ديوان الشاعر الرأوي / فواز ابن غسلان

قال اخبرك بالزعل صدرك شمالي .. ..

	ويش اسوي في غزال سل حالي=يوم شاف حصونها ماهي منيعه وان بغيت اترك غرام البيض جالي=وقلت راع الصدق ماهذا صنيعه قال اخبرك بالزعل صدرك شمالي =تدمح الزلات لو كانـت شنيعه قلت تكرار الخـطـا ماله مجالي=دام ريضان الوفى عندك وسيعه والشمالي فيه ثقل وطول بالي=بس مايرضى طواريق الهـزيعه وش يجيب الميل لدروب العدالي=او ربيع الوصل ودهور القطيعه زلة اللي من شروك الحقد خالي=ندفنه وسط الضمير ولا نذيعه وننقل اثقال الرفيق ولا نبالي=وبالندى نلـقى لغلطاته ذريعه وحـبلنا ياصل بعـيـدات المدالي=ولا نجي راي العذول ولا نطيعه دامها صارت تحت غيظ وجدالي=فالخطا مسموح بأحكام الشريعه من وقع ماله بوسط الناس والي=تشتعل في ضامره حرب الوديعه يزبن اللي قدرهم بالكون عالي=والمراجل عـندهم صارت طبيعه في بلد حاتم صواريم الرجالي=وخيلهم بالكون دايم بالطليعه عندنا يلقى الـمعزه والجلالي=وقيمته وسط العرب تصبح رفيعه في جبال اهل الندى يلقى ظلالي=وندمح اغلاطه قبل يرسل شفيعه لين يصبح مثل ابوزيد الهلالي=وعن لواهيب الدهر يلقى ربيعه بس مقعاد الردى صعب المنالي=والخـطـا عند العرب غير الخديعه وادري انك في رفوف القلب غالي=بس محدن يشتري قلب يـبـيعه والله اني كنت في دنياي سالي=والوقوت بعيننا تمضي سريعه لين دارت صوبنا سود الليالي=وروحنا في ناركم طاحت صريعه وراح تسري من مرابعكم رحالي=وعن جميلات الحشى الجاير جميعه

ياللي خفوقي طامع في غرامك!!!

	ياللي خفوقي طامع في غرامك=يسري وراك بلوعة الوجد مدفوع يرجي سواليفك ولذة سلامك=وشوف العيون اللي بها الزين مجموع اسهر وعينك تهتني في منامك=واصبر وانا مالي مع الصبر منفوع يمكن قمر حبي ينور ظلامك=ونارك تولع لي مصابيح وشموع والفجر تظهر لي مضارب خيامك=وتصبح مواعيدك مثل حبة الكوع نوب تعذر في عزيمة عمامك=والا تقول انك من البرد موجوع وتظهر علامات الدلع في كلامك=ولا تكترث للي من الغيظ مفجوع ولا تحتمل قول العرب وش علامك=كن العتب بين المواليف ممنوع واليوم وقعنا قرار اتهامك=وحكمك غدى في صفحة الصدر مطبوع زادت معاذيرك وقل اهتمامك=وصار الهزل مع صدق الاقوال مشفوع خلك بكامل قيمتك واحترامك=ماعاد لي في باقي الدرب مطموع صارت برامجنا تخالف نظامك=وصعب نطارد تالي الليل جربوع مااريد زخات المطر من غمامك=لو مات في قلبي بساتين وزروع هذي مراسيل العهد بإستلامك=والله يعين اللي من العام مخدوع

عواد قلبي بين الاظلاع يومي!!!

	عواد قـلبـي تحـت الاظـلاع يـومي=من كثر مايكـتـم من الـغـبـن والضيـم يومـي بـي اومـاي الهواء بالهدومي=ويرجف لـمـا نـقرى عـلـيه الحواميم من هاجس يطرد عن الـعـين نـومي=ويسهر جفوني مـثـل سهر الـمفاطـيم كـلـه عـلـى فـرقـى جـميل الوشومي=راع العـيـون اللي مثـل ذايـر الـريـم بـيـنـي وبـيـن الزين سود الـحـزومي=ما عاد لي سجه وشوفه وتكليم مهالكٍ ظلعه ينوش الغيومي=مربـى الطـيور الـنـادرات الـصواريم ذيـبــه يـهــوم بـنــايـفــات الـرجــومي=واسمه مدون في سجل الـمـظـاليم يطرد خيوط الرزق قبل الجهومي=وان لاح فجره صار ضمن المغاريم يقـنـب الـيـا كـثـرت عليه الخـصـومي=ويرسل من غـبـون اللـــيـالــي تـرانـيم ماهـو عـلـى شـلق الفرايس جزومي=خـيـفــة بـواريـد الـعـيــال الـشـغامـيم قومٍ غضبها بالضماير يزومي=مذخورةٍ للذيب شيمه وتكريم مـثـلــي مـن الـلــي بـالـمحـبـه يلـومي=واللوم باسباب أخـتــلاف الـمـفاهيم والـعـشـق ذابوح الـعـيـال الـقـرومي=اللي يـفـكــون الـنـيـــاق الـمـجــاهـيـم في ساعة طير الـمـنـايــا تحـومي=لاجـل الـنـيـاق الـمـكـرمـات المراديم سمـحات الايدي واضحات الوسومي=طوال القوايم مبرمات العلاكيم تقدح عيونه بالخلا تقل لومي=تجمع فنون الزرفله والدراهيم تصهل وراها كل قبا قحومي=ومن طاح يكفيه الدعاء والتراحيم كلٍ معه شلفى ورمحٍ وشومي= والنصر من ربك حـظـوظ ومقاسيم في ساعة تكشف عيال الـرخــومي=عـنــد الحــرار الـلــي تـسـد المـلازيم وراع الهوى يسهر يعد الـنـجـومي=ينحاش عن هـرج الـقـفـى والهذاريم مثلي شكيـت من السهـر والـهـزومي=لا صـاحـيٍ جـفـنـي بلـيله ولا نـيم اتلي هواجيس الامل والحـلومي=واسري وانا دربي شـكـوك وتـواهـيم والنوم لعيون الشقى ما يدومي=حتى ولو غنى عليك المعازيم وان ضاق صدري بالـغـثـى والهـمومي=والكـبد شامت عن لذيـذ الـمطاعـيم رجيت لي قلبٍ شفوقٍ رحومي=بالطيب ما يدفع قروش وملاليم يذبح لضيفانه خطات الردومي=وطيبه مثل وبل المزون المرازيم قلبه لبيبان المراجل يهومي=ماداج وسط السوق غمزه وترقيم يفزع لمن زادت عليه الرسومي=وشروطهم فيها حلالٍ وتحريم للي غدى رمشه ذبوح ظلومي=سـم الحشى في نـظـرة الـعـين تـسمـيم الـعين عـيـن الـفـرس والجـسـم رومي=ماجاه بأسواق الدعاره جراثيم ولا فاح ريحه بالنسانيس ثومي=ولاجله غدى ياخذ عطور البلاعيم حط الحشى بالسوق للي يسومي=واصدر على سـجـني صكـوك ومراسيم واشـعل بكـبـدي يـابـسـات الجــرومي=من يوم خـالـف بـي جـمـيـع التـعاليم واصبحت للي بالضماير كتومي=عن واحد يركض وراء السين والجيم وانحاش عن لـفح الـهـواء والسمـومي=فـي راس مـزمـوم قـريــب من الـغـيـم انـظــم بـقــيــفـــانــي جـمـيــع الـعــلـومي=واشكي طواعين الهوى دون تـعـتـيم وان الـسـبـايــب زاهــيــات الكـمـومي=الـلــي هـواهـا بـس ركـعــه وتـسـلــيــم واليوم جـسـمـي طـايـحٍ مايـقـومي=ولا ينفعه في ورشة العمر تـرمـيم سلواي بالـجـيـب الـجـديـد الـعـمومي=مـن مصـنــعٍ ما رهم البدي تـرهـيم زوله على موج الصحاري يـعـومي=تـدفـــع مـواخــيـــره عــزوم الـمــقـاديم راعيه عـن درب الـــمــذلـه يـشـومي=عـنــده عـلــى الـشــدات قـوه وتصـميـم واللي على سيته قـوي الـــعـزومي=حـطـم رقـوم اهل المسافات تـحطـيم كنه شجاعٍ من شيوخ البقومي=أو دوسريٍ من عيال المخاريم تسعه خـلـيـجـي فـي ثـلاث الـرقـومي=مـاصـار بـــه دقـــشـه ولا جــاه تـكــتــيم عـدى الجـمـارك بـالـورق والـخـتـومي=واليا مشى حسه مـثـل هـامل الديم ماراح عمره بالدوام الحكومي=ينقل خطابات العمل والتعاميم للخافق الضايق يـســـد الـلـــزومـي=وينحاه عن ناسٍ تـمــد الخـراطـيم

قال فواز الغسلان !!!

	عواد هاك القلم وإكتب على كيفك=وانظم حروفك ترى الاخلاق خربانه مادمت هادي قبل تقبس عواصيفك=وتشلع مزاجي وتقفل كل بيبانه النفس ما تحتمل كثرة عجاريفك=وجسمي يعاني مقصاته وعمدانه ترى مبارك قريب من طواريفك=وان صحت له يامبارك ثار شيطانه وان ثار للمعركه ثارت صواديفك=تفاق مايخطي المقرود نيشانه او هات الامثال من عالي مشاريفك=لك ريشة يضبط اللوحات فنانه نبي القواعد على نحوك وتصريفك=وارفع ولا تكسر اللي حاز سلطانه ويقنع هل الذوق والنقاد تهديفك=وروعة بلوت الهوى الجاير وكنكانه ونعرض على لجنة الحكام تكليفك=في رابطة مجلس الفيفا وعنوانه واذا بغت لجنة التصويت تعريفك=قاف السناعيس شاع بكل بلدانه ويضمن فريق الهوى جملة مصاريفك=وتذاكر اهل الهوى الظالم ومسكانه وساعة حضورك على النادي وتشريفك =اكشف مهارة ولد شمر بميدانه ولا تتبع اللي يبي صدك وتخويفك =من شان تترك قوافينا وديوانه واللي حداني على شدة قفاقيفك=عن باقي الناس مع روضه وبستانه فرقى وليفي مثل فرقى مواليفك=وقيفان شعري مثل شعرك وقيفانه واوصاف حالي تطابق نفس توصيفك=ونيران قلبي مثل قلبك ونيرانه وسموم صيفي تشادي بالغثى صيفك=وطغيان خلي مثل خلك وطغيانه اسرع وخل الهوى يدفع مجاديفك =وسفن البحر ماينام الليل قبطانه والا طلبنا من السلطات توقيفك=وصعب اتنازل وانا الاخلاق خربانه

قال عواد العلي !!!

	ياكبرها منك يافواز ياحيفك=ماهي عوايدك تدخل حرب خسرانه للبرد نزله سببها خف تلحيفك =تأثيرها بان وألأخلاق بردانه شبيت نارك بزندك والحطب ليفك=أصبر على مطرقة شعري وسندانه تسخر من أعظم لغه من ضعف تثقيفك=(وااا نحوااه ممنوع من الصرف غسلانه) لو ينفتح باب توبيخك وتعنيفك=هامو بك فلان وفلانان وفلانه ابذكر اللي ذكرته واسمه يخيفك=خوف أحترام ومهابة نار بركانه يامبارك اليوم يومك والفخر سيفك=حطه بحبس انفرادي وسط زنزانه الامر يرجع لتوجيهك وتصريفك=العلم ماهو مزارق طيب وميانه مضمون قدره يبذنه مغاريفك=من نادرات الدرر وحكاك مرجانه

قال مبارك التبيناوي !!!

	إربط حزام الأمان بحكم تكتيفك= الله عويني على الظالم وديانه لعل عواد يغضي عن تصانيفك =وإلا ليا ثار ماينهاط بركانه فاصل عسى فصلت تقراء على جيفك= واصل عسى الله يوصلنا لرضوانه وصل وفصل وفن إلقى وتوظيفك=مع جوهر المفرده تلميع وصيانه أمجاد الأجداد تضبطها سواليفك=تدخل عليها شعار المجد والدانه أبزع ولا أسمع هل الغيبه لتحذيفك= قولت (عشيرك) تهز القلب وأركانه عليك بالصدق لا كثر تحاسيفك =والكذب مهنة عيال إبليس وأقرانه مره قصيدك خيال وصعب تطويفك=ومره تطوفك غلى شمر وشيهانه ومراة لو مر مع طيف الكرى طيفك=أقول فواز مابه غدر وخيانه وتدخلني الشك ياكثرت محاليفك =وأنا ليا قلت والله جاك برهانه بياض قلبي مثل قلبك وتصنيفك = عذروبي اللي لقاه النذل وأعوانه حظي برئ ماشكأ ضيم الدهر ضيفك=وحالك هي الحال يفرق زود نقصانه (الجلغفه)(وإلفقه)(والنحو) تغليفك= والقلب مشغول في دنياه وأشجانه عواد مثلي ترك عزفك وتوليفك= سلس العسل لو تكرر ماله الخانه مرزف ورجف القوافي عن سراجيفك = بالثانيه تشتكي خلك وهجرانه مشفوح شفحه ولا تركد شواحيفك = دور العمر قبل جدي حد وعيانه زغرد وشوبش وخطرف في غطاريفك=إستثقلت بالسحاب وهل هتانه عواد يرفع على ضغطك وتلطيفك= طبيب به طيب قلب وعالي(ن) شأنه يخشى من العين لا تذبح مخاشيفك = أهل الحسد والقلوب السود عميانه واللي حداني على قافك مواقيفك=موقف له أيام عز وطيب وإميانه إن كان له متسع في قاعة إرشيفك = ياما عيال ولدك يقرون عنوانه

تجمع اظلاع الخلايق مع محيطه!!!

	السعاده للبشر دايم بسيطه=ولا لنا عن سنة الدنيا مناطي تنعشك في غرشة العطر وعطيطه=وتجرحك جرح صوابه مايهاطي والمصايب تسجن العمر وتحيطه=ولا يفك حصارها كثر العياطي ولو تعيد احداث الايام وشريطه=وتفصل ايام الضحيه عن شباطي راح تظهر لك من الواقع خريطه=قبل وقت الزير وعصور العلاطي تجمع اظلاع الخلايق مع محيطه=وتقسمه بين المداين والشواطي اوله طفل يغثك في قريطه=فوق عشر اعوام يلعب بالقواطي ومثل ذلك شايب تسمع نحيطه=تمضي اوقاته على العالم يطاطي وزهرته تجمع من الدنيا خليطه=بين طاروق الرفاعه والهباطي ونصفها مهدور لو مابه غبيطه=لابغيت حساب كيفي وانبساطي نخصم اوجاع الحياة المستشيطه=مع وقوت النوم في حارة غطاطي ولو دخلت السجن والدار الغويطه=واشتكيت العجز وغياب النشاطي وجلستك طفران واحوالك رطيطه=ضايق يقطاك دون البيت قاطي طفلتك ترجي فساتينه تخيطه=وزوجتك تزهم تبي عدة شناطي تستدير بشارع السوق وتميطه=والحشى ينجش على جمر الأراطي وبنشر الموتر على خط اللقيطه=وعدتك ماغير منقاش ومخاطي حالةٍ تقطع بوسط الجوف نيطه=وتودعك في ملعب العمر احتياطي ماتجي تحت النخل تاكل سقيطه=بين مجرى النبع وانواع اللقاطي والخلاصه عمرنا لو طال خيطه=مع طواعين الحشى صار متواطي لا تطيع اهل السواليف السليطه=وتهدره بين السخافه والغلاطي

حبال الردى والبوق صادت عراقيبي !!!

	حبال الردى والبوق صادت عراقيبي=وشفنا طبوع ماحسبنا حسايبها انا لو دفعت الرجل صوب المخاضيبي=تريحت من بعض النفوس ومعايبها ولولاه ماعديت روس المراقيبي=ولا سقت روحي ضايق في جنايبها رجوم العنى تطفي جحيم اللواهيبي=واباعد بروحي عن شماتة قرايبها وانا كان ضاعت بالخلايق تجاريبي=على غلطة بالعمر سقنا ضرايبها انا غافل والناس ماتعلم الغيبي=ونجهل طواعين الليال وحرايبها وكل الخلايق له طبوع وتراكيبي=ومحدن كشف نية شبابه وشايبها تعيش البشر مثل النعام المهاريبي=وخوف الخطيه يجدعك في مصايبها وانا عقب ماصارت فياضي مجاديبي=ولا لاح للعربان بارق سحايبها والاذواد غابت يوم جفت مشاريبي=وجيراننا بالريف شدت ركايبها تذكرت رجوى المشلحيه هل الطيبي=وشكوى المهونه يوم شابت ذوايبها أيا غيبة ابن هذيل ياغيبة الذيبي=ولا كل غياب العرب مثل غايبها وانا طحت باللي ماتعرف المواجيبي=وتذرى وعايدهم ذواري هبايبها وانا كنت اعاهد دون عقد ومكاتيبي=ولا اخاف بوقات النفوس ونكايبها والاقوال شيكات الرجال المعاطيبي=بحزة مشارق شمسها مع مغايبها وهو منهج اللي تكره النقص والعيبي=ولا تختلف لا ذاق رغوة حلايبها لما شفت بعهود الخلايق شواذيبي=وشفنا على قبر المبادي نصايبها ودلا يدور الهرج مثل الدواليبي=وقوم الردى تلقى الردى في جلايبها وانا يوم شفت نجوم ليلي مغاريبي=ونصف العرب سارت علينا كتايبها نخيت الرفاقه لاجل تطلق مقاضيبي=قبل تنتشر عدوى الهموم وشوايبها وراع الفزع دلا يعدد عذاريبي=وهي عذر مهتول الخلايق وخايبها وصاروا رفاقات الفراغه قصاصيبي=وريح النذاله في وصاخة حقايبها ثمانين والصافي ثلاثة مناجيبي =من اللي تعينك بالوقوت ونوايبها مدام الرفاقه له رماح وكلاليبي=تشيل المطامع ثم تكثر طلايبها ونار المعيبه للذي طاح بالعيبي=وراع الخديعه راح يلقى عقايبها

حبال الردى والبوق صادت عراقيبي !!!

	لا واهني الطـيـر فوق الغيم خفاق الجناح=ماضاق في دور ظلامه مثل ظلمة دورنا لا ضاق مايقعد بنار الغيظ لحدود الصباح=يكفخ ولا يحتاج بسبـور مثـل بسبورنا ولايرتجي لأجل العمل فترة اجازات وسماح=او يشتكي حبسه بسور مثل حـبسة سورنا يسري يطارد بارق من بعد نصف الليل لاح=قبل الصلاة وقبل ترجس بالدنين نجورنا يلفح بجنحانه لغيث في دماث القاع طاح=مابات بهمومه بجحـر مثل ضيق جـحـورنا يابوهلا يالذيب ضاق الصدر لا زل المزاح=هذي شهور القيظ جتنا عقب خـمس شهورنا حنا تبعنا ياعضيدي هجرة طيور الفلاح=يمكن نشوف اللي على الهجره يحد طيورنا معقول ناحت لاجل محبوب من الهجران ناح=او شوقها للقصر يشبه شوقنا لقصورنا وان كنت ياطير السعد تشكي طواعين وجراح=فالجرح ياطير السعد يسكن بوسط صدورنا وش عاد لو قالوا عصور العولمه والانفتاح=ماننفتح قبل انفتاح البحث حول قبورنا لو كان مقبور العرب من لوعة الوقت استراح=من جرحنا اللي مابداه الطيب مع دكتورنا مايصلحه تصريح قايد مع دراسه واقتراح=دام الكلام الواقعي ماعاد في مقدورنا قل ماتقول بكل وصف وكل لهجه واصطلاح =دام البلد والشعب للحكام في دستورنا راحت دعايات العساكر والامانه والكفاح=وصارت سبب ذل الشعوب وشرنا وشرورنا وش عاد لو تسري ركايبنا مع الدرب البياح =وظهورنا ماتختلف بالوصف عن مظهورنا كان العرب ماعندها للخصم ترسانة سلاح=وشفناه يظهر لاجل يقصف بالدجى جمهورنا مدري علامه صامت واعراض الامه تستباح=والا القذايف ماتثور الا على ديكورنا تشبه سلاح اللي سرق روحي برمشه ثم راح=اقفى ولا راعى قبل يرحل لجرح شعورنا اللي رمى قلبي بناره عقب مازاح الوشاح=واحرق بنظرات الحلا والزين روض زهورنا حبه رماني في معاليق الحشى عدة رماح=ماجيت دربه بس حظي حطها بنحورنا ليتي تركت الدرب عنها يوم شفت العطر فاح=مادام عطر الزين عيـا يندمج بعطورنا

الا وين المنام اللي هجرني من شهر شوال !!!

	الا وين المنام اللي هجرني من شهر شوال=لاجل يرتاح جفن اللي عيونه ماتنام الليل لعل النوم يكفيني هواجيس تغث البال=ويطرد هاجس لاداج بالخاطر يجيب الويل تقول الناس كثر الهجس لابواب المرض مرسال=وبرق المزن مرسال الخلايق والعرب بالسيل اشوف طعوننا زالت وجرحه بالحشى مازال=ولاتظهر جروح الروح تحت الفحص والتحليل واذا نوم الضحى ضيعه كلاليب السهر غربال=على اللي مالت دروبه وطبعه مايحب الميل قشوش الثقل لامالت تعوق الزمل والزمال=ولاينعاق حيل الزمل كان انك عدلت الشيل وانا مااريد جلسات يعقبن وسطها الفنجال=ولايرضاه من تفني مضايفهم خياش الهيل ولاآغازل قروش اللي يشوفك ماتجيب ريال=واحارب عيشة اللي عاش بالذله ونقص الكيل وجوعك بالخلاء تقنب قنيب الذيب فوق الجال=بقاعٍ قيظها يحرق معاليق الحشى بالحيل اذا جتها ركاب القوم تطلع من جفاه هزال=ولاتقوى على جفوة مظاميها عزوم الخيل ولا الميقاف عند اللي على بابه ثلاث اقفال=ولو قالوا تبي تملك من الدنيا نهور النيل واذا قلت السبب قسوة ظروفك فالهبال هبال=اخبر الهون مايمحاه كثر الشتم والترزيل واخبر العهد يصدق بهرج جديع ابن هذال=فلا ترجي وعود الصدق في هرجة طويل الذيل اشوف اجيالنا صارت طبوعه بالحياة اشكال=علامه تنحدر صوب المهونه كل جيل وجيل اخاف المرجله شدت ركابه تنوي الترحال=وتترك لابة نالت فخرها قبل عام الفيل عقب حاتم وزيد الخيل واجيال وراه اجيال=رجال في ظلام الليل توضي مثل نجم سهيل واشوف خصالنا ضاعت وجانا من وراه خصال=وخلتنا مع العالم محل النقد والتفشيل ولاادري هل تأثرنا بطبع الهند والنيبال=مع ان اطباعهم عجزت تغير قادة التاميل او ان عيالنا تتبع مشاهد سيد الشغال=وحنا مثلهم نضبط هروج الفلم والتمثيل غشانا الكذب والحيله وهانت شغلة المحتال=وصغنا في عروض الناس باب الجرح والتعديل وشفنا الظلم والغيبه اليا سولف ردي الخال=ولا يلقى الذي يمنع هروج مالها تعليل تقول القوم مافيها من اهل المعرفه عقال=تكافح غيبة المسلم بكثر الحمد والتهليل نعيب اللي معايبنا كثر عيبه ثلاث ادبال=عيوب شافها المكفوف بعيونه بلا دربيل او ان الناس ماعادت تكيل وتضبط المكيال=او ان عيوبنا ماهي وكاد وتقبل التأويل اذا صدنا الخبر صرنا محطة بث واستقبال=بجلسات الدجى حزة وقوت اللعب والتعسيل يعيب الضايق الحافي هبيل ماعليه نعال=ويشذب قاري القران ثور يجهل الترتيل نجيد الهرج والقالات بالفرغه بدون افعال=تقول الله جعل معنا على حكم البشر توكيل مدام الوضع مالك فيه لا مخرج ولا مدخال=تبي تلقى الكلام اللي يسدك دون قال وقيل واذا مابان لك مدخل عليك بشاشة الجوال=تحول في خياراته وترجع تنهي التحويل تراه اسلم بشرع الله وثقلك لايزيد اثقال=وخلك عن عيوب الخلق مثل محمد المنديل خذينا الطيب والقيمه بسيرة طيبين الفال=ولا نلنا مفاخرها بكثر الهرج والتطبيل خذوها اللي عزايمهم بوقفات الرجال رجال=ويوفون العهد بالطيب والشيمه بلا تكفيل سرينا مع سباع الجوف بخصال الكرام اميال=ونلنا مثل مانالوا من التكريم والتبجيل نسابق بالفخر سربة شيوخ في سفوح قيال=وبالدومه رجاجيل غذاه الشايب الحلحيل واخاف طبوعنا ترحل ويبقى صيتها تمثال=ويصبح شغلنا الباقي مهمة خدمة التوصيل واخبر السبع بالغابه يخلف بالعرين اشبال=ولا تدخل هروج الشهم باب الطبخ والتخليل واذا ماصار لعقود الشهامه والندى حلال=وخلا القوم برنامج هل العزه بلا تحميل نبي نسمع قصيد النقد والشرهه لابن محوال=ولانقوى نرد اللي يقوله بالعرب جهويل

وافهق على العلباء طوارف عقالي!!!

	بشت الغناة اللي رماني بالانشاب=عسى خيوطه للتلف والزوالي يامن يقدم لي مواكيل وثياب=ويستاهل البشت المطرز بدالي اوذى بأبوماضي ومرضي وغلاب=يضرب على روس العرب ما يبالي يودع ربوعك تنتظر عند الابواب=هذا يبي عونه وهذا كفالي وان قلت ماعندي يقولون كذاب=هذي بعيده يا اديب الشمالي والبخل بأمثالك مع الناس ينعاب=وينقض كلامك بالوقوت الخوالي وغديت طير دون مخلب ولا ناب=ياعل مايجري لك اللي جرالي وشلون اعين اهل المصايب والاتعاب=وانا عجزت اكمل حوايج عيالي واللي سمع بعض المدايح والاعجاب=ظن البنوك اللي بلندن حلالي والحمد لله بين مسجد ومحراب=ومنزالنا عند الرجاجيل عالي واحوال خلق الله بها سلب وايجاب=والميل يفرق عن دروب العدالي وماني جفول لا حصل حزم ****=وماني من اللي يعتريه الجفالي دام الشدايد بالعرب لعب طرناب=واهل الفزايع له دروب ومجالي بس البلى من علة ماله اطباب=وبير السعاده ما تطوله حبالي والرزق ماياتي بتفتيل الاشناب=وماهو لراع الحيل والاحتيالي وربي جعل للمال غارات واسباب=وقبله وبعده حكم رب الجلالي وانا حياتي فاتها وقت الانجاب=وشموس عمري قاربت للزوالي وما نرتضي بوق وخيانات واذناب=وكذب ونفاق ومهزله واغتيالي وما صار لي في غرفة القوم سنجاب=يجمع ريالات العرب مع ريالي ولا كنت امير وخزنتي وسط دولاب=والا رئيس المجلس الانتقالي ولا نلت ميراثي عمارات واطناب=ولا صرت بالترشيح صاحب معالي ولا صرت شيخ ولي كرامات وألقاب=من حزب شيخان الردى والضلالي ولا ني على الشاشه وسيم وجذاب=ولا لاعب بصفوف ناد الهلالي ولا مطرب في ليلة العرس ينجاب=ويقعد على روس الخلايق يلالي ولا عشت بالذله ولا كنت نصاب=ولاصار لي حفله نهار اعتزالي ولا قمت اعالج بالقراوي والاعشاب=وعلاجنا يبري ضعيف الرجالي وما ناسبن شيخ ملك عدة اسراب=ونادوا عياله بيننا ياخوالي لو هو على المسيار مع سود الاهداب=متعه ولاجل الشيخ فيها مقالي والا على المقناص مع تلع الارقاب=في خيمة تنصب بوسط المفالي مقدار ماينثر بها سمة الداب=وجازت قياساً بالخدم والموالي ولا لي كتاب بالقبايل والانساب=وآخذ على التثبيت شي خيالي ولا لي قتيل وزارني روس الاعراب=وطلبت ما يتعب ظهور الجمالي وماني معارض في محطات الاجناب=وادعي جيوش الغرب والاحتلالي واسعى ورى الفتنه وتأليب الاحزاب=ونار العدى والتفرقه والجدالي وهذي دروب المال مع حصن الاطلاب=وكله مضت ياهيه ياهملالي كل الذي عندي تواريخ وآداب=وخزي العروبه بالسنين التوالي ولو عندنا ثروه ظهر موس الانياب=واعطيك قانون الجميع ارتجالي وألبس مثاني غترتي دون مرزاب=وافهق على العلباء طوارف عقالي