رحلة عمر

غِصْت في بحر القوافي والمعـــــاني =لَيْن ميَّزْت الهزيله والسميــــــــــنه
وامتطيت الشِعْر واسرَجْت الحصــانِ = وقالوا (السّابق تطلّعها يميـــــــــنه)
مرٍّ أقصر من جمـــــوحه بالعنــــــانِ = ومَرّ يسبقني ليا شاف الثميــــــــــنه
ونوب لو صِحْت ونخيته مايـــــــداني =ونوب يرمي بي على الشّلفا السنينه
ونوبٍ يكسِّرْ كلامي ويعصــــــــــاني =ونوبٍ اطوَعْ لي من سيور المكيــنه
ونوب يفرَحْ لي ويرسل لي تهـــــاني =ونوب يطرَبْ للمواويل الحزيــــــنه
لَيْن حَطّ البيت واستوطن كيـــــــــاني =واصبَح اقرَب للبنادم من وتيـــــــنه
واستوى سيفي وكيفي واللســــــــــانِ =واقتِسَمنا قاسي الدنيـــــا وليـــــــــنه
وصار لي مرسول طيف وترجمـــانِ =وكل ما كَبْرت بعيني يستهيـــــــــنه
هاجسي يامنيف للشعْر يحـــــــــداني =كل ما هبّ الهوى من يمّ (ليــــــنه)
جايبٍ ريــح النّــفَــــــل والقحـــويانِ =من فيــــاضٍ كنّها وصف الجنيـــنه
و(امّ سالم) كل يومٍ له غـــــــــــواني =ما شِقَتْ في زيف وزحام المديـــنه
يا(ام سالم) غرّدي صوتِك شجــــاني =واهنيّــــك كل صبحٍ تزعجيـــــــنه
مادهاك من الزمــان اللي دهـــــــاني =واصطلاح (العولمه) ماتفهميـــــنه
افتِكَرْت بما مضى لي من زمـــــــانِ =شــارَفَتْ خمسيـن عامٍ من سنيــــنه
يازمــــاني منْك جـــاني ماكفـــــــاني =كم جرى للمسلمين من الغبيــــــــنه
وهمّي اللي لو نسيــــته مانســــــــاني =مايروح و(قبّة الصخره) رهيـــــنه
يا عُمَــر والمسجد الأقصى يعــــــاني =وين جيشَك ياصلاح الدين ويــــــنه
ابتديـــــنا نمتلك كــــــل المـــــــــواني =وانتهيــنا في مؤخَّــــــرْة السفيـــــنه
كنّا الاوّل يـــوم باقِ النــــاس ثـــــاني =يـــوم كنّا راس مال الشخص ديـــنه
وصِرْنا الاوّل بالملاهي والاغــــــاني =والنّـفـــــاق الاجتمـــاعي مبتليــــــنه
وارتضيـــــــنا بالمذلّـــــه والهــــــوانِ =وابتدأ يلعـب بنا (بوش) و(عويــــنه)
وكذبة(الإرهاب) وحقـوق الغــــــواني =أحيَتْ الماضي والاحقاد الدفيــــــــنه
و(الديموقراطية) أوهــام وأمـــــــــاني =دام عند(البيــك) مفتــاح الخزيــــــنه
واستفدت من الزمــــــان القلّبــــــــانِ =إنّ ما كلّ الحقيـــــقه مع(جهيــــــنه)
وانّ مالايُعقل أقـــــــرب للضّمــــــانِ =في زمــانٍ غمّــض العاقل بعيـــــنه
في زمانٍ يصبح المظلــــوم جانـــــي =ويصبح الظّــالم ضحيّة من يِدِيْـــــنه
وانّ حُبّ الذات من طبع الأنــــــــاني =وانّ حُبّ المـال هو ساس الضغيــنه
وانّ كل النـــــــاس من قاصي وداني =همّـــهم واحد وهُم من كل طيـــــــنه
وانّ بعض الشِّــعْر من سِحْر البيـــانِ =واكثره في مجتمعنا صــار ِزيــــــنه
وانّ حكّــــام الدّوَلْ من غيـــــر أذانِ =وانّ كـــلٍّ مستــــبدٍّ في عريـــــنه
وانّ ما للوقـت والدنيـــــا أمـــــــــانِ =ناظروا (صدّام) والقيــد بيديــــنه
وإنّ مهـــــما كــان،رِزْق المودمــاني=كـافله ربّــــه ومكتــوب بجبيــــنه
والزمـــان اللي خذا منّــي عطــــاني =نعمة العقل المفكّــــــر والسكيـــنه
فضل معبــــودٍ لتوحيــــده هـــــداني =واحــــــدٍ كل الخلايق تستعيــــــنه
أسكن العـــالي ولااحـب الطّمـــــــانِ =عــــادة الطّيـــــار وانتم عارفيـــنه
وأرغَبْ الطيّـب واعـدّه من اخــواني =لويشيـــن الوقت له طبعٍ يزيــــــنه
والرّدي لـــــــو هو قريـبٍ لي تراني =ما تركت الاّ الرّحَم بيني وبيــــــنه
وانتخي لاجل الخوي لامن نخــــاني =واتجاوز زلّــة الصّـــاحِبْ بحيـــنه
واترفّــــع عن كــــلام المكلمــــــــانِ =عن كثيــر الهرْج تكـفي(ياسميـــنه)
أنتقيــــها من غريبـــاتٍ حســـــــــانِ =للعقـــول المستنيـــره والفطيـــــنه
مانظمت استـــجدي فلان الفــــــلاني =مــابي الاّ قــــولة (الله لايهيــــــنه)
وماحلا يامنيــف كان سهيــــل بـــانِ =واعْــقبَـــه وسمٍ يفــرّح مرتجيــــنه
وقالوا ابشِر سال وادِ الديعجـــــــــانِ=وتاجر الاسهم عسى ربّي يعيـــــنه
حُـبّ مقنــاص الـقَـفِـرْ بين المَحـــاني =ثابتٍ لوكان ما للصّـــيد عيــــــــنه
مــرّتْ أيـــام الـــزّمن مثل الثــــــوانِ =مالحَقْـنا غاية النّفــس المهِيـــــــنه
غافليــنٍ ونتطـــــــــاول بالمبـــــــاني =عن تصاريف القَدَرْ ماهي حصينه
نطلب الدنيـــــا وهي دار امتحـــــــانِ = كــــم اهــــانتنا وحنّـــا مهتويـــنه
لو على كيـــفي توقّــــفت بمكـــــــاني =اتجهّـــــزقبل مااطيح بكميـــــــنه
لــكن الايّــــام مافيــــها تـــــــــــوانِ = والعُمـر يمضي ولااحدٍ سدّ دَيْنــه

7.وهمّي اللي لو نسيتـه مانسانـي
مايـروح و(قبّـة الصخـره) رهينـه
18.يا عُمَر والمسجد الأقصى يعانـي
وين جيشَك ياصـلاح الديـن وينـه
19.ابتدينـا نمتلـك كـل المـوانـي
وانتهينـا فـي مؤخَّـرْة السفيـنـه
20.كنّا الاوّل يوم باقِ النـاس ثانـي
يوم كنّا راس مـال الشخـص دينـه



صدقت ورب الكعبة

الشاعر الكبير والقدير / مفوز التبيناوي ( أبو فيصل )

صح الله لسانك وسلم بنااانك

ابدعت وامتعت والله لاهنت لاهنت

دمت كما تحب

مفوز التبيناوي
صح السانك ملايييين

تحياتي لك

الأخ/ محمد الذرفي، الشيخ/ منحاش،، أشكركم على المرور والتفاعل،، دمتم بخير... أخوكم/ مفوز التبيناوي.

الشاعر / مفوز التبيناوي
صح لسانك ملايين يالغالي قمة الجمال بهذه الأبيات لاهنت
إبداع راقي - مميز - جميل جداً جداً.
دائماً بإنتظار جديدك لاهنت يابعدي.
تقبل فائق أطيب التحايا والتقدير لشخصك الكريم،،،

رحلة شعر محمله بـ كل جماليات الشعر وفنونه

مفوز التبيناوي

وريث الشعر طال عمرك على الطاعه ووفقك لكل خير

شاعر فحل وغني عن التعريف والاشاده والاطراء

ولاتطري لينه تخلي عبدالله يدشر وغدانه ويقابل هالصفاة الصماء

تقبل كل التحايا

القدير / مفوز التبيناوي

صح لسانك مدى الحياة

نص اكثر من رائع نص جزل من شاعر جزل

لا فض فوك اخي

دمت بود

كبير ياعم مفوز التبيناوي
لله درك على هالرائعة
صح السانك بحجم الكون
احترامي لجنابك

شاعرنا الكبير مقاماً القدير مفوز التبيناوي

أياديك يابو فيصل
وصح السانك مدد بلا عدد
:bar :
خالص التحايا لسمو شخصك النبيل

الأخ/ عبدالله المفضلي، أشكرك على التعليق، (لينه) التاريخ، الربيع، اللفظ الشاعري لإسمها، الموقع المميز، كل هذه الأشياء تجعل من محب البر يمرّ عليها بنفسه أو بقلمه، ولايهمّـك اخونا نهير وحكيه، وكانه مايدري تراها كانت آخر نقطه حدوديه من الشمال قبل إنشاء طريق( التابلاين ).. الله يجيب المطر والربيـــــع،، دمت بسلام.. أخوك/ مفوز التبيناوي.