عبدالله بن طلال وفايح شداد

السلام عليكم

وارجو المعذره اذا كان مكان المحاوره ليس في القسم المناسب من المنتدى .. والقرار لكم بنقلها

محاوره مباشرة بين عبدالله بن طلال وفايح شداد

عبدالله

سلام والمسلم على السنّه ومبداه السـلام = واللي من الشعّار ودّه يمسك المايك يقـوم
نبا نسوق القاف بالمعنى على صفحة سنام = وناخذ ونعطي بالكلام ولا نبيّـح بالعلـوم

فايح

يامرحبا بالشاعر اللي جاء على حسب النظام = لو كان غير في النوايا البيض وإطبوع السلوم
عبدالله الروقي يحسب انه يجمل فـي المقـام = ترى الحقيقـه مايـرد العلـم قـدام القـروم

عبدالله

ما انته بأخو عنتر ولد شداد يالقرم الهمام = لكن فيك اطبوع من عنتر ليا شن الهجوم
ترى المعاني كلها يا صاحبي فوق الحزام = ماينضرب تحت الحزام الا الهلايم والرخوم

فايح

ترى الليال البيض معروفه من الليال الجهام = وانصحك ياطير النهار اليا بغيت تحوم حوم
مابغاك ياعبدالله الروقي تدور فـي الظـلام = اطلع معي قدام وابشر بالسعد عندي وروم

عبدالله

الوقت يافايح تغيّر والسماء وسطه عسام = حتى البواخر فالبحر يا صاحبي عيّت تعوم
البشت والشنطه مع الرجال مافيها كلام = والمشكله كان انها وصلت ليا فرك الخشوم

فايح

الوقـت لابـد يتغيـر مــار لله الــدوام = ليه الرجال اللي تغير في الفعول وفي الهدوم؟
قلي وش اللي صار هاك اليوم قـدام الكـرام = حتى اني ارضى عنك يارجال واقول محشوم

عبدالله

ما صار غير الطبخه اللي لا حلال ولاحرام = وكر الحرار اشوف فيه غراب مدري فرخ بوم
والمشكله لا جيت اقايسها على سعر الدرام = اشوف نفسي صايرن مظلوم جداً وإمهضوم

فايح

الظاهر انك لو تحوش من الغرام احلى الغرام = وإذا استرحت من التعب ياصاحبي لازم تقوم
دكتورك اللي ينصحك اياك عرشـك للعظـام = وانته ماتشبع من عظام ظبا الديار ولا اللحوم

عبدالله

مادام للعساف بشت وللبشر قلّ احترام = اموالنا ضاعت وحنّا لا نبيع ولا نسوم
وضّحتها لك يالعصيمي جعلها برد وسلام = واختامها عندك وانا يالقرم وفيت اللزوم

فايح

مدامك تضيف يابو طلال ضيفك ماتـلام = يمنا ً نديه ماعليها لو صاحبها محـروم
انا التمس معناك يارجال والمسك بكـلام = ياجعلها في قلوب خلق الله ياعبدالله تدوم

الشاعر الفاضل عبدالله بن طلال
صح السنكم يابعد حيي
ودي لك وتقديري

شعراء فطالحله تسلمون والله امتعتونا بهذه المحاورة الراقية
صح السنكم حتى ترضون
تحياتي لكم

الجزل عبدالله طلال

الف صح لسانك ولسان فايح شداد شعراء رائعين
الف شكر على المحاوره الرائعه الله يعطيكم العافيه

تقبل تحياتي استاذي

الشاعر عبدالله بن طلال
صح لسانك على هذه المحاوره الجميله
وصح لسان الشاعر فايح
دمتم بخير

اقتباس المشاركة الأصلية كتبت بواسطة الشيخ منحاش الشاعر الفاضل عبدالله بن طلال صح السنكم يابعد حيي ودي لك وتقديري

الشيخ منحاش

اول شيء اسجل اعجابي بإسمك :)

ومشكور يالقرم على الحظور الوافي .. والظاهر انا وطلاع الزميلي ماحنا سامحين لك تنحاش ونبغى نستدعيك في محاوره اخويه هههههه وعسى الله يخارجنا منك لاتفتري علينا بس لأننا لازلنا تلاميذ
في المحاورات خخخخخ

تحياتي لك ولاهنت ابد

شاعرنا القدير عبدالله بن طلال
ابوطلال
صح السانك والسان الشاعر الفاضل فايح بن شداد الف
لاهنت استاذي على اتحافنا بهذه المحاورة الراقيه
خالص التحايا لسمو شخصك النبيل

الشاعرالجزل القدير صاحب الخلق والادب
عبدالله طلال

الف صح لسانك ولسان فايح شداد شعراء رائعين مبدعين
كفيتو وفيتوومتعتونا من جد الله لايشده بالكم
لله دركما يالغالي
هذا شيخنا منحاش غالينا وصاحبنا المحبوب وصاحب الردود المميزه والخق الحسن كثر الله من امثاله
والله دره
لك كل التقدير
حفظك الله بحفظه