ديوان الشاعر / سطم فهد الخليل

الشيخ / محمد بن بعيجان العلي
عمل عملٍ جليل وجبار ويعجز عنه التعبير
ولا اعتقد انه يخفي على الجميع وهو انه ادرك العفو
من لدن خادم الحرمين الشريفين لمن حكم عليهم بالقتل
وكان مع الشيخ محمد البعيجان العلي كل من
الشيخ مطني بندر الشريم والشيخ فهيد عراك الهباس
الشيخ عواد خلف الطوالة والشيخ نايف عبدالمحسن الجبرين
الشيخ خالد جدعان اللغيصم ووالشيخ منها حمود الرخيص

ابيات بالشيخ محمد بن بعيجان العلي !!!

	قدام ياشيخ السنا عيس قدام = قدام ليامن قيل يأهل العوايد يامحمد البعيجان يارمح ياحسام= ياعيلمن يزمي بوقت الشدايد عوايدك ماهن جديد اتٍ العام=ورث الجدود من السنينٍ البعايد ياشيخنا ورثك من جدود وأعمام=مزبان من باتت بقلبه ضهايد يافزعت اللي جاره الوقت وانضام=اللي بقلبه جور الأيام زايد ويا مسند اللي بأسود الليل مانام=ينظر متى يأتيه سايق وقايد يافرحت اللي صادرٍ فيه الأعدام= اللي يتحر مرهفات الحدايد يامزبن اللي صا يبه هم وهيام=ويا مسعد قلوبٍ به الحزن زايد حليت يالحلحيل في دار حكام = وحل الفرح محلّ ماكان كايد حليت في جاهك على ولد الإمام=وحل السعد واستبعدن الشدايد تزهى بك الشيخة وله فيك الإكرام=ولاتأتي الشيخة بلين الوسايد واللي معك أجواد وأبطال وكرام= ويستاهلون من الثنى والحمايد كلٍ بذل جهدٍ ومجهود واسهام=زحول الرجال وبالفعايل ولايد كلٍ حمل حمولة هديب بالشام=ابطال والأفعال ماهي جدايد ومطني ولد بندر عضنفر وضرغام= ابن شريم للكايدة والشدايد وفهيد ابن هباس ياحل زهّام= ياسعد من ينخاه لياحل كايد وعواد بن خلف شجاعٍ ومقدام= اسم الطواله دوم بالطيب زايد ونايف على اسمه من زبن فيه مايضام=موارث الجبرين نعم البدايد وخالد ولد جدعان ليثٍ لياقام= سفير شمر ولآل لغيصم عوايد ومهنا بن حمود موارث كرام= ابن رخيص اللي ذكر بالقصايد قال اقبلوا وانتم هل البيت ياكرام=ومواقف الرخيص هم وابن ذايد تبقى على طول الليالي والأيام= دينٍ على اللي يعرفون العوايد ذاقول من فعلك على صدره وسام= ولا خير في قولٍ بليا شهايد وما قلتها مجرد أساطير و أوهام=لاقلتها اطلب وراها الفوايد تمت وصلى الله على نور الأسلام =اعداد ماتكتب بيوت القصايد

سطم فهد الخليل

فقط لأطلاعكم

وننزهكم عن صفة ذلك الساعي

0000 الســـــــاعــي0000 !!!

	الساعي اللي جايبٍ لي دسيسة=يبي الصواب ولاهو حول ألصوابي يرقص على دقة موسيقة اليسه=مايدري انه ينرجم بالشهابي دسيسته يحافظ عليها بكيسه = أطيب جوابٍ له مني اهْبْ هابي وراعي النقيلي والعلوم الخسيسه= حشى الحضور احط بأفمه ترابي وبعض الأمور يحتاج أفكر وأقيسه= من دون ما تأثر بحضرة جنابي وكانه رفيق ٍ بجلد شوكة ضريسه= أخفيتها بين القدم والجرابي واللي يبي حليب من ضرع تيسه=شرواه تيس وماحسب له حسابي الذيب ما يأكل لحمْة الفطيسه= و للــقافلة مـا يعيق نبــح (أل****ي) والنفس ليا طاوع هواها إبليسه = اغســل يــدك ترها دمـارٍ خــــرابي ويابغض قلبي للعلوم الدنيسه=وعسى الدنس واهل الدنس للذهابي وياحُبنِي لراعي العلوم الونيسه= ياصار طيّب ولأطيب الهرج جابـي ماينطق الا من العقود النفيسه=بهرجٍ يعــوضك عـن طعام وشــرابي واحب من بالدين ينفع جليسه =اللـي ارتـبـاطه دايـمـــاً بالـكتـــــابي يرفع جنابك عن الحياة التعيسه=بالفعل والآ من الصفات اكتسابي وأحب أبو خوذه وراعي اللحيسه=ومكازي السعيّد معشي الذيـابي و احب حاتم و الكرم هو حبيسه=و بن العلي لاياقيل(سمن العرابي) ويالله النجاة من الجحيم ووطيسه = بيومٍ يهيل وبه يحـل الرعابي

سطم فهد الخليل

هذه البيات وجهتها الى الشاعر الاديب نهار بن هيشان الوبير

واعقبها هذا الرد الجزل والذي افتخر به

( ثنين , صفر , واحد , ثنين)

0000نهار بن هيشان رجلٍ صراطي0000 !!!

	ياراكبين اكوار فــج الأباطي= قصار ألأذان دقيقات العرانين حيلٍ على قطع الفيافي نشاطي = ثنتين والثنتين ركبـــوهـــن اثـــنـــين طفقات بالممشا لهن اختباطي=واللي عليهن كل الاثنين طفقين ان زرفلن لعيونهن التقاطي=شعل العيون وفي حجم حبة التين مثل ألمهـا وإلا المهـار المعــاطي= وفي روسهن تقول يرقص شياطين مصيفهن ميْ ونصيْ وحماطِي=ومقيضهن رُوثه ورغل وعلى عين رعن زماليق القفر والشواطي= يما بنى بظهورهن بنيت الطين شدّوا عليهن وقللوا بالقشاطي=وارخو لهن بأرسانهن مستعجلين أو راكبٍ من فوق أرقط مواطي= ميلاد عـــــــــــــــــــــــــــــــا م (2 , 0 , 1 , 2 ) يشرب حمر كنه عصير الطماطي =مايقبل إلا شِرب خمسه وتسعين واليا مشى بالبر تقل متعاطي= يهز هز , يمين , يسار , يمين مافوقه الآ ثنين هم والشناطي= ياويْ اثنينٍ بالمزاج متصافين ماسولفوا بالثرثرة والغلاطي=ولاهم سكوتٍ تقل سكتة محازين سوالفٍ على احمدي ألبساطي= والشك زايل والثنين متغالين وليامشيتو صبح مع الغطاطي=مع العصر في أم صلال متقهوين تلفون بيتٍ به رخام وبلاطي=ولا احدٍ منشّدكم على وين ومنين حِلّوا على هيلٍ وبن ولقاطي=وعقبه على غالي حلال المربّين بيتٍ اساسه عاليٍ ماهو واطي=بيت الشيوخ اللي قديمٍ مسمين ذاك الوبير بكلمة الحق صاطي =هو مقدم الصفران اول وهالحين تلقون رجّالٍ بوجهه شماطي = شماط شيب وبه وقار الكريمين وبينه وبين اسم النهار ارتباطي=ومتحالفٍ هو والصراحة له اسنين نهار ابن هيشان رجل ٍصراطي= يصدع بقول الحق من غير تلحين رجلٍ يضع على الحروف النقاطي=ماهو من اللي يلوّن العلم تلوين سوالفه ماهي سوالف هياطي=تاريخ وسلوم العرب والقوانين صريح يكرم عن خطات الرهاطي=وكلمة رهاطي حطها بين قوسين وأنا مع الطيب يزود انبساطي=قريب والا من الرجال البعيدين ويا حُبني للي يجدد نشاطي=بالإرث والموروث والشعر والدين والله لامجامل ولاني متواطي=لاشك كلمة حق للمستحقين وشكرا حماك الله من كل خاطي=وصلوا على اللى بين الحق تبيين

سطم فهد الخليل

الاخ العزيز
ابو فهد
صــــــــــــــــــــــــح الســــــــــــــــــانك وعلا شانك وماعليك زود يالطيب
ومبدع كأ العادة شاعرأ متمكن ومجيد ومتألق دائمأ ،
والحقيقة انا توي شفت القصيدة وهي طويلة وحجزت علينا القاف وحجزت الهجن وحجزت السيارات ،، وطوقتنا من الجهات الاربع ، وليس لنا مخرج الا نطير في الجو ؟
وقد استحضرت هذه الابيات القليلة على عجل حتى لايتاخر الرد ويفقد حرراته ،
واسمح لنا من التقصير ،

0000 رد الشاعر نهار بن هيشان!!!

	يــاراكب اللي لـــه ثلاثة مواطي = تدرج عليهم دوب بهـــوين بهوين ومشيه خفيف بس ماهو بواطي= من شان راعيها يشوف الهوى وين ثم استدارت صوتها بنشعـــاطي = واستبدلت رجـــلينـها بالــجـــناحـين وأمر على الركاب حزم الرباطي = من سرعته يخـــاف يصيبهم شين وقامت تمغـــط بالسما بنمغاطي = وتمشي من الدوحة على غرب يبرين بـــدار اليمامة نزلت بنهباطـــي = وركـــابها مــن زين ركبه مـريحـــين وتدخل مطاره ماعليك اشتراطي = وتمشي وامورك كلها زين في زين وانص النظيم وعنه بالك تخاطي = تلفي سطم زبون من كان عــــانين في مجلسه تلقاء دلاله قلاطي = وصحون في وسطه كباشن سمينين وياجيت عنده بالكرامة تحاطي = زحول الرجال اللي على القوم صلفين ابو فهد ماهو بخيل ٍ يطــــاطي = من راس قــــوم بالحـــرائب عنيدين لو طال وقته مايجيه انحطاطي = صبار جبارأ على الــعسر واللـــين ياجاء نهار فيه مثل الغطـــاطي =ماتسمع الا فيه صوت المثـــارين تلقى مضاربهم كبارأ وغاطي = ومضرابهم دائم براس المسمين يابو فهد ياعزوتي واحتياطي = انت الصديق اللي يغيض المعـــادين ياشفتكم زاد الفرح واغتباطي = من يوم جيتونا على الجمس ناصين مار البلاء شخصأ صار متواطي = سوالفه مثل سوالـــف زعينين لقوه مدري وين راع الخراطي = يبــغــي يخــــلبصــنا وحنا ذكيين بعض العرب هرجه بليا انضباطي = يقوده الشيطان قود البعارين واضح بعقله خلتن وانفراطي = وراع المصالح يستغل المساكين لاشك حنا عارفين الخـــلاطي = حيث اننا ياطيب الفــــال صافين ياجاني الطيب فرشت البساطي = لو خالفأ بالراي ما قلت له شين واللي عدا مني عدي القطاطي = ماله مجال ٍ بين راس الحصانين

تقبل تحياتي
اخوك نهار بن هيشان

.. ما للبلاوي يالربع غير اهلها..

0000 ما للبلاوي يالربع غير اهلها !!!

	ان وسوس الشيطان والنفس ضاقه=حماقة الجهال ما انا من أهلها وان جتني الزلّة من احدى الرفاقه = افتح لها بابٍ فضي واحتملها والصاحب اللي في اسلوبه حماقه= اصبر على عوجاه وأنا جملها احمل حمل وأحط فوقه علاقه = ماللبلاوي يا لربع غير أهلها اقدّر الأصحاب واحمي الصداقه=وأجزى راع الشينة بزينه بدلها مار البلاء اللي مايجي باللباقة = خبلٍ جرح روحك وكبدك دبلها هذاك والله لو حصل لك فراقه=تسجد شكر وتقول يارب اطلها وياحي مطنوخٍ قباله أشفاقه=روحه على حسن التعامل جبلها صدره فضيْ وفاتحن فيه طاقه=هذا خرج منها وهذا دخلها مثل العسل سلسٍ وحلو ٍ مذاقه= من حشرةٍ لكن غلبها عسلها وياحي عشّاق المراجل عشاقه= نفسه على باب المراجل عقلها مزبان للي قاسي الوقت ساقة= يفزع ونفسه مايجيها مللها بشوش وجه وفي حجاجه طلاقه=وسفينته دايم يصلّح عطلها وياحي من قوّى مع الله وثاقه=يخشى عذابه ساعةٍ مايحملها دايم وهو بالله قوي العلاقه= يعمل قبل روحه يجيها اجلها يبي ليا من لِف ساقه بساقه= والكل يجزى في امورٍ عملها به يتقي حر الجحيم وحراقه=ويبقى على ربك بواقي املها وصلوا على اللي بذكره النفس راقه=امين. صادق. والرساله حملها

سطم فهد الخليل

عبد الله الداموك الرشيدي
شاعر من فطاحلة الشعر المعاصرين
شاء الله انه زارني في منــزلي بالرياض
وقد اتحف الحضور بطرائفه العذبه
ومن بين تلك الطرائف قصيدته الغزليه
التي يصف بها رمش معشوقته في قوله

والرمش كنه من طوابير شمر=لاصفّها عبد العزيز الجنازه
لاطقوا اللطمه على ظهور ظمر=قدامهم عدو يطلب نجازه

كان لذلك الوصف ابلغ الاثر في النفس
وعندما عاد الى مقر اقامته حفر الباطن
ارسلت له رسالة جوال بابيات تعبيرا عن المشاعر
الا انني تنحيت بها عن قافيته

0000 0000عبد الله الداموك00000 !!!

	عبد الله الداموك شعري لياجاك= اقره شرف لي منك ربي يشرفك انا اتشرف باللي مثلك وشرواك= وإلا ادري ان الشعر ماهو مكلفك انا يابو ممدوح اشكرك واجزاك = عن بيت شعرٍ مرني في طرايفك يومك توصّف رمش منهو تحداك= اللي على غالي حياتك مناصفك لله0 درّك و درّ0 وصفك ومبداك=لك منهجٍ ماغيرنه عواطفك ولعل قولي بك يوصلني ارضاك= وإلا لعله لو بعض شيء ينصفك شكراً يقابل لك0 و شكراً يتقفّاك=و شكراً فراشٍ لك0 وشكراً يلحفك

سطم فهد الخليل


وكان هذا الرد

0000 وكان هذا الرد !!!

	يامرحبا عداد ماسارت خطاك=وعداد ماللعز نادوا عوارفك يابو فهد هاض الفكر زين معناك=سمعت عنك وقبل ماجيك عارفك شعرك جزيل وسبك معناك ينحاك=على شوارد طيب الشعر يحرفك قلبك لبيب ويامر الفكر ينهاك=غير الذهب ماتصرفه في مصارفك النعم ثوبك كل ماحل طرياك=والعز والناموس تبري مواقفك يالضيغمي النور في الليل مسراك=هجت المحيط الأطلسي في عواصفك شموخ نفسك للعلا دوم يقداك=على ذلول المرجله لك مرادفك واختامها عداد ماسارت خطاك=تحية التقدير تشمل عوارفك

عبد الله الداموك الرشيدي

كيبوردية شف 0مغفرة ربك ذنوب العبادي000 !!!

	ياصار ماتدمح لزلات صاحبك = تر0مركزك بين البشر شخص عادي ويا صار ماتافي بفتلة شواربك = تر0يلحق اسمك عند ذكره سوادي ويا صار مالك عُبرةٍ من تجاربك = احيان غادي وتقتدي بشخص غادي صاحبك ترله واجبٍ مثل واجبك=وعليك حقه مثل حقك وكادي اخفض جناح اللين ولين جوانبك = اكسب قلوب الخلق لا0 لاتعادي خلك تغطي عيب ماهو بعايبك = شف 0مغفرة ربك ذنوب العبادي

سطم فهد الخليل

ارشيفيه حتى اتواصل معكم

000ممشاه ما بين السماء و المزوني000!!!

	يا راكب اللي بالوطى مالها عج = ممشاه مابين السماء والمزوني تمشي على قاز(ن) ونار(ن) توهج = هذا طعامه يوم له يصنعوني فوقه غلام(ن) له اسبوع(ن) تخرج = يبي يبرهن خبرته والفنوني إن أقلعت قامت ترج المدرج = وتسبق عيون اللي لها ينظر وني واليا استوت قامت تفج الهواء فج = شعيط خام(ن) يوم له يشرحوني صوته بفج(ن) بالسماء وجسمه بفج = عجزو هل الصنعة لهن يجمعوني بالله يا لكابتن أحب أتفرج = على مقدمة الجناح اركبوني واليا وصلتو ديرة(ن) قيل به عج = الله يسهل دربكم حولوني لي به رفيق(ن) عنده الصدر يثلج = يشفق على شوفي وأنا له حنوني يابو.روان. تر شوفتك تشبه الحج = عندي ترى شوفك يكحل عيوني أنا وأبو نايف نجيك انتهرج = نشفق عليكم مثل ماتشفقوني نبي بها لدنيا سوا ليف مع هرج = لابد من يوم(ن) هلي يدفنوني لابد من يوم(ن) يجي موفقه حرج = لاني بنافعكم ولا تنفعوني عسى لكم من عند الإله مخرج = صحا يف(ن) بأيمانكم تحملوني وصلاة ربي عد من للحرم حج = على نبيا(ن) لسنته يتبعوني

سطم فهد الخليل

قصيدتي رحلة الضياغم والتي مطلعها من جبل خولان سرنا بأتجاه جبال طي

انتحلها شخصٍ ما وشارك بها في منتديات التريبان علما ان الشخص ليس من التريبان

فانزلت بمنتدى التريبان قصيدة فيها ترميز لذلك الآ ان الشاعر مشعل التريباني قرأ الترميز

وقام بالرد في وقت وجيز وما اقول الآ شكرا يابا عبد الرحمن

اليكم الحدث

000 الفاطر اللي عندكم يالتريبان 000 !!!

	أبو فهد قال المثايل والألحان = ياهل العقـول الفاهمات افهمـوها الخيل تنسب للمرابط والأرسان=والبنت تنسبها العـرب لأسـم ابوها والفاطر اللي عندكم يالتريبان = حِطـو عليها وسـمنا واحفظوها الرحلة اللي بيـن طـيٍ وخولان = بعـض العـرب لحسـابهم جيروها إنتاج فكر الرأس منطوق بلسان=بسـيرة جدودٍ ماضيــه سـطروها ياربعنا الدهمان ذربين الأيمان=أما احفظوها زيـن وإلا اطردوها وللحق ميزانٍ وللحـرب ميـدان = وبالضيغميـه نعطـي اللي بغـوها وغير العطا لا مانبيعه بالأثمان = ومـادام هـي في نزلكم احتمـوها والآ بصيح صياح واقول يتمان = ياحــق ابـوي السـالفة سـنعوها واللي بسبأ ذكرْه هدهد سليمان= الجــن هـي وعرشـها حضــروها

سطم فهد الخليل

--------------------------

الرد من مشعل عسام التريباني

000 الفاطر اللي شفتها شوف الاعيان 000!!!

	يابو فهد يالليث ياطـــــير حوران = رسالتك كل الخلايق قــــــروها والفاطر اللي شفتها شوف الاعيان = مع ذود ربعن بالرسن جودوها اللي رسنها يافتــى الجود طمعان = مــــايدري ان اهل الامانه لقوها مايدري انك شفتها شـوف بمعان = مع ذود ناســـــن بالفلا طيحوها بعض البشـــر يابو فهد فيه جنجان = كم كــــبد عاقل يالفهيم ادبلوها ناسن سوالفها خطـــوطن بجدران = حتــــــى الاسامي ياسطم قلبوها تعلمت قلب الاسامــــي على شان = تضــــيع يامـــن العرب دوروها لكن نبــــــي ننخا مواريث دهمان = واليا لــقوهـــــــــا يمّكم رجعوها نجـــدع شداد الضد عنها ولو كان = يحرم عليهم كان هم يركـــــبوها يحــــــــــرم عليهم ركبها يابليهان = والله ولافـــــي وسمهم ياسموها

مشعل عسام التريباني

ابيات ترحيبيه بمناسبة زواج فايز لزام ملوح الخليل
وبحضور المحامي الشاعر/عواد بن سلامه الجهني من المدينه

0000 ابيات ترحيبيه !!!

	انا اول شي فِــ بداية كلامــي = على محمد صـلاتي والسلامي نبيٍ خصـه اللــه بالـرســاله =يوجّه بالحلال عن الحرامي وثاني شي انا اهني وابـارك = لأبوالعريس وجـده والعمامي حضرنا في زواج الشبل فـايز = معـزه لـه وحـبٍ واحترامـي واقـول الله يبارك فـي زواجٍ = حضـر في حفلته ناسٍ كرامي وثالث شـي انـا الضيف المعزب = ومرام اهل الحفل نفسه مرامي وبأسم اهل الحفل اهـلاوسـهلا= برجل جـامعٍ شــعر ومحـامـي عــواد ابن سـلامة من جهينه = عريب السـاس خـوال وعمامي عريبين النسب بنو قضاعه = لهـم مجــدٍ على رأس السنامي هلا بعواد في حفل الضياغم = كـريمٍ في حفـل قومٍ كـرامـي احيــي بالنيابـة والأصاله = لأنـي واثــقٍ واعـرف مقـامي واحيي في رجــالٍ شـرفــونا = جـميع ولا نعـدد بالأســـامـي هـلا باللي لفـونا ونتشـرف = ولا نلقــي على الغايب مـلامي والآياللـــه ياجزل العطايا = تديـم افـراحنا في كل عـامـي واختم القـول في شـيٍ بدابه =على محمد صــــلاتي والسلامي

سطم فهد الخليل

في اولى ليالي هذا الشهر الكريم

في مساء يوم الخميس ليلة الجمعه 1/9/1433هـ

دعانا الاخ حميد النزاري الخليل لحضور مناسبه على شرف كل من

(الشيخ سلطان والشيخ خالد) ابناء جدعان اللغيصم في قاعة هلا بحفر الباطن

حضرت من الرياض بدعوة من الاخ حميد وتشرفت بالوقوف امام الجميع والقاء الأبيات التاليه

0000 خالد0 جدعان0عواد0اللغيصم!!!

	انا اول شي وبـداية كلامـي = على محمد صــلاتي والسـلامي نبـي اللـه وآلـه والصحابه = عدد مالبـس في مكة احرامي وثاني شي على الجميع اسلّم = ســلام الله على جمـعٍ امامـي سـلام الله عليكـم يالنشامى = وعـذراً عن ذكر كل الأسامي وثالث اشي ابشكر من دعانا = كريم قام في دعوة اكرامي عريب الساس حميد النزاري = عريبٍ بين خوال وعمامي دعانا في حفل من شاع ذكره = سما و اسمه سما بين الأسامي دعانا في حفل ســفير شمر = سـفيرٍ حـل في راس السنامي خالد 0جدعان0عواد اللغيصم = اسـامي له معــزه واحتــرامي هـلا بك مرحبا يابن لغيصم = وترى لك عندنا اكبر مقامـي ترانا نفتخــر ياحل ذكرك = ولبسنا من سـبب اسمك وسامي اعرف أمجادكم ماهي جديده = قِطامـيٍ ورثهـا مـن قطامـي واللي غذاه ابو بدم جده = ورضعه من صباه الى الفطامي يجي مثل خالد0 ليثٍ مجرب = رسَم رسْمه الى العُليا المرامي ويعيش الشيخ سلطان اللغيصم = سـند لأخوه ودرعه والحزامي يميـنه هو ضمينه هو معيـنه = على الشـدات في كفه حسامي وسلام الله على كل اللغصـم = اخـوان و بني عـم و عـمامـي واختم القول في شيٍ بدابه = على محـمـد صــلاتي والسلامي

سطم فهد الخليل