ديوان الشاعر الرأوي / فواز ابن غسلان

	ساكر الخمشي وروائعه الشعريه

الشاعر ساكر الخمشي هذا الشاعر المعروف قد جاور الشيخ ضاري بن طوأله شيخ الأسلم من شمروقد اكرمه غاية الأكرام مايغزي الا وهو معه وفي مجلسه مقدره وهو مشهور بأصابة الهدف وله فن باالربابه والشعر وقد عشق بنت من الطواله وقد حيرها ابن عمها وهو سلم لعموم الباديه ماتزوج الا برضاء ابن عمها اما في جاه والا في طمع كثير يكون تعجيز على الخاطب والكثير منهن يفوت عمرها لهذا السبب لهذا زعل ساكر ورحل منهم فدعا عليهم بأبيات فقال:

	يامل قلـبن يـلـتوي لـيـة اــلدوك=بيدين ظــرفن شاطـرن باشـتـغـاله على غـزالن صافـين مابه شكوك=عـيوا عـليه الـذاهـبـيـن الـطــواله عسى يجيهم من بنى عمهم صوك=يـومن بـه الـمـرور يقـطـع بـخـاله جـمعن يعـزل طلعت الشمس مدلوك=مـدمي ولاتـنـفـع عـلـيه الـدخـاله والـبـيض عقب صخيف الوسط عكعوك=كالفرق بين المقتدي والضلالة

ولما انتشرت هذه الابيات غضب عليه ابن عمه الشاعر سند الخمشي لكونهم جميعا جربوا جيرة ضاري ابن طواله

وطبعا سند الخمشي ماذاق لوعة العشق وناره والا كان عذر ساكر لانه يتكلم من النار اللي بقلبه فقال سند ردا عليه:

	ياشــين ياساكر هل العــرف سبــوك=أخطـيـت ماهـذا الجـزاء للـطـوالـه قصـيــرهـم لوعـال مايلـحـقــه صــوك=مـتريـحـن مايـلـحـقــه كـل قـالــه في ضف اخو صلفه من الغوش مزنوك=غـيـر الظــفر ماتـنـتعـدد خصاله جـمعـت مـالن ماجـمـعـتـه على ابــوك=ملبـسـك لبـسـه ماضـرى للبـخاله

فقال ساكر الخمشي قصيدته الغزليه الساحره التي انتشرت في حينها انتشار النار في الهشيم وقال على منوالها

العديد من الشعراء والتي توضح حرقته وجمال شعره ورقته:

	يالله ياللــي تـــودع الــمزن ناشــي=تـفـرج لعـيـنن ناش ماعــاد منهــاش ونــيت ونة مــن له الشـيــخ داشي=صـكـوا عـلـيه الخيل ماقــدر ينحاش كسير عظم الساق غــادي طشاشي=عزاه تسمع لاسفــل العظم خشخاش على عـشـيرن مـرنا العـصر ماشي=علق صواب القـــــلب ماكن سواش يارميح غاد(ن)لي مع الورد حاشي=وقم الثـــــنيه فـــوق خديــنه رقــاش وسمه ثلاث ردوع ماغــيــرها شي=ومن الوســـــوم الباقيه ماعــليهاش لو بس امـــزه مــز عظم المــشاشي=مـــــزة سبيل مولع(ن)حرق الجاش اخاف اموت ان ماحصل لي ولا شي=دغلــــوب خبراء ناشفــن ميها ناش يلايــمــي ياعــل مالــك مـــواشــي=يالعــنــبــوا من لامنــي لابو قــطــاش مســـــكــين بيــاع المــوده بلاشــي=يزعــل على مالون ويرضى على ماش

ساكر الخمشي كانت على وقته مذبحة اهل المسجد المشهوره في المسجد اثناء صولات الاخوان قبل قضاء الملك

عبدالعزيز عليهم واكتشاف خطرهم وكان من بين المقتولين اقارب واصدقاء لساكر فرثاهم قبل موته رحمه في تلك

القصيده الشهيره على ألسنة الناس فقال:

	مبداي باسم اللي له الصبح ينقاد=يابادي(ن) ذكره على كل بادي تقبل دعاوي واحدن قبلها صاد=حيث الدعاء يذكر مجادع هوادي ذبحة هل المسجد ركوعن وسجاد=يظهر لها مـــن بعـــد ذلك مــنادي وجدي على البيحي وعقدي وفهاد=أوي ربعــن من ربوعي نوادي ياعل دارن حل به ذبح الاجواد=تاخذ ثمان سنــين ماســال وادي لما يهش العظم ماجاه رعاد=ويسكن هواها مايطــــير السمادي وترخص بها السلعه ويغلى بها الزاد=وتذهل به المرضع رضيع الفوادي

ويعتبر ساكر الخمشي من اعلام شعراء قبيلة عنزه الافذاذ وربما خفي بعض شعره على افراد قبيلة عنزه لكونه

عاش اكثر عمره في ديار شمر الذين حفظوا الكثير من اشعاره رحمه الله000

اتمنى ان اكون افدتكم بهذه السطور الجميله لشاعر فذ والسلام00

الراوي فواز الغسلان00

	مرثية ابن غيث الاسلمي لاخيه عام 1257 للهجره

صاحب هذه القصة هو عبدالله بن غيث بن دباس بن مجيلد بن محمد بن صالح بن محمد بن رخيم

الجحيشي الاسلمي الشمري وهو من الأسرة التي تسكن منطقة القصيم وتحديدا بريده وكان عبدالله واخوه ناصر

الاصغر يعيشان في حاله فيها شي من الضعف مثل اكثر اهل ذلك الوقت وهو مايقارب 1257 للهجره0

فذهب ناصر للعراق واخذ يعمل ويرسل المال لاخيه الكبير عبدالله حتى تحسنت حالهما بعد الحاجه واصبح

عبدالله من اغنياء بريده 0 وكان ناصر بالرغم من ذلك صاحب مجلس وعلوم رجال وعندما تحسنت الحال

وضع عمالا بالمجلس لتكون القهوه دائما والمه للزائر والضيف0

وبعد مرور اكثر من عشر سنوات وبينما كان ناصر يفكر بالعوده مرض مرضا شديدا فتوقع انه الموت

وارسل كتابا لاخيه عبدالله يقول فيه ابي اشوفك قبل اموت00

وبالحال ركب عبدالله ورحل لبغداد وعندما وصل كان الناس يحملون جنازة ناصر فلم يتمكن من رؤيته

قبل مماته فهاج الحزن في قلبه وصدح بمرثيته الشهيره فقال:

	قال بن غـيـث حاربت عـيـنه النوم =عبدالله الصابر على حكم والي لفا الكـتـاب وصار بالقـلب معـلوم =يذكـر لنا اللي من بعيد يسالي يامال عين شافت الخط مرشوم =تبشربطـوي اليـاس وفراق غالي دنـيـت مايطوي الفيافي من الكوم =ثـنـتـيـن لـمـا تــركن الجــفـالي متـعـلٌي باكوارهن كل شغموم =ضاري على قـطع الفجـوج الخوالي في فرجتن مابه صديق ولاحوم =محذى الوحوش ومهرف الذيب خالي تضالعن عقب الزعانيف والزوم =وقلت اصبرن يانوق هــذي فعالي كم ماردن مع طلعه الشمس مدهوم =يتـلـن مـواردهن غــديرن زلالي اسري بليلن خرمسن مابه نجوم =واصبح على دو(ن)سرابه يلالي مضامي(ن)مابه صديق ولاقـوم =نسقي ونوردهــن قراح زلالي يوم استقل الدرب عن كل زيزوم =وافـقـن مع جـسرالمـسيب عجالي طبيب بغداد الـمسـمى تخـت روم =انشد ولاأدري ويـن ربـي نـوالي كني غـشــيمن تايه الدرب منجوم =غريب دار ويعــلم الله بحـــالي لفيت بيت العز والحبل مبروم =وفكرت باركــانه والى البيــت خالي واللي يناطحــني دخيلن وسلٌوم =وعلي يفــجــع يوم شافــن شكالي قلت الخبر عن ناصر قال مرحوم =جبرك على الله واعتصم لاتسالي وسجمت اعالج زفرة البين بهموم =وصفقت باصباع اليمين الشـمالي وعلى وزيـن الـروح ماناب مليوم =حـيــدن يدنى للحــمول الثــقـالي قلت آه من وجــدي وقول آه مذموم =وجد الجــمـيـلي حين قفا وشالي لو يـنشـرى أشريه واغليه بالسوم =وافـديه بـعـيـالي وحـالي ومـالي كبــدي وجـيــعة ماتبي كل مطعوم =والشرب لو هو من حليب الـمـتالي وقعدت انا مااحبي ولاامشي ولااقوم =وصبرت صبرمحجُرات الجمالي وغديت مثل اللي عن الدرب منجوم =وتغـطـلـست صارالجنوب الشمالي انحـب نحـيب الورق والعي كما البوم =واقـنـب كـما ذيـبن لقا الجو خالي والا علـيــلــن مســتـه سقــوة الروم =تـداركــن بـه مـعـسرات اللــيالي على وزين الروح مانيــب ملــيـوم =والله مايجــلي عــن الكــبد جــالــي كيــف ابانام وساقــف البــيـت مهدوم =عـضيــدي اللــي بالمـودة صفالي مايـوم كــدر خاطري دايم الدوم =ولاعــمــر يومــن قــال ذلك وذالي صــغــير ســن مــات والموت مقسوم =ولاينـفــع النواح كــثرالعوالي اخـوي خادمــني وانا كـنت مخدوم =وحــاش الــمراجل دقــها والجلالي له سفــرتـن تلــقا بها الزاد وشحوم =والعبــد عــند مراكـيـات الدلالي مــن ضــلــع سنجارن لياخشم لملوم =والـضــيف يقرى والعطايا جزالي كــثر البـكا يـرث عمى العين وهزوم =وكــثرالــبكا يالعــين ماهو بجالي مالك عن المكتـــوب يالــعــبد ملزوم =باللــوح مــالك حــيــلةٍ واحـتيالي عــساه بالجـــنة عن النار محــروم =مــتــبــهـجن مــع صالحـين العمالي

	قصيده موجهه للشاعر عواد العلي وعند ورود الرد سأعرضه لكم00

	مــن الـــعـام يـاعــواد والــبــال فــي ضــيـقه=ابــي مـنــك تـرشــدنــي طــريـقـي ونـبـراسـي خـذت خـافـقـي والـيـوم تـنــوي مــعـالــيـقــه=عـنــــودن تـحـــاربـنـــي بـزيــنــات الاوراســي وهـي حـاجـتــن لـلـريــم تـسـعـى لـتـحـقـيـقـه=وتـحـقـيـقـهــا يعــنـي لـنــا قــطــع الارمــاســي وانـا كـيـف احـارب من سلاحــه حـلا ريـقــه=وجـسـمـــن مــعـازيـلـه زهــت زيـن الالـبــاســي فـسـاتـيـنـهـا تـفـــضح ردوفــه تــلاصــيـقـه=ولـون الـنــحـر يوضي مـثـل عـقــــد الالـمــاسـي وصــدرن بـه الـتـــفـاح بـلـــواه مـااطــيـقــه=ومـجــدولـهــا بـمــتــونـــهــا مــثـــل الادمــاسـي غـنـوجــن تـفــنــن يـابـوصـالح بـتـشـويـــقــه=عـيـــونـه مـفـاتـيـــح الـمـــغـــثــه والاونـاسـي تـمـنـيـت مــرقـاد الــدفــى فــي مــشــاريـقــه=دواء حــضـنـهــا يــدفــع غــثــاء كل وسـواسـي خــذت تـاج شـيـخـات الــحــلا مع تـلاحـيـقــه=ولااحــدن قـــبــالــه شـال درعــن ولا كـــاســي لـك الـلـه فــلا تـحـتـاج مـــدحــه وتـسـويــقــه=هـــي الـريــم لاذعــذع لــهــا كــل نـســنـاســي هـي الــريــم فــي روضــن تـمـايـل زمـالــيـقـه=تـخـالــط بــهــا حــواء وربــلــه وبـــسـبـاســي تـتـالا عــلـيــهـا الـغــيــم تـلــمــع بــواريــقــه=تـشوف الـطـخـى يـوضي مـثـل نـورالاعـراسي عــلــوم الـمـطــر تـلـفـي لـهـم مــع طـواريــقـه=وراع الـخــلا يـســري عـلـى كـل عـرمـــاســي ويـطــرب لـهــا طــيـرن سـعـيـدن بـتـحـلـيـقـه=ونـصف الـشهر تـخـضر بـها حـمـر الاطـعـاسي وتـنـازا جـيـوب اهـل الـقـنـص فـي سـواويـقـه=والاربـاع تــرقــى فــي نــبــى كـل مــرواســي غدى الـجـيـب ياعـــواد يـشـكي مـطـافـيـقـــه=تـخـالــط مـعـه صـوت الـمـسـجـل والاتـراســي يـعـاف الـسـهـل كـلـه ويـرقـى مــطـــابــيــقــه=طـريـقـه مــن الـسـرعــه غـدى مـثـل الاقـواسـي يـحــده عـلـى مـرقـاء الــوعــر مـع مـصالـيـقـه=لـفـيــح الـهــواء مــثـل الـعـواصـف الـيـا داسـي تـسـابـق عـلــى ذبـح الـذبــيــحــه وتـعـلـيــقــه=ولا خـاف مـن كــثـر الخـسـايـر والافــــلاســي مـثـل هـرجـهـم يـفـتــح لـقـلـبـي مـــغـالــيـقـــه=رجـالــن كـرامــن مــاوطــوا درب الادنـاســـي ولاحــولـــهــم ثــورن يـعــفــــج خــثــاريــقــه=ولا رافــقــوا رجــلــن هــــذورن وبــلاســــي عـن هــمــوم غـنــدورن فـقــدنــا مـخــانـيــقــه=مـن الـغـيـظ صـبـيـت الـقــوافــي بـالاطـراسـي وجــودي عــلــيـهــا وجـــد مــن غـاب تـوفــيـقــه=سـجــيـنـن وعـنـد الـبـاب خـمـسـيـن حـبـاسـي صـدر حـكـــم تــقـــويــده وزادوا بــتــوثــيــقـــه=دقــايـق ويــصـبـح جــثــتــن مـابــهــا راسـي وله طــفـلـتــن تــشـــبــه حـــلايــا غــرانــيــقــه=وحــيــده وتـرســـم وردتــن فـــوق كـراســي وحـكـمــه مــن الـتـمـيــيـز زادوا بــتــصــديــقــه=وجــروه بـشــداد الــكــلــبــشــه والامــراسـي وقـال اصـبـروا بـنـتــي انـا اخــاف تــعــويــقــه=واخـاف انـهـا تـشـكـي مــن الـضـيـم والـبـاسـي انـا خـايـفـن تـلـقــى الــغــثـى مــن مـخــالــيـقــه=وعـقـبـي تــصـالـيـهـا الـمـصـايـب والاتـعـاسـي تـعــيـســن وزاد بـوســط جـوفـــه تــخــافــيــقــه=مـثـل خـافـقـي يـشــكـي شــطـيـرات الامـواسـي رمـاح الـغـــلا زادت طــعــونــه وتــشــلـــيــقــه=ولااحـدن رحـم قــلـبــن شـكـى الضيم واحـتـاسي عـنـودن رمـتـنــي مــن عــوالــي شـواهـــيــقـــه=عـلـى خـافـقــن يـشـكـي غـثــى كــل هـوجــاسـي طـيـوفـه سـبـب جـرح الـضـمـايـر وتـفــتــيــقــه=طـيــوفــن تــدوج بـوســط فــكري وانـا نـاســي وانـا خـايــفــن غــدر الـلــيــالــي وتــفــريــقـــه=مــمــاتـي فــراق الـلـي تـقــل عـيــن قـرنـاســي هــل الحــسـد شـغـلـتـهـا الــسـوالــف وتـذويـقــه=وتـرمــي بــدرب اهــل الـهــوى كـل لــولاســـي وانـا سـقــت ياعــواد صـــافـــي مــواثــــيــقــــه=اراجــي وفــى الـلـي دهـــورت كـل مــــدبــاسـي

	عبدالله الاشقر جبل الشعر لاتنسونه يااهل حايل

الشاعر الفحل الوافي عبدالله الاشقر شاعر الجبلين الذي كتب الشعر بصدق واتى على ابوابه جميعها وبرع

فيها واثبت حميته لجماعته قبيلة شمر هذه القبيله التي عاش بين ربوعها ولحائل البلد الذي قضى عمره في

ارجائه فكتب الغزل والحكم والامثال ونافح عن جماعته ضد من حاول ان يعيبها بشي حتى لو لم يستطع عيبها

لان شموخها ومكارمها وتاريخها المجيد اكبر بكثير من ان يستطيع شخص طمسه بمجرد بيت او بيتين من الشعر

كما اثبت الاشقر ان حب البلد والجماعه انما يكون بالحميه والبذل والتضحيه وليس لمجرد الانتساب ثم يرى

من يحاول اهانة جماعته او ديرته ويسكت اكراما لهؤلاء او مجاملة لذاك 00

ولعلي اخذكم معي في جوله بسيطه بين اشعار هذا العلم الشامخ والبحر المترامي الاطراف والقلب الغيور

والروح الشفافه عبدالله الاشقر رحمه الله تعالى00

ولعلنا نبدى برده على الشاعر فهد بن صليبيخ الذي قال :

	يانجد من سماك نجدن غوا اسماك=هو ليه ماسماك يأم البـلاوي ياصبر سكانك على شين ملفاك=واللي مكذبني يقول انت غاوي اللي ببلدان الاجانب غذاياك=ماهو من التقصير امرن سماوي اللي حداه العسر واصخى بفرقاك=يبي المعزه لو يسمى جلاوي ياخذ سنين وتالي العمر ينساك=ويبكت اللي لعز عينك رجاوي ولو ماجفيتينا حشى يوم نجفاك=ولا من تلجى بك يذوق الحلاوي كم واحدن مع جور شورك تمناك=وجدن على مسكان جالك شفاوي يستاهلك من صان جالك وصفاك =زبن الجلاويه ربيع الفداوي يوم ان ابن مقرن بسيفه تولاك=خلا سنامك والفقار امتساوي ركب عليك وطوعك لين خلاك=اطوع من النظوا ذلول اللحـاوي حرش العكوب موثماتن ثدايك=بيضن دفوفك من غبيط الرواوي حمال مايفخت بلا داك برداك=يحتار بك خطو الطبيب المداوي ياعاد ماعرف ارفق الناس لدواك=كيف الحول يانجد بامرك نساوي هذي فعال ارياك يوم الله اعماك=راحت مصاريفك لغيرك هداوي عسى الذي سوى رسومك وسواك=يرسل عليك من الميازين هاوي حتى نريح ويسفه القلب طرياك=بليا رجى طليان ربقن تلاوي ابي اليا من المعيل تمثناك=يضرب على تالي ارسومـك خـلاوي بس الوحوش وناعي البوم ينعاك=والذيب من قل الأزاويـل عـاوي يانجد والله ماتسوى سواياك=نفسك علينـا مثـل نفـس المهـاوي قومن تحصدينه وقومن ترجاك=وقومن تجلينه بحامي المكـاوي اللي على الرجلين ماهو ولا اياك=ولاتصلحين الا لمن كان قاوي من شان عدوان الشريعه نفرناك=من شاخ بك عذال هو والهواوي

هذي قصيدة ابن صليبيخ كامله حسب ظني بعيده عن الزياده والنقصان كما حفظتها من محمد العيسى ابن هذال

قبل سبعة عشر عاما وهو في قوته شفاه الله تعالى فرد عليه العديد من الشعر لكنه كان يرد عليهم ويسكتهم بكل

قوه وكان من ضمن ردوده رده الذي يقول لاحد الشعراء

	قل لي وين انته يوم صولات الاخوان=يوم ان برزانن تهظم عباره يوم اجتمع بالجو عج ودخان=والا انت هرجك مثل طقعة عزاره

الى ان رد عليه الاشقر الذي اسكته الى الابد00

يـقــول الـشـاعـر الـشـهـم عــبــدالله الأشــقــر :

	يالله يامنشـي السحـاب لـدار = عليـم مايخفـى علـيـك مــدار ياواحد كل ذليل لسطوتك = بك نستجير بحيـث مـن جـارك يجـار وخلاف ذا ياعيال حوفوا على النضا = باكوار مامونات حوفوهن بكار حوفوا على مثل الادامي بزيهن = طفقات يا طـال المغـار اسطـار عجلات وجلات خفاف على الوطا = تعاطن المكنون طوعات ذعـار لاهاوزوهن ثم لجن ولجلجـن = شـراد فـراد عـن النـاس نيـار انا اذكر الله يوم علق دلاهن = بيض تمارى في ضحى العيـد زمـار بالله عليكم يم حيٍ نـون بكـم = لامحـت المعلـوق للفـن استـدار قالو لحايل حياها عزوة لنا = حاجة حزيـن القلـب ماعنهـا عـذار قد قلت لهم بالله عليكم تريضوا = حيث انكم لـدار السـلام اشطـار وصلت جمالتكم وشيلوا وصيتي = سيروا جناح الليل مع نور النهـار اسركم وليـا وصلتـو دياركـم = اسرارنـا معكـم تصيـر جهـار اضفوا على دار الضياغم سلامـي = سـلام مـادام السـلام يـدار عداد ماحدره وفوقه من الملأ = وعـداد مايرمـي الحجيـج جمـار وماسمعت الاذنين واللي يرى البصر = وماشالت البيداء ثرى واثمـار سلام من قلب من الحـب مستقـي = وداد مانـاح الحمـام وطـار احلى من الصحة بعد سقم انجلى = والذ من يسـر يسـوق اعسـار دار الصخا والجود مـن قـام ساسهـا = دار بهـا للغانميـن وقـار دار بها يكسـى الارامـل ومـن عنـا = دار اهلهـا للديـار دمـار ياما فنت من دونها من قبيلة = وتعشت الاخيـار مـن دونـه عمـار هي امنا خيرة وشره يعمنا = لـو شـان وقتـه مالنـا عنهـا منـار عيبا على رجل صغير كبر به = كبـرت متونـه بالمضيـف ونـار ياكل حلاويها ويشمت بمرهـا = ويدعـي عليهـا بادهـر والدمـار قلت قال نارك غير دارك عدو له = تر والدك عقـه عـذاب وعـار ياقايل الطليان خاب الرجـا بـك = الزيـر مايذكـر يجيـب جفـار لولا عمامك كبر عضاك فضلهم = ينسا ثنا المعروف من حظه هيـار ذولا الجنايز سدهم فعل جدهم = ذولا وبا الفرسـان برمـاح قصـار اخوان نوره سترها لا عتزو بها = مل كادهـم تلقـى العثـار كثـار ياويل جمعا بالملاقـا بلـي بهـم = عـزي لقومـا تقتديهـم جهـار قومن على الضد ماعنـه صـده = للجـار كـار وللحريـب فقـار الله على لانبهـوا ثـم صوتـوا = شبيـب وعيـاده عطـوا اخبـار قدا لهم من رزت الجيش صيحه = جـض النضـا محتريـن مغـار قالوا ترا باكر تمد ثقالنـا = قـادوا مـن الطفقـات عبـرات عبـار مدوا هل البيرق وشمر تقدموا = وصفوا ورا الدمـام دربيـن كثـار بيرق اهل حايل توسط جموعنا = عبده يمين الشيخ والصايـح يسـار قالوا مغرب قلت هذا مرادهم = تلقا حلال الشرق مـن قبلـه كثـار قوما تعداهم وقوما عدا بهـم = وقـوم خـذاه بليـل والاخـر نهـار جوٍ لقاه خلو وعليـه استـراح = وبعـد ذا بايـام للغـرب استـدار خلا عليهم يشيب الشاب ماجرا = خلج النساء والنيب تسمع له صرار ثم انتسف لديار حيه وعزوته = لقصرا زمـا مبنـاه حامينـه نمـار تلقا مراكيب الاجانيب لا لفـوا = غاشيهـم الـذل والكبـار صغـار كلا يريد الصلح يسوق ماطلب = من عقب ذاك الطول غادين قصـار هـذولا مساييـر هادييـن بالمهـل = وذولا بعيديـن يبـون اخبـار وهذولا اهل سيه وحسنا تعمها = يبغون مـن مرعـا الحمـاد جهـار مار سبحان من يدير الاملاك بيده = مغير دهور الدور من داراًلجـار مار افتكر ياصاح في نثر شملهم = راحوا هل الطولات باحولاً انحدار راحوا هل المعروف عنا تقربو = واختارو الاجناب عن دار الاقراب قوم الندا ضيم العدا صفوة الملأ = ترعا بهم الجيران بدروب الاخطار ياجا الخبر منهم لقوماً تكفكفوا = الكل يطق لبيت فـي خافـي غتـار يخشون قوما روسها تنقـل العيـا = ربيعهـم يـوم وحـلاه مـرار شمر اهل ضمر وقحصاً من المها = شمر ليا غشـا الكـرار كـرار يحيا وربيعيه ولاسلـم وزوبـع = يالابـة بالكـون ماتعطـي قـرار عبار جبار صبار على اللقى = لهيـب الجمـوع للحريـب اصقـار غلاب جلاب فهودٍ زلازل = فهودٍ زهـود نكـود وانمـار ضـرار تكره ملاقاهم كما تكره الوهم = ماصٍ به المفراص مايشكـي الغيـار اعيادهم بانكادهم ساعات اللقـى = شلـع العـدا والعاديـات اطيـار ولاينشمـت بأمـرٍ ليـا حـل القـدر = امـر يديـره واحـدٍ قهـار يوم انها شامت لشيخـاٍ شقـا بهـا = سلطـان نجـد طـلابٍ بثـار شامت لابن مقرن قديماٍ من اهلها = مالومحت000 والناس الثبـار عبالها جزل العطى مدلهمه = سبـاع علـى عيـال السبـاع شطـار شيوخٍ بظل شيوخ قبلٍ بظلهـم = تـر مثـل هذاقبـلٍ عليهـم صـار الله ينصر من نوى نصـر ديننـا = ويديـم للديـن العزيـز انصـار تمت وصلى الله على صفوة المـلأ =ماهـل همـال المخيـل بـدار

ومن قصائده الغزليه التي تعتبر من جواهر شعره رحمه الله00

	دار الغرام ولـف بالقـلب لافـوف=لاع الـولـع قـلبي وروحـي صرمها ياخشم ريم مـن عنا العـين مشـفوف=سيـف الهـوى بالحـال يـلحى لحمها القلب رفـرف وانغرف غـر بصـدوف=والـروح فـوح الجوح يلفح فحمها جسر الغرام ابرا معي زل بزلـوف=نـزع الزغازغ زلـةٍ عـن قـدمها مـانيب كـف الـذل عـنـي بمعـروف=لا تبـحثه بـالله يقبـس لـغـمـها الله خلق بالنـاس نـاسٍ لـها نـوف=والشمس ما تخفى العرب مع عجمها كاس الهوى بالباب الأسباب مـذروف=مـن ذاق رشف شـفاه يفرق طعمها لولا الهـوى مـارشـرش الريم بخـشوف=والنـاس نسناس الهوى هـو نسمها خشف عفر فارع ظـفر عـشر مكشـوف=تـل القلوب وسلـها واستـلمـها رعـبوب راعـب كــاعب طرب غطروف=عمـهـوج داعـج لاعـج عـاج فمها تمـشـي تـهز الخصـر تنعاج بعطـوف=مـال الهـوى به مال عوذا كصمها بعيـونـها رايـات وايات وحـروف=يـرمي هل هل الغايات سم سهمها مـادار دور نهـدها نـز بـوقـوف=نشـو نشى مـانيش مشـمـش حـرمها واكثل كثيلٍ لـه كثـاثيـل وزلوف=يلعـب علـى هـاضم ضـميره هضمها عفرا برا طرز الطرا صدر واردوف=اطـخم طـخم طخم الطراخم طخمها شربـت شـذى شذر الهوى كمع وكفوف=مـن طـاح بتفاحه حـرق من وحمها يانـاس خلـوني احوفـه وابـاشوف=لا مـوت فـوت وناضري ما فهـمها يسـلب قـلب المبتلي فيك مـكلـوف=ارفـق تـرى نـفسي تقـطع وذمها امنع طريح طـاح بيـديك مـكتـوف=سلم العـرب مـن سالمه في لـزمها

وقال ايضا في الغزل رحمه الله تعالى000

	الله من قلب به الغيض منتك=ومتضايق عده بقفلن وتوباك والصدر كنه محدثن بالحشاضك =ياعود ماصبرك على كبر بلواك نطيت اشوفك واتلهابصورتك=وفزوفتح ناظر العين ماراك جدد جروحي ماشين مثل مشيتك=ووحا نحيبي والتفت قال وشجاك قلت المشقى له مع الناس ركزتك=ميرالبلا ملحال حالك وحلياك هذاك لاخزك باللعيان حرك =نجل هدبها في تماثل سجاياك يازين والي ودع الزين نطحتك=وعطان من حبك ملايين وعطاك اني بحال ماتمناه مرضتك=ون شفت حالي ماتمناه للعداك اسير مجروح طريح بسربتك=وعزيل من مثلي وطنه سراياك

ومن جواهره التي ذكر بها الجماعه وطيبهم رحمه الله تعالى000

	طلّتْ وهلّتْ واهمـل الوبـل مـدرار=يبكي سماه ويضحك الورد مسـرور غنا غنـوجٍ تبتسـم لـك بالازهـار=عبيرهـا مسـكٍ وعنبـر وكافـور تشكّلتْ فيهـا الروابـي والاشجـار=لبْستْ حللْها زيْنـة القـد والطـور فاحتْ روايحْ ريح روحـه والاثمـار=نشوةْ شذاها تنعش الـروح بعْطـور عليلهـا يشفـي عليلـه بالاسحـار=ترقص غصونه بالصبا تيه وغْـرور دانٍ جنا جناتهـا الخضـر وجْـوار=طربٍ بها البلبـل يغـرد لشحـرور تكاملـت وامسـتْ محـطٍ للانظـار=صيغت بها الاشعـار نظـمٍ ومنثـور ناديتها بخضـوع واجـلال واكبـار=مستسلمٍ هايم ولـو مـت معـذور بالله يـا نـور العـذارى والاقمـار=من وين يا بـدرٍ تكامـل بديجـور ؟ قالت سنا شمس العرايس والاقطـار=تاج الجمال ومنتهى الحسن والنـور‍ أهلي رجال المجد وافيـن الاشبـار=لطّامـة العايـل فنـا كـل طابـور ياما تفانوا وارخصوا غال الاعمـار=من شان شاني واسمي اليوم مشهور حايل فخر شمر هل الـدار والجـار=يوم اللقا صبيان حايل علـيْ سـور قومٍ اليا ثـاروا هـل الـدار للـدار=تفرح بهم عيني وافاخر هـل الـدور قومٍ تجـر الضيـف لكتـار وبهـار=طبعٍ تواصوا فيه غيّـاب واحضـور يـا دار حاتـم لـو تنحّيْـت مقـدار=القلب بين السمر والحمـر مأسـور دارٍ نشينـا بـه مواليـد وكـبـار=حقّـه كبيـر وعقّهـا زور وفجـور أمٍ لنـا نفخـر بهـا سـر وجهـار=أهل الجبل دونه سبيل عـن الجـور ياما وطوا دونه من النـار والحـار=أحدٍ فنا واحـدٍ بـذل كـل مذخـور

ومن الغزل ايضا قال000

	ياملا ماخبرتوا للمـودة مـداوي=دام حالي وروحي ماقضت كلها يوم ربي نواني بالشقا والبـلاوي=ساقها لي بغرة ثـم ساقـن لهـا جية الزين والله ماتجي بالهقاوي=كلمة مع رفيقٍ قلـت لـه قلهـا مقبلٍ ويتبسم مثل عين النـداوي=الهوى يستوي له والبهـا دلهـا يامليح المجدل ذب عنك الغطاوي=جعل عينٍ تملك ماترى من لهـا بالخديد المورد والمقاد الضباوي=من ثمانك تبـل الـروح وتعلهـا ياغضيض مضمر مستميلٍ هفاوي=يشتكي من ردوفه متعبـه تلهـا الله اللي محطـك كيـة للهواوي=عيذها من عيون الناس تفطن لها

وقال ايضا في الغزل0000

	سلام الله يانور القناديل=سلام من على قلبي سلاما الاما الهجر يازين التعازيل=الاما يابعد روحي الاما جرى لي من سبب هجرك غرابيل=ابيك تبدل الفرقا بلاما ماحسب انك قطوع يالغضي حيل=تنام وعين خلك ما تناما خذيت الزين والقلبه بذا الجيل=حرام ما ظهر مثلك حراما شربت من الهوى كمع بلا كيل=وذلوا لك سلاطين الغراما سحرت القلب بعيون مظاليل=تجوح الروح بجروح تدامى علا صدرك تفافيح مقابيل=به الارواح حرقات عداما حبيب الروح ماغيرك محاصيل=ولا لي في هوى غيرك مراما

وهذه قصيدته عندما مر على قصر الاخيضر وتفكر بالدنيا وكم مر من الاقوام على هالقصر وراحوا فقال00

	دندار دار بلبة القلب يليب =ارى جوج ماجوجه ورا العوج يليب عليُ فار طوفان النبا واحتشا الحشا = كما فار تنور لابوحام يهيب لم علا ماها علا كل ماعلا =تعلت ومجراها على ماه حليب تحدر لها الجاري ولو مات سيّسه = والأرياح زاجرها بالالواح عطيب وأنا بت في غبات الأنجاد حاير = به ساعة غب وساعات ……. إلهي معاذي هو ملاذي ومزبني = عطوف لطوف لا دعي يجيب لها العزة العليا مع الطول والبقا = عليّ تعلا في سماه رقيب ترا كان مافيها ولا كان سكنها = ولا كان مخلوق على الكون يجيب ولا سبعها العليا ولا سبع بيدها = ولا سبعها الجرا ولا همس دبيب إلا بتقدير من الخالق الصمد = حكيم عليم مستعان قريب أنا عبدها المملوك ذلي لصبري = وياذل مخلوق لها الرب حريب أناجيه وحبالي بعفوه وثايق = ثم أني بفضله طامع رغيب أجاب يونس في لجاليج غبه = واعاد لأيوب ويعقوب سليب هو الواحد الكافي هو الشافي العلا = هو اللي إلى نيدي للأغرار يجيب مالي سوى وجهه إله يغيثني = ولا لي سوى جوده بالأرزاق نصيب أساله وهو عما بالأسرار عالم = وحاشا لعبد لادعاه يخيب نوضي علا ذا الطول والحول والبقا = ليا جل نوضي مشتكاي حسيب ألا ياهل الألباب والفهم والنهى = لقيت التبصر بالليال عجيب تفكرت بالدنيا شذاها وجلها = إلهي تهيل بهولها كل لبيب تجي لك كما العذرا إلى بان ودها = غاد ضميره من هواك سريب وتوريك من وجه كما بارق الدجا = وتقسم فلا لك في هواه شهيب حتى ترى قلبك تعمق بحبها = وتراك فيها هايم تليب تجذ عنك بساعة وأنت غافل = تجفاك بصدود عن القلب يغيب تسقيك من غل الليالي وغبنها = تموت قهر وإن حييت تشيب تلقاه مع غيرك تزحم غرامها = صارت معك شري ومع ذاك حليب لا تأمن الدنيا تحمله على الوفا = تراها ماله مذهب يطيب من خلقت الدنيا ونصبة جبالها = إلى نفختين الصور وحساب الحسيب ماعاهدت عهد على الكون وانجزت = ولا عد لها خل من الخل حبيب ولا حمدها واحد راغب بها = إلا يذمه حاضر قريب ولا أضحكت مخلوق إلا بكى بها = ولا دام فيها واحد طريب إلى تم به أمر ترقب زواله =ترى كماله للزوال نديب أشوف أنا الوهاج يكسف إلى كمل = والشمس تزهر لابغت تغيب أبصر بمسعاها بناس تقدموا = تشوف منها عبرة تريب هلت عليهم سحب الأنعام وارغدوا = وقامت تصب الطيب من فوق الرطيب تعظموا فيها بعز وسطوة =تطول لهم لو هم بسكنى الوطى … دارت بهم وقلوبهم له حزاين = وصاروا علوم للزمان تصيب ماتقل شافوا ساعة ماتلذذوا = أحلام ليل ماتراه ذهيب هذي منازلهم شهود لمن بقى = خوالي والبوم له فيها نعيب مير ليت الدوارس تعطي السايل الخبر = تنبي عن السكان هيهات تجيب دنياك ماسوم رضاها وغيضها = غيضه قليل ضحك منه صعيب لله ما يدله بها كود جاهل =قليل التبصر بالليال وطيب ماذاق منها لسعة لاجل ينتبه = حوار على أمه والزمان خطيب ترا هل التجريب فيها كواظم = يرون مره من حلاه قريب سقتهم من الصافي وهم به غراير = وضمت لهم كدر الليال غبيب وصارت فعايلها بهم عبرة لهم = والكل منهم كاظم صويب مير إن دارت الأفلاك بأمر العلا لهم = صاروا لها طيّ وهي طار كريب تمسكوا فيها ***ف من أمرها = وقلوبهم ببحور الادبار عجيب الأيام له رب عظيم يديرها = بامره جميع الكون دولاب يليب لكن أشوف العلم فضل به الفتى = فضل بعلمه واللبيب طبيب يسلك مناهيج المعارف ويهتدي = لو هو عديم الشوف والمنطي طليب لاشفت أنا فعله بالاسلاف والخلف = أصير منها خايب رعيب توطا لها حر تربى بجالها = تسوقه بعسره للملام غصيب بالأمس له منٍّ على كثرة الملا= واليوم بين الناس مسفوه سغيب وشره على من به عن النوب ملجا = ليا جاه مجروح الضمير يطيب لا ضك بك أمر جليل ذكرته = تلقاك في وجه كما العد عجيب ولا تأخذ إلا هيلع أو صميدع = مفراص ماص والابن نجيب لا سددوا عمالة الرأي رايهم = يظنون أنه ناجح صعيب وقامت تخوض الناس في دفع مانبا = وكل يناظر صاحبه غضيب نقضهم كما نقض الجواري لغزلها = وضربهم بمفتول من الراي صليب هذا تشيله حاضر مااهتنى بها = توحي لربعه من وراه نحيب تشوف بها ناس تزاوم نفوسها = دجاج تبختر بالكلام تهيب ضغول تخصه ذي مزارع وثورها = وهذي مناغزها تصب صبيب اليوم حصن للمطاليب شبشبت = توسطوا قالات الاحجا تزيب إذا مر واحدهم مع الناس ما يرى = شبر من البيدا يخب خبيب زوم على بوم من أمس تعظمت = تقول يالتبعي وراك تغيب لو هو من أهل المجد من عرنة الثنا = ما يجرح المعلوق للعليا قريب أخف بعيون الخلايق من الهبا = غدا لها الخنات خيال لعيب ماله من الناموس حق مع الملا = ولا حوى الطولات ماكرها الخريب ذيب على اللابه يسرك ذهابه = سيف على الأقراب مع غيره عسيب رفيع العمد ياديب يدرا ويقتصر = عن كل درب مايراه حبيب ماتقبل المخماة نفس رفيعه= ولا يلبس الأدناس من ساسه عريب يأبى جناح الصقر يلفح لجيفه = يرزق وراها أو يموت رديب مير أبصرت لاجا للمناجيب قصرها = يفنون شبان والأنذال تشيب لكن أرى الديان يأخذ خصايص = حيث أن شمس المستدين تغيب صاروا هل المعروف غُرب مع الملا = وضاقت فجوج البيد بالواف النجيب قضوا يافتى طلابة المجد بالعنا = ماظن منهم بالوطى كتيب من ماله الناموس والجود والوفا = خلي على المرحان ملهود غضيب هل الشيمة العليا هل الجار والندا = راحوا وخلوا بالزمان مصيب خلوا مع الأحيا سطول تضمنت = تبقى المكارم والعمار ذهيب إن كان باق من هل المجد ماجد = فهو عايش عيشة ذليل تعيب يكفيه من دنياه أمر أمرها =والا المصايب دايم تصيب أمرها رجوى لئيم إلى كبا =ورده مع الأثار بحجاج كئيب وهو عاكة لص بخيل أرث بها = ما يدفع القراع في حبة زبيب تاقف له الجلاس من شأن ميمته = لو كان مابه خصلة تعيب لافرغت الايمان كثرت عيوبها = لو سلفت بالجود وتفك العزيب اليوم خير القوم وادناه واشجعه = رجل دني النفس له مال هضيب زماننا يمحي ويمشي على القفا = مداسه على راسه تراه عجيب تطمن به العالي وطالت به الوطى = وذاب الجبل ياذيب من خوف الرطيب غابت رسوس الناس واخفت عدودها = قل الحيا والسيل ماياطا الشعيب رخيص بها المرسن عزيز بها القفا = يمشي بها السرحان والقنفذ طريب بانت طيور الليل باول نهارها = وغابت طيور من ورا الطور تليب تعلت حباريها وذلت صقورها = وطيّر خشاش البيد من عقب الدبيب وصارت مخالبها سيوف صوارم = والسيف يخشى مخلب زريب تهنا يساريها بصنعة يمينها = الاشمال خصم واليمين قريب هذي سجاياها وهذي خصالها =تبا لها ،تبا لها، تب ، تبيب واوصيك أنا كان أنت تفهم وصيتي = ترا راعي التجريب بيطار طبيب أحذرك أنا عن ملة الهيس والنساء = ترا ملة الاثنين معيار وهذيب ولا تصحب أهل العيب والريب والردى= خلك من المشبوه واحزابه حبيب عاشر خيار الناس تحمل على الندا = توقى لك العثرات وتحير الحريب حيث هل السايات هم عرضة البلا = ترا سهوم الناس للشارة تصيب ولا تزحم الشاشات تكسب بها العنا = لا صار ماتعنيك خلك له جنيب ولا تعتني بالكبر والزور والريا = تراهن شهود النقص والخزي القريب لامدك السلطان بامر على الملا = خل الهوى والزور كان انك أديب ولا تحسب أن الحرص للمال حارس = ولا تحسب ان البخل بالدنيا يثيب توكل على الكافي والاسباب جرها = ولا ضرك المعبود ما ينفع قريب الله يضرب حوزة الكفر بالفنا = ويرفع منار الدين بالوال النجيب

ومن لذائذ شعره الغزلي هذه السامريه التي عشقناها لاننا كنا نسمعها ونحن اطفال 0000

	ألا يامل عين عن لذيذ النوم مشطونه =وجار النوم عن موقه وزاد الويل والوالي وحياة اللي تخضع له جميع الخلق يرجونه = فلا احسب الهوى يذبح لمني شفت انا حالي انا توي عرفت ان المحبه زايد كونه = تسل الروح برموع له المعلوق ينشالي نطحني فارع دالع يشوح الريح بقرونه = مغر يطرق القذله يحسب المطرق خالي تذير يوم لاقيته وضف الراس بردونه = تذّير قلت لاتزمل انا المملوك يالغالي غرير غر في زوله وعيني فيه مفتونه = مغر بالهوى توه غرامه لاح باقبالي

ومع الاسف ان الكثيرين من الناس لاياتون على ذكر الاشقر الا عندما يختلفون ايهم شاعر الجبلين الاشقر او الجريفاني 0 كلهم

عينين براس وقدموا ابيات المجد والفخر للديره وللجماعه فلاينبغي ان يكون هذا شغلنا الشاغل فينسينا ذلك ماقدمه الشاعران لنا

من فخر ومجد رحم الله الميت منهم وابقى الحي 00



هذه نقطه في بحر افتتحت بها هذا الموضوع وارجوا من الاخوه ان يدلي كل شخص بدلوه حتى يكتمل

الموضوع لكي نجمعه بعد ذلك بموضوع واحد والسلام000


(((الراوي)))

	اختلاف الدويش وبن سويط بلغز الخلاوي وتحكيم بريك الاسعدي

في حدود عام 1195 للهجره نزل الشيخ فيصل ابن سويط شيخ الظفير


على بقعاء في وقت الصيف للقرب من الماء وبقي لمدة ثلاثة اشهر هي ايام الصيف

0 وفي البدايه كره بريك راعي

بقعاء او خاف بمعنى اصح ان يكون هناك مضايقه منهم لاهل الديره بسبب كثرتهم0

الا انه وبمرور الايام اكتشف ان ذلك الظن غير صحيح فقد وجدهم في منتهى الاحترام

والخلق وعدم التعرض لاهل

الديره وممتلكاتهم كما نشأت علاقة صداقه قويه بينه وبين الشيخ فيصل ابن سويط

كما قال بريك:

	حنا كرهناهم ليالي ورودهم=واثريهم السكر بجوف حليب تسعين ليله جيرة الشيخ فيصل=تقل ربع يوم مع احب حبيب عسى طارشن قال السويطي مقفي=عسى ذلوله ماتدب دبيب

وعندما قرر ابن سويط الرحيل لم يخبر بريك وارتحل في الليل وعندما اصبح بريك

وجد السويط قد ارتحلوا وكل

راعي ذود عقل بكره بمراحه لراعي القليب اللي كان يسقي حلاله منه0

تضايق بريك وخاف ان رحيلهم ليلا بسبب اذى او اهانه من واحد من اهل الديره

فأرسل اخاه خميس في اثرهم

فلما وصل لهم قال ابن سويط اخبر بريك ان وجيههم مثل بياض الشاش ومادفعني

لذلك الا كراهية دموع الفراق

فرجع خميس واخبر بريك فقال بريك قصيدته المشهوره ومطلعها:

	شربك قراح الماء مع الناس عيشه=وشمك هبوب الريح والشوف قايد وقرب حبيبن من حبيبن يسرني=والبغض هذا من مناه البعايد عساك يادارن تلم المرشد=تهل عليك المرزمات الرعايد على وجه شيخن من شيوخ المرشد=لهم بميلات الوهيد العوايد

وهي طويله 00

وبعد سنتين جلس الشيخ فيصل بن سويط مع الشيخ الدويش شيخ مطير (ولاادري

بالضبط ايهم) فتذاكروا الوفاء

وجاء الذكر على وفاء الخلاوي عندما اطلق الظبيه لانها تشبه عيون ميثاء عشيقة

صديقه منيع بن سالم والتي

ذكرها الخلاوي بقوله:

	يقول الخلاوي والخلاوي راشد=هرج الفتى وافق قريض البتايع يامبلغن مني منيع بن سالم=قديم السبايا والجيوش القوالع قل حبايلي صادت عنودن من المها=رباعيتن من سايلات المدامع وذكرت وصاتن من منيع بن سالم=وغيري اليا من جاع ينسى الودايع

الى قوله في القصيده عندما قال انه ربما ياتيها وحش وياكلها ( الظبي) فقال في

وصف الوحش هذا:

	قليل قذى الاعيان لاناش نوشه=من الزاد معتاشن بها غير شابع يقعد بها يومين والا ثلاثه=وخطرن بها يقعد الى يوم رابع

فقال ابن سويط هذا قصده الذيب وقال الدويش لا هذا قصده الطير 0 فتراهنوا من

فرسي لفرسك واختاروا بريك

راعي بقعاء يكون الحكم00

وهو الطير على كلام الدويش والسبب كلمه وحده وهي ( قليل قذى الاعيان) يعني

الوسخ بعينه قليل وهذا ينطبق

على الطير وليس الذيب0

وعندما جاء المرسول لبريك عرف ان فرس صديقه ابن سويط راح ياخذه الدويش

فلجأ الى خطه ماتضر الجميع

فقال للمرسول باقي بيتين من الوصف وهن :

	قليل قذى الاعيان لاناش نوشه=من الزاد معتاشن بها غير شابع يقعد بها يومين والا ثلاثه=وخطرن بها يقعد الى يوم رابع محنوني كالقوس من مهرفن به=شجاع من بعض السباع الهلايع عشاه دم الجوف في ليلة الدجى=وشربه من جال الحوض يلقاه ناقع

يعني ازاد بيتين من عنده علشان يصير الوصف للذيب بالضبط00

وهكذا صار الوصف ينطبق على الذئب ثم قال للمرسول امسك بن سويط واهمس

باذنه وقل يسلم عليك بريك راعي

بقعاء ويقول لاتاخذ فرس الدويش تراها بوجهي00

وفعلا فهمها ابن سويط وفهم ان الحق مع الدويش وان فرسه ماتحل له وان بريك

فعل ذلك فزعه لصديقه علشان

يفك فرسه 00

وطبعا بعد اسبوع عجز يصبر ابن سويط وهو يعلم الدويش وقال هذي فرسي خذها

لان الحق معك انت0

فقال الدويش مدام بريك قال ان فرسي بوجهه ؟ اجل انت فرسك بوجه بريك عني والله

ماتجيني0000000


رحمهم الله جميعا على هالسوالف الحلوه اللي توسع الصدر000

	طير ياللي بالجناحين خفاقي

	طـيـر يـالـلـي بـالـجـنـاحـيـن خـفـاقـي=مـاشـكـى نـار الـهـواجـيـس مـن شـوقـه ان نـزل يـنـــزل نـبـا كل شـوهــاقـي=وان بـغـى لـه وجـهـتـن شـال طـاروقــه يـشـلـع الـجـانـح تـحـت كـل بـراقــي=الـبـشـر تـحـتـه والامــزان مــن فــوقـه مـاوقـف عـنـد الـجـمــارك بـالاوراقي=لاجـل يـدفـع قـيـمــة الـخـتـم وحـقـوقـه او وقـف سـاعـات مــع كــم سـواقــي=فـي لـهـيـبــن يـجـدع الـنـفـس مـزنـوقـه مالـقـى من نقـطـة الـحـجـز مـنـطـاقـي=عـسـكري يـنـفـخ على الـنـاس بـشـدوقه صابرن يـشـكـي لـواهـيـب الاشـواقي=والـهـواجــس تـحرق الجوف وعـروقـه تجـتـمـع بالـقـلـب مـن كـل الاشـنـاقـي=ويــل مـن يـاصل لـهــيــبـه لـمـعـلـوقـه مـن عـشـيـرن بـالـحـلا حـاز مـا لاقـي=لابـسـن زيــن الـمـلابـيــس مــن ذوقــه مـهـرتـن فـوقـه شـجـاعـن ومـطـفـاقي=دايـمــن مـع سـاقـة الـقــوم مــصلــوقـه وعـيـن ريـمـن ترتـعـي قـبـل الاشفاقي=تخـتـفــق بـيـن الـمـشـاريـف وفـلـوقـه مـزبـنـه عـالـي شـفـى كـل مـطـبـاقـي=فـوق روضـن زاهــي نـبــت رقـروقــه جـافـلـن عـن بـنــدقـن بـيـــد تـفــاقــي=تـودعـه مـع هــبـرة الـفـخـذ مـصـفـوقه جـاه وبـل الـوســـم بـالـوبــل دفــاقــي=وزان عـشـبـه وارتـفـع سـاق زمـلـوقـه خـفـرتـن زيـنـه جـمـع كـل الارنـاقــي=لـيــن صارت بـيـن الاريـام مـفـروقـه الجـديـل بـمــتـنـهــا طــاق مـاطــاقـي=والـردايـف تـشـكـي الـثـوب مـن ضوقه مـع حـلاهـا حـايـزن زيـن الاخـلاقـي=الـوصـايـف فــي حــلايـاه مـطــبــوقـه حـبـهـــا فـي ذابـح الـبــرد مـشـراقـي=لاضحـك شـفـت الـثـنـايـا لـهـن لــوقــه لاطـرت لـي فـزة الـروح بـشـهــاقــي=كــن قـلـبـي والـمـعـالـيــق مــحــروقــه طـول لـيـلـي سـاهـرن ضـايـقـن شاقي=كـن روحـي بـيـن الاظـلاع مـسـروقـه لـيـن تـنـشـف بالـقـهـر كـل الاريـاقـي=ذاهـلـن بـالـفـكر عـن كــل مــخـلــوقــه ريـحـهـا ريـح الـمـعـاطـر بـالاسـواقـي=كـنـهــا فـي غـدفـة الــزيـن مـدفــوقــه قصر حـبـه فـي خـفـوقـي بـالاعـمـاقـي=وارتـفــع مــن دون لـبـنــه وطـابـوقـه والـلـه انـه مـاغــدر بــي ولا بـاقــي=والـظـروف الـظـالـمـه هـي سـبـب عوقـه سـاق لـي بـعـهـود الاحـبـاب مـيـثـاقي=ولا ظـهـر مـنـهـا كـذايــب ولا بـوقــــه ثــم صـار الـزيـن لـلـظـرف مـنـساقي=وشـفـت روحـي مـن غـثـى البعد مفـلـوقه صار فـي بـابـه ثـلاثـيـن مــغـلاقــي=واصـبـحـت فـيـه الـمـسـامـيـر مـطـقـوقـه دايــمــن قـلــبــي لـــرويـاه تـواقــي=قـطــعـتــن مـن داخـل الـجـوف مـشـلـوقـه الـمـفـارق والـجـفـى صـعـب يـنـطـاقـي=يـوم صـارت حــب قـلـبي ومــعـشـوقـه لـيـن رب الـعـرش يـامـر بـالاوفـاقـي=لاجـل اشـوف صـويـحـبـي زاهـي دقـوقه أه ويـلـي مـنــــك يامــدمــج الـسـاقـي=لـيـت مـن يـاخــذ مــن اشــفـاك لـو ذوقــه

	كان حبك خطيه نرتجيك السموحه

	كـان حـبـك خـطـيـه نرتـجـيـك الـسـمـوحــه=ويـش ذنـبــي وربـي فـي غـرامــك رمــانـي يـوم تشـلـع خـفـوقي فـي يـديـــك وتـمــوحـه=مـوحـة الـطـيـر ريـشـه لادعــيـتـه وجـانـي كـنـت احـسـبك تـداوي خـافـقـي من جروحـه=وانت حـطـيـت قلـبـي في دروب الــهــوانـي لـيـتـنـي طـعـت نـاسـن بالـمـحـبـه نـصوحـه=كــان سـهـــر الـلـيـالـي لاجـلـكـم مـابـلانــي قـالوا افـطـن لـنـاسـن جـمـرهـا بـان فـوحــه=مـثـل مـجـنـون لـيـلـى او جـريـس الـيــمـانـي قـيـس يـطـرد عـنـوده لـيـن راحـت بـروحــه=مـات والـقـلـب يـشـكـي مـن طـعـونه ثـمـاني والـيـمـانـي كـتـمـهـا والـمـحـاجـر فـضـوحـه=بـالـدقـايـق يـزوره هـاجـســه والــثــوانــي قـلـت يـانـاس خـلـي صادقـن فـي طــمــوحـه=وان جـزيـتـه خـفـوقـي في خـفـوقـه جـزانـي لاتحـسـبــون روحـي لـلـمـحـبـه كـســوحـــه=راح تـبــقـى بـجـنـبـي لـو يـطـول الـزمـانـي حـبـهـا وسـط جـوفـي عـالـيـاتـن صـروحــه=شـاد حـبـه بـقـلـبــي فــي طـويـل الـمـبــانـي لـه خــدودن تـشــادي وردتـن وســط دوحــه=يـخـــتـلـط مـع نـفـلـهـا زاهـي الـديـدحــانــي زاهــي فـي مـسـيـلـن يـنـحـدر مـن سفـوحـه=وام سـالـم بـروضــه تـطـربـك بـالـغــوانــي لـو تـتـالـى ربـيـعـه سـالـمـن مــن سـروحــه=مـاوطـوهـا سـروحـن بـالـنـيــاق الـمــقـانـي ريـحة الـعـشـب تـسـحر والهـبـايـب تـشـوحه=الـخـزامـا خـلـطـهـا الشـيـح والـقـحـويـانـي ولـه رمـوشـن سـهـومـه لـلـضـمـايـر ذبـوحـه=والـردايـف تـشـوفـه بـالـخـفـى والـبـيـانـي في هـروجـه غـنـوجن تـطـربـك فـي مـزوحـه=ثـوب حـبـه رمـانـي فـي هــواه وكـســانــي لـيـن شـفـت الـمـفـارق بـارقــه بـان ضوحـه=وجـمر هـجسـي رجـع لـي من جديد وغـشـاني كـل قـافـن نـثــرتـه مـنـبــعــه نـار بــوحـــه=لاطـرت لـي طـيـوفـه جـت حـروفـه مـثـانـي يـوم شـفـت الـركـايـب عـن عـربـنـا تـزوحـه=وفـي مـسـامـيـر هـجـره والـمـغــثـه كـوانـي لـك حـبــيـــبــن دفــقـــتـي بالـتـوالـي صـبـوحــه=ولي حـبـيـبـن شـبـكـنـي بـالـغـرام وجـفـانـي الحـبــايـــب تـوضــح قـبـل تـرحـل شــروحــه=وانـت راحـت ظـعـونـك عــذركـم مـالـفـانـي كـنـت اريـدك ربـيـعـن قـعـدتـي حول سـوحـه=وصرت ريـحن عـصوفـن في هـبوبه فجـاني اشـهـد ان الـضمـايـر كـل هـجــســن يـلـوحـه=مـن عـشـيـرن بـهـجـره بـاعـنـي مــاشـرانـي وان خـيـل الـعـذارى بـالـمـحـبــه قــمــوحــه=وان خـلـي غـدر بـي عـقـب عـهـد وضـمـاني

	شيلة سنيد منقره البلوي للذود غضبا على ابن رشيد(موضوع لم يبحث سابقا)

بسم الله الرحمن الرحيم000

((( هالموضوع رضاوه لابوغازي لانه ماكتب سابقا ابدا )))

طبعا الذي دفعني لكتابة هذا الموضوع هو انني سمعت من يروي الحادثه بعدة اشكال واكثرها بعيده عن الواقع
والحقيقه وهي قصة (سنيد منقره البلوي)شيخ الفريعات من بلي والذي قدم الى محمد العبدالله ابن رشيد المهاد
ولم يجد الاهتمام الذي كان يرجوه سنيد منقره بمايليق بكونه فارس معروف(اخوسنداء) وكونه من مشايخ قبيلة
بلي المعروفين00 كان ذلك بسبب انشغال ابن رشيد بالتجهز لغزو عتيبه في وقت تلك المغازي00
خرج سنيد منقره مغضبا من حائل وفي طريقه مر على شخص من شمر اسمه (سلامه) مع ابله فأخذها معه وانا
لااجزم هل كان وحيدا او معه رفقه000
انتخى اثناء ذلك بقوله ( انا اخوسنداء) وذهب بها00 في ذلك الوقت ذهب صاحب الابل واستفزع بالامير ابن رشيد
واخبره بمنخاة اللي اخذ الابل وكان الجيش جاهزا للذهاب لعتيبه فقرر ابن رشيد تغيير الوجهه الى الغرب الى
مايسمى(تهامه)في ذلك الوقت حيث تقيم قبيلتي بلي وجهينه وهذه تعرف بمغزى (جيده) وهي منطقه هناك فيها
ظلع تترس فيه مسند منقره لحماية نفسه من هذا الجيش الجرار000
كان دليلة ابن رشيد شخص من قبيلة حرب من (الحلالمه) وعندما اقترب الجيش من المكان قام بعض افراد الجيش
اللي مع ابن رشيد(في بعض الروايات)الى احراق بعض النخل اللي في طريقهم ومن الرواة من قال بل جلس بعضهم
تحت النخل وشب النار للاكل فثارت حريقه غير مقصوده000
قال معوض التلفيه متهددا الحربي الذي كان دليله لابن رشيد وذاكرا بعض ماجرى:

	كان الدلاله ياحليمـه لكـم ثـار=الله مـن دينـاً علـى الله سـداده جبتولنا الدمام يضحي على الـدار=تقل دبانـاً طايـراً مـن بـلاده من حمد ربي فيدكم هدم وحمـار=وحنا لنا بديـار الاجنـاب عـاده ياويلكم من طيرنا حيـن ماطـار=اللي قنصنـا فيـه بـاول هـداده اذا ضرب بالكف من غير الاظفار=يصبح معلق بالضمايـر سـواده ماشفت نوره تقشع الثوب بجهـار=راحت مفرع عقب طريا الحشاده يحرم عليكم بالمساء شبـة النـار=ونضفكم بالحزم ضـف الجـراده

طبعا القصيده فيها زيادات في بعض الروايات وتذكر هذه الزيادات انها ابل ابن رشيد المنقيه وانه كان معها حرس
وهذه غير صحيح لان التبيناوي في وصفه لما حدث قال:
ذهابكم ياسنيد فاطر سلامه000والا فلاتسوون نقل الجدادي
فهو قال فاطر سلامه00 وسوف اروي القصيده بعد قليل كامله000
عندما بلغ الجيش المكان ووصل ابن رشيد لبيت مسند منقره وجد الى جانب البيت كومه ضخمه من الهيل والقهوه
مما يدل على كرمه واهتمامه بشبة النار وانه مجمع للرجال 000
وفوق ذلك كان بالبيت شايب كبير السن جدا ولما رأى الناس توقع انهم سيسلبون كل شي من بيت سنيد منقره
فقام هذا الشيخ الكبير(قيل انه والده وقيل عمه) فاحتضن النجر والدله وقال خوذوا اللي تبون الا هذولي اتركوهن
لي يارجال000
كان الموقف يهز الجبال من الرجال اللي فيهم طيب ويغلون الطيب والكريم من الرجال لو هو خصم00 فكومة الهيل
الكبيره وهذا الشايب اللي تخلى عن كل شي ماعدا الدله والنجر مما يدل على انها عائله تضرب جذورها في بطن
التاريخ كرما ومرجله000 وقف المهاد قليلا وهو مطرق الراس للاسفل يفكر في هول ماوجد ثم قال لمن حوله
اتركوا كل شي بمكانه ولاتلمسوا شيئا فاللي ياخذ هذولا ماراح يتوفق بدنياه واخرته000
رجع ابن رشيد دون قتال كما ذكرت لكم00 فلاهو هرب خوفا من البوارديه اللي براس الظلع ولاهو بسبب اخر غير
ماذكرت فقال حسن التبيناوي واصفا المغزى:

	الجيش حيش وصوتـوا باالتمامـه=وإن حيش جاه من النسانيس حادي جيشن حداه الغيض وأبداء حلامـه=بعوج الدروب ومنحيات المعـادي شهب الظهور اللي سريعن ولامـه=زمايـل الغلمـان سقـم البـوادي تشداء عصيف الريم سرع إيتلامـه=قمشن لمن يسقي الحريب النكـادي واحلو من عقب العصيـر أدحامـه=لهن بنا عقـب المقيـل أجتـلادي تشداء شواحيفن صدوقـن ولامـه=صلفن وحاديهن مع الموج حـادي ياما غدت مثل الجرايـد عظامـه=من كثر ماياطن حـدور وسنـادي من السير والفن المراء والخدامـه=يبكن على الدرب السماح المقـادي وأنحى بهن خوف الدروب وعلامه=وضربهن الدرب الحشار القصادي ومن عقب عشرن صبحن في تهامه=صبحن على الجهنان ماهو جوادي فجريتن صـارت غنمهـم كرامـه=باالريع والهرمة على جـال وادي قطع ثلاث دروب الأقطـار رامـه=عقابن يـدور مقرشـات التـوادي عقابن شهر يضحك بدبرت عمامه=من العالمات اللي يقـض الفنـادي عينه على اليمنى شهر باإبترامـه=وحنا على ياسر ولامـن وكـادي وردن عمـودان قليلـن جمـامـه=وأضمن وصار السقي داب العيادي ومدن على الأفنار وأسفر ضلامـه=لولا توال جموعنـا كـان غـادي والصبح تطرب من براسه نشامـه=علـى رخانـا مانهـاب الـدوادي على الرخى نبغي كبيـر الجهامـه=نجنب عن الأدباش مثل الجـرادي خوفن من الراضه تصيح القيامـه=وإنحاش عنا مسندن هـو مـرادي ولذنا على مسنـد نوايـف ردامـه=ضربة فنى تبري عليـل الفـوادي ذهابكـم ياسنيـد فاطـر سلامـه=وإلا فلا تسـوون نقـل الجـدادي شرك عشاء مرزوق هو وأبو شامه=اللي على نقر المغـارف سـدادي جاك الوشل ماهو مشل أو حلامـه=إنحاش عن مسند يدور الحصـادي يوم إستعار العـام قلـب النعامـه=أوفى ديونه طيـر شلـوى وزادي طلق اليمين اللي تعـداء العلامـه=اللي تكفـل كـل سبـع البـوادي فرز الوغى نعم العميـل وعمامـه=ياحـل بالعيـان مخطـي وقـادي مفني الهديب اللي طويلـن سنامـه=لكن يجيبـه مثـل حـق الزبـادي أنا أذكر الله عـد حجـاج شامـه=أو عد قومـك ياذهـاب المعـادي عن كـل شـر يامنثـر طعامـه=يااللي على عوج القوايـم نفـادي وصلاة ربي عد مالخلـق صامـه=على النبي سيـد جميـع العبـادي

وكما ترون قصيدة التبيناوي في المغزى هذا والذي اعتبره من مواقف الكرم والمرجله والذي ينبغي ذكره في
مناقب المهاد وحبه للطيب واهله000
فلم تكن هناك حرب او قتال ولم تكن الابل ذروات كما قال البعض بل لم تكن للرشيد اصلا وانما لاحد شمر واسمه
مذكور بالقصيده000
اتمنى من الاخوه المشاركه ومن لديه معلومه او تصحيح لبعض ماقلت ان كان فيه غلط
لفائدة الموضوع علما اني اختصرت قصيدة التبيناوي ولكني كتبت كل
مايخص الموضوع والاختصار كان بتوصيف الامير ابن رشيد خوف الاطاله والسلام00

	((عواد العلي)) مار البلا فواز شاعر خرافي

الشاعر عواد العلي متواضعا يقول:

	يا بو فهد لاهـنـت نحـتـاج فـاصـل=ماني مطول بس فاصل وواصل يلومـنـي مـن لاعرف ويش حاصل=الـمـعـذره يااخوان هذا اعترافي الـيـوم مـتـهـيـض وحـبـيـت اولف=مانـي بـتـنـظـيـم الـبـيوت متكلف شـخـصـيـتـي بالشعر شـبه متخلف=مااحـدآ فهمني غير وهج القوافي عـنـدي تجـارب نـابـعه من تجارب=لو تخـتـلـف مـرات فـيـها تقارب تـوسـطـة مـابـيـن لـحـيـه وشـارب=حتى طريقي صار فيه انحـرافي انـا دفـعـنـي لـلـتـنــافـس فـراغــي=واقول انا بالشعر مـجـرم وطاغي وطـاح الـعـقـال وطاح بعده شماغي=قـدام ابـن غـسـلان هـاك السنافي فـتـح ثـغـور ولا لـقـت مـن يـدافــع=وابو فهد مـابـيـن كـابـس ورافـع انا مـهـاجـم صـرت عـنـده مـدافــع=اللعب على المكشوف مامن خوافي اصبحـت كـنـي مـن حكومة حـماسي=هـذا وانـا ماني بـكـادر سـيـاسي رغـم الحـيـاد اعـيـش نـفـس الـمـآسي=اقرو كـلام الـقلب قبل الاشافي صحـيـح انـا شـاعـر فـدائـي وصـامد=ومـولـعـآ ضـوي ولاهـو بخـامد وزنـي يـقـارب وزن ابـن زيـد حـامـد=مـار الـبـلا فـواز شاعر خرافي بأقـول كـلـمـة حــق مـانــي مـجـامــل=قـلـبـي نطـقـهـا وكتـبـتها الانامل انا ياابـن غـسـلان مـازلـت صــامــل=لااجل الـتـحدي فيه شوطآ اضافي على الـهـزايــم صـاحـبــك مـاتـعــود=من كـثـر حـرصه في مساره تجود حـتـى لـو ان الـــدرب بـيـض وســود=اسـوقـهـا قـدام والـنــور طــافـي انـا ظــروفـي فـــي حـروفــي تــوزع=يـمـكــن مـمـلـه بس لااحد يتجزع عـلـى الـغـزل قـام الـهـواوي تـهــزع=مادام سـتــر الله على الكل ضافي الدمـعـه الـلــي حــارت بـعـيـن عاشـق=اللي لها بالجـفـن حـارس وحاشق الـيـا حـبـسـهـا قـام خـشـمـه يـنـاشــق=لو قـيـل كـافـي قـال ماهـو بكـافـي الــحـب ذره قـابـلــه لـلـتـخــصــب=بـدايـة الـتـشــجـيــع قـبـل الـتـعـصب حـتـى عـلـى قـلـبـك حـبـيـبــك يـنـصب=ويفاوضك من شان عقد احترافي لاياحـبـيـبــي صـدر عــواد واســـع=وبـداخـلــه بــردآ مـن الـثــلج لاسـع ارضى الخـطـى يـالـيـن ثـامـن وتـاسـع=والـعـاشر ابعد عنك والقلب صافي الـمـجـرم الـلــي وسـط قـلـبـي تـسـلــل=ومــن الـغــبــاوه قـلــت آمـر تـدلـل انـا وطـيـفــه سـاهـريــن نـتــعــلــل=واثــر الحـبـيــب مـلـتـحـف باللحافي هــذي مـشــاعــر شــاعــرآ مـايــكــذب=مــر بـتــجــارب بالحـيــاة وتعذب ثـرثــار زاحــف انـطــوائــي مــهــذب=آخــر لـقـب سموه ((ثلج القوافي))

	يودع ربيع القلب يرجع خريفي

	ياحـمـود قـلـبـي من جفى الـزيـن مـهـمـوم=قـلـبـن على هجـر الحـبـايب ضعـيـفي جـرح الـهـوى فـعـلـه بـالاجـواد مـعـلـوم=يـودع ربـيــع القلب يـرجـع خـريـفـي لاداج طـيـفـه بـالـخـفـى يـطـرد الـنــوم=لين يـتــهــشــم حـجـرهـا بـالــذريـفـي لامــن لـمـحـت الـبـاب يـاحـمـود مـردوم=من عـقـب مـاكـانـت حـيـاتـي وريـفـي والـقـلـب عـقـب الجرح مـايـنـفـعـه لـوم=والـهـجـر نـاره مـثـل نـار الـصـريفي قـلـبـن قـبـل ظـلـمـه من الوقـت مـظـلـوم=كـنـه طـريحـن مـن جـنـود الـشـريـفـي ودنـيـاك مـاتـصـفـي لـنـا دايــم الــدوم=وزمـل الـفـرح ترجـع ظـعـونـه نـكـيـفـي غـديـت مـثـل الـلـي قـلـب راسـه الحـوم=من عـقـب مـاهـو بالـحـبـاري يـحـيـفـي باسـبـاب مـجـدولـن على الـمـتـن مـلـمــوم=لاطـاح مـن فـوق الـردايـف صفـيـفـي وجـسـمـن سـقـاه الزين بالوصف مـبـروم=كـتـفـن وردفـن والـمخـصر صخـيـفـي تجـمـع عـيـون الـفرس مـع بـشـرة الروم=وعـيـون شـامـيـه وهـرج الـقـطـيـفــي خـشـفـن بزين الطـبـع والـعـيـن مـوسـوم=كـنـه عـروســن فـي لـيـال الـزفـيــفـي خـــــده تـــلالا بـالـحــلا تـقــل مـخـتـوم=والـقــلــب مــع زيـن الحـلايا رهـيـفـي والـلـه فـلا زيـنـه مـكـايـــيــج وهــدوم=يـكـفـيـك رمـشـن مـع سـواده نـظـيــفـي خلت خفوقي عن حـلا الـبـيـض مـعـصوم=عن غـيـر زولـه بـالـعـذارى كـفـيــفـي لولاي اخـاف الـلـه وعـادات وســلـوم=خـطـفـتـهـا مـثـل الـعـقـاب الـمـخـــيـفـي في لـيـلـتـن نـور الـقـمـر طـاح بـغـيـوم=مـع ضـوح بـرقـن بـالـسـمـاء له رفـيـفي والا كـمـا ذيـبــن عـلـى راس مـزمـوم=مـن نـار جـوعـه لـه قـنـــيـب وهـريـفـي والا كما جـيـبـن عـلـى الـدرب مـنـهـوم=فـيـه الـدبـل جـاهـز ثـقـيـل وخـفـيـــفـي فوقه شجـاعـن شـب فـي جـوفـه الـزوم=كـنـه لابـوصـــالح بـطـيـبـه وصـيــفـي عواد شـوق الـلـي مـن الـزيـن مـوشـوم=الـلـي يـدوس الـــدرب لـو هــو كـلـيـفـي نـسـل الـرجـال الـلـي لـهـا مـجـد وعـلـوم=الـلـي لـيـــاكــادت تـشـيــل الـرديــفـي مـزبـان مـضـهـودن مـن الـقـوم مـضيـوم=الـلـي وقــع سـاقـه كــسـيـرن سـعـيـفـي مـاهـو بـطـول الـدرب ضـايـع ومـنـجـوم=يـصـلـح لـمـن سـاق الـمـواتـر عريـفـي يـفـزع لـمـن كـنـه عـن الـديـــد مـفـطــوم=لـه مـاقـفـن بـالـطـيـب مـاهـو طـريـفـي الـشـاعـر الـلـي حـضـرتـه تـرهـب الـقـوم=ولالـي قـبـالـه غـيـر ربع الـنـصـيـفـي مــار ان وقــت الـيـوم حـاكــم ومـحـكـوم=وراحــت بـحـمــد الله وقـوت الـزحـيـفي وقـتـن مـضـى عـنــد الاجـاويــد مـذمــوم=كــان الـعـرب بـالـسـيـف دمــه نـزيـفـي دخـلـت بـامـواج الـهـوى جـاهــل الـعــوم=واجـهـل طـبـايـع كـل جـنـســن لـطـيـفـي والـيـوم قـلــبــي مـن هـوى الـبـال محروم=ونـتـيـجـتــه جـسـمـن عـلـيـلـن نـحـيـفـي والادمــي رزقـــه مــقـــدر ومـقــســـوم=والـصـبــر مـلــجــأ كـل رجـلـن عـفـيـفـي