حرب الأعصاب

16-08-2006

شاب القصيد وباقي الهم مـا شـاب//ونعيم فكـري مـا تجـاوز جحيمـه

يوم انفتح معناي للحـرف وانسـاب//للحزن قيمه واصدق الشعـر قيمـه

نويت أمّيلها غزل واكسـب إعجـاب//حديث عشـقٍ مـن نديـم لنديمـه

لكن حضر هم الشعر والغزل غـاب//جا للشعر بيـن المحانـي حطيمـه

من يحترق ماله عن النـار مجنـاب//وماهوب شرط إن العواقـب سليمـة

والشعر لو جاله جماعات وأحـزاب//زيف المشاعـر لا تمـادى ذميمـة

ياشينها لا طوّلت حـرب الأعصـاب//ما ينتصر فـارس ولا مـن غنيمـة

ماجا بدون حساب ماجا له حسـاب//والنصر لاجا سهـل مثـل الهزيمـة

احدٍ عرق وجهه من الوقت صبـاب//واحدٍ عرق غيـره مسبـب نعيمـه

للفعـل روايــه وللمجـلـس آداب//وللمستقيـم أفكـاره المستقيـمـة

والصفحة اللي ضيّعت جهـد كتّـاب//وجودهـا وسـط المجلـد جريمـة

من عابها يفتح على الناس له بـاب//يشيب راسه ما عرف من خصيمـه

ومن غض طرفه ضاع والوقت غلاّب//والعقـل نعمـه والجهالـة عقيمـة

إلى متـى زود التفاخـر بالأنسـاب//العـز مـن تـوّج جديـدة قديمـة

كبوة جواد الروس من حظ الاذنـاب//وبعض الاسامي جت لاهلها ظليمـه

بس العزى ما ينقص النار مشهـاب//من شذ محروم ٍعسـاه الحـريمـه

والفعل بيت وعزه النفـس الإطنـاب//يبنى على الشيمة وبـذل وعزيمـة

ولو نظرة العالم لنا بـدو وأعـراب//حنا الأصـول الثابتـات المـديمـه

حنا بنينا المجد مـن قـوّ الأسبـاب//تاريخنـا طـبّ العقـول السقيـمـة

وما يلغي التاريخ تظليـل الأغـراب//الحـر يفهـم والبهيمـة بهيـمـة