ديوان الشاعر / سطم فهد الخليل

بسم الله
(سعدي ونهار)هيشان الوبير
من الرجال الذين تستفيد منهم في مجالستك لهم
فلديهم مخزون من الثقافة الأدبيه التي تجعلك تتلذذ بالجلوس معهم
فتجد لديهم من الموروث الشمري وغيره ومن الحقائق التي قد لا يتجرّاء
على قولها الآ الواثقين بمايقولون ولديهم من الشواهد مالا يدع شكّ لدى
المستمع وهذا ليس بغريب على ابناء بيت مشيخة من بيوت شمر الكبار
كنت ازورهم في قطر لبضع سنوات مضت وكان الجلوس معهم
ان لم يكن الاجمل فهو من اجمل لحظات العمر بالنسبة لي حيث كان يمر الوقت
سريعا لكنه ليس مرور الكرام بل قد نهلت من عدٍّ روي وارتويت
إلا انني لم ازرهم هذا العام
لذلك جاءت الأبيات التاليه من تلقاء نفسها ولم ابحث عنها

شفّي قبال اهل الوجيه المفاليح

	ياهاجسي اسرج خيالك مع الريح=واكتب سلامٍ من نديم لنديمه سجل مع الذكرى من الشي تلميح=للي لهم عندي مقاماً وقيمه ارسل لأبو نواف صورة لتوضيح=عن ماحوى صدر الحميم لحميمه واكتب لأخو نهار نبذه وتصريح=يأبو مطر نفسي عليكم معيمه افرح بطاري ذكركم يالطحاطيح=ويبقى لكم عندي معزة عظيمه شفي قبال اهل الوجيه المفاليح= قبالكم يأهل الوجيه الكريمه وافخر بكم ياصار بالحكي تصحيح=خصيمكم يدفع رسوم القسيمه فيكم عسل. فيكم ذحاحٍ وذرنيح=ومعكم وشاح وتاج . ومعكم شكيمه للقاسي اقسى من اجنوب الصلافيح= ولل ليـّن الين من رذاذٍ بغيمه سمحين.شرسين. زحولٍ زحازيح=لطفين للي يستحق الحشيمه واللي عنا. يقلط على هبّة الريح=على البشاشه والعلوم القديمه وعقبه على غالي حلال المصاليح=الله يحيي الضيف على الوليمه ماحسبو للزود هو والمرابيح=يجي كذا طبع النفوس الكريمه سلمٍ لهم يوم السنين الشلافيح=واليوم صارت عادةٍ مستديمه ويوم الرمك بالغوش مثل الزنانيح=ياويل من صار اخوفيضة خصيمه هيشان. يوم انه شحاح ومشاويح= طيب وكرم ودين وعفافٍ وشيمه هومقدم الصفران يوم المراويح=وهو شيخهم بعسر السنين القديمه

سطم فهد الخليل

احتفل الشيخ سعود بن سعد بن شعير العلى
لتكريم الأعضاء الفائزين بالمجالس البلديه لهذالعام من الجعفر والويبار
في كل من ألأجفر الخوير بقعاء حفر الباطن الخفجي وكذلك تكريم نايف الضوري
المتبرع بكليته
كان الأحتفال بمنزل المحتفل في بلدة الأجـفـر- منطقة حائل
تخلل حفل التكريم عدد من القصائد الشعريه وكان لي نصيب بالمشاركة التاليه

نـوّر الأجفر بنورٍ شع من نور الحضور

	يالله اني طالبك. ياولي كل الامور= انك تجمل كلامي. بالعبارات الخيار بالكلامٍ اللي يجمّل لاتعالي . لاغرور= ولاعجب بالنفس. يدّي صاحبه الى الدمار ويالله احفظ لي لساني لايجي منه القصور= ولايجن منه الهزال. ولايجن منه الكبار ويالله اجعل ما اقوله.فيه متعه للحضور= واجعل اسلوبي مهذب. بأحترامٍ و وقار وبعد هذا الحمد لله. زاد نور النور نور= زاد نور النور نور. وصارت الليله منار نوّر الأجفر بنورٍ شع من نور الحضور= ونورٍ من نور الجعفر. ونورٍ من نورالويبار بأحتفالٍ وابتهال .وانشراحٍ بالصدور= بأجمل شعور ومشاعر بين ابن عمٍ وجار وزودٍ عن قرب القصور. اتحادٍ بالجذور= الأصل و الساس واحد مابين عمير وعرار بأجتماعٍ للجماعه . به محبه به سرور= به تآلف به تكاتف . وبه مواضيعٍ كثار وبارك الله في همامٍ للمراجل شد كور= شد. كورٍ للمراجل مابحث له عن عذار جمّع ربوعه بطوعه وصفقوله يالحضور= صفقو له يالكبار و صفقوله يالصغار ابن علي سعود السعد رجلٍ بالطيب مخبور= ابو بدر عالي القدر حر من ماكر حرار شيخ من ماكر مشيخه من قديمات العصور= من سلايل من بحايل اسسو اول جدار ابن عم و تاج راس . وانا بالطيب فخور= زاده الله خير وطيب . وزادني فيه افتخار وبعد هذا ياحي الله كل منهو شال دور= كل عضوٍ بلديٍ في مناطقنا الكثار وياحي الله الضويري نايف الشبلٍ جسور= معطي كليته لمحتاجه ما تردد بالقرار وبعد هذا عندي كلمة واسمعوها يالجمهور= يعني كأنه نصيحة وكلٍ بيديه الخيار التشاور و تحاور يفتح لك صعب الأمور= يبين لك وجه حقايق وينجلي عنها الغبار الوقاعه ياجماعة تنبني منها القصور= والصجاجه واللجاجه ماهي من نهج الحوار وسامحوني ياجماعة ان حصل مني قصور= البشر لوصاب مرة . مرة من جنب المسار

سطم فهد الخليل

في يوم الجمعه ليلة السبت 10/5/1437هـ

احتف الجعفر بقبيل مطر نظير احتفال مطير بالشاب

نايف معيلي الجعفري المتبرع بكليته للفتاة المطيريه

واليكم مشاركتي بالحفل

الصوت الجهور

	هنا ميقاف للصوت الجهور= يعبر فيه عن بوح الشعور وانا باقف هنا واجهر بصوتي= واقول انا بسترك يالستور الآ.يالله .تحفظ.لي.لساني = بحماك عن الزلل وعن الغرور وعساي. ليا وقفت وقلت قولي=يجي قولي بعيد عن القصور وقبل القول. يلزمني اسـلّم= سـلام الله عليكم يالحضور وسـلام للدوشان اخوان جوزاء= ويعم مطير فروعه والجذور وبأسم الشيخ ابن علـي احيي= بأسودٍ من اسودٍ من نمور احيي مطير حمران النواظر=وهلا ويامرحبا بكل الحضور احيي بمطيرومن يحضر معاهم=حضورٍ.زاد. بالخاطر سرور حللتم مرحبا واهلا وسهلا= على الكمبود ودلالٍ تدور هلا. عند السناعيس الطنايا =على الهيل الخضر هو والبخور وبعدها ياهلا على اللحيسة = على حشوان وحيلٍ بالقدور وبأسـم شمر يحيون الضياغم = بني جعـفـر. .سنام من الجزور لكم علينا سابقة بتكريم نايف = ولـكم علينا اليـوم يحين دور ترى نايف لوجه الله تبرع = ولا له قصد في بعض لأمور ولا يبغى جزاه الآ من الله = هو اللي . يعلم بما فالصدور وجازيتوه يامطير. بهدايا = من الضبطان . وافين الشبور وفيتو في وفاكم وأحتفاكم = ولا يجزى الشكور الا الشكور ولو امدح مايوفن المدايح = عن الماضي وكل شي مخبور ويبقى الطيب يامطيرمتبادل = مابين الناس من ماض العصور

سطم فهد الخليل

ابيات ظمن المشاركة في حفل زواج اولاد عبدالله غازي النهيت

حياكم الله عند نوماس شمر

	رجلٍ دعا حـقـــه علينا نزوره=ونشاركه في فرحته وسـروره ونقول له مبروك عرس عيالك=وندعو لهم بالدعوة المأثوره وّاجب علينا ياحضرنا نسلم= على اهل الحفلة و كل حضـوره وسلام يارجالٍ حضورٍامامي=وجــودكــم بالحفـل كمّـل نـوره حياكم الله عند نوماس شمر= اهـل اللحيسة. سـيرةٍ مشهوره ان قيل منهم قلت ذولاك الأسلم= اللابة اللي بالوفـا مخبـوره فيهم كرم حاتم واكـرام سبلا= وكـل المفاخـر راكبيـنٍ كــوره ولأقول بباّق الناس نقصٍ وقاصر=اهل الشيم واهل القيم مشكوره والله يبارك حفلكم يابو ماجد= واللــه يجمٍلـــكم بأحسن صـوره وافين يالعصـلان والحفـل وافي=واهـل الوفـاء تـافي بكل اموره هذا وصـل اللـه على محمـد=وألـه وصحبه . عـد نبـت زهـوره

سطم فهد الخليل

اطلعت على تغريدة لخادم الحرمين الشريفين
الملك سلمان بن عبد العزيز حفظه الله
في حسابه على تويتر
يقول فيها
(فخورون هذا اليوم بتضامننا في رعد الشمال ويشاهد العالم
عزمنا جميعا على ردع قوى الشر والتطرف ومحاربة الارهاب )
وتفاعلاً معها جاءت الأبيات التالية

ســلّ اجربك ياسيدي من جفيره

	انت الفخر وفيك المفاخر كثيره= ياخادم البيتين ياولد الامام يحق لك تفخر بقيادة مسيرة=وحنا بعد نفخر بسلمان الاقدام ابوك من جمع شتات الجزيره=وانت الذي جمعت عُرْبه والأسلام ياحزمها ياعزمها يانصيره=يامحققٍ بالحق صعبات الأرقام نبني عليك من الأمال الكثيره=معك معك ياطيب الفال قدام سـلّ اجربك ياسيدي من جفيره= هذا زمان الحزم والعزم وحسام خلّـة تشاهدك العيون الضريره= حتى تنام وعين ذولاك متنام الجار ليامنه طلب منك جيره= لازم على داره يرفرفن الأعلام وتبقى الكبيره في عيونك صغيره= عينٍ على صنعا وعينٍ على الشام

سطم فهد الخليل

في احد زياراتي لحفر الباطن لحضورمناسبة زواج لاحد الأقرباء
عزمني الأخ ساير مطر المهيني الجعفري على القهوة بعد المغرب
فوافقت بحيث نتقهوى ومن ثم نروح للمناسبة
الحاصل انه سوّى عشاء وقدمه قبل صلاة العشاء
وقال هذا اكراما لك والمناسبة للجميع وهذا لايمنعنا عن المناسبة
بالرغم من انني اعلم ان ذلك كرما واكرام إلا انني عاتبته عتاب محبه على هذا العمل
وفي عودتي الى الرياض عبر طريق المجمعة استرضيته عن العتاب بأبيات تغنيت بها في الطريق

البياض يعم سكان الحفر,من جنوب فليج لفليج الشمالي

	مع طريق المجمعة بعد العصر= راجعٍ من دار غالي يم غالي وكن فيني حاجةٍ وسط الصدر=لكن ضيق الصدر ماجاله مجالي احمد الله . والثنا له والشكر = بالحفر اخذت لي عدة ليالي والبياض يعم سكان الحفر = من جنوب فليج لفليج الشمالي ومن شمالي غرب حي ابو قعر= لين شرقي البلاد من العوالي رايةٍ بيضاء من شمس الظهر= عالية من فوق عاليت الجبالي للعموم وخصٍ لساير مطر= ابن مهيني والله ونعم الرجالي ضيغمي الساس من صلب جعفر=حاضراً مشهود مع ماض الفعالي للروتين المتبع سوّا كسر= والجزال يسوّيه راع الجزالي وادري ان الكسر من زود القدر=له تحية وافي وارفع اعقالي منهجاً لك صار يابو احمد حصر=العشاء بعد غروب الشمس زالي واقبل جزال التحايا والشكر=عد مالاحت بروقٍ بالخيالي ولو بيوتي ياصلن فهد مطر= المطيري شالهن في صوت عالي

سطم فهد الخليل

الـعـرب كـلٍ بعـرفـه يعْـرف حتى اصـل جمـلـه

	شاقني قول الحقيقة في جزيلات اللحون=واحرص اني ما اجيب من الكلام الا اجزله واتقــرّب للحقايـــق واتجنب للظنون= واصـدح بقـولٍ جهــور مثـل نارٍ مشــعله يسمع اصم الآذان ويرى ضرير العيون=ومن جهل به جعل ربه يلهمه عقب جهله العرب فيهم عرب وفيهم ناس معرّبون= وفيهم ناسٍ من البقايا البايدة ماله صله يجهلون الجاهلون ويفهمون الفاهمون =والعرب كلٍ بعرفه يعرف حتى اصل جمله البشركله بآدم واقرب منه شوي دون= اعلى قمة رأس الجودي لهم فيها منزله راكبينٍ صنعت اللي من خيار الصانعون=يوم يأتي امر ربك كل مخلوقٍ شله يوم سارت بأمرربه وركبو فيها الراكبون= كل مخلوقٍ ركب به يعتبر احد اهله فيه ناسٍ بالسفينة للسفينة ينتمون = وفيه ناسٍ بالسفينة مجرّد الأسم شمله ومن شمله الأسم واجب, انهم له يحتمون=يسندونه في لزومه ويزعلون من زعله هاكذا نهج الاكابر جعلهم مايذهبون= بهم خوّة بهم نخوة بهم طيب ومرجله وياللي تبون المعالي ليا بغيتوتكْبرون=لاحدٍ يضن التكبر للمعالي يوصله لاتحقرون الأوادم ثم يوما تُحقرون=ولاتخفّون الحقايق حتى لو قيد أنمله البشر من طين وتربه وبعد ذلك يرجعون=الى طين ولبن وحفرة وكل يجزى بعمله والسلام ختام ودمتم طيبون وسالمون=وصلى الله على محمد الصلاة الكامله

سطم فهد الخليل

مشاركتي في حفل تخرج الملازم سيف سعد الخليل

	مبداي بسم اللي عزيزٍ جلاله = اللي عليه يعود كل اعتمادي ويالله توفقني لقول الجزاله = ومن لااهتدى بهداك ضايع وغادي صلوا على محمد وصحبه واله = اللي بُعث بالحق مرشد وهادي وبعد الصلاة اببتدي بالرساله = عاش الملك سلمان وعاشت بلادي وعاشو جنودٍ بالجنوب وشماله = حماة الوطن درعه وضد الاعادي ومَن بعد هذا يارجال الشكاله = حيّاكم الله عد ماسال وادي سعد يحببكم بيوم احتفاله= واقف يحيي كل من جاه بادي يقول لِمن جانا علينا جماله = ولنا الشرف باهل القيم والمبادي جيران ولا اصحاب ولا زماله = من دارنا , او من ديارٍ بعادي بحفلة تخرجً واحدٍ من عياله = شبلٍ تخير مركبه بالشدادي سيف السَعد الله يحقق مناله = الله يحقق له دروب الرشادي سيفٍ لنا والعين تبخص حلاله = وانا على شانه نظمت الجدادي ينساق جزل القاف ياجا مجاله = وماقول به ياكود قولٍ وكادي ان كان هي بالساس يالطيب فاله = تقدح ركون مثل قدح الزنادي عرقه عريقٍ من عمام وخواله = مابين دهن العود هو والزبادي ومن روس قومٍ يدركون الجماله = ياحل ضرب مصقلات الهنادي يتمان ياركب الرشاء للمحاله = تلقى مضاربهم بوسط الثنادي ضياغمٍ عنها تبرهن فعاله = يشهدلهم بالطيب حضر وبوادي ويوم العطاء وكلٍ يتفاخر بماله = ميقافهم يشفي عليل الفوادي فيهم لنا ساسٍ ومنهم سلاله = ماضٍ عريق وحاضرٍ تو بادي مفاخرٍ بين القيم والأصاله=والطيب بين الناس بسوق المزادي وكلٍ من افعاله يبهر دلاله= وتُجنى ثمار الزرع وقت الحصادي وصلواعلى اللي كلمة الحق قاله = اللي بُعث بامر الهدا والرشادي

سطم فهد الخليل

كــثر الســنين اللـي مضــن علمــني

كـثر السـنين اللي مضـن علمـني

	كثر السنين اللي مضن علمني = وعرفت مالا يعرفون الكتاتيب واخذت منهن شي له ماعطني = من واقع الخبرة وكثر التجاريب وعرفت فيه اثنين مايعوّضَنَّي = ياطيبهن للي يبون المواجيب صبري على خطا القريبين مني = اصبرعلى الغلطان اجزاه بالطيب الصبر الاول ثم بالطيب اثني = إلا. بحال ان الصبر يتبعه عيب واثنين ايضا بغيبتي يحفظني = احفظ بهن نفسي عن الشك والريب الصدق بللي ينقل الناس عني= وحفظ اللسان وترك شذب العراقيب واثنين اتركهن ليا جنبني = ياصار مالي من وراهن مطاليب الاوله , سوالفٍ مانصني = اخير مايجزى المجنب بتجنيب الثانية , من يقصر الصوت عني= مارخي له اسماعي وراسي بتقريب واخير منهن كلهن لي ومني = علاقتي مع عالم السر والغيب ياسامعي انكان لك يعجبني = يمكن ينوبن عن كثير التطابيب

سطم فهد الخليل

ابيات الى ابني ماجد سطم الخليل.. !!!

	ياماجد امنحني المشاعروالاحساس=وانا امنحك مني تـعاليـم ودروس عطني انتباه اعطيك منهج ونبراس==واعطيك شيٍ غير ماهو عطى فلوس لـ ابوك ياماجد. تـجـاريب وقيـاس=شيٍ يقوسه وشي. من قبل مقيوس واليوم ابين لك بعض شي بالناس=الناس. به انيس . وبالناس مأنوس وبالناس ناسٍ عرفهم فيه نوماس=تكسب بعرفتهم معزة وناموس وبالناس ناسٍ عرفهم يوجع الراس=بعض معرفة ناس فيهـا وجع روس وبالناس ناسٍ وصفهم. مثل الالماس=مابين طيب قلوب . وطهارة نفوس وبالناس ناسٍ لمعته . لمعة نحاس=يبرق بريق وهو نحاسٍ ومنحوس خلك حذر . تر بالبشر ناسٍ انجاس=يعطي عسل. وبداخله سم مدسوس وتـرى البحر مايركبه. كود غطاس=وأعط السهم والقوس للي براالقوس

سطم فهد الخليل