ديوان الشاعر / سطم فهد الخليل

البرق يلعج والمزون استهله =وقصيدتي هذه بليا عنـاوين

قصيدتي هذي بليا عناوين ..

	ياصاحبي صاحبك بالله قل له = قله يتعوذ من شرور الشياطين وقل له ترى شيطان نفسه يظله = والناس مثله له نفوس وشياطين وترى العمى يلقى بصيرٍ يدله = مار العمى ياصاح ماهو عمى العين نصيحةٍ من واحـدٍ ناصحٍ له = قل لايزيد إراقة الماء على الطين ويا صاحبي قل له ترن عزوت ٍله = لايحسبني ناوي إيسار وأيمين وقل له ترى صيته وبيته وبلّـه = روحي فداهن كان حصل لهن شـين وابي انصحه لا شـفت عليه زله = والنصـح يشرونه بجلّ البعـارين وحـنا مـاحـنا فئـة مسـتقـلـه = شـراكـةٍ بالدم والعـرف والـدين والجـد ضيغم جـد عبـّود كلـه = رفـاقةٍ واللـه تعـدْل المـوازين وتجاهل الجاهل ومثله وخله = واحشم عن الهزلة شعور الشريفين ترى الجماعة مثل سيفٍ تسله = يجبر بهم عظمك وتوفي بهم دين

سطم فهد الخليل
ابو فهد

اكـــــبـــــر غـلـــــــــــــــط

بعيداً عنكم

00000000اكــــبــــــر غــــلــــــــط0000000 !!!

	اكبر. غلط . لامنك . اخلصت . لانسـان=تعطيـه. مجهـودك . ويعطيـك . صـده وهو يدري. انه . بك مقصر. وغلطـان=لكن. يديـره . واحـدٍ . عنـك . حـدّه ودك . يتحوّل . مثـل هـاذاك . دخـان=وتهب . ريـحٍ . مـن شمـالٍ . بشـده وتطيره . بين .السماء وبين .الاوطـان=تبعـده عنـك . ولأهـل بيتـه . تـرده وتعمل(Delete) لأسمه بلا كثر صدقان=ولا . للكـــراهـيـة . ولا . لـلـمـــوده واسمـه . بجوالـك. تسميـه. (نسيـان)=وتحط . له . نغمتْك . مـن غيـر. رده وان لاح .لك يأشّر. وموتـره . خربـان=اضرب هرن قل (طيـط) ومـر وتعـده طيرك. ليامنه . خـرب طبعـه. وشـان=اقطع سبوق . الطيـر . وبالجـو هـدّه

سطم فهد الخليل
ابو فهد

نبي نتسامح

نبي نتسامح !!!

	الله يبيض وجه وقت المعاسير = يكشف خفا ما يجهلنك من أخبار ويعرَفنّك ناس عرفك لهم غير = عن ماتظن تشوف ممشاهم يسار وأيضا تبيَن لك رجالٍ مناعير = لأجل الرفيق تسوق ماله والأعمار ناسٍ تبيع الروح بأردى المخاسير = لرضاك وان حصل الخطأ منك صبار ولولا الفعل وش يفرق الطير عن طير= الكل منهن له مخالب ومنقار وكل الطيور تخلق بريش ومناقير = لكن بعضهن له مناقيره قصار وبه فرق حتى بصرف بعض الدنانير = ما كل دينارٍ يجي مثل دينار دينار عن دينار في قيمته غير = وحتى الذهب يكون له وزن وعيار والفرق حتى في صغار المسامير=فيهن ردي وصلب وطوال وقصار ومن بينهن ماهو صبورٍ على الكير = اسأل ويعطيك الخبر عنه نجار ويا صاحبي الله يذكرك بالخــير = والله يحرَم والدينك عـن النار منك السموحة ان حصل مني تقصير = واناابي أسامح حضرتك بكل ماصار نبي نتسامح قبل ربح ومخاسير = قبل الفراق وقبل قصاف الأعمار

سطم فهد الخليل

السلام عليكم

عندما أُعلن بأن الشيخ غازي الياور رئيس للعراق

صار هناك كلام كثير وتعليق بين الكثير من الناس

مثل شمر صارو حكام وحائل للتقبيل ومثل ذلك من باب المزح

واستحثني بعض الأخوان بالرد على من ياخذ ذلك بماخذ الإستهزاء

فقلت

0000الحرّ يفهم والبهيمه بهيمه0000 !!!

	أبو فهد يقول زينات الألحان =تسمَعوا يااهل القلوب الفهيمه إنذار بالمخفي شديدٍ ليابان =ولاكل غلطه تقتفيها تعليمه الخيل يرفع روسها لجام وعنان =والعوص يعبا له خزام وشكيمة والكدش كدش وتنربط بأردي الأرسان =والحرَ يفهم والبهيمة بهيمة ومن يلمز الاجواد في هرج حقران =لو انه اقرب حي أنا خصيمه حنا قديمٍ بالجزيرة لنا شان =وأمجادنا مع الجديدة قديمة حنا الطنايا مجدنا بكل الأوطان =ايَِام بضعات الغريم بغريمه ماهو بتوه حكمنا اليوم يافلان =حكام من حكام سنينٍ مقيمة من عصر اخو خنسا إلى يومنا الآن =عند العرب لنا مقامٍ وقيمة وعبد الله المصطور وعبيد الاخوان =بنوا لنا مجدٍ بعزم وعزيمة يشهد لنا قصر الاعيرف وبرزان =وتشهد لنا ارض الرياض وقصيمه ومن الجبل ياما تجي ديرة عمان =ومن المدينة لين شرقي رحيمة ومن شرق سورية إلى غربي إيران =ايضاً بعد منا وفينا زعيمة ان قيل منهم قلت ياهيه جربان =مثل الجبال الراسيات المقيمة تاريخهم يعرف على مر الأزمان =وأفعالهم بين القبايل عظيمة حكام بالقالات فرَيس ميدان =ساس الكرم أهل الوجيه الكريمة وأيضا بعد عندي كلامٍ وبرهان =ان عودة على طبوعه حليمة واليوم في حكم الفهد ما نبي ثان =بالعهد نافي والنوايا سليمة حنا العهد نعطيه وزنٍ بميزان =ومن يبخس الميزان اكبر جريمة وأبي السموحة كان بالقيل نقصان =ما أخذت أنا ضد الخطأ أي بيمه وصلوا عدد ما ردد حروف قرآن =على الذي بالغار زاره كليمه

سطم فهد الخليل

0000النصيحة تشترى بسوق الحراج0000!!!

	قال من يازن كلامه ياهرج = مايتخبط لين يودع له عجاج هرجتي اختار له بعض الفرج = واتحرص لاجي فيها اعوجاج وآزنه وزنن مثل مشي الدرج = واحبسه حبسة اسير في سياج لين يأتي له مكان ومخرج = وبالمقابل انتظر حسن المزاج ثم أقوله لمن بغاه بلا حرج = النصيحة ماتجي بسوق الحراج جـاك مضمـون النصيحة يافرج =من نصوحٍ فوق طرس بلون زاج في البداية خذ مكانك بالزرج = خل دربك واضح مع الزراج وانتبه من منطقك لامن خرج = لايجي به زلةٍ ولا ارتجاج ولاتقاطع هرج رجال هرج = ولا تحذف وأنت بيتك من زجاج وانتبه من مسلك الدرب العوج = والظلام ليا حلك دوّر سراج وأحذرك من هرجة مع الهوج = والهوج يجذبك لدروب الهواج وابتعد من مشية مع الهمج = والهمج دايم تورد للهماج ولاتوقف ماقفٍ منه الحرج = مايفيدك لو رفعت الاحتجاج ولا تباها في كبيرات الحجج = ومايجييك من الحجج الا اللجاج وكل شيء بعد ما يكثر سمج = والتسمم سبته كثر العلاج والقطا مي بالنظر لامن بلج = يرفع النظرة عن فروخ الدجاج وكل موقف صعب يقفاه الفرج = وكل ضيقة دوم يقفاه انفراج ومن مشى بالدرب لو انه عرج = يظهر الله بعد ذلك له خراج

سطم فهد الخليل

هذه احدى المراسلات بيني وبين بندر بن مياح الوبير

0000مساجله بيني وبين بندر الوبير0000!!!

	سطم على ايّام البداوة فجاني=دلّى يحاورني على اسرار دربي ذكرتني ياسطم احلى زماني=يوم الهوى بسوق المحبة تجربي اللي لعب بي لعبة البهلواني=جاءبالضماير بالحشاء وانتحربي حب الشرف رجمٍ براس البياني=وانا براسه والردى ماعثربي سلامنا وكلامنا بالبناني=بروس الأصابع مثل جمعٍ وضربي من خوف لايدري بنا السرمداني=اللى جنوبه بالهرافيل جربي تعللةٍ مع مرهفات الثماني=ولياطرق بالرمش ثمّن نظربي اوجس مثل بنج الأطباء يغشاني=وعجزت اميز بين شرقي وغربي ليا اخذت معهن من حياتي ثواني=ولياجلس ناب الردايف بقربي اعطيه معسول الكلام وعطاني=الدر والياقوت زادي وشربي تسوى حياة ٍعايشينه اهداني=واهل المثل قالو خدينه وزربي صخاف البطون وليّنات المثاني=ناب الردوف وحارس الصدر كربي يوم ان سلطان الهوى ماجفاني=غدى البخت عقب المحبة نكربي يابن خليل اظن ماجاك جاني=الكبر لحاقٍ يقص الأثربي الشيب ياريف النشاما بلاني=شيب الصبا يأخو الضياغم ظهربي اخفيه يوم وعقب يومين باني=بيني وبين الشيب كرٍّ وحربي انا بلاي ليا زماني دهاني=تنكرت لي يوم مال الدهربي ياصرت مثل القوس وهلال ثاني=والراس من بين المتون انحدربي مثل الجمل ياصار بالدار واني=يهدر ليا مرّنه الحيل سربي ينوض بالأقدام والحيل فاني=حنانةٍ بالصدر والفكر خربي والضغط والسكر بجيشه ولاني=ابي الهروب ولادري وين اهربي جيت الطبيب واحتينن عطاني=ولاتقرب الحالي ترى الحلو يربي والحلو غربلني وعمري تماني=وعشر سنوات يوم يبدا السهربي واليوم بالسبعين والشوف داني=بدل شرايين الشباب وغدربي لاتوب انا وخلف المطوع مكاني=غدي العمل فوق السراط يعبربي الله يجمعنا بهن بالجناني=حورٍ حراير محصناتٍ وعُربي

بندر بن مياح الوبير

ردي على الشاعربندر بن مياح الوبير !!!

	يامرحبا باللي جوابه لفاني= القاف جزل وقايل القاف ذربي بندر يصخّر نادرات المعاني= القافية والوزن شاربه شربي يحط في روس القوافي عناني= ويدرّب اللي هايبن ماهو دربي وانكان بندر في صعيبن نخاني= قولو لأبو مياح شد الظهربي حنّا للي شرواك لازم نعاني= نحفظ كرامة من لنا فيه قربي ورفيقنا حقوقه علينا سماني= عيناك ياشاكي من الوقت كربي ضياغمٍ نعطي بليّا مثاني= ومالا يجي بالطيب ياتي بحربي وبندر شكى يقول سطم حداني= عن واقعي يم القديم وعبربي يقول ذكرتن ليالي زماني = ايّام كان البال والقلب طربي ذكرتن اللي بالمحبة كواني= اللي جرى غلاه مع الحمربي غروٍ على غالي حياتي بلاني = عز الله انه بالغلا ما وجربي واليوم بندر يشكي الحيل واني= يقول لي ياصاح بان الكبربي يقول كِِثِر ْ الشيب فيني وباني= الحيل واني ومني الوجه خربي يابندر المياح يالمعشراني= اللي تعرض لك لقيته بدربي انا بعد يابندر الشيب جاني= بدا شوي شوي ياما انتشربي وحولني الدكتور للصيدلاني= جاب العلاج وحدد اكلي وشربي والكبر يابندر بجيشه غزاني=والعمر مثل الغيم يا هب غربي

سطم بن فهد الخليل

.

0000 ابتسامة الذيب !!!

	درست بالتجويد اقلاب وادغام = يومي صغير وناقصتني فهامه ومع الزمن عرفت انا كل الأحكام= من كثر تقليب الزمان لنظامه وعرفت فيه دروس صعبات وعظام=وبعض البشر صرنا نفسر حلامه واخذت درسٍ من الليالي والأيام = وحفظت دورات الزمن وابترامه وعرفت وقتٍ لأكثر الخلق ظلام = وقتٍ به الأجواد قل احترامه وقتٍ به الحصني حمل رمح وحسام= من ورث جدانه يبي له زعامه وفيه الفهد يمشى على اطراف الأقدام= خوف من الحصني يتكدر منامه والذيب يمشي طايعٍ وسط الأغنام= يعطي تحيه للغنم و ابتسامه وبالمنتدى واكثر قنوات الأعلام= كل على كيفه تقلد وسامه ولقيت لي ناسٍ تبنّي له احلام= جماجم الموتى تجمّع عضامه تبني لها مجدٍ بتسطير الأوهام =كلٍ جعل جده كبيرٍ مقامه يقول جداني اهل خيل وكرام = ومن رث جداني ورثت الكرامه ولو هو فعل فعلاً بيمناه مايلام = لكن يقول انه وريث لعمامه وطيب الجدود للحي ماضنه الزام= الطيب له ناسٍ تعلّى سنامه صحيح للماضي مع الحاضراسهام=وماضٍ بلى حاضر بذكره ملامه ومن يعتبر امجاد جده له حزام= اخطى وفعله مثل فعل النعامه نصيحتي له لا تزغويه الأوهام=احلى تعامل للنفوس احترامه

سطم فهد الخليل

0000 تعليق نهار بن هيشان الوبير !!!

	يابـو فهـد من طـاح بالنار ماقام = واقرب قريب ٍ قام يشوي اعظامه والناس مبطي ثار تقطع بالارحام= ماعندهم عطفاً ولطف ورحـــــامه ومن كان مسكين ٍ توطاه الاقدام = وياطا على بطنه هجيج الجهــامه ودنياك معروفة قبل عصر الاسلام = السيف يفرق نورها عن ظلامه ومن لا كسب يالقرم في ذيك الايام = اليوم كل الناس صارت نعــامه والسالفة ماهي بحاجة للادغـــام = وتبقى الفهامة عند راع الفهام

0000 تعليق عبد الله بن محمد المفضلي !!!

	سطم عداك السؤ وصدوف الايام = هذا الكلام اللي عليه العلامه تلخيص حال المجتمع شعر وإلهام = على الاصول وكل رجل ومقامه المرجله ماهي مواريث وعظام = ان جنّب الحاضر دروب الكرامه هذا وانا مثلك و لي بعض الاسهام = حول الذي ينقل بقايا عظامه

السلام عليكم

احياناً يكون الشعر اضطرارا لاتفاخر

او بالأصح هو ردت فعلٍ تثير المشاعر


اليكم رحلة الضياغم

0000 00000 رحلة الضياغم 00000 !!!

	من جبل خولان سرنا باتجاه جبال طـي = اسمها رحلة ضياغم اعرفوها يارجـال كل وادٍ له حدرنا نبتغي عشـبٍ ومـي = يالها من رحلةٍ من الجنوب إلى الشمال يوم سرنا وانتشرنا ضاق فينا كل فـيْ = انحدرنا من الجبال وامتلت فينا السهـال واستدرنا بالجزيرة مثل استديار الرحـيْ = وكلٍ جنّب عن خطرنا عارفٍ ماله منال واللي يصير بنحرنا ماحسبناه أي شـيْ = ماهو حقران وتكبر لكن من كثر الرجال كل أبوهم عزوتلي ضيغمي عن ضيغمـيْ = فوق صهوات الاصايل مايهابون القتـال والتقينا بجيش مارد . ويا لمقابر افتحي ْ = شيخهم سلطان مارد. راح وطياً للنعال دزه حميدان منّا . اصقهٍ مـا يسمعـيْ = انفجر عرقٍ برأسه اخو ميثا يوم قـال يوم قاله اخو ميثا مااعطي ميثا وأنا حيْ = لوتجينا الترك كله النساء هي والرجال و استوينا بالجزيرة ويالمجاهيم ارتعـي = ماقصدناها غزاةٍ قصدنا مرتـع حـلال واستقرينا بدارٍ فيها فـيْ وفيهـا مـيْ = بين أجا وما بين سلمى دائما عليه ظلال وقلنا لأهلْها تنحوا ماهي لكم هذي لـيْ = هذي دارٍ للضياغم وانتم روحوا للشمال راحوا اهلْها وتنحوا والمدامـع تذرفـيْ = ياقشر غدر الزمان وياصعب غلب الرجال والله ماراحوا جبانه لكن شياً يغطى شيْ = الزمن هذي سواته بين حلٍّ و ارتحال واستقرينا بــ(عقدة) والبنـات. تزغرتيْ = والجبـال ألنايفات زادن جماله جمال ديرةٍ يا حلوها ميً عذب وطلع حليْ = الصبح بظلال سلمى العصرمن اجا بظلال قلنا يالله . يالله نبني قصرنا ألمشيـديْ = قصر برزان الذي حايـلٍ بيـن الجبـال وقمنا ننشد و نتغنّى. بالسـلام الوطنيْ = يابعد حيي لحنّا, شعارنا ميْـل العقـال اسعدي يادار حاتم . بالسناعيس اسعديْ = شوفي عيال الطنايا صايرينٍ لك عيـال واسعدي بسلومهم اجودي من اجـودي = وان حصل يوم الملاقا مثل هدير الجمال

سطم فهد الخليل

الفقر عيب
الفقر ماهو عيب
الفقر ماهو عيب أي ماهو عار نعم
لكن الفقر يعجز الرجل احيانا كألعائب
كفاني الله واياكم شعر الفقر وضيق الصدر

00000الــفــقــــر00000

	لوقال بعض الناس ما بالفقر عيب = لاوالله إلآ فيـه عيـب ومذلـة لآو الله إلا فيه عـدة عذاريــب = إلا الفقـر فيـه العذاريـب كلـه إلآ الفقر يسقيك كدر المشاريـب = ومنه النفوس تهيم من زود غلّـه يكفيه عيب انه يحدك عن الطيب = ويحط في كبــدك ثمانيـن علـه أولهن اللـي لا بغيت المراقيـب = تكفخ وفي رجلــك سبـوقٍٍ تتلـه ودام الفقر يردني عن المواجيـب = أيام عمــري كثرهـا مثـل قلّـه طيّب!إذا كانك رجل خالي الجيـب = ويأتيك من يطلب قضـي لازمن له ليا قال( لك وإلآنقطه على الذيب) = والســالفة مابين ( ِشلّه و خلـه) وأنت الذي لاانته تودي ولا تجيب = تعال فهّـم ثـور عنتـر و قلـه ابي اسأل اللي ماضياً له تجاريـب = عن قول مابه عيب سائلـك بالله ابيك تكتب لي عن الوضع تعقيـب = وتناول الموضـوع دقـه وجلـه ودقق, وفكر, وانتبه , قبل ما تجيـب = وكلمـه تقولـه , اثبتـه بالأدلـه الفقر, ماهـو (عار) لكن به (العيب) = إعرف معانـي العيـب يافاطنلّـه كم واحـدٍ , لـه بالثريّـا مطاليـب = مار الفقر, عن مطلبه واقـفٍ لـه وكل شيٍ أمره بأمر ربك مواهيب =وانا علـى مـا يقـدّره , شاكرٍلـه

سطم فهد الخليل

0000 الهذر في وسط المجالس ملاهـه 0000 !!!

	ياصاح. والله من امور البداهه = ان الرجل يبقى بحاله أديبه ومغالط الجاهل أساس المتاهه = تطـخ دلـوه في جوانب قليبه مليان جوفه بالجهل والبلاهه = سيله يجنّب عن مجاري شعيبه لا يحترم نفسه ولآبه نباهه = مسكين عنده كثرة الهرج طيبه قليل ميز وفي لسانه شراهه = خله مع ألعالم يدوّر لِعِيبه والهذر في سط المجالس ملاهه = لاصار ماللهرج داع وجذيبه والصمت اخير ولا كلام السفاهه = والهرج لاجنّبْك جنّب وسيبه وهرجٍ بلا داعي هبال وبواهه = نوبٍ على راعيه يجذب معيبه ياصار ما بالهرج صدق و نزاهه = مالك بهرجٍ يلحقك منه ريبه روّض لسانك وأحفظه في شفاهه = ولا كل مايطرق أذانك تجيبه وكثر اللجاجة ماوراها وجاهه = ولا نال ساكت من سكوته غليبه يكفيك ما قال الرسول وإلاهه = حذراكْ عن قول النميمه وغيبة

سطم فهد الخليل