ديوان الشاعر الرأوي / فواز ابن غسلان

هلا ياغزال حن قلبه لنا وارسل

	هلا ياغزال حن قلبه لنا وارسل=ذكر رقم جوال الجريح وعناوينه لو ماذكر رقمي عقب مانساه افضل=ولا عودة جروح الغرام وطواعينه انا يوم اروح لديرة الشيخ ابومشعل=اخاف اجمع الثنتين دهر ومعاوينه وابي ترك محبوب بعهد الغرام اهمل=وخشف وقعنا تحت مرمى نياشينه تكز القذايف راجمة رمشها الاكحل=وتقصف دفاعات الخفوق وميادينه لما صار قلبي في لهيب الحروب اعزل=وقيل الجمل لا طاح كثرت سكاكينه غدى تايه بين العواصيف والحنشل=وقصف من اريام الخشوف مزايينه رموش العنايد تطعن الخصم في مقتل=وتترك ضعيف الحيل تنزف شرايينه مدامه يعاملني كما الغازي المحتل=ويسجن مطاريح الهوى في زنازينه له اعوام لاينشد علينا ولا يسأل=مثل فعل ضباط العرب مع مساجينه سجين يعاني في طواريف ابو زعبل=لانه دعم مرسي وحرم غلاوينه لما ضاعت افكاري وحالي بدت تنحل=على نار عقال الهروج ومجانينه اذا شافني شديت لاهل الجنوب اشمل=واذا حان وقت الوصل تكثر مصاخينه عقب ما رماني بالبحر قال لا تبتل=هروج تكرر ما فهمنا مضامينه تثاقلت هجره والرضى بالهوان اثقل=ولا راح اطارد بالهبايب كراتينه واذا كان مرسال السعاده علي اقبل=وغابت هواجيس الفراق وشياطينه وقيل البشر في بادي اعمارها تجهل=قبل تكتشف زين الطواريق من شينه فأنا حالفٍ باللي فرض شرعه المنزل=فلا انزل بعمري فوق فوهة براكينه واذا زان حكمه راح اعاند واقول اشكل=واركب على باب الضماير كوالينه ولا هو مقال اللي اليا قال مايفعل=او اللي يقول ولا يقدم براهينه او اللي يدوس عهود قوله ولا يخجل=ولو عاهدك وسط الرجال ودياوينه مدام السوالف بالفراغات ماتنقل=ومن ينقله يصبر بلدغة ثعابينه ولا ني من اللي لا لقى الهون ما يزعل=لاجل عين شرهات الشيوخ وصوالينه او اللي كفوفه في وقوت القسى تبخل=ومحدن قلط يبي الدسم في مواعينه او اللي مع اهل المال والسلطنه طهبل=وساوى النسور الجارحه مع كراوينه ولا اقول خلك مع رزيل الكفوف ارزل=وتترك مرابيع الكرام وبساتينه وتجعل مقامك مع رذيل الطبوع ارذل=وتدخل محلات العفون ودكاكينه انا اقول خلك مع جميل النفوس اجمل=وخلك بمنزال العلا مع شياهينه واذا شفت هراج الجهالات لا تجهل=عقول البشر ماتستوي في موازينه ولا تفضح اللي في دروب الحياة اخمل=ترى الستر من طبع الكرام وقوانينه ولاتحسب ان الله تناساك يوم امهل=ولابد للديان يطلب ديايينه