ديوان الشاعر / مشعل عسام التريباني

بسم الله الرحمن الرحيم

الشاعر / مشعل عسام التريباني الشمري

(( رد على فرحان الظفيري ))في25\8\1433هـ

0000 ابيات قليله مجارات لقصيدة فرحان الظفيري !!!

	فرحان ياشــــوق الغزال المشمحط = ابو جديلٍ باطــيب المسك ممشـوط عســـــــــى يمــــينك ياولد ماتربّط = وعساك دايم سالـي البال مبســـوط عـــــز الله انك تحبك القاف واتحـط = في مقدم القيفان همـــزات ونقــوط وانا اشـــــهد انك بالمثل ماتلخــبط = ماصار في قافك شخابيط وشخـوط شعرك بحر مهو قطـــــيرات وخــبط = سيلٍ يشيل القاع وايموطـها مــوط سلمت يمينك صدق يالذيب الامعط = انا اشهد انك صغت الابيات مضبوط لو تصعب القيفان مــــــنت مــتورط = تحمل وسام الشــــعر وتعلـّق النوط شعرن جزل مافيه مـــيلات وصقط = تقل مـــن المحــّار والــــــدّر ملـقوط القافــــيه صــــعبه ومـــثله فـــلا قط = سمعت شعرن باجمل العود مخطوط شـــــــــــعرك لعشاق المثايل ينشط = لانه درر مــــاجـــابها كل خــــربوط

بسم الله الرحمن الرحيم

الشاعر\ مشعل عسام التريباني الشمري

((بشار))في 25\8\1433هـ

0000 اللهم انصر اخواننا في سوريا !!!

	يالله ياعــــلام مكــــنون الاســـرار= ياعالمٍ مــــــاكان تخفى الســـــراير ياخــــالق الجــــنه وياخـالــق النار= عـــــلام يعلم ماتكـــــن الضـــــــماير يامهلكن فـرعـون منجي هل الغار= مـــــابين كاف ونون مــاردت صاير يامخرجن ذا النون من غب الابحـار= من عقب ماهو في حشا الحوت حاير ياشافيٍ يعقوب من عقب الاضرار= ياجـــــــابرٍ عظمٍ كســــته الجباير تلطف بشعبٍ مــــزقه كــــيد بشـار= اللـــــــــي علـــى شعبه يشب السعاير بالارض دبابه وبالــجــــو طـــــيار= علــــــى الضعوف اللي جداها العباير طاغـــــــي ومتكبّر وفاســق وجـبار= علـــــى ضعوف الشعب يعطي بشاير ثارت صواريخه علــى ساكن الدار= والا علــــــى الجــــــولان ماهو بغاير جوده على الثكلا وشــيبان وصـغار= فـــيهم يجــــرّب كل نوع الذخــــــاير مجازرن مــنها حـــــــزن كل مغوار= مجـــــــازرن فيها تضيع البصـــــاير يارب سلـّط قـــدرتك وانــت قـــدّار= على الخبيث اللي على الشعب جـاير سلـط عليه مـــن السماء لاهــبن حار= شهبٍ علــــى راســــــه تولـّع سعاير يارب دمّــــــر كل فــــاجــر وغــدّار= انت الـــــــذي تعلم بما كان صــــــاير من غـيرك اللي يعلم السـر واجــهار= ومن غـــــيرك اللــي به تهون الكباير ياناصــــر المظلــوم قــيّوم جــــبّار= تلطـــــف بشعبٍ ذاق مــــر العـــــزاير اصغيرين ايتام وضــــعوف قصــّار= وامٍ تقـــــــد اللــــــبس دمعــــه نـــــثاير من جور هذا الطاغيه راس الاشرار= ريموت الاعــــدى به تصـــــير النكاير مايدري ان الله علــــى ظلم كســار = وان الدهـــــــر دوره علــــــى العبد داير

بسم الله الرحمن الرحيم

الشاعر \ مشعل عسام التريباني الشمري

((وداعا يارمضان)) في 24\9\1433هـ

وداعا يارمضان!!!

	راح الشهريارب تقبل صيامـي = وتقبل قـــيامــــي والتهجدبالاسحار وتقبل تلاواتي وترفع مـقامـــي = وتجعل لنا منزال من ظمن الابرار وتقبل دعاي وتوبتي واهتمامـــي= واجــعل لنا يارب ظلن عــن النار يارب يامحيي رميم العظامــــي = ماخاب مــن يرجيك ياخـــير غفّار يالله تعيدالصوم في كل عامــــي = علــــي ياعلام مكـــنون الاســـرار وتجعل لنا سهمٍ يفوق السهامـــي = ياسامع النمله علـــى صم الاصخار وابوي تجعل له محل الحشامــي = فـــــي جنةٍ فـــــــيها بساتين وانهار عسا ه يلحق في رعيل الكرامــي = فـــــي جــنة الفردوس ينعم و يختار ادعي له الله فـــي نهاية صيامــي = بالــعفو والغـــفـــران قــدام الافطار حيثه من اللي يطعمون الطعامي = له مجلسن يكرم به الضيف والجـار يارب تحسن منزله والختامــــي = وانزله مـــــــنزال الكرامه والافخار تجعل على روحه براد وسلامي = ويســـكن بجناتٍ بها الخـــير مدرار امين ياربـــــي تحقق مـــــرامي = يارازق الحيتان فــــي وسط الابحار اطلبك في ختمة ليال القيامـــــي = وارفع لك الكـــفين يامجــــر الانهار والخاتمه يالله تعيدالصيامــــــــي = وتجعل لنامنجات مــــن واهج النار

بسم الله الرحمن الرحيم

الشاعر\ مشعل عسام التريباني الشمري

((بعض الاوادم))في 17\8\1433هـ

بعض الاوادم!!!

	بعض الاوادم يدبل الكـــبد شوفه = الارض يثقلها اليا مـــن وطاها عليه خـف الــنفس فـــيها كلوفه = طش المراجل والهزال احتواها نفسه ذلولٍ للردى و معـســـوفه = با الكبروانواع الرزاله كــــساها كن الرجوله من يديه مخطـــوفه= الطــيـّبه توخــذ وعـــــينه تراها والياهرج جاب العلوم معطوفه = هــــــذي يشقلبها والاخرى لواها مايلحق النفس الشقيه حســـوفه = اليا تكلـّم كلــــــمتن مــــاقـــــداها ومن خلقته ماقيل مــدت كفوفه = يموت واغلب خــــــبزته ماكلاها وايفكــــر انه عايزاتن وصوفه = يشره على الابطال يحذو حـذاها يدلي بكلماتٍ مهـــــي بمعروفه = يهرج هـــــروجن عالين مستواها يركب ذلولن بايداتن دفـــــوفه = واعن المراجل قاصراتن خطاها دامه على نفسه كــثيرالمروفه = هوكيف عســرات المراقي رقاها مايستوي خبلن يجمّع قطــوفه = يهرج هـــروج اللي كرامن لحاها كبشن تميـّزبس في كثرصوفه = دايم ورى المرياع يركض وراها متفرّغـــــن للسالفه مــاتطوفه = ويجــــــــيبها يركـــض بها يالقاها

بسم الله الرحمن الرحيم

الشاعر\مشعل عسام التريباني الشمري
((انا البارحه))في 8\10\1433هـ

اناالبارحه محتار واقلـّب الافكار!!!

	انا البارحـــــه محــتارواقلــــّب الافكار= اباعــــرف شـــــيٍ ماقدرت اتوصلـّه اشوف بعض الناس لوماش شيّن صار= يصبح سليم وباالمســـــى ينكشف غله يضحك ويضفي فوق غل الظميرخمار= شيطان تفكــــيره عـــــن الناس مجتله مطيعن رجيمه لين سـوى عليه حصار= جـــــود وثاقه واحكم القبض واحـــتله دقة هــــــــــواجيسه كما دقة المـزمـار= وشيطان فكـــــــره قام باالشــــر يحبله يبي عليه عن البشــــريبعـدالمشـــــوار= ويبعده عـــــــن حـــيه وداره ونزلٍ لـّه ويقلع مداه عــــــــن المحبين والانظـار= وايكـــــتفه تكــــــتيف والعقل يســـتلـّه يزوره قـــــرينه بالـــــجواهر وبالازهار= يقــــــدم له انواع الدرر لين يشــــــــتله يحده عن الدرب السوي يم وســط النار= يحده على دربٍ عـــواكـــيس وايضلـّه يجيه الخـبيث بزخــــرف القول ياستار= يبي يخرجه عن درب الاسلام والملـّه ياهيه يامســــــكين ياضــــايع الابصار= تعوّذ مــــــــن الشيطان والدرب تندلـّه من طاوع الشيطان يشرب مـن الامرار= يشــــــوف شــــــــيٍ في طريقه يخيلـّه ياتيه با التفكــــيرتكرارفـــــــي تكـــرار= ومـــــن كل شيٍ ترغب النفس زين لـّه لكن خل الوســــــوســــــه وادحرالغدار= تعوذ مـــــــن الشيطان والوسوسه خلـّه انا اعوذبك يارب يامجـــــــري الانهار= مــــــــن كل شيٍ يخلف العقل وايخلـّه وانا اعــــــــوذبك يالواحد القادر الغفار= ياهازم جيوش الكفروالشـــرك ومذلـّه يارب عفوك يوم يكشف عـــن الاسرار= وطهّر لساني ياالاهـــــــــي عن الزلـّه عساني من الزله بوجه الكـــــريم مجار= وعساني من اللي في يمينه خذا سجلـّه وصلاة ربي عد ماتنبت الاشـــــــــجار= صلاتي على الهادي محمد رســول الله

بسم الله الرحمن الرحيم

الشاعر\مشعل عسام التريباني الشمري

((من ينشّد عريب الساس))في 11\10\1433هـ

من ينشدعريب الساس!!!

	مـــــــن ينشّد عـــريب الساس ياسالمين= قـــــــولتن لـــــــيش ادق ولاترد الجواب من ضحى العيد اشوفه خاطره فيه شين= كـــــنـــي اقـــــــــراء بعينينه عليّه عتاب وش حصل وش حصل ياترثة الغانمين= الخـــــــــبر تر سكوتك زاد قلبــــــي عذاب والا انا مـــــــا اتغـــــيّر لو تطول السنين= لين مــــــــن فوق راسي ينثرون التراب والله انــــــــي حريص لكل علمن سمين= وازن الهــرج واحسب له كثير الحساب واحــــترم كل شبلن صــــــيرميّاً فطين= مثل شـــرواك واخفض له رفيع الجناب واخـــــبر انــــي حشيم وكل مافات زين= وانت غالي واخبر انك تعرف الصواب مار مـدري وش اللــــي غـــــيّر الطيبين= والـــنفوس الزكـــــيّه لــيش جاه اكتئاب يزعـــل الرجـــل من نومه عسـى الله يعين= ضــــــيع الدرب واخطا كل ماكان جاب تالـــــــي الوقت حــــــيّر معظم العارفين= كم غـــــــلامــن هقا له هقوتن مار خاب والله انـــــي هــقــيت انك نبـــيه ورزين= مـاهقيتك ضحاحن مثل وصف السراب مـــــار تالــــــي زمــــنـّـا يخلف العاقلين= اكــــــثر الناس للشــيطان شال الزهاب طـــــاوع ابلــــــيس لين اقفا عليه اللعين= وابعـــده عـــــــن دياره وادفنه بالتراب مــــن يطيع الهواء والنفس يصبح حزين= مايشــــوف السعاده لو يشيب الغــراب حاصـــــــــرته البلاوي من شمال ويمين= لــين نجــــم الســـعاده عن محياه غاب في رضا بليس نفسه صـــار مثل السجين= والبسه مـــــن ردي اللبس رث الثياب انتبه لاتطــــــيع ابلــــيس بيس القــــــرين= كم مطيعن شرب زقوم بيس الشـراب طيعنـــــي حــــط بذنن طين واذنن عجين= وادحـر ابليس لايحمل عليك الصعاب واحــتزم مـــــن عــــرا ربك بحبلن متين= وحط عينك بعين الله مــرس الهضاب ثم عفـّـــــر جـــبينك لارحم الراحــــــمين= وادع باخـلاص يمكن دعوتك تستجاب في دعا الله من الشيطان حصنن حصــين= غـافر الذنب راع التوب منش السحاب عـــــالمٍ بالـــبيان ومــــــايســـــــــر الكنين= الغفور الرحيم الله شــــــــــديد العقاب

بسم الله الرحمن الرحيم
الشاعر / مشعل عسام التريباني الشمري
(( القلم بالكف وافكاري تطيع ))

القلم بالكف وافكاري تطيع!!!

	القلم باالكف وافـــكاري تطـــيع = يازهمت الفكــــــر ياتـينــي بســــــاع انظم القيفان في وقتن ســـــريع = خــــافقــــي للشــــــعر عجل الاندفاع راكب اللي يشبه الذيب المجيع = تقل ذيبن زاد مـشــــــيه يوم جــــــاع يتبع الغـــــــرات مع راع القطيع = ويسلك المطمن ولايهـــوى الرفاع جيب لكزس يامشا يهرع هــريع = مـــــــاعليه الا الدريول والمـــتاع سايقه وصل سلامــــــي للجمـــيع = والعجل بالرد قــــــدر المسـتطاع ياسلامي عد مايزهـــــــــــر ربيع = وعـــد ماضاح القمر وابدى الشعاع وعد براقن ظهــــــــــــر يلمع لميع = وعـــــــد ماهل المطر واخضرّ قاع ياسلامـــــي ياهلا الساس الــرفيع = امــــركم يالابتـــــي شـــيّن مطاع انتم اهل الجود والحصـــن المنيع = وامــــركم ملزوم نعطيه استماع لابتـــــــــي باخــــبارها كلن يذيع = كاسبين الطيب مع حسن الطباع ندرن من بينهم مـــــابه وضـــيع = صيتهم عند البشـــــر بالطيب ذاع والختام الله يسلمكم جمـــــــــيع = ياهلا الطــــولات واشـــباه السباع

بسم الله الرحمن الرحيم

الشاعر\مشعل عسام التريباني الشمري

مره دق علي عبدالعزيز البليهد قال ارسلت لك رساله جتك قلت ايه جت لكن جوالي عيا لايرسل
ابي ارد عليك وعجسزت عنه قال اقر عليه يمكن مجنون اقر عليه غديه يبرى فكتبت هذه الابيات

((قرينا على الجوال))في 18\10\1433هـ

قرينا على الجوال

	قرينا على الجوال ثم جاب شيّن غــــير= جـــزل القوافـــــي يمّكم جاك جالبها لقينابه اربع جن من ساكــــنين الصــير= والكل منهم جــــزل الابيات يكـــتبها الكل منهم ســخـّر القافــــيه تصخــــــير= جزيل المثايل يافتى الجــود جاك ابها سلامي على ساهرعدد مايطير الطــــير= مـــــــاهبّة النكبا وشـــــدت هــبايبها سلامي عليكم ياهلا الشعــــر والتفكـــير= سلامي على النفس الزكيه وصاحبها لعلك بعـــد ناســــــن تقلـــــّب بلا تبرير= ناسن نشـــوف الغيض يملا حواجبها ثقال الانفس مـــاتزن حبـّة القطمـــــير= وابليس دايم مـــــــاسكن في غواربها يبـــي مثل بن جساس والا يصير الزير= يامــــــــرعلى ناسن طوالن شواربها بعض الاوادم ياصفونه بنافـــــخ كــــير= اللـــــــي جلس عــنده هدومه يخرّبها كبير نفسن مار مامنه ياتــــــــي خـــــير= لاخـــــــير بالمتكــــــبرين ومكاسبها

بسم الله الرحمن الرحيم

الشاعر \مشعل عسام التريباني الشمري
(( لولاي ازخرف بيض الاوراق بالزاج )) في 25\10\1433هـ

لولاي ازخرف بيض الاوراق با الزاج

	يامــــــــل قلـــــبٍ به دواكـــــيك وازعاج= دايم مــــــن الهوجاس شال الجزافي لولاي ازخــــــرف بيض الاوراق بالزاج= والــــنفس اسليها بـــنظم الـــقوافـي اكــــتب مــــــن الــــقيفان مـــايبهج ابهاج= خــــزايزن عدلات ماهــــن عجافي انتاج فــــــكـــــرٍ بالمثايل اليا هــــــاج= يجيب قرقوحـــــن مـن الجم صافي ياضاق صدري غصت في وسط الامواج= اجـــــيب مــــن لوله جزالٍ نظافي امــــــر علـــــى صندوق صدري بالافراج= يطلق مســـــاجينن بصدري خوافي فـــــــــرايدٍ فيهن مـــــــــن اللول والعاج= اخــــفــيتهن خلف الضلوع النحافي فــــتحت عنهن كل قفـــــلن ومـــــــــزلاج= واصدرت حكم اعتاقهن والعــوافي مـــــــن شـــــــان لايبقن حبيسات الادراج= وايقال وين المــــــــوهبه يالسنافي وابـــــي بهــــــن مــــن زايد الهم مخراج= هــمن لجا وســـــط الحشا مايشافي اســـــــباب وقــــــتن فـيه للطيـّب احـراج= اللاش يركــب وابن الاجــواد حافي يــتـــبع كـــــــــثير المال لــو كان هـــلباج= وايقال هــــرجه صدق لو هو هلافي وينســـــــا عـــــزيز الساس ياصار محتاج= ياصــــــــار ماعنده مـن المال كافي والــرس يضــــربّه مــثل (مثل) هــــداج= وهــــداج من فوقه تهب الســــوافي وراع الصـــــخا قالو به جـــــــنون وسهاج= والـــــعفن قــــالو طـــيبن ومتعافي

بسم الله الرحمن الرحيم

الشاعر\مشعل عسام التريباني الشمري

((اللجلجه))في 3\11\1433هـ

اللجلجه !!!

	المــــجالس ياكـــــثر فيها الغــلاط= اعــــــرف انه قل ذوقه واسمجه خل عنك اهل اللجاجــــه والهــياط= قـــــــوم عنهم خل عنك اللجلجه كان خطو الخبل با الحكي استشاط= يحسب ان الهرج خبزن واعلجه بس هـــرجه با المجالس واط طاط= برمــــــج لســــانه عليها برمجه مثل مــــاقالويضحّــــــي با الحماط= مايفــــــرّق بين جــحــه واحدجه ينفــرط وســــط الرجاجيل انفـراط= وبا السوالف فــــيه ميله واعوجه ابتعد عـــن مجلــــسٍ فيه الســـقاط= لين رب الــــبيت ياتـــــي بفـرجه مجلسك وحدك علــــى قطعة بساط= خيرلك مـــــــن مجلسٍ فيه همجه اثركـــــثر الهــــذركا الزاد السماط= ســــــامجن ذوقه تقل فــــيه خمجه لاتكــــــثـّرمع مثل هــــــذا اختلاط= كل ماشفته علـــــى الدرب اسهجه ارفع الاقدام عــــــن راع الخــراط= عنه ســــوج الرجل بالممشا سجه وارض ربك كان تبــــــي الانبساط= وعن شرور الخلق وجهك به لجه الله الخــــــلاق بالاْرزاق احــــــاط= بس عــــوج الراس للمولــى عجه غــــــير توحــــــيده فلاحط اشتراط= فارجــن شدات عــــــبده وحـرجه