القلب ياوصل العتيبي يفوعي

(واقلبي اللي من مكانه يزوعي)

وآقلبي اللي من مكانه يزوعي=خطراً مطيره لو ماله احمايه
محتار من وقتاً اسهومه تروعي=وقت المظاهر والفتن والدعايه
وقتن يمشيني علي غير طوعي=يرسل افزوعه لان يبحث خفايه
سيفه على كل الموارد بتوعي=حاولت اقاوم واثر ماله انهايه
قلب العنا من شوف عيني جزوعي=تكفخ اهمومه كل ماهب حايه
عصر الثلوث وصبح يوم الربوعي=محدن كشفني وين ياصل مدايه
ابطي مع الهوجاس باول اسبوعي=واخر اسبوعي فيه يقرب مسايه
تطري اهمومي والاوادم اهجوعي=همي موصيها عليه اوصايه
قضيت نومي بين كفي وكوعي=وخذت من كل الهموم الكفايه
صديت عن مجلس خباث الطبوعي=اهل النميمه موصلين الحكايه
قفلت عن مجلس للغاهم اسموعي=وقدمت عن ممشاء اخطاهم اخطايه
سدي دفنته خلف حدب الضلوعي=وطويت عن بعض الموارد ارشايه

الشاعر وصل الله العالي العتيبي

((مــجـاراة عيدبن بجاد العتيبي للشاعر وصل الله العالي العتيبي))
(القلب ياوصل العتيبي يفوعي)

القلب ياوصل العتيبي يفوعي=فوع العديم اللي سمع له حدايه
حدايةٍ ينخابها كل دوعي=وغرايبٍ ترهق مذيع الوشايه
شبت شبايبها بروس الشموعي=ومدور الغرات عاف الجبايه
هواجسك ياوصل سبة طلوعي=وقصايدك ياوصل سبة عنايه
ياوصل فرعك واحد من فروعي=وعصاء يمينك باللوازم عصايه
وان كان لي مدخال مديت بوعي=والمال قبل الجاه سقته ودايه
انا تراني بالعتيبي جزوعي=وعزه بدار القوم والله منايه
واللي سوالفهم طلوع ورجوعي=مالي بهم لوكان نجع قصرايه
وترا الزهوف اللي حصانه قضوعي=وروابعه ياوصل دايم دعايه
لامسه الحبل القوي البتوعي=يروغ عن شرواك شين الرمايه
وسوالفه ياوصل فيها خنوعي=وان حده الدندون رام النهايه
مدي يرجِّح له ثمانين صوعي=عيبٍ على شرواه يلحق مدايه

الشاعر عيد بجاد بن شده العتيبي