"محمد العواد" ومجاراة من "مشفي الجرواني" ((من الإرشيف))

هذي الابيات بيني وبين الشاعر المعروف مشفي حمود الجرواني

(مجاراة اتشرف بها من ابو عارف الله يطول بعمره)

وهي سابقة عهد في إحدى السنوات الماضية وكانت بالتحديد في وقت

مثل وقتنا هذا الا وهو وقت المقيض وربطة الطير وراع الطير ههه

وللتوضيح الصقاقير برفحاء كانو وما زالوا يقيضون الطيور

بمقيض الصقار أبو بدر جرّاح الملبّس

أقول انا

لا تنشد عن الطير والطير مربوط = خلّه على وكره يكمّل مقيضه
ياخوك طول القيض والجيب مصفوط = وراعيه تر بعض السوالف تهيضه
راع الولع مظغوط لاتزيده ظغوط = أدناة ما يبحث خفاه ويغيضه
ياشفت ريّ القاع بسيول وشخوط = ثم جا لنا مع هيضة سهيل هيضه
خذ موتري غير كفرات وجنوط = كل الخساير فيه ماهي غميضه
غيّر له الفحمات والهوب مخروط = كل ما تلفت قطعه بقطعه نعيضه
وان صار للمقناص والبرّ مشروط = اركب نبي قطع الفجوج العريضه
نضرب عليه قطوع ونعانق خطوط = ناخذ لنا وقت الهداد اتعريضه
مع صحبةٍ ممشاه بحدود وشروط = تِدّي على وقوت الوجوب الفريضه
ماعندهم جمخ وخرابيط وخروط = الكذب عند اهل النفوس المريضه
هادين مالجّوك في كل مغلوط = مرحين ما يقنون نفسٍ بغيضه
في مهمهٍ ماهو من الناس مهيوط = تامن به البرقا وترتع امريضه
قفرٍ من اشكال النواوير مخلوط = في كل روض وكل تلعه وفيضه
ومعنا اشقرٍ ما بريشته دق ورقوط = صافي ظهر جثلٍ متونه عريضه
يقدح سنا عينه مثل قادح الشوط = ياشاف زول الخرب يزداد غيضه
ياروّحت بالجوّ ياخذ معه شوط = نزولها ياقام يردم فريضه
يهوي اهوى رجمٍ من الجال مقروط = دزّه حزينٍ شاف شيٍ يغيضه
من صفق كفّه غارب الخرب مشعوط = برقا الجناح ان هِدّ ماهي حضيضه
اليا اتّقى وجيناه والخرب مليوط = عن كل عنوات المعنّى معيضه
هذا الهوا لوكنت بالدين ممحوط = لو سجل الديّان رقم الحفيضه
مبسوط والقرناس ياصاد مبسوط = وخسايرٍن تبسطْك ماهي غميضه
هيّضتني بالطير والطير مربوط = وراع الولع بعض السوالف تهيضه

محمد العواد

يقول (ابوعارف) في مجاراته

ما يدله الصقار والطير مربوط = يا شاف دَشْن الطير يزداد غيضه
يا شاف شلوٍ داخل البيت مقروط = شلو اشقرن عند الملبّس مقيضه
في كيبل الافكار خطرٍن يجي شوط = يلوج ما بين الزعل والغميضه
ويا صفّ ريش الطير تلقاه مبسوط = مثل الرحوم اليا تشافى مريضه
يبي القنص يا وليَتْ القاع بشخوط = وتخالطت غرّ المزون ونفيضه
معه أبلجن عينه تقل جمّ حابوط = دقاق المقفّى والمناكب غليضه
ياشاف له خربٍ رقبته تقل صوط = ناظر عديمٍن شاف لطمة بغيضه
في خايعٍ منْه الكمى تو ملقوط = ما به سوا اللي زيّنت عش بيضه
ما ينبت الحُوّا ولا ينبت الطوط = نبته قفر واوراق عشبه عريضه
هذا وانا من سامج الشعر مظغوط = عايض هجا عيضه ويمدح عويضه
يشدّني شعرٍن لبو سيف مظبوط = ياخذ من الصافي ويترك خويضه

مشفي الجرواني

الشاعر محمد العواد
صح الساناك ولسان ابو عارف الف
تحياتي لك

صح لسانك وصح لسان مشفي الجرواني
صراح ابدعتوجميعكم الله يعطيكم العافيه
تحياتي لك اخوي محمد العواد

أخوي / محمــــد العواد سلمه الله صح لسانك وصح لسان مشفي الجرواني قرأته أكثر من مرة كم جازت لي كلمات ومعنى الله يعطيكم العافية على هذا الكلام الطيب ,,,,

محمد العواد
صح للسانك والسان ابو عارف

لاهنتو

ودي وتقديري للجميع

الشاعر محمد عواد بن رخيص
صح لسانك وصح لسان مشفي الجرواني الف

‘العلي‘‘‘إإإإحترامي‘‘‘‘

أأأأأأأأأأأأأأأأأأأأأأأأأأأأأأأأأأأأأأأأأأأأأأأأأأ أأأأي كلام جميل جدا صحو لسانكم

صح لسانك 000 ياخلف ابوي 000ولسان مشفي الجرواني