هجينيات بين عمرالفضلي ومحمد الذرفي

السلام عليكم ورحمة الله وبركاته


هذي هجينيه أسندتها للعم الشاعر / محمد الذرفي

أما أنت هيجن ليا هيجنت=وإلا أنت عن فاطري حول

أقول

أكتب قصيده أبي أرتاح=لاضاق صدري أغنيها
جودي على فركت المسباح=والعين تشفق لغاليها
من يوصل العلم له ياصاح=إن كان حالي جهل فيها
قله ترا ماني إبمرتاح=والنار بالقلب صاليها
ياليت عيني تشوف أشباح=ولا هنوف(ن) تمنيها
مجنون ليلى زمانه راح=واليوم هايم بواديها
أثر الهوى بالزمن سفاح=لاصاب قلوب(ن) رثع فيها
غنية أبياتي وسدي باح=وبـانـت علوم(ن) مخفيها
أكتب قصيده أبي أرتاح=ليت أبو سند يجاريها

وهذا رد محمد الذرفي

ياعمر وأنا معك منصاح=لو تطلب الروح لهديها
لاتشكي جرحك على الجراح=علتك محدن يداويها
إلا أبو نهود(ن) كما التفاح=هذاك ينعشك طاريها
يابن عطر الحبيب وفاح=مواجع الروح يبريها
أسأل مجرب زمانه راح=مواجعه كان يخفيها
ياما ركض بالطريق وطاح=والعين نومه مجافيها
ماعمر برق الأمل له لاح=لاشك مازال يرجيها
أهله علي ياصديق إشحاح=الله يزين تواليها

وبعد أن وصلني رد العم محمد الذرفي على قصيدتي
تقلبت مواجعي وقمت بالرد بهذه الأبيات

أقول

عرضت جروحي على شراح=ثم قام بالموس يدميها
قد شب نار(ن) بلا قداح=وأنا أحسبه جاء يطفيها
أخذت علم(ن) مهوب إمزاح=وأنا اللكاعه ما أدانيها
عن النخل إنشد الفلاح=كود الثمر من سواقيها
مير النخل حاجته لقاح=من شان يثمر بحاليها
ولافيه نور(ن) بلا مصباح=ظلمتك يالليل يضويها
ولافيه قفل(ن) بلا مفتاح=وخزن الذهب عند واليها
لو ماشكيت العنا يا بداح=للي كحلها ويعميها

وقد رد العم محمد الذرفي للمره الثانيه بهذه القصيده

ترفيه حرب(ن) بليا السلاح=قوم العرب بدعت فيها
أزعلتني يارفيق ابدااح=مدري بعد وين تنهيها
موج البحر يغرق السباح=ياعمر جنب بلاويها
الطير حمله على الجناح=ياضاقت القاع يطويها
وحول النهر يفرس التمساح=والذيب رجله يعنيها
يمرح ردي النصيب امرااح=يصبح رعيته مفنيها
ياعمر تبقى النويا اصحاح=مابه لكاعة مسويها
نصايح(ن) ماعليها ارباح=كان العرب قبل تشريها

وسلامتكم جميعاً

صح بدنك يالشاعر ماجد بن مطر

أشكرك على هذا الإطراء

أسعدني تشريفك المتصفح

تحياتي

الشاعر / عمر الفضلي صح لسانك
وصح لسان الشاعر / محمد الذرفي ( لاهنتوا جميعاً)
تسلمون على هالإبداع الغير مستغرب عليكم
الله يعطيكم العافية ويسعدكم جميع
لكم أطيب التحايا والتقدير،،،

صحت السنتكم ملايين والله شعراء مبدعين

ياسلام وياسلام عليكم ابدعتو وامتعتو

صوت وصدى وصوت وصدى روعه

كل الشكر لكم ياعمر انت ومحمد

لاهنتو يالغالين وتراني منت ونسقت

الهجينيات ودمتو بخير

اقتباس المشاركة الأصلية كتبت بواسطة ابو كادي الشاعر / عمر الفضلي صح لسانك وصح لسان الشاعر / محمد الذرفي ( لاهنتوا جميعاً) تسلمون على هالإبداع الغير مستغرب عليكم الله يعطيكم العافية ويسعدكم جميع لكم أطيب التحايا والتقدير،،،

صح بدنك أخوي ابو كادي

الله يسلمك من الشر ويعافيك ويخليك لعين ترجيك

لك الإحترام والتقدير

اقتباس المشاركة الأصلية كتبت بواسطة نهير النمش صحت السنتكم ملايين والله شعراء مبدعين ياسلام وياسلام عليكم ابدعتو وامتعتو صوت وصدى وصوت وصدى روعه كل الشكر لكم ياعمر انت ومحمد لاهنتو يالغالين وتراني منت ونسقت الهجينيات ودمتو بخير

صح بدنك يا عمي

أشكر على هذا الإطراء والتنسيق

خذ راحتك يالغالي أنا ضيف في حكم المعازيب

والتنسيق جميل بس ليتك مميز قصايد أبو سند بلون وقصائدي بلون للتوضيح :)

إحترامي وتقديري لك يا أبو نمش

عمر الفضلي صح السانك ملايييييييييين وصح السان عمك الشاعر محمد الذرفي

الشعراء القديرين

الشاعر عمر الفضلي

و

الشاعر محمد الذرفي

حقيقتاً مبدعين وأمتعتوا جمهوركم الذي يترقب مثل هذه القصائد وغيرها من شعراء عضام ومن العيار الثقيل
أسعدني ماقدمتوه لنا هنا وماتقدمونهُ لشبكتكم شبكة نشامى شمر التي تفتخر بكم وبشعركم

صح السنكم شعرائنا الأفاضل

تقديري لسمو شخصكم الكريم ؛؛؛

صح السنكم يالشعار

لاهنتوا الجميع مااجمل هالهجينيات
ولايهمك ياعمر بدينا بهن نهيجن بعد حيي

احترام لكم الجميع

وعليكم السلام ورحمة الله وبركاته
الشاعر القدير عمر الفضلي صح السانك ملايييييييييين وصح السان عمك الشاعر محمد الذرفي
ولاهنتو جميعاً على هالمجارات الجميله