وكر الكرم من جارها ما يضاما

ضلعان حايل مدهلٍ للنشاما=وتلاع حايل مرتعٍ للغنادير
من مر بالديره غدى مستهاما=بطباع اهل ذيك الوجيه المسافير
ما يقدر فراقه ولو عِشِر عاما=لا فارقه دِقت بقلبه مسامير
عاشرت به ناسٍ عزازٍ كراما=لهم بقلبي كل حبٍ وتقدير
شربوا بها كاس الوفا والغراما=ومسطرين من اجله الحب تسطير
عيدت معهم عيد شهر الصياما=يا علهم باعيادهم دوم في خير
لقيتهم بانين شقح الخياما=في وسطها صفر الدلال المباهير
شمال حايل بين سمر الحزاما= شرقي اجا في روض كله نواوير
يفوح به ريح النفل والخزاما=يسعد به الماشي ويطرب به الطير
وشارك فرحنا عزف وبل الغماما=في ديرة اهل الخير رحّب بنا الخير
ومر به المعبود رب الاناما=ربِّ جعل حايل تميَّز عن الغير
حايل ولو سافرت شرقٍ وشاما=تفرق على غيره بكل المعايير
وكر الكرم من جارها ما يضاما=للمنتخي جنه وللمعتدي كير
من زارها يسعد بطيب المقاما=يشم ورد الحير من جاور الحير
بالخاتمه مني لحايل سلاما=سلامٍ احلى من حليب المغاتير