.. الدغيرات .. لولد العم الشاعر/ نهير بن نمش الحسيني

طبعا هذه من الأرشيف له يمكن ١١سنه



(الدغيرات)

ياصاحبي خذها على كيف ماجات=اما تجي بالزين والا بلاها
لاترخص الخطوه بدل كم خطوات=بعض الخطاوي خاسر(ن)من مشاها
الكل بالله والمطاليب فزعات=والناس تعرف وش نهاية رضاها
ياحكمة الله للبشر كم غايات=ولحد(ن)يموت وقسمته ماكلاها
ادري واعرف ان المواقف صعيبات=بس الرجال رجال حزة لقاها
الطيب لاهل الطيب فطره وعادات=والا الردي ماحاش قمة وفاها
يامسندي ياطيب الذات هيهات=هذه حياتك وانت تعرف قداها
سلم على اللي كاسبن للوجاهات=اللي كسب للطيب بأول صباها
قرم(ن) تعود للكرم والطناخات=حاز المراجل والمكارم خذاها
يالابتي يالابتي يالدغيرات=يالابتي ياعز منهو نصاها
يلابتي يامطوعة كل عسرات=سقم الحريب اللي نواء وانتواها
أولاد علي(ن)لابتي كل حزات=وقت اللوازم تسعد اللي نخاها
أولاد علي(ن)فعلهم له دلالات=حي الضمير يقولها ماجفاها
سبع الجموع معدلت كل ميلات=سبع الجموع اللي ينومس نباها
اهل الكرم والجود ماهي تفاهات=اللابة اللي يستعز من لفاها
هم لابتي هم ظل راسي بالازمات=ربع(ن) على الطولات نبتت لحاها
ياعدة الافعال جبنا الثقيلات=حنا كعام الضد وحنا عماها
الله خلقنا للسعد والمروات=خوينا نوصله غاية مناها
وحنا لنا في قمة المجد صولات=قصيرنا من كل طيب نحساها
نمشي مع الطيب على كل قالات=والا الردي مانحب نمشي وراها
راع الجميله نذكره بالجميلات=وراع الرديه مانشيد برداها
والله ياوقت(ن) مضا ياحلولات=ياكم من نار(ن)وطينا لظاها
تاريخنا يحكي علوم(ن) قديمات=دخيلنا من كل ضيم نحماها
ويوم المناخ اللي مضاله روايات=نوخ لها مفتاح واعلن طناها
والذيب يوم انه عوى بالطويلات=ابن سعيد شيخنا مانساها
وضحت روس اقلام واحلى عبارات=للي سمع شعري وللي قراها
وانا حسيني وافتخر بالدغيرات=سبع الجموع اللي يشرف نباها
وصلوا على المختار باحلى صلاوات=اللي هدى للدين واحسن هداها

شعر

نهير بن نمش الحسيني