وصفه ومنهج لعشاق القهوه

بسم الله الرحمن الرحيم

الشاعر\ مشعل عسام التريباني الشمري
((وصفه ومنهج لعشاق القهوه 1\6\1433هـ))

قم سو مايقعد خـــوى دايخ الراس= بدلال رســــــلانٍ نظـــاف وربيبه
صفرٍ تقول من الجواهر والالماس= اشكالهن كن الجـــــــواهـــر طليبه
هدفٍ مشاربهن مثل لون الاقواس= فيهن لراع الصنف نضـــره عجيبه
احمس ولاحضها تر الكيف حساس= واحرص عليها من الحرق لايصيبه
واليا ظهر منها العرق فوق محمـاس= وســــــــــط المـــبرّد كبها عن لهيبه
ثم نق قشره واجدع النــــي والهاس= يامــــــا تســــــاوى مابها مـــايعيبه
واذا تيســـر نجـــر ياطيب الســـاس= دقـــــه وخـــــل الناس تسمع قنيبه
وان ماتهيّا نجـــــــر يالقــــــرم لاباس= استخــــدم الطاحــــون مــابه غليبه
وخذله مــــن الما يافتا الجــود مقياس= واركه علـــــــى نارٍ كـــــفينا لهيبه
ياما يفوح الكيف بارباع واخـــماس= ثم اجـــــذها من شان يركد سريبه
وبهـــر بهيل وخالطه زين الاجناس= من زعفران ايران حــط ابو شيبه
واستخدم المشــــخال ياطايل الراس= مـــــن شان مايوجـــد بها مايريبه
يبري خوى راسن مصدع ومنحاس= تبطـــــــي مطاليق الرجال تحكيبه
وصبه على اللـــي بالمهمات مدباس= اللـــــــــــي دروب المرجله تنلقيبه
كتبت لك وصفه مــن الراس للراس= عسـاك وصفت شايبك تعـتـنـيـــبه
ابيات شعـــــرٍ سطرت فوق قرطاس= فيها وصـــــــــــوفٍ للنشاما غريبه
فيها بيوتٍ للمشـــــــاكيل نـــــبراس= واللــــــــــي يريد المـرجله يهتديبه
الطيب موج وطالب الطـيب غطاس= والدر مـــــن غــــيهب ظلامه يجـيبه
والله قسم طيبه على اجناس واجناس= مالله كتب له شـــــــي من زود طيبه
وتمت وصلوعــد ماهـــب نســـــناس= علــــــى رســــــــولٍ واجبٍ نقتديبه

صح لسانك طال عمرك
امل ان تقبل مروري ومشكوركل الشكر
تحياتي واحترامي لك

منهج يدرس للاجيال

وسيره تربت عليهاقوافل الاجداد ويعلمها الابا للابناء

انه كيف الكرما ومنهج النبلا

الشاعر القدير والكريم الجزل//مشعل التريباني

عندما تاتي دروس المراجل من اهله فلاغرابه

ابدعت ومتعت متع الله بعمرك ويسر الله امرك

تقبل اعجابي بتميزك

واليا ظهر منها العرق فوق محماس=وسط المبـرّد كبهـا عـن لهيبـه

يقول القاضي:

لا أصفر لونه ثم بشت بالأعـراق=صفرا كما الياقوت يطرب له الموق
-----------------------------------------------------------
واذا تيسر نجر ياطيب الساس=دقه وخل الناس تسمع قنيبـه

ياسلام ياسلام بس وش فايدة النجر بين اربع حيطان هذاك لو البيت مهوّب وتشوف وين مالديت

والله قسم طيبه على اجناس واجناس=مالله كتب له شي مـن زود طيبـه

يقول بداع العنقري:

الطيب ماهو بس للضاعنينـا=قسّم على كل الوجيه المفاليح
البدو واللي بالحضر نازلينـا=كلن عطاه الله من هبت الريح
--------------------------------------------------
وتمت وصلوعد ماهب نسناس=على رسولٍ واجـبٍ نقتديبـه

اللهم صلي على نبينا محمد ماتعاقب الليل والنهار وماذكره الذاكرون

صح لسانك يابو عبدالرحمن شاعر جزل ونقي شهم كريم وسلمت والله

على هالرائعه الشامخه بكل مافيها من وصف للهقوه وانت من اهله لاهنت

تقبل كل الود

ثامر الدعسان
الشرق
نهير نمش
شكرالكم جميعا على المرور والاطرى الله لايهينكم جميعا
اخوي نهير يقول وش الفايده بالنجر بين اربعة حيطان اقول
اوافقك الرائي والله حلاته بالبر لكن الشكوى لله هههههههههه

عزالله اني مدمن قهوه لكن فيه زعفران كشميري ازين من الأيراني وااااجد طحت به من المصدر

وصفتك يابو عبد الرحمن بالدماغ بس ترا اللي يصلحه ويصبه وهو يتبسم ويسولف يزيد الكيف مثلك وشرواك

صح لسانك واعتلا شانك ونستاذنك بوضع صوره تعبيريه لو ان توقيعك به الكفايه

الشاعر مشعل التريباني
لله درك عمي ذكرتنا لزمان دقة النجر وعلوم الطيبين شرواك هالحين طال عمرك اللي يسوي القهوة الحريم
مع الاسف راح دور شبات الرجال وتقليط المحماس ودقة النجر
صح السانك ملاييين
تقديري لجنابك

ابو عبدالرحمن
الله لايقطعنا من هالوجه الطيب وعلوم الرجال شرواك
صح قلبك وصح كلك

الشاعر مشعل التريباني
صح كلك استاذي وصح السانك الف

شكرا لجميع الاخوان على المرور الله لايهينكم جميعا
واخوي تمباك يقول اللي يسونه الحريم انا والله ماتسويه
المره عندي دلالي واسويه انا واصبه انا والا يصبه ولدي
ياصارموجود الله يخليه لي ولاعمر المره داجت عليه الا كان
تبي تنظف المجلس هههههههههههههه ولا علي من الناس