ديوان الشاعر / نجم الشعر

ياذيب / بقلمي

	ياذيب ماشفت اشهب الذيب ياذيب=يوم انت تمشي في ربوع الفيافي تلقاه دايم حول حرش العراقيب=ماظنتي مثله على الناس خافي أبو زايد راع الوفاء والمواجيب=ربيعنا وقت السنين العجافي محمد بن عبدالله الشويب الذيب=وان قلت محمدنا على العز كافي له ماقفٍ مافيه شكٍ ولا ريب=لامن نخيته مايروم التجافي يقضي لزومك راعي العرف والطيب=تلقاه في كل المواقف سنافي ولامن خاويته شال عنك الصواعيب=واخلاقه تجعل غابر الجو صافي ولا من لفاه الضيف يلقى التراحيب=هو الذي من جملة الناس وافي الله يجيره من سموم اللواهيب=ويبقى لنا رمز الوفاء والتصافي وياذيب ماشفت اشهب الذيب ياذيب=يوم انت تمشي في ربوع الفيافي

نايف الشويب

ماعندنا تصويت / بقلمي

	ماعندنا تصويت يافالح الراي=الا تصويت العز في منتدانا الشامخ اللي مالناه عنه اقفاي=هو عزنا هو فخرنا هو منانا ومبدا النشامى قبل مايصر مبداي=ياماسعدنا فيه وياما عطانا يفداك ياابو غازي الرايح الجاي=لاتغلقه مادام هو ملتقانا وياما على شانه تسابقت بخطاي=وجزل المعاني من خفوقي سمانا وياما غيري يقول هو غاية مناي=حيث الهوا في منتدانا هوانا ياابو غازي كانك تبي غاية رضاي=عدم اغلاق المنتدى هو رضانا وسلامتك مااقول ياعزوتي باي=حنا عرب والطيب هو مبتدانا

نايف الشويب

قصة جندي / بقلمي

	ياعزتي للي تبلَّغ مجازى=الوحده والثنتين في تالي الليل يوم العريف المستلم له توازى=من سطوته شاف العناء والبهاذيل هو يحسبنه يوم يجازي انجازى=نسي يومه متعرضٍ للغرابيل واليوم يمشي كنه فوق القزازى=ويشوف جنوده مثل شكل البراميل توه ترقى رتبته جته طازى=ويشوف نفسه كنه منوِّخ الفيل وهذي القصة سجلتها بامتيازى=عندي على كشف الجزاوي تفاصيل قصة جنديٍ من عريفه تجازى=لو يطلب التكميل ماجاه تكميل

نايف الشويب

ياطيري / بقلمي

ياطيري / بقلمي

	ياطيري اللي بالجناحين رفَّى=وانا هنا والوقت بالحيل قاسي احيان تجي مثل شهدٍ مصفَّى=وارفع بها يااهل المواجيب راسي واحيان تجي وعقلها مستخفَّى=اخف من عقول اهل التكاسي والفكر يااهل العرف مني معفَّى=ولامن ندبته قام فوق متواسي واحيان يجي معنى قافي مخفَّى=ولامن بدا مثل الجبال الرواسي ومن كان وده للخبر يستشفَّى=ويبي يعرف اطوالها والقياسي البير ماها لابدا يستجفَّى=خطرٍ على كبود الظوامي يباسي ولامن بدا نور الروتين يتطفَّى=الناس تبحث عن بديلاً اساسي والشاعر اللي بالمجازيل وفَّى=مايمنع انه بالمقابل سياسي لاتحفَّها ياراعي العرف حفَّى=الناس ماهي بالمواقف سواسي

نايف الشويب

قالوا علامك / بقلمي

قالوا علامك / بقلمي

	قالوا علامك يابو فهد خاطرك ماهو بالحيل=نشوف الهم ياابو فهد واضحٍ على شكلك نبيك تشرح لنا اللي حصلكم مع التفصيل=والا على ماقالوا اضحك للدنيا وتضحك لك قلت اسلموا والعلم جاكم ماهو يقبل التأجيل=مااقول مثل ماقال المصري وش فيك متلكلك الأمر كله ياجماعه شايلٍ حملٍ ثقيل=الله يعينك ياللي مثلنا بلشان في حملك هم الإيجار اللي خذا كل المكاسب والتحصيل=وخلاك ياللي مثلي ماترتاح حتى مع اهلك حيث المستاجر حالته يسودها كل التعطيل=رهيناً للمؤجر والؤجر منه مستهلك الله يغنينا من فضله مانبي غيره تفضيل=طالبك يالمعبود تغنينا عن خلقك من فضلك هذ جوابي عن سوآلكم جاكم مع التحليل=وياللي همك كسب الإيجار حاسب حاسب على مهلك لا بد من يومٍ يجي ونشوف الحال في تبديل=تزين احوالنا وماتلقى من يجيك يدفع لك

نايف الشويب السليمي

فهدنا / بقلمي

فهدنا / بقلمي

	أهني نفسي والا اهنيك=فهدنا يا عصابة الراسي بزواجكم من بنت ابناخيك=عريبة الأصل والساسي أبوها طيبه مابه تشكيك=مع الكرم كل نوماسي سليمان بن غالب ويكفيك=إنه على الطيب متواسي يعنيه كلامي ويعنيك=والشهم مثل الجبل راسي الحي قالوا انه يحييك=والميِّت يزيدك نعاسي وانا تراني ابا وصِّيك=حيث انت مبداك من ساسي الأوله طاعتك باريك=رب الفلق ورب الناسي وعلى سنة النبي مهديك=أغلا من اللُّول والماسي والثانيه طاعتك والديك=كم ليلةٍ صاروا حرَّاسي من شان مااحدٍ يجي يؤذيك=واسقوك من حالي الكاسي والثالثه من بدا يعطيك=أغلا ما عنده بالأنفاسي نسيبك اللي منه يدنيك=خلك معه طير قرناسي واختامها ربنا يحميك=يحميك من كيدالأنجاسي وصلاة ربي مع التبريك=على النبي عد نسناسي

نايف الشويب السليمي

قلبي اللي / بقلمي

	أتصبَّر والأمل بالله كبير=يفرج الضيقات عني واستريح والعقيده ماعلى ربي عسير=عالمٍ الأسرار بالكون الفسيح وابتدي بالقاف والمعنى غزير=وادري انه مايصح الا الصحيح أعسف الطاروق فالبحر القصير=على نهج الشعر الشعبي والفصيح قلبي اللي من عناء خلي خطير=عزتي للقلب من حبه جريح لولا ضلوعي يحجبنِّه لا يطير=كان شفته طايرٍ مع كل ريح قلبي اللي تلَّته مني عبير=وبالي اللي منها ماهو مستريح جرَّني في حبها سلك الحرير=دونها ياليت حظي مايطيح واختم الأبيات من نفح العبير=لااختلط ريح الخزامى وريح شيح وصلوا على روح الهادي والبشير=قدوةٍ للناس بالقلب النصيح

نايف الشويب السليمي

يامرحبا فيكم / بقلمي

	ياطير رفرف وغرِّد بالفرح والسرور=دام الليالي ياطير جتنا بسرورها ياالله انك توفقنا في جميع الأمور=والناس ياربي توفقها بامورها ألفٍ هلا ومرحباً نقولها للحضور=اللي شرَّفنا ياهل الطيب حضورها تفضلوا قدمكم الورد مع الزهور=يازين شوفتكم مع الورد وزهورها والشاذليَّه والعود الأزرق معها يدور=وبعد السوالف صوانينا يجي دورها والمعذره ياجماعه عن جميع القصور=الناس مهما تقدم تشعر بقصورها يامرحبا فيكم واللي تعذر معذور=وكل النشامى شرواكم نقبل عذورها واللي حضر حفلنا نوره زاد النور نور=الليله الليله نشوفه بدا نورها بمناسة عرسك يافهد كلٍ بك فخور=أوَّلهم انا ياابوك وكلي فخورها ونسيبك أبو غالب تراه نفس الشعور=وناسٍ تحبك يافهد نعرف شعورها مثل أخوياك الأكارم والقدر بالصدور=واهل الشيم والقيم وفاها بصدورها الله يجنِّبك يافهد جميع الشرور=ويحفظك من كيد بعض الناس وشرورها وختامها نشكر الله الغفور الشكور=شكورٍ يزيد الشاكرين بشكورها وصلاة ربي عدد من هو للكعبه يزور=على النبي الرسول افضل من يزورها

نايف الشويب السليمي

أسري مع الهوجاس /بقلمي

	أصارع الأفكار واندبك يالنشوه=وابدعك انا يالقاف واكتبك بيديني أسري مع الهوجاس وتسرع بي الخطوه=والبوصله عدادها للعناويني والذيب ماتغزيه في نومة الغفوه=لونام مايخطيك في لمحت العيني وانا خاويته حزةٍ بعدها غدوه=وكم حزةٍ سرحان فيها يخاويني أسبِّح وهلِّل وميِّل على الغنوه=واطلب عسى رب المخاليق يهديني أستغفر الله عن هوى النفس والجفوه=وعن حاجتي للناس يارب تغنيني واحب بنتٍ زينها صايفن صفوه=قلب العناء في صافي الخد مشقيني والحب بين اثنين ياناس ياحلوه=لاجيت اعطيه من غلا الود يعطيني ومشروعنا بالحب ماهو على الخلوه=وهذي حلاته مع الأخلاق والديني

نايف الشويب السليمي