ديوان الشاعر / سطم فهد الخليل

نادى ابو وادي

نادى ابو وادي

	نادى ابو وادي وينكم ياهل العيس=واعلـن بصوتٍ واضـح بإنكشافي نادى يقول يا محرقين المحاميس=وساع الطعون كبار شدق الصحافي ياشمر الغلبا الطنايا السناعيس=ياهل اللحيسة مطيرين الشعافي يامن. بكم تفتح قفول المحابيس= يافـزعة المضيوم عــز الضعافي شوفو فهد يعيش ليله هواجيس=بين الامل. ومابين. حدب الرهافي وعاداتكم ري الكـبـود الميابيس=عقب العطش مشروبها نبع صافي يالابتي. ياكاسبين. النواميس= ياسيفي المصقول يادرع ضافي ترو امس له فريس ولليوم فريس=ارمو بعقل الروس. هي والغدافي

سطم فهد الخليل

قالوا. كـبرت وقلت. ياراحـم الحـال

	قالو كبرت وقلت ياراحم الحال=يارحم من الام الحنون. بولدها يامن على بابك. يعلقن الامال=عفوك يامن الروح جاها وعدها ياحطّو الجثة تحت مظلم الجال=تحت اللبن والطين داخل لحدها اليانقطع مابين الاثنين الارسال=بين اتصال الروح هي وجسدها أجعل لنا. في جنة الخلد منزال=انا ومن سمع البيوت وشهدها وتسمعو لمصخر القيـل ياقال=اللي لياجته الجزيلة رصدها عشنا بدنيانا على كل الاحوال=ذقـنــاً ملـذتهـا وعشنا نكدها ونجني ثمرمن وقتناكل ماطال=الوقـت يبذرها.وحنّـانحصدها ونزود عرفٍ كل مايمضي هلال=وناخذ من دروسٍ كثيرٍ عددها ناخذ دروسٍ من كريمين الاسبال=مدارسٍ تروي ضما من وردها تجاربٍ له بأوسط الصدر مدهال=واللي يجربهــا لزوم يحمدها اجلها الاخلاص مع رب الاجلال=واقلـهــا عيـونن نـعـالـج رمـدهـا

سطم فهد الخليل

شمر وما ادراك ماهم شمر

	مبداي راسٍ تجتمع به روس=راسٍ يضم الطيب والناموس راسٍ تجمّع فيه روسٍ ثلاثه=فيه اللحيسة والطنا وسنعوس راسٍ . يشرّف كل من يلتجيـلـه=ويضفي عليه من الوقار لبوس يضفي على من ينتمي له هيبه=ويعطيه من نهج الدروس دروس راسٍ سما، بأسمه ونال العالي=(شمر) وعرقه بالـوفاء مغروس (شمر) وما ادراك مـاهـم شمر=عبدة و الاسلم وأهل الدبوس شمر موارث طي بالجود والكرم=كبارالصحون وللدروع حبوس نالو من الالقاب ، بالغلب غلـبا=والعــقْ والمنكوس وسود الروس شمر خيار القوم كسابة الثناء=شمر هل الشيمة عزاز نفوس (شمر) وفيهم ويش قال العوني=دم الوفاء بعروقهم مدسوس ( يقول. لولاهم فلايذكر الوفاء)=(ولا للحميـة بالـديـار عسوس ) واليوم ياشمر نوصلكم الخبر=هذا ولدكم بالسجن محبوس بسـجنٍ و سجّانٍ وبابٍ مقـفّـل=وصارت مفاتيح السجون فلوس وياسِعْد من له لابةٍ مثل شمر=جزالٍ . عطاياهم . كـرام نفوس

سطم فهد الخليل

في طريقنا من الرياض الى حفر الباطن
انا وأثنين من الرفاق هم (بندر الفهد وفرحان المشعان)
صلينا صلاة الجمعة في قرية الفريده بالصمان
وقام احد المصلين من اهل القرية وعزمنا على القهوة والح علينا بالعزيمة
استجبنا لدعوتة وتشرفنا بدخول مجلسه وتناول القهوة
ومن ثم واصلنا مسيرنا الى حفر الباطن اخذت اسمه ورقم جواله. هو ابو مطلق. خالد الصنعوني المطيري
جادت القريحة بالابيات التالية
............................................

اللي تقدم للطراقي قهاوي

	يالله عسى المزن الحقوق الرهاوي=ياخـذ ثلاث ايـّـام ماطره ماطر يعم من شـويـة. لحد الصداوي=على ديـار مطير حمـر النواظر وعلى الفريدة خص صبٍ سماوي=سـيلٍ يسـوّي في رياضه محافـر وبعـده.يجيك العشب فيها متساوي=وتصير في صورة حـديقة مـزاهـر دارٍ تقــدم للـطــراقي قهـاوي=فنجـال والـم يالغــريب. المسـافر واللــي يمــر بـدارهـم لا يـراوي=يقلط علـى تقدير مـع طيب خاطر يقلط علي بنٍ وتمــرٍ حساوي=في بيـت. نادر ينعتـه ساس نادر في بيت ابو مطلـق شـبيه النـداوي=هو. خالد الصنعوني. ونعـم المـواكـر قلتـه وانـا مابـي وراهـم جـزاوي=لاشـك انـا لمن يفعـل الطيـب شـاكر وانـا معـاي اثنين. مانـا. خـلاوي=الكـل. منهـم شـاهد. اعيـان حـاضـر

سطم فهد الخليل

هذه القصيدة/ قالها طراد بن مطرود
يسندها على / سطم بن فهد الخليل

يابــو فهــد يـاتـاج متني وراسي=نفخر باللي مثلك عصامي وشغموم
واطلـب ياعلك ماتعرّض لبـاســي=ومن خلفك عساه من النار معصوم
وياسطم عيني ماهتنت بالنعاسي=صرنا من حال شعوبنا بحزن وهموم
والوقت مايرحم على الناس قاسي=مايـنْـومـن يابو فهــد دايم الــدوم
حلب من النحسين حلف النجاسي=تسـعيـن بالميــة مدمّــر. ومهـدوم
وقاسم سليماني يحدا. وهـاسـي=(بحلب بني يعرب) صنع نصرمزعوم
ليت سيف الدولة . وليت ابو فراسي=ليت كلٍ منهم حي. ويقعد من النوم
ونكشف لهم ماحل بنا من مئاسي=هجـم علينا الفارسي هجمة الروم
وشهباحلب . كان شـيله متواسي=وسكانها احـرار ومافيـه مظلـوم
واليــوم حلب من المصايب تقاسي=من الاكل والماءوالدواء الشعب محروم
والسنة تذبح. وعلى جثثهم يداسـي=اصحوا قبل ياتيكم الــدور ياقــوم
الفارسي . ماهـو لماضيـه ناسـي=شوفوه حول حدودنا يدرج الحوم
وكم واحدٍ يفهم وعنده احساسي=حذرنا وقال مجابـه الفـرس محتوم
ومن الخليج لحدود طنجة وفاسـي=يطلق علينا امّـة الضـاد معلـوم
وتعدادنا بالكثر يصنف قياسي=بس للأسف يوجد بنا شرح وثلوم
ماعاد بنا فزعة ونخوة وحماسي=واخشى علينا تنطبق كلـمـة رخـوم
ياشعوب نجد وياشعب بني ياسي=وشعب الكويت وقطر يارجالٍ قـروم
وياشعب عمان ياطيبين الاسـاسـي=وشعب البحرين اهل قوانين وسلـوم
احمو حماكم قبل الديرة تحاسي=ياحل بنا المكـروه ماينفـع اللـوم
وترو تكاتفنـا ضروري واسـاسي=والـذود دون الارض. والعرض ملـزوم
ويالله. يامثبـت. جـبـالٍ. رواســي=يافـارض الصلاة. والحـج والصـوم
تنصر امتنا. على كل الخسـاسي=وبقدرتك. تنهـي شقا كل مضيوم
وصلو على محمد صبـاحاً واماسي=اللي ارسـله ربـي لنـا بخيـر تعلـوم
دين الاسلام اللي. رفع شـان ناسي=ماهو اسـلام النمـر محـرّف وملغوم
بأمر الملالي مفصلٍ لـه قياسي=خان الوطن ومن خان مجرم ومذموم

طراد بن مطرود الضوي

الرد من سطم فهد الخليل

مساجلة بين طراد الضوّي وسطم الخليل

	ياحـي من راسه تعزوى براسي=وياحي من اسمه حمل وسم وختوم وسم الاشدة قبل ختم الكـراسي=وسمٍ عزيزٍ وين ماحل . محشوم واســمٍ كساه من المفاخر لباسـي=ضوّي وشمروخي وبزميل مدعوم وحي الكتاب اللي يثير الحماسي=خصٍ ليامن. صار من خيرة القوم كـتـاب من يشـكي كثير المئاسي=واللـه. يابو نايف فلا يلحقك .لـوم وقـريت انا خط الرفيق السـياسي=خطٍ سياسي وكل مافيه مفهوم فزيت به . والوضع صار انعكاسي=ساعة قريت خلاصته. صرت مهموم وعيت. عيوني. لا تطيـق النعـاسي=واصبح علي الصبح ماجـانـي النوم بأسباب خطٍ كان بالحيل قاسـي=من لـينٍ صدوق والقلب مخموم رجـلٍ درس نهج الحياة الـدراسي=وعرف بها عـادات. واعـراف. وسلوم وياطراد. انا والله تبلّــد احساسي=من شي يعرض بالفضا بليلٍ ويوم وادري تشوف الوضع ماهو متواسي=واثـارتـك . رمـلا . و ثـكـلا . ومكـلوم شي (ن) يابو نايف يهز الرواسي=بالامـوي. يصلّى على دم. ولحـوم وعلـى حـلـب تكـالـبـنّ الجـنــاسـي=الغرب هو والشرق . والفرس والروم واظن بالاسـلام صار انتكاسي=اشـوف مـابـه حيـل . يطيـح و يقـوم وسـجّل. من الخـذلان. رقــمٍ قيـاسـي=اصبـح. ذليـل. وعنـد الاجنـاب مشئوم لاشـك انا . عنـدي يقينٍ اسـاسي=شـيٍ جـرى من والي العرش مقسوم وحتـى ولـو قالو مخطط سياسي=الامـر عنــد اللـه . مقـدّر ومحتـوم وسـفينـة الاسـلام . لهـا. مراسـي=لابــد مـا تـرسي ولـو طـول العـوم وخطك مكانه بين عيني وراسي=ورحـبت به. ترحيـب. عازم بمعـزوم ومـن بحركم اخذت شـي اقتبـاسي=العــذر. منـكم كنـت مجـبر. وملـزوم وصلو على محمد صباح واماسي=اللي من الزلات سـالم ومعصـوم

سطم فهد الشمري

توجيه النفس

	يانفس. في راسي من الشعر بيتين=توجيه . يانفسي بأوامـر جديـده خوذي مني . يانفس قولي وتلقين=كل الامور. اللي ذكرته سديده يانفس . عشنا من العمر فوق ستين=من بينهن. ميـّـزت بيت القصيدة عشنا.وخذينا من الزمن خبرة سنين=كفيـلـةٍ. بتـرويـض نفـسٍ عنيـده يانفس . راي بليس. له لاتطيعين=تبقين . يالنفس الشقيه سعيده وتجاهلي. بعض المواقف وتنسين=وبعض التغافل به صفاتٍ حميده تعاملي. يانفس. بالصفح واللين=وكوني ليان بحال . وحالٍ شديده ليني . بأمورنٍ ماتغـيّر موازين=وشدّي . ليامن طِـق راس الحديده والحلم يانفسي على الربع الادنين=هو مكسب اللي يبي يرفع رصيده ويانفس. مابه ناس بالعمد مخطين=لاشك. بعض الناس هذا حصيده يانفس . دلّيتك على المنهح الزين=وتـري.النصيحة من اساس العقيده وصلي. على اللي مرسلٍ للثقلين=افضـل . بني ادم إمـامـه وسـيده

سطم فهد الخليل

المجلس

	المجلس اللي مدهلٍ للرجاجيل=يشتاق له قلبي ونفسي تشوقه واجيه لو انّـه بعيدٍ علي حيل=مادام مابالنفس شـيٍ يعوقه لياصار يسمع فيه حمداً وتهليل=وتذكير بحق الله. على مخلوق مع مايدورمن القصص والتماثيل=وانساب تتناقل من ألسن صدوقه يصير كنّه روضـةٍ علّـها سـيل=والا كما حيرٍ تدلت عذوقـه واشتاق للي ياهرج يازن الكيل=وقعٍ بحكيه دوب هرجه يسوقه كنه يداري مقدم العين بالميل=الوقت والمجلس يقدّر حقوقه ماهولياسولف مثل حاطب الليل=خبلٍ ليا سولف تنابل شدوقه واحب بالمجلس رجالٍ حلاحيل=ناسٍ لها ماضٍ يغذّي عروقه اللي لياطلوا مثل طلعة سهيل=جو ٍ. جميل ومحريات ٍ بروقه اللي على الزلة مثل مظلم الليل=ناس ٍ عن الزلات مقفول سوقه وياحي ريح البن والعود والهيل=طيب ٍ يداوي خاطر اللي يذوقه وياحي شغمومٍ يحوف المعاميل=فنجالهن يطيب من طيب ذوقه والمجلس اللي للنشاما مداهيل=نفسي شغوف ٍ له وقلبي يروقه ياحي مجلاس الرجال المشاكيل=وقبالهم يجلي عن الصدر ضوقه وصلاة ربي عد وبل الهماليل=في ليلةٍ قامة تكاشف بروقه على شفيع الخلق يوم التهاويل=اعداد ماتغرب ويبدي شروقه

سطم فهد الخليل

الحمد للباري

	‎الحمـد للباري على مـاهـداني=على طريق الخير، وجنبني الشر ‎والحمد له ثاني ، شكر وامتناني=على قضى المكتوب واللي مقـدر ‎والحمد له ثالث على مـا عطاني=خير ٍ كـثير وراجيٍ خيرٍ اكثر ‎اكـبر عطــا ، اجابتـه يـا دعانـي=بصـوتٍ بلـحـن بـلال قـام يتكـرر ‎حيَّ على الفـــلاح يالمودماني=ليا ارتفـع بالصوت ، اللـــهُ اكــبر ‎وبعده عطـاني عرف عدة معاني=عشت وعرفت اشياء اغلا من الـدر ‎الاولة.. عـرفـت ، ممشى الزماني=وعرفت فيه ان الحوادث تقدر ‎وان القدرلي، ياصلن في مكاني=لو كان من دونه محيطات وابحر ‎ والثانية. ان امـرٍ يقـوله لساني=احلا من الحالي ، وامــر من المـر ‎اما ، من الكـدر المغثرب سقاني=وإلا سـقـاني مـن زلالٍ مفلتـر ‎والثالثة. مـاكــان بيـن المحاني=ماابوح به لفلان ، واقول له سرّ ‎ان ماحفظت اسرار شاني بشاني=مالـوم غيري كانه افشى ومرر ‎ والرابعة. ان اللي سمعته باذاني=ماهو بشرط انه على الناس ينشر ‎احيان الاول يحوّل يصير ثاني=والقول في بعض المـواقف يغـيّر ‎والخامسة . يالمستمع للمعاني =درب الخطاء اياك معك يتكرر ‎احرص على الدب السري البياني=وابعد عن اللي به مطبات وحفر ‎والسادسة امضيت عمراً كـفاني=وعــرفــت بـه كـل الـكلام المشـفّـر ‎وحطيت بالنفس القويـة عناني=وحصرتهـا بدربين مارد و مصدر ‎ومـن بعـد هذا ياولـي الحسـاني=اجـعـل لنـا أمـرٍ بـأمـرك ميسـر ‎وصلاة بي عد ما الصـبح بـاني =على الذي في دين الاسـلام بشــر

سطم فهد الخليل

يـاحـيْ شـيخٍ كـلنـا عـزوةٍ لـه

	الشعر لـه ساعه وللسيف سله=ويحين سل السيف وقـت الحرابه ومن فضل ربٍ كلنا تحت ظلّه=السيف في غمده وداخـل جرابه في ظل من سيفه حمى نجد كله=وخـلا شمالـه والجنـوب يتشابه وانا. معي سيفٍ من الشعر اسله=وعن لايميل السيف امسك نصابه ومن شـان سيفي مايجي فيه زله=جعلت مـن ذاتي لــذاتـي رقابه ولا اقول انا ملكي من الشعر جلّه=كــلٍ عـلـى طــولـه يفـصـل ثيابــه ويا هـاجسي هات المشاعـر وفـلـه=وحط النقط على حروف الكتابـه وأبـدا الكلام وبالصلاة. استهلّـه=على النبي والال هم والصحابه وسلام ، اسوقه سوق فنجال دلـه=على الجميـع شيبانها مع شبابه واقــــول للجميع حياكـــم اللـــه=جميع من حضر وســمـع ياهلابه بحضـور شيـــخٍ كلنا عزوةٍ لــه=هو شيخنا ، وحنا سند لـه ولابـه الشـيخ ، ابو وادي محمـد نجـلـه=شيخٍ ، ويحمل تـاج طيـب ومهابه كم كبد ملـهــوفٍ عـن اليبس بلّـه=كم قالةٍ ، خلص نشبها وجابـه وكم قالةٍ ، خلص نشبها وحلـه=بالمال ، والا بجاه حضرة جنابه وبالخـويـِر ، بيـت الشيخ كلٍ يدله=بيتٍ على الطولات ، مفتوح بابه من صكته سـود الليالي زبن لـه=عن البرد والسموم يلقى الذرابه البـيــت بـيــتٍ للسناعيس كلـه=والشـيخ ، شـيخٍ لكل منهـو لجابه ولنا الفخر بالشـيخ ، ومواقفٍ لـه=وعلى مثـل شــرواه ، مابه غـرابه وخـ.....ــا = لـ......ــد وخالد ولد محمد وتـرعـرع بظله=يمشي على دربٍ محمد مشابه شيخٍ ولــد شيخٍ. ويحـل بمحلـه=الــدم دمــه . والفـعــايـل تشــابـه (هذا ابو هذا ) ( وهذا ولدٍ له)=وهذا لهذا ســيف وهذا إعصابه وخـالد. نبارك له على ماحصل له=ثقـة ولات الامــر بحضرة جنابه مبروك. ياخالد وانتــم هلٍ لـه=ومشيختك بالارث ماهي كسابه وتاريخكم حـــاز المفاخــر سجلّـه=وهذا انت تفتح صفحةٍ من كتابه ويا خالد. اسمــع كلمةٍ في محله=من راس رجلٍ صادقٍ يوم جابه درسٍ من اللي بالزمن ماضيٍ له=تجاربٍ ، كنّـه . غــذاه . وشرابه يسوقها. يـم الـلي هو مخلصٍ له=كلمة وفاء. ويـرجـي من الله ثوابه الشيخ ، اللي يبي ربوعه. تجله=يسوق نفسه ، دون ربعـه جلابه يسوق نفســه. للصعاب ويحله=ويقـرّب الوجهات . بين القرابه ويا خذ . من العاقل . كــلامٍ يدلـه=ويصفح .عن الجاهل ويترك عتابه وعــن الهزال . يعــز نفسه بجلـه=ويرقى عن الطامن. بعالـي هضابه والطيب. كل الناس. وده تصل لـه=مار الردا. على الردي ، يعصابه ويكرم جنابك . عن الردا وطاريٍ له=واللي مثـل شـرواك . يكرم جنابه مـاضيـك سـمنٍ فـوق حيـلٍ تـزلـه=وحـاضرك سـهـمٍ رابـحٍ من شـرابه وصلوا على اللي دار طيبة محله=اعداد ماهل المطر من سحابه

سطم فهد الخليل

الهرج ترخص قيمته كل ماطال

	قــال الــذي يــازن كــلامــه لياقال=وقــول المبالغ يقصر القـول دونـه ماهـوبيـرسـل كـل ماجا على البال=ولالــه بقـوا اللي ماهو من شـئونه حرصٍ على الصمته ولاله بالاقــوال=إلّا انـهـم عـن السالفـــه يسـألــونـه وان قـال حط بـكلمتـه قيـد وعـقــال=واخـتـار من جزل الـكلام وفـنـونــه لأن الـكلام احلاه قـلّــه والاجــزال=والناس ، كـثر الهــذر مايـقـبـلــونـه والهـرج. ترخص قيمته كل ماطال=يسمج وعقّـيل العرب يسفهــونه واللي لسانه لكـل مـاجـاه نـقّــال=لابــد مـن قــولٍ عنـه يســألـونه والصمت خيرمن الحكي الف مثقال=والشاهـد انـه بـالــذهـب ياصفونه وخـلاف هذا اقـول ياطيب الفال=اسـمع كـلامي جعل مالك مهـونـه اللي يلالي كن صوته صدى الجال=ابعـد ضعونك عـن مفالي ضعونه لا تحط معدالـك ولايحط معـدال=خـلَـه لمـن مثـلـه يعالـج جنـونه ترى العقـل تـاجٍ على صاحبه دالّ=تــاجٍ يتــوج روس مـن يلبسـونـه و(العقل حلى ماتحلّا بــه الحـال)=بيتٍ عـن ( القاضي ) لـنا ينقلــونه وانا ، اقول ان العقل ، يحطم جبال=ويبني بـروجٍ بالحياة ويصونه وياصاحبي خلك صبورٍ وحمال=وخذ من هديب الشام وصف ونمونه وان مرتـك حـرداء. ويشعاه جهال=خلّـه تعـدّي وسـكّـر البـاب دونـه ترى الصبر محمود في كل الاحوال=غـــب الصــبر. نتــايجـه يـحمدونه الصبر اللي ينقال له صبر الابطال=ماهــو بصبرٍ فيـــه. ذل ومهـونـه (والناس تدري بالجدايد والاسمال)=بـيــتٍ ( لأبن رشـــيد ) مـايـجهلونه افعـل وتسمع عنك بأذنك وش يقال=والـناس فعـل الطيـب ما يـجحدونه لياصار فعـلٍ بـاينن فـــوق ماطـال=يصعب على اللي ودهم يبخسونه وكلمة نِعِم ماهي لكـل واحد تقال=رجــلٍ يعشـق النعم يـبني ركـونـه والمــدح ذم، انكان ماهو على افعال=عيبٍ على الممدوح، ومـن يمـدحـونه المدح. يـزهـى فـي كـريمين الاسـبال=وحـلال صعبـات الامــور وزبــونــه والفـرق ماهـو بالمظاهر والاشـكـال=مايفــرق. الـرجّـال بلبـسـه ولــونــه فـرق الرجال ، يكون بأفعـال وأقـوال =فعـولٍ جـزال ، وكلـمةٍ ينطقـونـه ولا يفتخر بأفعـال عــــمٍّ ولا خـال=إلاّ الذي يحافظ عليـها ويصـونه وياصاحبي ، اعرف ترى الوقت ميال =كم من ، عزيزٍ شـاف منه المهونه وترى للعرب منهاج من ماض الاجيال=نـــزال بيــن بيــوتـهــم ، يحتمونـه وللاجـــودي ما بيــن الاجـواد مدهـال=ســلـم العـرب كــل العــرب يعـرفـونه وياصاحبي ترى المبادي لها رجال=رجالٍ على طول الزمن يحفظونه وترى بالرجال رجال يبنون الامال=وفيهم رجال امـالهـم يحطمـونه وراي العرب ياصـار بيدين جهال=عـزي لهـم مـن مـنزلٍ يـنزلـونه والشـجرة اللي مابهـا فيْ وظلال=عسـاه ماتخضـر، وتيبس غصونه ومن لايعيـن اللي عليه الدهر مال=لايـامـن الدنيـا بغــدْره تخـونـه وصلوا على محمد وعلى صحبه وآل=بـيـت النبي. وعلى الذي يتبعـونـه

سطم فهد الخليل