ليه تكرهوننا بفعل الخير

بسم الله الرحمن الرحيم



السلام عليكم ورحمة الله وبركاته


اخوانى النشاما

قل الخير بالناس والسبب بعض الانظمه الجائره التى حرمت الكثير من الناس فعل الطيب

لااحد ينفعل

لنتكلم بصراحه وبواقعيه مطلقه

اسمعوا هالسالفه البارح جرت على اخوكم تهول وتشيب بالراس

اتصل على واحد من الشباب وقال يامغترب انا بطاقه الاحوال والصراف ضاعن وابحول لرصيدك فلوس واسحبهن وش رايك

قلت زين وعجب عين (مهى هذى سالفتنا يالربع )

المهم حول الدريهمات ومرن علشان نسحبهن لوه وتخبرون ايام راتب الدنيا زحمه ومن صراف الى صراف وانا واعدن الخال انوه يشوف خشتى (حلوك وجه ) :cool:
ومستعجل طلعت من البيت ماخذيت الجوال بس بطاقه الصراف ومن مكان الى مكان وكله زحمه
تذكرت صرافه على له خط واخبره فاضيه دايم قلت لخويي وش رايك نروح للصرافه اللى بالخط قال تم
المهم مشينا يمه وفعلا كما توقعت فاضيه ماعنده الا حول خمس سيارات (تهون ) ماهى شين

المهم وحنا راجعين الا هكالحادث والناس متجمعه عليه وش رايك يالخوى نمرهم ونساعدهم
وحنا نجى الا بوه لوه واحد يشخر شخير يالربع يبى يموت واخوكم كماتعرفون عسكرى عنده شوى خبره طبيه بالاسعافات الاوليه الوكاد اسعفناه يامار كل ماله بزود موات الرجل يالربع

تذكرت انى معى فرشه بالسياره لاضاق صدرى خذيت عزبتى وفرشتى وطلعت اتسلى بلى مكان اجلس به ياما تروح ضيقه هالصدر واصيح لخويي شف بدبه السياره فرشه جبه لعنبوا حيك
المهم راعى لى خويي بنظره لن انساها ماحييت (تقل يقول وش لك وللمشاكل )

الهلال الاحمر تقوم ناقه صالح وهو ماجى (حسبنا الله ونعم الوكيل )
المهم حطينا الفرشه ودربيناه ياما صار على الفرشه لان شيله يمكن يكون مكسور وانت ماتدرى تزيد الحمى مليله
المهم تشاقلناه ياما حطيناه بالمرتبه الخلفيه وخليت خويي يجلس بجنبه
ويوم بغيت اركب السياره سمعت واحد يقول قعد به هالخبل بغيت اخجمه بس الوقت من ذهب
وطبلون السياره (شويهينه ) اسم سيارتى والاشارات انسى الوقفه عنده وللمستشفى بسرعه وانزل بسرعه وصياح يالربع الحقوا المصاب تكفون وين الاجاويد المهم تجمعت الدكاتره وشالوه داخل ولغرفه العمليات وبغيت اروح هالحين انتهت مهمتى ولله الحمد وشوى يقولون نبى احد يتبرع بالدم فصيلته نادره والحمد لله مطابقه لفصيله دمى واتبرع له مع العلم انى متبرع خلال ثلاث شهور مرتين وهى تضر بالصحه ولكن نبغى ماعند الله عزوجل وانا على كرسى التبرع مادريت الا بالعسكر على راسى ويقولون انت اللى جبت الرجال قلت ايه انا هو على بالى يبون يشكرونى (وانا مابى منهم شكر يعلم الله )
وهم يجيبون هكالدفتر واسمك وعنوانك وليه صدمته قلت يالربع انا مسعفه حتى خويي معى اسئلوه (ليتن ماقلته تسان شاف لنا واسطه بس امر ربك وصار )وهم يشيلونوه ومادرى وين وودوه
المهم ومن هالاسئله وليه وبينك وبينه عداوه قلت يالربع اسمعوا هذى السالفه حادث ورجال مصاب واسعفته وهذا اثباتى وانا اعمل بالمكان الفلانى وباى وقت تبونى اجيكم وهم يضحكون تجينا من قال لك انك تبى تروح اصلا ويبون يسحبونى قلت اصبروا خلونى اكمل جميلى واخلص هالتبرع بس وبعده (هذا وجهى تسان اسعفت احد المهم انتهينا وهم يشيلونى وادور جوالى ابتصل اثرينى ناسيه بالبيت وللمركز وللتوقيف بدون كلام يالربع مهى هى انا فاعل خير )
واسمع ضحكه داخل التوقيف
بجنبى يافاعل خير
الصباح رباح وعين خير وادع ان الرجال مايموت بس لانتحمل رقبته
وادور الصوت ياهذا خويي وش جابك بهذا قال انت يافاعل الخير سحبونى للتوقيف بعد اشارتك وجدعونى بهذا بدون كلام

المهم كلمت الخفير نبى ضابط الخفر وينهوا قال نايم ولانقدر نزعجه (الله واكبر هالحين بطلبنا تزعجه وهو يصك الباب الخارجى ويطلع )
المهم طول ليلى يالله انه مايموت يارب انت تعلم انى ماسويته الا علشان اجرك وثوابك ارحمنا يا ارحم الراحمين

وبالصباح مادريت الايدعونى ويامار بوه لو شايب عندهم جالس ماتكلم ويوم سئلن الضابط انت اللى اسعفت الرجال وهو يقوم الشايب ويحبن على راسى الله يجزاك خير ياولدى الله يخليك لهلك ويبارك بك
ومن هالدعاوى
المهم من انت يالشايب الله يخليك ماعرفك والله قال انا ابو الولد اللى اسعفته الله يجزاك خير
قلت ايه اسعفته واخرته بالسجن
عطونى التلفون ابى اتصل على اهلى واطمنهم على من البارح مايدرون وين انا حى والا ميت
وادق على التلفون ولايرد على الا العجوز وينك يامغترب ياهالسربوت ياقليل الحياء عينى ماغمضت اتحراك وليه تسوى هالعمل بس كل يوم وانت مشغلنا عليك (تخبرون قلب الام ) ماعلمته انى بالسجن والا تسان رايحتن به قلت ساعه بالكثير وانا عندكم ان شاء الله وهى تسكر التلفون زعلانه ماتدرى عن وضعى وعن هاللى جرالى
وسئلت الضابط تعرفون ان بعملكم هذا يقل الخير بين الناس لو ماسعفته وخليته لهالناس اللى بكل حادث تجيك وتصور يكون احسن والا اسعافى له احسن مارد على الابكلمتين اول شى هذا النظام والثانى انت تبغى الجزاء من الله مهو من الناس
المهم طلعت انا وخويي من التوقيف وللمستشفى مرينا الرجال يامار حالته مستقره والحمد لله
وامه اول ماشافتن وهى تبتسى يالربع وتصلخ له قلاده بصدره وتجدعه على وقالت ياولدى والله انك تستاهل البيضاء تغزلك والله ماهذا حقك ياولدى قلت اسمعى ماجيت ادور حقوق انا جيت ازور اخوى بالدم معطيه من دمى ترينى وذهبك خليه معك مالى به عازه لكن انتى وشايبك من وين قالت حنا من وادى السعلوه (ديره بجنبنا حول خمسين كيلو كله بدو )
قلت اسمعى هالحين تمشين معنا للبيت وتريحين والعصر تمرينه قالت ياوليدى انا ماغمضت عينى من البارح (وتذكرت امى وحاله )قلت لايكثر ويالله معى للبيت بسرعه

المهم جينا للبيت ومعى هالشيبان
واول ماشافتن العجوز وثيابى كله دم وهى تصيح كل يوم وانت بمشكله ومسوى لك خنقه مع احد

قلت اسمعى يابنت هالحين معى ضيوف وقلطى هالبنت معتس وجهزوا لنا القهوه وخلوا ضيوفنا يرتاحون وتعالى اعلمك باللى صار (وعلمته بالسالفه واطمئن قلبه )

هالحين عندى كم استفسار

لو مات الرجال من يتحمله
ان كان ماجاء ابوه وهله ابخرث بالسجن قولكم
الجندى اللى صك الباب الخارجى انا اشتكيه
ضابط خفر النيم اصكه بلوه شكوى ياما يعرف ان الله حق
ان قابلت حادث هل تسعفه ام لا
برايك انت اخى لو جرى لك ماجرى لى وش يكون موقفك
ان صادفت حادث ولقيت ناس تصور وش ودك تسوى بهم
متى يتعدل وضع الهلال الاحمر بقولكم

نبغى التفاعل منكم