي على من لفاء يمه حجاجه يكش=كل العرب تنكره بالبر والحاضره والناس ياصاحبي اظن فيها وقش=اشوف بعض السحر يرجع على ساحره خلك صميدع وخل اللي كمش ينكمش=حلق على الطايره وابحر على الباخره واللي بسوق البشر ماغير ينهش نهش=يرجع على صاحبه وتشوفه يناقره وسلمت ياصاحبي من سو سم الحنش=وعساك ياصاحبي ماتفقد الذاكره وبمعرفة حضرتك بالحيل انا مندهش=ونلت الفخر والشرف بالصحبه العامره

بـ صفحتي بالفيس بوك طرحت ثلاث ابيات وتمت مجاراتها من الاخوان والاخوات

اليكم ,
----------------1--------------

ياطويق لـو انـه مكانك جبــل طي
...........................ماشفتنـي مهمـوم يا طويـق لله
ياعـل بــرقٍ تالـي الليل لـه ضي
...........................يسقـي ديـار الطيـب والعــز كله
ديرة هل الطولات شمر بعد حي
...........................اللـي بهــم كــل . المكـارم تعله

.......................................نهير النمش

---------------2---------------

شكلك بعيد وخاطرك ضايقه شي
...........................وشـاحت هواجيسك على غايتـله
البـعد عن حايل ترا ماهو شوي
...........................فـــدوك سـودان الـقـلـوب المغله
لـك خـوّتٍ حكـوبـهــا بغيبتك لي
...........................قــالــو شريـف فعـول ماحدٍ يمله
.......................................بدر الشمري

----------------3--------------

صح الله السانك ومنطوقك الحي
...........................ياللي بدعـت الشعر دقـه وجله
يابـعـــد راسي يابن عمي ويأخي
...........................ياشاعـراً بالطيب شـرف محله
اعذب كلامك مثل مايسقي الري
...........................ينبت على جاله غصونِ مضله
......................................ماجد مطر

----------------4--------------

يالتربيه بالله .. ســوي لنــا شي
...........................الهــم . والغربــه سيوفــه تسله
الطيــر مايوكل . لحمه تـرى ني
...........................يالله .. ياالمعـبود .. بيــدك تحله
ومنك العذر يالنمش مماجرا بي
...........................قـد قلتها شمــر هــل الطيب كله

......................................تناهيد العصيمي