ديوان الشاعر / محمد ضرمان الشولاني

السلام عليكم ورحمة الله وبركاته

صباحكم فل ومساكم يا سمين

هذي اول مشاركة لي في هذا المنتدى الاكثر من رائع والذي يحمل
اسم قبيلة عزيزة على قلبي ولها مكانتها العظيمة بين القبائل قديما
وحاضرة وهي شمر والنعم فيكم والله . وتسجيلي في هذا المنتدى
دعوه لي من اخ عزيز وشاعر مميز وقدير وهو الشاعر عبدالله المفضلي
ومشاركتي قصيده متوضعه تعني في نفسي الكثير

الفرقى ..

	راحــت حيـاتي عقب فرقى حبيبي=صحيح عايش بس ميت بالاحــزان وشلون مدري صـــار هذا نصيبي=بس ادري انه من مقاديـر رحمــان اسامر القمرى وجــرحي عطيبي= والذهن ملهـوفٍ وشـــارد وحيــران لصــــار خـلي مــن ردوده عجيبي=نوبات يضحك والزعل اكثر احيــان خذيت روحي وانتظر وش تجيبي= حتى وصالك يا اكحل العين ما بـان بنــات فكــري في سطــورك تنيبي=حتى لساني في الشعــر تـو مــازان حتى شبابي مــــن صدودك يشيبي=وان مالفاني جهزو بيض الاكفـــان يـــاليت محبوبي يرد و يطيبي = يلطف بحالي قبل ما مـوت زعـلان

وسلامتكم

أخوكم محمد الشولاني العجمي

السلام عليكم ورحمة الله وبركاته

صباحكم فل ومساكم ياسمين

احببت ان اشارك بهذه القصيده ولها مناسبة حيث ان ابني راكان اعتاد مني الجلوس كل يوم في وقت معين اراجع فيه صفحات قصائدي اما مراجعة واما كتابة ولاحظ في يوم من الايام اني لم اكن منشغلا بالشعر وهو من مشجعي نادي الهلال السعودي فطلب مني كتابة قصيدة عن الهلال فباحت قريحتي وقلت سوف اكتب لك ما هو افضل من الهلال وغيره فكانت هذه الابيات:

وصايا ..

	سر يا قلم واكتب وصيه لراكان=اقرا مضامين الورق والكتابه ستة وصايا سقتها لك بقيفان= افعال روس القوم فعل القرابه الاوله دينك صلاتك وقرءان=سنة نبيك نهج خير الصحابه ترا حياتك في العمل مثل بستان= يا تزرع وتجني يا تلقى خرابه الثانية وصل الاقارب والاخوان= فيها الاجر فيها وقار ومهابه لو واحدن قاطعك منهم وزعلان=اركب ذلول الوصل في طرق بابه ترا الوصل ماهو جزا احسان بحسان=ترا الوصل خيره على من بدابه الثالثه حفظ الامانه والايمان=واليا شتلت الحمل شد العصابه الارض عيت والجبل صار شفقان=من ثقلها حتى السما في سحابه لكن حملها في جهل وحده انسان=ما يدري ان الشيب يلحق شبابه الرابعه حذراك وافات بلسان=الخوض فيها فالمجالس معابه نميمه وغيبه وكذبٍ وبهتان=إياك و قول الزور ما ينحكابه ترا لسانك فرد واحصان ميدان=عنّ الحصان وبيت فردك جرابه الخامسة تكريم جارٍ وضيفان=دق النجر والبيت كثّر زهابه اهلا وسهلا خلها دوم عنوان=بشاشة محيا وصدرك رحابه الجود للرجال مَعْلم وميزان=كم واحدٍ قفّى ولا احدٍ درابه شف حاتم الطائي على مر الازمان=قدّم جواده والفقر ما حكابه الجار لا وصيك يا نسل سرحان=الله ذكر حقه بمحكم كتابه الجار لا طول غيابه ولا بان=دارك ذرا داره بحلّ وغيابه السادسه دوّر لذيبٍ وظفران=دايم وهو كسبان من صيد نابه ياقف عضيدٍ لك لمنّ الزمن شان=وقفة شجاعٍ والعنى ما يهابه جنب هل الزيفات واصحاب حقران=الـكـلب كلـبٍ والذيابه ذيابه هذي وصاتي حطها نصب الاعيان=منهجك في دنياك درب اللبابه عشرين وخمس ابيات جاتك بتبيان=أخير من نظم الشعر في دعابه صلاة ربي عدّ ما هل ودان=اعداد من صلى وطاف برحابه

وسلامتكم،،،

السلام عليكم ورحمة الله وبركاته

مساكم فل وصباحكم ياسمين

الله يعين الدار واهل المكاني.. ..

	يا قلب مما جاك بيحت الاسرار=ببيات شعرٍ نبِّشَت للدفاني ناتج تفاعل بين صلفات الافكار=في فلسفة شعري وضوح وبياني راحت تتابع تبغي البوح مسيار=ضافت ركايبها منازل لساني للصاحب اللي يطلب العذر تكرار=طعنات غدرك ضربها بالمحاني خليتني جاني وظالم وجبار=في محكمة ظلمك تضيع الاماني ما هي من اطباعي جحودٍ وغدار=ولا اكسب الصيده على ناب ثاني نفسي مضرّيها على طيب الاوكار=حرٍ على حزم المراجل مكاني طوفت لك مره ومرات وامرار=والقلب خليته لسفنك مواني ابدعت لك من خافقي عذب الاشعار=كتبتها لك في جميل المعاني اخلصت لك حبي بحلك والاسفار=اخلاص عنتر فالوفا والتفاني الفكر قيدته بقيدين واهجار=آمال واحلامٍ وتخليد فاني لا تامن الدنيا ترا الوقت دوار=تلعب عواصيف الدهر باللياني مالك سوى خلك اذا صار ما صار=وشربت من ظيم العنى والزماني كلن له اعيوبٍ صغيرات واكبار=وانا عيوبي عند غيري تهاني كانك تبي تمشي وتترك لي الدار=الله يعين الدار وأهل المكاني صحيح من طبع الجمل دوم صبار=حتى الجمل لا زاد حمله يعاني لكن قبل ترحل وتعْزم بالابحار =في مركب اوهامك وقلبٍ أناني وتطفي شموع الوصل وتضيع الانوار=خذ أصدق اشواقٍ عليك تحداني طويت صفحات الامل منك بانكار=وانهارت قصور الغلا والمباني ببني بقايا عشقنا نصب تذكار=في مقبرة هجر المحبين باني واذا طرا لك يوم ترجع بالاعذار=سيف الغدر زلَّه ودرعي أماني

وسلامتكم،،،

الشوق .. ..

	أبكتب ابياتي على بيض الاوراق=دقات قلبي وزنها باتفاقي مالوم قلبٍ من عسل شوفتك ذاق=أدمن غلاك ولهفته بالتلاقي ساعة يشوفك صافي الشعر ينساق=مالوم شعرٍ هيضه زين فاقي حسنك جمالك حرفك العذب فواق=بعثر كياني زين وجه الملاقي وجهك غشى شمس الضحى نور واشراق=يذهب ظلامٍ داخل النفس شاقي خذني يتيمٍ داهمه حزن وافراق=اقفت أيادي عودته العناقي تعال قرب زدني اعناق واعناق=تطفي سيول الوصل جمر احتراقي اعذر همول العين لانست دفاق=ما غير صدق الشوق والوقت عاقي خذني عليل الحال شوفتك ترياق=ولا كسير الذات للهم ذاقي محظوظ يا دربٍ مشى فيه مشتاق=درب الهوى والشوق للرجل ساقي عطني فديتك وافي العهد ميثاق=ميثاق حبٍ ما نوى بالفراقي يبقى وفانا شامخٍ وسط الافاق=في دفتر الكتاب نبعٍ وساقي شف عنتر وعبله وتاريخ عشاق=اقفوا ونبض العشق مازال باقي

وسلامتكم

مشاركة متواضعه ..

	ابدا على الله همتي واتكالي=الواحد المعبود للانس والجان علمٍ لفاني شاش روس الرجالي=من فعل ابن نايل سلايل كحيلان شيخٍ ولد شيخٍ وذرب الفعالي=فعله يخلَّد وافي ٍ مر الازمان يوم الردي يبغي لدرهم ومالي=في بيعة انفوس الولد حيل طمعان لكن ابن نايل رقاها معالي=في صفحة العافي كتبها بعنوان ساس ٍ ومبدا يا كريم السبالي=افعال روس القوم ذربين الايمان بيَّن لنا عفوه جميل المثالي=يوم الحزن طوح على روس خلان العفو ما يكفيه شعر ومقالي=يا سيد العافين يا نسل طوعان الله يعوّض منه خير الجزالي=يجزاه عن عفوه جزيلات رحمان

صباحكم فل ومساكم ياسمين

((وصــوفــه)) .. ..

	نامت عيون الناس والنوم سلطان=وانا عيوني هانيه في سهرها اناظر المعشوق والبال سرحان=في صورةٍ سبحان منهو فطرها الجادل اللي كنه الليل كسيان =و إليا التفت عانق سواده نحرها في بسمته عينت لولو ومرجان= تذهب عنى نفسي وتبعد كدرها انفاسه الكادي نسايمه ريحان= توليفت ازهار الطبيعة عطرها الله عطاه الزين حلاه بلسان = يقطف حكيم القول ناق ٍثمرها الحرف لا قاله له اشكال والوان = تلقى كريم احجار صافٍ دررها تبهر وصوفه معشر الانس والجان= الشاهد الله نادرٍ في صورها برفع كفوف الود للحب برهان= اسقي ضما شوقي موارد نهرها يا مزن براق الودق فيه ودان=يا سعد قاعٍ هل فيها مطرها عاهد حبيبك لو بياض الشَّعربان=يبقى وصالك في حياتي بدرها لا تطري الفرقى وتنوي بهجران=تكسر مجاديفي بلجة بحرها

وسلامتكم،،،

صبحكم ومساكم الله بالخيرات جميعا

عادة ما يكون الانفصال او الخلاف بين اثنين بسبب طرف ثالث فتجلت هذه الابيات في قريحتي.....

غلطان ما تنهان فالحب اشانيب .. ..

	عزاه يا قلبٍ كما البن محموس=تلعب مخابيط العنى فيه تقليب وسط النجر دقه يعاني ومحبوس=مابين دق الخل والماو تعذيب سمع العذول الدنّ عالي ومجروس=هيف على المجلس يبي كيف تجريب والقلب فوحه من على الجمر مركوس=جمر العتب والصدق مجزي بتكذيب زلَّ الحكي والقلب مبلي ومحيوس= في دلة العذال فرصه وتثريب ولا لفّ فنجال الجفا كف مخموس=اتركْه علِّه صدّ عذِّب زده ريب عزّاه يا قلبٍ تواليه متروس=من صدَّة المعشوق همٍّ وتكريب يا شين وقت الحب تاليه مطموس=لا صار قلبك كيف والشين شريب يا جعل راس الشين مفري ومنكوس=في صدَّة العشاق يسعى بتخريب ولا يعاني باقي العمر مضروس= ولا عليلٍ ما لقى حلّ تطبيب دخول ثالث بين الاثنين محسوس=ترصدْه رادارات قلبي بتعقيب وأنا عطيب الجرح والهم ملبوس=لا طاب نصف الجرح عوَّد بتعطيب يا طول ليل الصدّ والحلم كابوس=لا صرت انادي طيف ولا به امجيب يا كنز عينٍ دونه الليل محروس=طال انتظاري والهدب صابه الشيب يا صاحبي اقرا كتابٍ ومدروس=حكي العرب مفهوم من دون تعريب كلّ ما زاد الوصل طابت انفوس=انعيش حبٍ صافي ٍ دون تشويب خلَّ الوفا مسقاك والحب مغروس=في مشتلٍ تبغيه نفسي بترغيب والشين عن مشتلْك منفي ومرفوس=خلّه يذوق الهم يبلى بتغريب درب الهوى ظلمه والاشواق فانوس=خل شوقنا شعله بروس المراقيب درب الهوى ما زيَّنه ذيل طاووس=درب الهوى جمرٍ وطتْه العراقيب بنك الغلا ما يرفعه مال وفلوس=يرفع رصيد الحب وصلٍ وتقريب وإن كان قصدك حب تخضع له الروس=غلطان ما تنهان فالحب اشانيب

وسلامتكم،،،،

مجاراة لقصيدة الشاعر مشعل التريباني
(ياليتني مارحت يم المطارا)

مجاراة للشاعر مشعل التريباني (المطارا) .. ..

	يا مشعل اللي شفت وسط المطارا = من بنت شامٍ ساقت الرجل ممشاه خليت ابن مسمار لجل العطارا=يوم ان قلبك يتبع الزين بخطاه عليك بالزين المحلي ديارا=بنات عزٍ سترهن دين واغطاه حسن وظفاره مكسبٍ للحرارا=بنات قرمٍ بيته الضيف ينصاه عذريّةٍ يا زينهن من عذارا=بنات حرٍ ماكر الطيب مرباه فيهن عظيم اخلاق ستر ووقارا=يزْهى بها درب الستر يوم تاطاه اثمن من الذهبان وزن وعيارا=ما صاغها صايغ ولا عايلٍ جاه هذا مقال العقل سر وجهارا=ببيات شعرٍ واضحٍ فيه معناه وان كان هذا مطلبك باختيارا=فالله يعين القلب يا وين وداه

وسلامتكم،،،،،،،،،

السلام عليكم

مساكم وصبحكم الله بالخير

هذه استغاثة حضرتني بعد رؤية أراضي وادي العجمان وماحل بها من طول
غياب المطر والله يجيب المطر والخير ويعم به اراضي المسلمين.........

استغاااااااااااثة.. ..

	في وادي العجمان يا ارض الفخر رمز الكريم=واجدادنا نفخر بهم اهل القنى وهل الحسام شفنا لنا ارضٍ تكدِّر خاطري صارت هشيم=أعوادها تشكي دهر بعد الزهر والإنقسام استبدلت أثوابها لبست لها ثوبٍ قديم=بعد الخضر فستانها يوم الفرح فيها مُقام أُستُعمرت قيعانها جيش الضمى فيها مقيم=استسلمت بشموخها تعلن فضايع انهزام يالله يا رافع ويا خافظ ويا فردٍ حليم=يا من سجدنا له وصلينا صفوفٍ بانتظام نطْلبْك خيرٍ وافي ٍ ينزل على أرضك مديم=من مزنة ٍ برَّاقةٍ تغشى بها قاع العدام يالله يا حافظ ويا باسط ويا رب ٍ حكيم=يا ذا الجلاله والسمو يا خالقٍ كل الانام ينعم بها خلقٍ رجا ربٍ جوادٍ بالنعيم=تزهى بها أرضن بغت عشبٍ يقلدها وسام العالي الوالي ولا غير الله الوالي عظيم=الحاكم العادل تجلَّى في سماواتٍ عِظام تفتح لنا باب السما خيرٍ على أرضك عميم=تروي ضما عطشى بغت فطْر ٍ بعد فرض الصيام العالم الخابر ولا غير الله الواحد عليم=الخالق القابض تعالى باعثٍ عقب العظام تحيا بمزن ٍ مِرْسِلِه قادر على بعث الرميم=من بعد موتٍ أينعت صحرى تكدسها ركام هذا دعانا ربنا والعفو من مذنب أثيم=نستغفرك نستغفرك نستغفرك عدَّ الغمام

وسلامتكم ،،،،

السلام عليكم ورحمة الله وبركاته

صبحكم ومساكم الله بالخير جميعا

هذه قصيدة من جديدي وتعني لي الكثير .......

هااالاااات .. ..

	هامت حروف الشعر في وصف ذاتك=ضاعت وصوف الشوق من صادق الشوق جفَّ القلم مذهول باجمل صفاتك=يِزْهي الورق وصفٍ تكامل به الذوق أحلى من الشهد المصفَّى حلاتك=ينساق لك قلبي من الحسن لك سوق نعسة عيونك فوق ذبلة شفاتك=من فوقها موجٍ وهالات من فوق زهرة حياتي نبعها من حياتك=في داخلي نبضك شرايين وعروق رمشي جلالك وسط جفني مباتك=نفسي صحاري وانت همَّال وبروق عندك هناتي وانت عندي هناتك=لا صار عشقٍ وثِّقه عهد موثوق أغليك واغلي جمرتك من غلاتك=ولو صابني منها غرابيل وحروق ابغيك ونفسي جاهده في لقاتك=شمسك وصالٍ نوره اشعاع وشروق كان الثمن نفسي فخذها وجاتك=يكْتَب على قبري شهيدٍ لمعشوق بكتب وصاتي ودعلي في صلاتك=ارحم عشيقٍ فارق الروح بزهوق وان كان عشق ٍ وافي ٍ من سماتك=عجِّل على من صارع الموت برفوق وان كان غيري مقصدك في طراتك=قلبي وحش ما قيّده وكر وسبوق

وسلامتكم،،،،