المساعد الشخصي الرقمي

مشاهدة النسخة كاملة : قصيدة من القائل...هبت هبوب الشمال وبردها شيني

الكاش
19-03-2011, 03:34
أخواني الأعزاء لقد أستمعت لهذه القصيده من الأولين والآخرين وسألت عن مصدرها ومن قائلها فلم أجد أي خيط يدل على القائل ولا المناسبه فهل أجد الإجابه عندكم ؟؟

من قائلها

عديت في مرقب ٍ و الليـل ممسينـي =بديار غرب ٍ لعل السيـل مـا جاهـا

اضحك مع اللي ضحك و الهم طاويني = طية شنون الطرب لا قطـرو ماهـا

و راك ما تزعجين الدمـع ياعينـي = على هنوف ٍ جديـد اللبـس يزهاهـا

هبت هبوب الشمال و بردهـا شينـي = ما تدفي النـار لـو حنـا شعلناهـا

ما يدفي الا حشـا مريوشـة العينـي = و الى ظمينـا شربنـا مـن ثناياهـا

ياشبه و ضحى فتـاة ٍ دلهـا زينـي = داجت على عقلة ٍ و الورد مـا جاهـا

ياعل من شار بالفرقى عمى العينـي = والا بشلفـا علـى الفخذيـن مبراهـا

جعله حسير ٍ كسير و راكبـه دينـي = و اتلى حلاله ذلـول ٍ راح يطلاهـا


اتمنى اجد علم صحيح منكم لنستفيد
ايضا هل الابيات صحيحه حسب علمي فيها تحريف

مثلا يقول هنا ؟ الطرب ؟ والصحيح ،، الطلب ،، وغيرها من الكلمات هل هي محرفه
ماكنا نعرفه ونردده بالابيات

خطأ
اضحك مع اللي ضحك و الهم طاويني = طية شنون الطرب لا قطـرو ماهـا

الصح
اضحك مع اللي ضحك و الهم طاويني = طية شنون الطلب لا قطـرو ماهـا

وايضا هناك كم كلمة وجدتها محرفه مثل حشا ومانعرفه حضن وايضا شعلناها ومانسمعه شعمناها

لان القصيدة هجينيه
نهير النمش
19-03-2011, 04:15
هلا اخي الكاش

الله يعطيك العافيه وفعلاً هذه القصيده ياكثر مانرددها

وانا اسمع انها لـ الدجيما

اضحك مع اللي ضحك و الهم طاويني = طية شنون الطرب لا قطـرو ماهـا

اللي انا اعرفه

طوية شنون العرب لاقطرو ماها 00 والشنون هي قرب الماء -

والله اعلم
بدهان
19-03-2011, 05:57
هبت هبوب الشمال و بردهـا شينـي = ما تدفي النـار لـو حنـا شعمناها

هذي يوم انا وغد وان اسمع بها ونغنيها سامري بالليل بالشعيب


تحياتي
فكاك زمل المخيفات
22-03-2011, 05:34
اخوي القدير الكاش هذه القصيدة اختلف الكثير علي معرفة صاحبها
منهم من نسبها الي الشاعر دخيل الله بن عبدالله الدجيما من روق من
عتيبه وهو من الشعراء الذين ماتو من العشق والغرام
ومنهم من ينسبها الي فهد بن عسكر العجمي والمعروف بأبن الحضريه
وقد انتحلها الكثير وفيه من قال انها لشاعر موهق بن عجاج الغنامي
عندما تزوج بنت عمه وشرط عليه ولد عمه انه يبقي في نجد ولايذهب
مع الشريف واذا ذهب سوف يطلقها منه ووافق وانجب منها ولد وبعد
ذلك نقض الاتفاق وخرج من نجد فما كان من ابن عمه الا ان طلقها منه
فقال هذه القصيدة والله اعلم .

والقصيدة هذه لااحد يجزم من هي له لان عليها اختلاف ولااحد سمعها من
صاحبها لذلك سوف تسمع اسماء كثيرة مانجزم عليه انها قصيدة رائعة

وصح لسان قائلها كائن من كان
الكاش
06-10-2011, 05:10
هلا اخي الكاش

الله يعطيك العافيه وفعلاً هذه القصيده ياكثر مانرددها

وانا اسمع انها لـ الدجيما

اضحك مع اللي ضحك و الهم طاويني = طية شنون الطرب لا قطـرو ماهـا

اللي انا اعرفه

طوية شنون العرب لاقطرو ماها 00 والشنون هي قرب الماء -


والله اعلم


هلا بنهير النمش
ياحيي ماتجي العرب ولا الطرب
لان البيت مبني على الطلب والطلب انت تعرفهم اكيد هم الفزعه اللي مكلفين بشي ما وخلص الماء
بصملتهم اللي معهم أو قربتهم اللي هي عاد
وهذي الهجينية نسمعها من صغرنا حتى الحريم يهيجنن به

الا فكاك
لاهنت يابعد حيي على التوضيح الكالف

تمنيت الشاعر عبدالله المفضلي
علق على الموضوع :xc :
تحياتي
بدهان
22-02-2014, 05:37
لااعلم عنها شي اسمع الكثير يرددونها من قديم وحاضر
تحياتي لك