الوعد وان سيل الله كل وادي

اشتهرت القصيدة الحربيه الشهيره للشاعر غانم بن علي بن مشرف اللميع من الدهامشه من عنزه والتي اثارت حربا
داخلية بين الدهامشه بزعامة شيخهم محمد بن مجلاد الملقب (سعران) وبين الشيخ محروت بن هذال (ابوزبن)
بسبب قوتها واثارتها وكان الشيخ محروت بن هذال حمى (حامر) وهو مكان في العراق ومنع نزول احد فيه سوى
الصقور والجبل وهم جماعته المقربين فغضب غانم اللميع واثار شيخه سعران بهذه القصيده وفعلا تقدم بهم سعران وهزم
ابن هذال ونزلوا حامر ذلك العام 0
ودائما يتم السؤال عنها من عوام الناس لشهرة بعض ابياتها وانتشارها في جميع نواحي القبائل
العربيه ولذلك سوف اوردها كامله لكي تتم الفائده حيث قال اللميع:

ساهر بالليل ما جاني انوادي=من ظلايم شيخ جراهن علينا
صبرنا ما يصبره كود المهادي=رافيٍ خـمـلة قصيره له سنينا
يوم شاف الجار بالنسوان عادي=حزب النسوان عن علمٍ يبينا
يا بو زبن منت مع درب القوادي=لك سنينٍ مسملات مبتلينا
ادري انك شيخ واعلومك بعادي=بس حنا مانبيك ولاتبينا
تبي تجري شيء ماهو قبل قادي=ما ذكر في وقت أهلنا الاولينا
هات ابن ياسين وربوع الرمادي=وجب اجنودك كان قلبك مشتهينا
لو تلمه من غثيثين البوادي=ما نطيعك والموازر في ايدينا
ما نطيع اللي يجينا بالعنادي=ولطمة الفسقان ما تشكل علينا
أنشد اللي جاء لهم بالقوم عادي=وش جرا من ضرب عطبين اليمينا
يوم جيتوا مثل عمدان الجرادي=وطار كل الصيد يوم إنا مشينا
يوم لحق الضرب مصقول الهنادي=طاح ما به روح من حنا ولينا
كن جدع الروس تجديع الهوادي=حنظل تحاذفوا به جاهلينا
نسمع اللي قيل بهروج المعادي=غير نسكت كن حنا ما درينا
كيف ديرتنا تحط ابها الحدادي=وبالشمال اخرى تحرمها علينا
قول عنتر صدق ما غيره وكادي=فاتن الاربع وحنا صابرينا
الوعد وإن سيل الله كل وادي=حرمة اليسرا ترى الممشا يمينا
كان حامر سال من حد الحمادي=تبي سيله لك وحنا ما يجينا
مرتع الفطر عريضات النوادي=يرتعنه وابو من يزعل لعينا
يرتعنه كل وضحا بأستنادي=يرتعن القفر والخافي يبينا
وان تهيأ لقوتك حسن المرادي=يتلف التالف وتصفي من حدينا
حكم خالقنا ولا حكم العبادي=نبي حكم الله ولا حكمك علينا