ديوان الشاعر / نجم الشعر

دخيل عيونك / بقلمي

	تعال وشوف الحال يازين وش فيه=أرجوك يالمجمول ضمِّد جروحي مريض حبك ياهوى البال داويه=دخيل عيونك يالغظي لاتروحي ياقلبي اللي في غرامك أسرتيه=بعدك ياكثر دمعي وكثر نوحي غبتي وانا فرقاك ماني بقاويه=طال الغياب وبان سدِّي وبوحي طيفك يزاورني وماني بناسيه=حبك ملك عقلي وقلبي وروحي حبك بقلبي ياهوى البال شاريه=ياراس مالي ياجميع الربوحي لك منزلٍ بالقلب ماحدٍ يساويه=وعن حبك المجنون مالي نزوحي قلبي رهين الحب وانتي خذيتيه=يسري بي الهوجاس وليَّه يشوحي والبال من فرقاك كثرت طواريه=متى على الله برق شوفك يلوحي وتعال شوف الحال يازين وش فيه=أرجوك يالمجمول ضمِّد جروحي

الشاعر/ نايف الشويِّب

سقى الله صبري / بقلمي

	على سلَّم المحبه وقفت باقدامي=وعلى رغبتي عشقتك بالعرض والطولي ونظمت القصيد وخطِّته روس أقلامي=على شان حبك صغت انا القاف مجزولي وعشر القصايد فيك من صافي انغامي=تغنِّيت لك فيها على العود وطبولي على الهاجس اللي بانين فيك أحلامي=ياكم ليلةٍ زارك مع الطيف مرسولي سهرت الليالي والعناء طول الأيامي=وانا هذي حالتي ولاشفت محصولي أعد الليالي واصبحت عدة اعوامي=وانا اشوفني من تالي الوقت مهبولي أنا ماذبحني منك غير التِّسلهامي=على هامش النظره كنَّ السِّيف مسلولي دخيلك دخيل الحب لاتنوي اعدامي=ترى الصَّدِّ عقب الودِّ ماهو بمعقولي تنام الأوادم وانا سهران مانامي=بس اتابع الونَّات والدَّرب مجهولي لاواعزِّتي للقلب ياناس منضامي=وانا صاحبي طوَّل ولاشفت له زولي سقى الله صبري وسقى حزمي الظامي=وسقى الله روح الحب من كل هملولي ألا ليت خلِّي يلحق الحال بشمامي=ولو قدِّر اني متَّ انا منه مقتولي

الشاعر/ نايف الشويِّب

ربعي بني سالم / بقلمي

	ياللي تقول الوقت خاين وغدَّار=أكيد ظروفك تختلف عن ظروفي الوقت هو الوقت لو الزمن دار=والعين للمكتوب لازم تشوفي لو الليالي علَّمتنا بالأسرار=ماكان عند الناس بعض الحسوفي ترى الخساره ماهي مليون دولار=أكبر من هذا بالعدد والحروفي أنا اعتبرها خيبت الظن بالجار=والا نسيبٍ مايشوف معروفي لايعزمك ولايخصَّك بمسيار=ياخذ منك ويعطيك عرض الكتوفي والا الوفي له عندنا كل مقدار=الشَّهم اللي بكل المواثيق يوفي حنا هل الطولات لاصار ماصار=ناقف عدالٍ في جميع الصفوفي ربعي بني سالم وفيين الأشبار=ماصكوا الأبواب دون الضيوفي عاداتنا الترحيب مع شبت النار=ياما ذبحنا من بعيرٍ وخروفي هذي شيمنا نكرم الضيف والجار=وعند اللقاء تسمع صقيل السيوفي وكل القبايل فيهم الطيب والكار=مايذمَّهم ياكود رجلٍ هيوفي أنا تعجبني حكمة الجار والدار=أشهد انَّ اللي قالها فيلسوفي وصلاة ربي عدَّ هتَّاف الأمطار=على نبيٍّ بالمزايا عطوفي

الأمر أمر الله / بقلمي

	أثبت كما ثبت على الضيم صدام=حيث الشجاعه والوفاء والبطوله ماني من اللي يربكه كيد الأقزام=وسمو شخصي يثبتنِّه فعوله أصبر على الشِّدَّات لوكنت منضام=والهم رب البيت عني يزوله الله يصبِّرني على جور الأيام=الأمر أمر الله والحول حوله أعتز دام اني على دين الإسلام=والطيب ساسي والكرم والرجوله ويهمِّني ذكر الوفيين الأكرام=من قاصي الأجناب والا الحموله الذيب له مع فجَّت النور مجهام=ياخذ على دار الشواوين جوله والحر لامنِّه لمح صيدته حام=ومن عالي المرقاب تكفيه صوله أنا الذي لاقمت زعَّلت الأخصام=وان طاب لي عدَّيتها بالسُّهوله وان شفت انا ماعفت سجَّيت الأقدام=كنَّ الفضاء صدري به القلب دوله

هذه الأبيات أسأل فيها أهل منتدى نشامى
شمر عن الأخ أبو طارق محمد الشميلي :

بعيد الهقاوي / بقلمي

	أنا ابسأل اللي له مع الأوَّله حضور=عن النجم اللي له مدِّةٍ ياجماعه غاب عن المنتدى تغيَّب ماشفت له ظهور=وانا اقول جعله سالمٍ من شر الأسباب ألا يالله انك تحفظه ماتجيه شرور=عزيزٍ على ربعه وعزه مع الأجناب وانا ضاق صدري يوم ماشفت له مرور=وهذا الرجل يحسب له مع الرِّجال حساب وله ماقفٍ لاجاه من يشتكي معسور=وفضله تجلَّى بعد فضل الله الوهَّاب سلامي على ابو طارق رجلٍ سليم الشور=بعيد الهقاوي عادته فكَّت الأنشاب عسى من يخبِّرني عنه ياعرب مأجور=وله مني حبَّة خشمٍ يسودها ترحاب أنا اقول هذا القول من خاطرٍ مكسور=وماتنومن دنياً تفرِّق بين الأصحاب ألا يالله انك تجعل الكل بدوم سرور=وعلى الخير تجمعنا مع الأهل والأحباب

نايف الشويب السليمي

خذ راحتك / بقلمي

	قل الذي في خاطرك لاتستحي=قل الذي في داخل الخاطر يجول والا تدري ياصاحبي لاتبتدي=خل العيون الساحره عنَّك تقول ترى العيون الساحره ياسيدي=مبدا عواصفها من الطرف الخجول لاسلهمت آقف واعطي تحيتي=تحية الجندي للضابط في ذهول ومن بعدها ياسيدي اجلس معي=إجلس وقلي وش كنا معك نقول فلَّ الحجاج وخل البساط احمدي=ونبي نستعرض مابقي من الفصول وقبل نتكلَّم ضع يدينك في يدي=نبض اليدين يترجمه نبض العقول أنا اشكر جهدك وانته اشكر جهدي=ترى الوفاء للحب من طبع الأصول يامنتهاء حبي ياغاية سعدي=خذ راحتك معي عسى عمرك يطول الآن احكي تكلَّمي لاتخجلي=دام انتهت كل المشاكل بالحلول قالت والله اني احبك يابعدي=ماطيع فيك اهل الحسد واهل العذول قلت لها انا عطشت أبي قزازة مي=من يدينك حتى العطش عني يزول

الشاعر/ نايف الشويب

ياحرب / بقلمي

	على الحجر اسم القبيله منقَّش=ماينمحي لومات منهو نقشها ياحرب طير العز بالدار عشعش=وعادات صقور العز تحمي عششها ياحرب في دارك كثيرٍ تنعَّش=في حزت الضيقات جودك نعشها ياحرب طيبك من عبيرك تنشنش=بالدين والأخلاق ينومس نششها ياحرب مارمتي سبيل المغشَّش=حاميك ربي من حبايل غششها ياحرب لو نسأل مجنونٍ محشِّش=عد الحقيقه من غياهب حششها ياحرب ثوبك بالوصايف مرشرش=عروسةٍ تبخترت في رشرشها ياحرب لو نصب الأعادي تهشهش=نصبك على مر الزمن ماهششها ياحرب لو كل الخلايق تفتِّش=عن الرداء في حرب خابت فتشها وكل القبايل نعمٍ ماتنتهمَّش=تبَّت يدا منهو يريد يهمشها واعداد مارش المطر فوقها رش=على النبي صلوا عدايد رششها

نايف الشويب

عطني غرامك / بقلمي

	بالله قلي يالغظي كيف ابنساك=وانت الذي ملكت فكري وعقلي أفز من نومي على ضو طرياك=ومن حبي المجنون ماشفت شكلي أحلام نومي تحكي اوصاف رؤياك=مشكور ياحلمٍ لشخصك وصفلي ماحلاك لو شفتك بالأحلام ماحلاك=يام العيون اللي بالأوصاف نجلي والا جديلٍ فوق الأمتان غطاك=ومن الكثافه لامس الخلف سفلي والخد كنه اقتبس نور الأفلاك=وتفاحتينك تفتل العقل فتلي سبحان ربٍ ياهوى البال سوَّاك=وخلاك في زينك ترومين قتلي لاتقتلين اللي من اعماقه اغلاك=أرجوك يالمجمول عطني وشف لي عطني غلا عطني حلا من شفاياك=عطني غرامك سو يازين مثلي بالله قلي يالغظي كيف ابنساك=وانت الذي ملكت فكري وعقلي

نايف الشويب

صدق المحبه / بقلمي

	سألت بحر الشوق يومه تدفَّق=عن الغرام وقال عندي مزيده وسألت جفن العين يومه تغرَّق=عن السهر وقال فرقا شديده وسألت نبض القلب يومه تحرَّق=قال الهوى والحب ناره وقيده وسألت لساني يوم بالشعر ينطق=قال القصايد والمعاني فريده ومن بعدها جات القصايد تخافق=مايهمني لوقلت ميَّة قصيده بالصاحب اللي فيه قلبي تعلَّق=بنيت له بالقلب دارٍ جديده وسجلتها باسمه بعقدٍ مصدَّق=يسكن بها خلي سنينٍ مديده وعمرانها ساسه على الحب والصدق=صدق المحبه والحياة السعيده يابنت انا لو رحت للغرب والشرق=مااحب غيرك والقصايد شهيده إفتحي باب الحب لايصير مغلق=وهاتي علومٍ ياحياتي مفيده ياام الخدود اللي كما لمعت البرق=البيض واجد بس أنتي وحيده ليت الأماني والمطالب تحقَّق=والرازق الله يفعل اللي يريده

نايف الشويب

دنياً تقلَّب / بقلمي

	دنياً تقلَّب كنها الداب ياناس=أزريت انا اعرف مرها من حلاها أحدٍ على شانه تهجرس تهجراس=واحدٍ على شانه تركِّز بلاها أحدٍ تسقيه المر والسم بالكاس=واحدٍ تسقيه زلالها من سماها أحدٍ تغنِّي له على كل مرواس=واحدٍ تعكِّر صفوته من غثاها أحدٍ بها شكى تناويع الأوجاس=واحدٍ بها تنوَّعت له مناها أحدٍ بها شكى بالأفكار هوجاس=واحدٍ بها باقي همومه نساها أحدٍ بها ذاق البلاوي والأتعاس=واحدٍ بها كل السعاده حواها أحدٍ بها ياماشكى وجعت الراس=واحدٍ بها مايشتكي من عناها أحدٍ بها ياناس ماشاف الأوناس=واحدٍ بها كل الوناسه مشاها أحدٍ تعطيه انذار من كل الأجراس=واحدٍ ماسمع انذارها في فضاها أحدٍ بها مايبني العز من ساس=واحدٍ بها كل المعزه بناها أحدٍ بها له صفوة الدين نبراس=واحدٍ بها صار الجهل هو عماها أحدٍ بها من عادته كل نوماس=واحدٍ بها من طبع نفسه رداها أحدٍ بها كنه كما الطير قرناس=واحدٍ بها يمكن يجي هو عشاها هذي هي الدنيا على كل مقياس=أحدٍ تطيعه واحدٍ ترفع عصاها دنياً تقلَّب كنَّها الداب ياناس=أزريت انا اعرف مرَّها من حلاها

نايف الشويب