كوني مكتملة الانوثة!

ياهلا ومرحبا بأحلا امورات
مسائكم فل وياسمين

نبدأ بموضوعنا على دووغري

حابة أنبهكم ع شي...انو في معلومات زغيرونة ماتستاهل الواحد يفتح موضوع كامل عشانها...فجاتلي هذي الفكرة...
اني كل 3 أيام تقريبا...أنزلكم معلومة جديدة أو فكرة ....
وان شاء الله أفيدكم باللي أقدر عليه وبكل اللي أعرفه....أوكي؟؟؟

ننتقل لموضوع اليوم...

مولود جديد...الجنس أنثى...تكبر هذي الأنثى وتعيش طول حياتها تحت مسمى أنثى...وتموت وهي أنثى...
خلقت وعاشت وماتت وهي ماتحمل من الأنوثة الا مسماها وبس
وذأه اللي صايرفعلا...نشوف بنات ( أفضل أسميهم مخلوقات)...عالة ع الانوثة...لما أشوفهم نفسي أتحول لذكر ولا يجمعني فيهم نفس المسمى
الأنثى انسانة أرقى...كانت ومازالت...
وبموضوعي اليوم...راح أحاول بقدر استطاعتي...اني أكتبلكم عن ملامح الأنثى (مكتملة الأنوثة)...من كل الجوانب...(باختصار)...

قبل لاأبدأ بالموضوع...أبغى كل وحدة منكم تقول أنا راح أتغير ومن اليوم...مو عشان فلانة...ولاعشان أقهر علانة...ولاعشان أنخطب...
ولاعشان الناس يشوفوني....
ألين متى راح تعيشي عشان خاطرالناس...؟؟؟أحد كلف نفسه عشانك؟؟؟
قولي راح أتغير...عشان أنا انسانة...لي ذاتي...لي كياني المستقل عن كل الناس...عشان أحترم وأسعد الروح اللي قدر لها انها تعيش داخل ذأه الجسد...معقولة أموت وأنا ماحققت شي لذاتي؟؟؟ماأسعدت نفسي بيوم؟؟؟ماعشت لنفسي؟؟؟
لوحطيتي ببالك أقهر واغيظ فلانة وفلانة...حتى ربنا ماراح يوصلك لمرادك...تأكدي من كذا...وكل وحدة ونيتها...

والموضوع راح يكون ع عدة أجزاء...

ونبدأبالجزء الاول

وهذي ملامح الأنثى الحقيقية...

المعاملات

*ملتزمة بدينها
*حسنة الأخلاق
*مؤدبة مع الصغير والكبير
*تحترم الكبير والصغير لأنها تحترم نفسها أولا وأخيرا
*توقف احترام وتقدير للي أكبر منها بالسن
*تبعد بأكبرقدر عن المشاكل>>> موتعتبرها فرد عضلات وقوة شخصية
*لها قيم ومباديء صحيحة ماشية عليها بحياتها.>>> مومع كل مين هب ودب
*ماشية بحدودالشرع والعرف
*ابتسامتها دايما مشرقة ع وجهها
*كلها حيوية ونشاط لما تشوفيها تحسي انها فعلا شابة
*لما تكون بمكان تملأه حياة وتترك بصمتها فيه>>> مووجودها زي عدمها مافرقت
*لها أهداف وطموح ...انسانة منتجة
*متعلمة...مثقفة...( موثقافة مطربين وستارأكاديمي)...ولاثقافة مقتصرة ع الجمال والميك أب...
*اذا جلستي معاها تفيدك وتستفيد مو بس تضيعلك وقتك بالحش والنميمة
*ناصحة...صادقة...متزنة...رزينة ...بعيدة كل البعد عن التكبر والغرور...>>> صايرموضة هذي الأيام طبعا كالعادة ع ولا شي.
*تعرف قيمة نفسها وأهلها...حريصة ع سمعتها...
*ماترفع صوتها ع أحد.

وغيرهاكثير...ماتخفى عليكم وأنتم أعرف فيها باذن الله...

وللحديث بقية............

للامانه الموضووع منقول
ْْْْ

تسلم أيــدك ع المـــوضـــوع التحـــفه

ننتـــظر بقية الموضوع بشـــوووووق


دائما متمـــيزهـ بــطرحـــكـ ,,

وحنا كيذا ان شاء الله

تسلمين خيتووو يااارب

مساء الخيرات حبوبات

جيتكم اليوم بالجزء الثاني

ويارب مااكون لاممله ولا ثقيله عليكم

واسال الله الفائده لي ولكن
التصرفات

*جلستها صحية
*هادئة
*خجولة.>>> هذي الصفة تميزت فيها الأنثى...فلو ماكانت فيها حطي عليها x ...
*صوتها منخفض مو متذبذب.>>> موتخرجي من عندها تروحي ع طول لعيادة الأذن والأنف والحنجرة.
*مشيتها راكزة واثقة وقورة هادية زي النسمة بدون تغنج ولاتمايل.>>> بنات تشوفيهم تحلفي بالله انهم مشاركين بماراتون أو سباق الهجن.
*ضحكتها ناعمة ساحرة أقرب للابتسامة من القهقهة.>>> صارت نادرة...الوحدة تضحك تستني اللي بمعدتها يخرج بوجهك.
*تحركاتهاا ناعمة وقليلة.>>> مو تزعجك بخشخشتها وتجيبلك الحول بكثرة تحركها...في بنات أشك انهم جالسين ع جمرة.
*ماتتدخل في اللي يعنيها واللي مايعنيها.
*ماتتفلسف ع الفاضي والمليان.
*حكيها واضح مفهوم يخرج من فمها بانسياب.
*ماتسمعي منها ولالفظة صبيانية أبدا ولاعربجية.
*الكلمات النابية ماتنطقها أبدا.>>> وجع ويا****ة ويازفت....الخ.البنت اللي أسمعها تقول كذا ع طول أحكم عليها بالهمجية...
*الكلمات اللي تخدش الحياء لوتموتي ماتسمعيها من فمها
*الدق والتطبيل وشغل الدقاقات ذأه مافي أمل تسويه.>>> شايفتها كثير.الله لايبلانا قلة يعني.
*اذا اتكلمت بالتيليفون أو ع السيلولير صوتها منخفض مع وضوح.>>> موتزعق اللي حولها كلهم عرفواكل أخبارها.
*تراعي قواعد الاتيكيت والذوق العام.
*مستمعة جيدة...ومحاوره ممتعة.
*حكيهاذوق ومريح .>>> موتقولك هييييييييه انتي...أو ياانتي...كأنها داخلة عليكي من الشارع...ولاتتكلم عن غيرها بلفظ هاااااذي...خيرفين نحنا...استغفرالله في بنات أخاف منهم أشك انهم خريجات سجون.
*تبعد عن الهمز واللمز والمناجاة والضحك من غيرسبب لأنوووووو..................... .........؟؟؟
*طبيعية غير متصنعة.>>>أتمنى الأرض تنشق وتبلعني لما أشوف وحدة متصنعة...مكشوفة مرررررررررة.
*كل تعاملاتها تحت بند ( لوسمحتي – حاضر – ممكن؟)...وكل الألفاظ اللي تدل ع أدبها.
*نشيطة...مستبشرة...ماتسمعي منها:مافيّا...تعبانة...طفشانة. ...زهقانة....وكل الألفاظ اللي تحسسك انها بعمر الـ 80 سنة.

وعشان تكوني أنثى حاولي تتخلصي من اللزمات السيئة اذا كانت موجودة...فيه بنات أول ماتقوليلهم خبرية...يروحوا لاارادي يقولوا ( كذابة)!!!
أو ( قولي والله)!!!أو ( احلفي)!!!>>> تخليكي تقرري قرارجاد ماعاد تقوليلها ولاشي.
أو بعضهم تقوليلها شي ...تلاقيها فجأة شهقت ( شوي انتي بنفسك تدخلي بفمها)...وضربت بيدها ع صدرها(تحسي ان صدرك انتي آلمك)...>>> يعني سوت أكشن.

وللحديث بقيييييييه يالغاليات

ومن التصرفات اللي كثير بنات يسووها وآخذينها عادة..وهي تشوههم...وتخرب أنوثتهم:

*أكل اللبان ( العلك) بكل وقت...شكلها بجدموحلو...والأفضع انها تحكي مع أحد واللبانة بفمها......
*قضم الأظافر...بجدبشعة واللي تعاني منها...في محلول بالصيدليات خاص فيها مروطعمه وريحته مقرفين...تحطيهم ع أظافرك خلال فترة بسيطة راح تتخلصي منها.
*حك الاذن...واذا عندك التهاب حاولي تعالجيه عشان تتخلصي من ذأه الموقف المحرج.
*حفرالكوسة(الأنف)...>>> نو كومّنت.
*لمس الشعرباستمرار.>>> حتى انك تقرفي تاخذي من يدها شي أو تسلمي عليها...وهذي الحركة تدل ع التوتر وعدم الثقة بالنفس.
*في بنات عندهم بثور بوجههم...تلاقيهم طول الجلسة وهم يلمسوها وشغاليييييييين.>>> تتسلى الأخت...عندها جلسة فيشيال.
*وهذي الحركة كمان مقززة وملفتة...وهي تقشيرالشفايف...سواء بالأسنان أو اليد.
*بقولكم ع حركة بس لاتضحكوا...لكنها والله صايرة كثيييييير وشايفتها...وهي:
الوحدة أول ماتقوم...لاارادي تلاقيها سحبت الاندرويرتبعا( الكلوت)...>>> لاتلوموهاضايقهاالأخت.
*فرقعة الأصابع...>>> غير انها بشعة ومزعجة...أحسهاتآلم ماأدري كيف يجيلهم قلب يسووها.
*أوقات تجلس وحدة وحاطة رجل ع رجل وطول الوقت تهز رجلها وتمرجحها.>>> ملاهي.
*أو تجلسي جنب وحدة تلاقيها تهز وتهز وتهز...افففففففف مزعجة توترك وترفعلك ضغطك غير منظرها طبعا.>>> كأنو زلزال.
*أوتجيكي وحدة طول الجلسة كل شوي مخرجة شي من الشنطة ...عشرين ألف مرة تطلع المرايا( ماعندها ثقة)...أو الغلوس.>>> مزعجة.
*أوطول ماهي جالسة والسيلولير بيدها ومشغولة فيه>>> السفيرةعزيزة.
*العصبية...دمارالأنوثة...وتقلل الهيبة والوقار...
*كثرة التلفت وتركيز النظر ع الأشخاص ...ماوراهذي الحركة الا الخفة...
*تجيكي الوحدة بنص الجلسة...تطلع التيشووتنفرأنفها...>>> تنظيفات بلدية.
*وهذي الحركة تقتلني وبجد بشعة...الوحدة بعد ماتمسح فمها أوانفها...تفتح التيشو وتجلس تشوف اش فيه...>>> تدور ع شي مضيعته.
*اذا كنتي بجلسة اياكي من الحكي الكثيرالمتواصل وماتدي مجال لغيرك بالمشاركة...أومقاطعة غيرك...
*أوتسمعي وحدة قالت شي...تروحي مكذبتها...
* اذا كنتي من الناس اللي طول الجلسة تردد: أنا روحت وأنا اشتريت وأنا جبت وأنا وأنا وأنا.....حاولي تتخلصي منها...لانه اسلوب منفر...والناس راح تقول عليك حديثة نعمة...أول مرة تشوف خير...

وغيرها كثيييييييييييير...فالأفضل تنتبهي انتي لنفسك...وتعدلي أي شي من تصرفاتك...قبل لاينتقدوك الناس ويحكون من وراك ويابخت من بكاني ولاضحك الناس عليّ

ونكمل الباقي بعدين باذن الله

تسلمين يااارب

الغلا هايدي

الله يسلمك

شاكرة مرورك

يعطيك العافيه وتسلم يمنااك على النقل الجميل والطرح الاجمل
ومن جد هذا اللي حاصل بمجتمعنا وخصووووووووصا بالمدارس

يعطيك ربي الف عاااافيه

يعطيك العافيه