|
06-03-2010 | #1 |
|
توضيح لقصة الشياه(الذبائح) واسماء الشيوخ ..كتوثيق تاريخي
السلام عليكم ورحمة الله وبركاته
ان قصة الشياه او الذبائح نلاحط من كتب عنها بعض المنتديات واخذو يشرقون ويغربون بالقصه : فهي قصه ومشهوره ومرويه بالمجالس ومن مجموعه من الشيبان ودايم نلاحظ بالمجالس و عبده وشمر يسلفونه ويستشهدون فيها بعض التقسيمات ويرجعونها لاصول تقسيم خص نص قبيلة عبده وهي نوعا ما ترمز الى تقسيم عشيرة عبده كيانات ومشيخات مستقله كفخوذ من قبيلة عبده وتجتمع مع بعضها بجد واحد وهو اصل عبده الضياغم السناعيس من شمر ,, وقصة الشياه والذبائح التي ياخذها الشيوخ : من القصص القديمه والناس اول تكتفي باللقب دون الاهتمام بالاسماءفتجدهم يكتفون بلقب ابن سعيّد وابن علي وابن شريم وابن جدي ولاتهتم كثيرا بالاسماء وذالك لشهرت هذه الالقاب عند الناس وقصة الشياه منقوله بكثره من شيبان ومن عبده وبعض الرواة اشار لها حسب ماكتب عنها ,, ------------------------------------------- لقد جاء ذكر( تقسيم الشياه او الذبائح) بكتاب ايام العرب الاواخر (قصص وروايات شفهيه من شمال الجزيره العربيه) للدكتور سعد العبدالله الصويان وموجود جاء فيه: قسم(جزء): عبده انسابهم وشيوخهم ووسومها ننقل لكم الروايه من الكتاب نفسه وحرفيا وهي : والكلام للمؤلف عن الراوي : (هاكلوقت يوم القبائل تاخذ الشاة على الاجناب اليحي بالاول ماكان لهم الا شاة وحده ياخذها ابن شريم الى ساقوه لهم الاجناب ووحده ياخذها بن علي وبعد ماجاء عقيد من الروله يقاله ابن ملحاق عقيد اوذي شمر و قضبه خلف ابن شريم وربطه حتى انه جاء اخوه وسامه من عشرين ناقه الى ستين ناقه وعيى يطلقه وبعدين سعل اخوه المربوط من هم هذولا وهوذولاك ومن ادخلك عليه؟ قال ادخلن على النزل هاذاك اللي هم الجري وهذولا هم والدغيرات صيحتهم وحده واسمعم وانا بالمجالس حميّاهم وحده ويقولون انهم هذولا من دون هذولاك وعيال مره وحده (وامهم وحده) راح اخوه وخذا من البيوت درع غزل وهالخيوط هذي وعقد وحده بوحده وعقده بيد اخوه المربوط وجره لبيت ابن وابل وعقده بواسط بيت ابن وابل من الجري وصيحتهم وحده وهم وعيال (علي الدغيرات) وجوا خلف بن شريم قالو يابن شريم اطلق الربيط دخل علينا قاال ابن شريم ماني مطلقه هذا اوذانا وانا لوابطلقه كان اطلقته بستين ناقه .والله ماطلقه الا تطلقه الاماطلقه ..مشت الكرام على الكرام وتصير مناخ دوير ..ودوير شعيب حدري ياطب شرق حائل وتصير الكون وتهج البل ويحطونه ويلحقه المحول من ال جري والدغيرات ويطلقون دخيل الوابل . ا(بن ملحاق )..وبعدين جا الصيف وتوادو ويطلع للدغيرات شاة لابن سعيّد باسباب مناخ دوير ويصير ليحيا شاة ياخذه ابن شريم وشاة الدغيرات ياخذه ابن سعيّد ولابن جدي شاة ملاقة شاة ابن علي ويصير لهم اربع شياة عبده وحده لابن سعيّد ووحده لابن شريم ووحده لابن علي ووحده لابن جدي وهذي باخذونه من الاجناب قصرة سنع ورتاعه ..ويطلع هاكليوم ابن رمال بجوار عبده زعلان على سنجاره ويطلع له شاة ))انتهت القصه منقول حرفيا من كتاب ايام العرب الاواخر والمضمون بالقصه . .صفحه 37 قسم عبده وشيوخهم ووسومهم ------------------------------ وماجاء بالقصه المنقوله من الكتاب ايام العرب الاواخر قصص واساطير مرويه من شمال الجزيره العربيه يخالف من ذكر بعض من كتب في المنتديات انها عباره عن جباية زكاة لابن على لان الواقع التاريخي المنقول بالقصه ينفي مقولة انها جباية زكاه ..ويخالف من قال انها لازم تذبح شاة للشيوخ المذكورين اذا ضافك احدهم .. حسب ماذكر بالقصة ,,, حسب الروايه السابقه تكون اسماء الشيوخ من قبيلة عبده من شمر : ابن علي له شاة وابن جدي له شاة وابن شريم له شاة وابن سعيّد له شاة وهي من العوائد القديمه و تختص كشهرة الروايه بفخذ عبده من شمر ولكن خروج ابن رمال ونزوله بجوار عبده و يطلع له شاة ..حسب القصه المذكوره .. نقل كتاريخ فقط ومعرفه اصل سالفة الشياه او الذبائح ومن هم الشيوخ اصحاب الشياه ,,, ومن عنده روايه او له تعدل وتصحيح الاخطاء فليتفضل مشكورا .. منقووووول |
|
06-03-2010 | #4 |
|
الشهم
مشكور على النقل وننتظر منهم يملكون الرد على مشاركتك اناوالله ماعندي اكيد ولااريد الدخول بمتاهات لانستفيد منها ولعل الاخوان يردون عليك قريبا التحريف صار سوله للكثير من البشر ولاتعلم من الصادق أو اللي كلامه غير صحيح ولعل الراوي العزيز فواز الغسلان يرد وينورنا بعد تقبل مروري |
|
06-03-2010 | #5 | |||||||||||||||||||||||
|
صويدر الف شكر لك نحن ننقل رواية التاريخ وناخذ ماهو اقرب للتوثيق .. كتاريخ من تاريخ عبده من شمر وهي اقرب للصحيح |
|||||||||||||||||||||||
|
06-03-2010 | #6 |
|
مشكور ع النقل استاذي الشهم
راح زمان الشياه الله المستعان تقديري لك |
اغلي اهل الطيب واعز القرابه=وابغض النمام والرجـل الهـذور من يحط الطيب والنخوة زهابـه=والله اني له رفيـق (ن) مايبـور |
06-03-2010 | #7 | |||||||||||||||||||||||
|
صدقت اخي العزيز ابو ناصر وتشرفنا بمرورك ولكن القسم المكتوب فيه الموضوع تاريخي وكتبناه بقسم المواضيع والقصص التاريخيه للمهتمين بالتاريخ الشكر الجزيل لك اخوي ابو ناصر وتشرفنا |
|||||||||||||||||||||||
|
06-03-2010 | #8 |
نائب المشرف العام
صفق الهواء
|
بارك الله فيك اخوي الشهم وانت اخذت كل معاني اسمك الأصيله الف شكر على الأيراد الطيب وهذا تقريباً هو المتداول وأكثر ماأسمع في مجالس الدغيرات وباقي عبده ماأوردته الله يعافيك وننتظر لربما يظاف شي للفائده والتوثيق أكثر لنا وللتاريخ0 الف شكر لك فاضلي ولا أنشلت يمينك يالسنافي تقبل تقديري وأحترامي |
|
06-03-2010 | #9 | |||||||||||||||||||||||
|
اخوي العزيز صفق الهواء والله يعطيك العافيه وصدقت اخوي الغالي القصه هي هذي له شواهد تسندها من الشيبان منهم من ثنين من شيبان الدغيرات وشايب من الويبار وروايتهم متقاربه مع اختلافات بسيطه لايتغير من اصل السالفه ومقارب لما جاء به ناقل الكتاب المذكور انفا في بداية الموضوع اخوي الكريم لك الشكر الجزيل |
|||||||||||||||||||||||
|
06-03-2010 | #10 |
|
الشهم
تسلم على الموضوع المميز ومن مبطي وانا ادور طرح حقيقي لهالموضوع اللي عند شيباننا ان الذبايح لثلاث : لابن علي . وابن رمال , وابن طوالة وسألت الراوي الغسلان العام الماضي عن هذي وذكر لي سالفة جباية الزكاة وسألت الراوي صالح الظلماوي الله يمد بعمره وذكر انها لسبعة من شمر وهم اللي يدخلوون عق ويطلعون حق من ضمنهم ابا الميخ , والنويشي من الزميل , ومايحضرونن الباقين لارجعت الديرة آخذ العلم كامل منه وارجد به هنا ان شاء الله الله لايهينك يالعزوة |
|
مواقع النشر (المفضلة) |
الكلمات الدلالية (Tags) |
..كتوثيق, لسالفة, الحقيقه, الشياه, الشيوخ, القصة, تاريخي, واسماء |
الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
إن جميع ماينشر في المنتدى من أشعار ومشاركات ماهي إلا نتاج أفكار تمثل رؤية كاتبها فقط ولا تمثل رأي المنتدى
(رأيت الحر يجتنب المخازي.. ويحميه عن الغدر الوفاء.. فلا والله مافي العيش خيرٌ.. ولا الدنيا إذا ذهب الحياءُ)
المشرف العام