اشهر معارك شمر وعتيبه

25-09-2007

بسم الله الرحمن الرحيم

قبيلة عتيبه من القبائل الكبيره ذات الصولات والجولات في الجزيرة العربيه واشتهر منها العديد من الفرسان

الاعلام الذين لهم صيت كبير وشائع مع الناس بشتى طرق الطيب00

الا اني ومع الاسف اطلعت على بعض منتدياتهم التراثيه فوجدت الكثير من الوقائع المحرفه والمعدله والتي

تم تعديل بعض حقائقها وابياتها الشعريه واتمنى ان لايكون متعمدا لذلك كتبت هذه السطور التي توضح

بعض ماحدث في تلك الفتره بين القبيلتين علما ان قبيلة عتيبه لها من الفخر والمجد مايكفيها عن التزوير

الذي يقوم به بعض ضعاف النفوس والدنيا دائما انتصار وهزيمه وقوه وضعف وهذا حادث لكل القبائل والافراد

لذا نرجوا من كل من يكتب في مجال التاريخ البحث عن الحقيقه والتزام الصدق لانها امانة تاريخيه للجميع

ومن اشهر الوقائع التي حدث بها التزوير هي موقعة ( ابيرق ) او البرقان والتي شرح فيها الشاعر سلطان

التهامي العتيبي هزيمتهم بشكل مفصل الا ان البعض قام بحذف ابيات الاعتراف واضاف اليها ابيات عكس

ذلك تحكي الانتصار المزعوم وهذا ظلم وتزوير0 ولو كان ذلك في موقعة ( نطاق ) لكان اقرب لانها هي التي

رسى فيها فرسان الحفاة من عتيبه امام جيش ابن رشيد ( المهاد ) اما موقعة ابيرق المذكوره فهذا هو

شاعرها سلطان التهامي يقول:

الأ يالله طلبتك يامقل الطير بالجنحان=مقله فالهوى يلفح بزينات الجناحينا
كمنك قادراً تنجي من اللي ياخذ العربان=أخو نوره محمد لادفع ذروات ناصينا
ولا لا عدت يايوم علينا فأسفل البرقان=نهار البيرق الجاير عن الحله يعدينا
والا واشيب عيني من تنازي الخيل بالتومان=ليا قلت أوجهو ردو لنا خيلاً تناحينا
طردنا البدو عن حم الذرا لين ألحق الحضران=وموشية الفتايل بالبنادق وقدو فينا
تلافت لقحنا والخلف مرزيت(ن) على الحيران=وتوحى حس دماماً تقفاها وقافينا
ترى البل دونها قحص الطلايع فوقها العضيان=حمول الخيل مهدية العمار بلا موازينا
تراها دونها جاسر وأبن شلاح وصنيتان=وينحاهم مخيمر دون حرزات المزابينا
وخذونا في لهيب القيض لامزهب ولا صملان=عسى رب(ن) كتب هذا علينا مايخلينا
ذبح تركي ذبح متروك مع شبابة النيران=يحسبون الضياغم نجع صلاحن تبارينا
وغدينا عقب ماحنا عرب نمشي مع السيدان=على قطعة حميرن يقدع اولنا لتالينا

وهذه القصيده بعض كتاب عتيبه يشككون في البيت الاخير ويقولون زاده رضيمان الحسين لانهم

سمعوه يقصد القصيده 00 وانا اسمع البيت مبطي لكن الى الان ادخل على الله مااتضح لي شي

وكاد اجزم به 0 ووضعته انا حسب روايتي اللي سمعت من شيباننا ولو اتضح لي عكسه راح

اعلن ذلك بوضوح دون تردد000

والمعركه التي تحدثت عنها سابقا ( نطاق ) هي التي اثبت فيها فرسان عتيبه صمودهم ودافعوا عن

انفسهم وحلالهم بقوه وساعدهم في ذلك كونهم متنذرين للحرب ومتجهزين00

وفي هذا الكون قتل العديد من شمر وانتهت المعركه دون ان يظفر محمد العبدالله الرشيد بالانتصار الكامل

مما دفعه للعوده مرة اخرى 0 علما ان الحفاة من عتيبه كانوا بقياده ( صنيتان الضيط) علا مااعتقد وفيها

قال الشاعر سعود اليابس من الحفاة من عتيبه:

أول كلامي طلبت الله وذكره=ذكرت ربي كل بادي نور
يقول بن حافي بدا راس مرقب=في مرقب عالي بروس القور
يرد من زين المثايل وينتقي=مثل العسل حلو بدون امرور
كلامن أحلى من لبن شمخ الذرا=لاروحت من حاجرن ممطور
بعد جاء خيال طلعة الشمس وامطر=اثعوله من الدم الحمر شختور
وبرقه من أيمان النشاما سيوفهم=ورعده من افواه السلاح يثور
قبلي خشم(نطاق)لاطقه الحياء=شمال من العد الهماج حدور
طاحوا به الفرسان منا ومنهم=وردوا هل العاده على الصابور
نطحنا العداء من يوم جتنا جموعهم=على سردهم والبيرق المنشور
وسقيناهم السم الذحاح وسقونا=مثل نمورن صادمت لنمور
وابن لغيصم طاح منا على الثرا=ونحدهم عن مالنا بحدور
ياذيب ياللي بايمن النير وايسره=كل من مداس الخيل يا معثور
واشبع من الصبيان والجيش والرمك=والى ظميت اشرب من المنجور
تلقا على الساقه حصانن ومهره=وتلقى عيالن لابسين كمور
وصوت لذيبن يم حشة مليه=وخلو لغياب السباع جزور
كم طاح عقب الكون من صيعريه=حناها طناها حنية الباكور
من اولاد حافي لابتي ذي فعولهم=أهل ماقفن يوم اللقاء مشهور
كدو علينا ثم رجعنا عليهم=واقفت بهم جرد المهار اعبور
وردوا علينا وردة في عزيمه=وهج الحلال وزرفل المظهور
وأحاطوا بنا قوم تهاذب خيولهم=ولجة حداويهم على المامور
ورمينا العمايم واعتزينا بحافي=وثبت لهم كل أبلج منعور
وطاحن جياد الخيل من ضرب لابتي=والدم الاشقر بيننا منثور
وحمو جريرتنا عيالن بفعلهم=وعيا على التالين بن صمعور
وافتكت اللقوة بكثر الرزايا=وكلن خذا حقه من الميسور
جنايز الضفران حافي وشمر=أمسي بها سبع الخلا مسرور
واربعي اللي كل ما قلت أظنهم=لاكن يهدم بالبلاد اقصور
أهل مرحبا وان جت ليالي الشدايد=وأهل الكرم وان جت ليال اعسور
ياحيسفا ياريف هجنن حفايا=يوم الردي عن فاطره مثبور
أيضا وابن هزاع وعميش قبلهم=وحزام شوق الجادل الغندور
وجدي عليهم وجد من بات ساهر=يجر العواء من عظمه المكسور
والوجد الاخر وجد راعي هجمه=خذاها الذويبي من طرف مجرور
واستغفر الله قبل تكتب عليه=في كل عمري ما ذكرت الزور
تمت وصلى الله على صفوة الملا=اعداد ما يزهى الفلا بزهور

والنعم والله بالرجال اللي هذا فعلهم وهذي مواقفهم وبالشاعر اللي وصف المعركه هالوصف الرائع الجميل

وادخلوا على الله يارجال لاتحوسون مثل هالنوادر التراثيه سواء لكم او عليكم00

وحدثت معركه لعتيبه بقيادة عقاب ابن شبنان لمساعدة عيال فيصل ابن تركي لاستعادة الملك من الرشيد

وانكسروا وقال فيها حمود العبيد الرشيد:

عادة ولي العرش يرمي هل البوق=سبحان من لى قال للأمر:كن،كان
شلنا على ذروات من كل اهل سوق=ناتي جموع والوعد قصر برزان
يمشون الى نادي شريدة بمرزوق=مثل الدبا بالصيف لى صال كتفان
جينا كما مزن من الغرب مسيوق=يمطر بصبيان وخيل وتفقان
يوم ارتميناكم على النير بلحوق=شرك لحق طقة دحيم وسلطان
وخليت شيخه كنها وصف غرنوق=تشبه لعنز الريم والجسم عريان
من عقب ماهو زاهي صدرها الطوق=ومفاصل بعقود حص ومرجان
من فعل ربعي مروية كل مذلوق=يوم الوغى يفرح بهم كل بلشان
اشرب هماج الما ولو كان مطروق=واصبر على صكات بقعا والاكوان
تمرح وكنك من على راس خازوق=من همنا مايدخل النوم الاجفان
نهجت من درب السعة تدخل الضوق=أطعت حكي ابليس وعلوم شقحان
ومذاقنا مر الى جرب الذوق=مثل الشري ماتكهمه كل مصران
شابت عوارضنا بزارق ومزروق=وصوايح بظهور طوعات الارسان
والى فتق فتقٍ رفيناه بفتوق=نصبح على اللي فاتقه قبل الآذان
رفقاتنا تشرى الى كنت مرفوق=ومن باعنا يبشر بذل وخسران
يوم استحق العرف والديك مفهوق=رقعت خشمه عن عقاب بن شبنان
بخماسي لى وافقت رفة الموق=نقضي الغرض به عند روغات الاذهان
شكر لمن قاضى على الحق بحقوق=قدنا السبب والفعل من والي الاحسان
وأبن أدم لو قال سويت ،مخلوق=سبحان من يرفع وياضع ببرهان
على النبي أفضل صلاة ومنطوق=اللي لنا يشفع بعفو وغفران

واشهر القصايد في حروب شمر وعتيبه قصيدة حسن التبيناوي(شيخة حسن) وقيل انها بعد ( عروى )

وقيل انها بعد المضيق ولعل من لديه تاكيد يفيدنا لاني اكتب من الذاكره واحيانا تخون0

قال حسن التبيناوي:

يامزنة(ن)غرا نشت من لديده=منشاه من حد الهضاب المظله
من خشم عرنان الينه الضيده=بالطول ما جت بالمخاييل كله
مرهاش ياما ضيعت من لديده=وياما هفا به من حلال(ن)وحله
نمرى على نجد(ن)تعمر مديده=فيحا من الماء كل واد(ن)تبله
وزامت على خشم الهضاب الجديده=وطم العريق وخشم ابانات ظله
وانقاد من بين القرايا مديده=فوق اجفنا وابحار والنير هله
وابن عقيل هو مسلط مجيده=هلة بردها فوقهم تقل جله
وطاح بغثاها مسلط(ن)ذاق عيده=من ماطره كل القلوب اسفهله
خيال(ن)يفرق والد(ن)عن وليده=من اللي يورث بالقلوب المذله
يامااذهبت من شيخ قوم(ن)حميده=وكم عاشق(ن)عقب الضحاعاف خله
بتدبير من يافا بالاشيا وعيده=محمد نفل سبع الخاليق كله
وسرد(ن)عشاهن باللوازم حديده=كالديدحان لبوسهن يوم فله
وشقر(ن)زهت بالبوس غاوي جديده=وصفر(ن)يشادن مزنة(ن)مستهله
تشبه عراقيب البى يوم قيده=يا قرطن حين الصباح الاجله
وتحيزمو عيال الحرار وعبيده=لمرهاش يجلى عن صدى الكبد عله
مرهاش يتلف علط الارقاب ميده=يشدى لجاج الحشر يوم استهله
وثار العجاج وصوتوا بالوعيده=على جماعة مسلط(ن)يوم حله
حريبنا مايهتني بي رقيده=كدرى ومثلوث الشفا مردفله
عيال اليتيم اللي تغازوا حميده=صبيان وان ثار الدخن منوتله
بسعود طخم رشوم مفني ضديده=فرز الوغى كساب دقه وجله
ذعار السبايا وان صارت وكيده=المصطفق زبن الطحوس المخله
اليا اقرشن بالابطال تكصم وريده=يا كربت كشط المحازم وحله
بمصافق الامواج زبن البليده=محمد نفل سبع المخاليق كله
وراحت اعتيبه ما بقاله شريده=من فعل شمر حاكمتن نجد كله
لو اجمع اقلام الملا لي وازيده=واكتب خصايل ريف الايتام كله
تحتار ويبلش بالدفاتر مجيده=ليل الظلام اللي غدابه مدله
ان قلت سلطان(ن) تره هو عنيده=وان قلت درة كوثر (ن) ماتمله
وان قلت نور لنجد عمه وسيده=سراجه ولكبود الصناديد عله
مجيز اليتامى بالسنين اللهيده=معيش اليتامى والبوش في محله
من كل رنق(ن)ما تميز عديده=شروى حجيج البيت يامن فطله
ويخف طاري مجدهم يوم اريده=واللي حذاهم مثل غوج(ن) نتله
يا تالي الاجواد وين الوعيده=اللي وعدتوني ترن مستحله
وعيدت(ن) مابين امير وقعيده=واحمود عندك خابره شاهد(ن)له
ياما عطيتو مثل عنق الفريده=ومن خزنة(ن) تغني الفقارى المقله
ومن غرسة(ن)يزري مصافق جريده=واقطاع تبراله خطاة السمله
الله يجمع زولكم عن بعيده=من خوف يفرحن القلوب المغله
اللي لكم كل الخلايق مقيده=بالطوع ماجت بالتواريخ لله
ماهو عطى جت بي قواطع حديده=بضرب الهنادي لين اطاعت وذله
وصلو على خير البرايا وسيده=نبينا المعصوم عن كل زله

رايت في منتدى عتيبه يقولون ان عتيبه لم تعطي زكاتها لابن رشيد وانما لابن سعود مع انه في

نفس المنتدى قصائد القثامي التي تثبت انهم ساقوها لابن رشيد فكيف تنكر شيئ وتثبته بنفس المكان0

اقول ذلك لكي لاتغترين بكل مايكتب في المنتديات لان ليس كل كاتب معناه متخصص ومحايد وصادق وهه

القصيده اللي منها بيت الشعر اللي يقول:

(( ابن رشيد اللي وطتنا زكاياه )) ووعدته بذلك حين اجد الوقت الكافي وهاهي امامكم0000

وهي لمخلد القثامي العتيبي الذي قدم الى محمد العبدالله الرشيد ينخاه على عشقته اللي عارضوا بها

اهلها ويطلب الوقوف معه والعون منه فلما دخل مجلس ابن رشيد قال القصيده يمدحه فيها:

حنا عــتــيــبـــة كـم حريـب لطمنـاه=ودقلاتنا مثـل الخيـال الرزينـي
غربـيــنــا في الحجـز تلــطـــم قريـاه=وشرقينـا يـم الحسـا مردفينـي
جـنــوبـنـا وادي الــدواسـر رعينـاه=وشــمــالنـا يـم المديــنـة يميـنـي
تـرى لـنا نجــــد المـســمـا ملكـنـاه=وخابت حضوض ملوكه الأولينـي
والحرب جاء في اربع سنين مسماه=لين أودعوا سبع القبايـل طنينـي
منها نهار جاء على الضال اقصاه=منها الهضاب العلط عيـت تبينـي
ويوما على الجال العوينـد فعلنـاه=على الدويش مشيب المرضعينـي
كم راس شيخ عن متونـه نقلنـاه=واصبح تهرجبه كـلاب القطينـي
تبرهجي في عشبتة وأشربي مـاه=تبرهجي يـا مقرعـات الحنينـي
والله يلو لا اللـي وطتنـا زكايـاه=ما ناخذ القصره مـن الحاربينـي
شيخٍ تجيله سبـق الخيـل مهـداه=ابـن رشيـد مـروع الغافليـنـي
يجـر سيراتـه وذروات تـبـراه=من كثرهم يـا ارحـم الراحمينـي

وبعد القصيده التي ارتاح لها الامير محمد العبدالله الرشيد قال قصيدته اللي تخص عشقته مادحا وذاكرا

شدة الغرام والوجد وطالبا العون منه فقال مخلد :

يقول مخلد بادى الحيـد الأسمـر=في مرقب قدم الضعائـن منيفـي
يا الله واني فـي رجـاك أتصبـر=صبر الديـار المسنيـة للخريفـي
تعزا لعين دمعهـا حـار وأمطـر=لينه تهشـم حجرهـا بالذريفـي
والله لـولا العظـم يـوم أتعمـر=ليا كوّيت العظم عيـدي وريفـي
ابرد بها عبراتـي اللـى تكسـر=لا شب في قلبي سواة الصريفـي
ولولاك ياطعـم الـدلال المنحـر=لا ولف القيفان واهـرف هريفـي
هريف سرحان بعـد ليـل اقشـر=هايف ومطـرود وتلـف معيفـي
على الذي يجر قلبـي إليـا مـر=جر الرشا من فوق طيـة عفيـف
عليك ياللـى حبتـه كنـه الـدر=در الصعوب ان سلهمت للعطيفـي
در الصعوب مكسـر فيـه سكـر=ومبـرى فـي عارضـي رهيفـي
لا روحت من وادي نبتـه أخضـر=بين الحرار وغـادي لـه لفيفـي
عز الله انه بالهوى جرنـي جـر=جر الرشا فوق المقـام المهيفـي
عز الله انه بالهـوى كرنـي كـر=كر الضوامـي للقليـب الغريفـي
من لامنـي لعـل يمنـاه تكسـر=يطيح في دقلـة خويـا الشريفـي
يالايمـي عسـاك للحـر واكثـر=زند المحلـج وبـواردي ظريفـي
في درجة تحذف بخفـاف وعشـر=ياخذ سنة غمق صوابه مصيفـي
ويالايمي طاولك في عمرك الشـر=وتأخذ سنة بين القرايـا تضيفـي
ويالايمي طرحوا عيالـك مجـدر=ومن بعدهم تقعد ضعيـف كفيفـي
ويالايمي صادوك صبيـان شمـر=وجونا بعلمك سابقيـن النكيفـي
يازين خلي وان مشـى بالمشجـر=وثويب السبهان خياطـه نظيفـي
يامل لقلـب يجذبـه كلمـا مـر=وليا دله بالعين وازنـف زنيفـي
زنيـف دراج السوانـي اذا صـر=علـي ثـلاث يجذبنـه صفيفـي
كنه هديب الشـام يـوم يتندجـر=قدامه المدفـع ويـرزف رزيفـي
وعقيل يتلونه على اكـوار ضمـر=ومشطريـن ايمانهـم بالرهيفـي
وإلا مشى له ساعة ثم هـو كـر=يسعون خدامـه لحكـم الشريفـي
يا ليـت خلـي يـوم قـــفـى تعـذر=ما اقفا على السفهان كنه معيفـي
من يمكـم يـا الطـيــبــيـن اتعـذر=تدرون راع الحب قلبـه رهيفـي
دلا يزايـدنـي بـشـــقـــر تـــنـشـر=ومحاجر للمـوت فيهـا رفيفـي
ولي عشير جرني بالهـوى جـر=ويجرني جرت مـزون الخريفـي
وفي عينه اليمنى سيوف تسطـر=وفي عينه اليسرى عساكر شريفي
أشكى على حماسة البـن الأشقـر=أهل النجور اللى تـرازف رزيفـي
واشكي على لباسة الجوخ الأحمر=من فـوق قـب ينقلـن الرديفـي
واشكى على اللى يم حائل تومـر=تكفا ياخو نوره زبـون المخيفـي
وان كان اخو نوره لشكواى ما سر=ولا انقطع حبل الرجا من وليفـي
اللي حما في نجد بالسيف الابتـر=وما طرت البصرة لحـد القطيفـي

والحقيقه ليس لي علم باللي فعل الامير ابن رشيد بعدها وان كان من المؤكد انه لن يسكت بعد هذه

النخوا شأنه شان جميع اهل المراجل والطيب سواء من شمر او غيرها من القبائل المتعدده والطيبه000

ولم اتطرق لقصائد حمود العبيد الرشيد بعد ( عروى ) لعدم الاطاله الممله ولكونها مشهوره شهره كافيه

نضمن معها عدم التحريف00 وتقبلوا تحياتي على المجهود المتواضع يالعزوه000

25-09-2007

رأوينا القدير الشاعر الكبير اخونا / فواز ابن غسلان

اتشــــــــــــرف بأن اكون أول المعانقين لماتخطه يمناك لاشلت يمناك ياطويل العمر
والف نعم بالعتبان فلهم من الصولات والجولات مع قبيلة شمر وغيرها وعقب هذه المعارك التي انتهت بشرف للجميع / العتيبي مايخلي
الشمر والشمري مايخلي العتيبي بالفزعة كأننا اخونا ولله الحمد والمنه وهذا كله بفضل الله ثم بفضل مؤسس هذه الدولة العزيزة على قلوبنا جميعاً وموحدها المغفور له الملك عبدالعزيز رحمة الله عليه

وهذا انت بارك الله فيك سطرت كلمات مرصعه بالذهب تشهد عليها وعلى تاريخها ، ابيات قصائدها في زمانها

اشكرك جزيل الشكر

25-09-2007

الراوي ابن غسلان

بيض الله وجهك

لاهنت على كتابتك لهذي المعركه والتي قد لا يعرفهااا الجيل المتواجد

الان وكي يكون عندهم خلفيه عن المعركه حتى تتوارثها الاجيال القادمه

وشكراَ جزيلاَ
دمت بووود