ديوان الشاعر / علوش الشمري

[علوش الشمري]

اطلالة اولى الى نشامى شمر!!! ..

يامحمل الشعر سوق المقبله باعتدال=على بحور الاماني والنواظر تخيل
طال انتظاري وانا حملي يهد الجبال=ياطول صبرٍ صبرته وادري انه جميل
كم عاشقٍ حركة حبك ومد الخيال=على طوارف غرامك وانت مالك مثيل
ياللي رفعت الاسامي فوق روس الرجال=ياما رفعت الرجال اللي تقدم دليل
على طريق المحبة عنفوانك دلال=يانبع ياللي شرابك كنه السلسبيل
تشرب من انهار جودك مترفات الجمال=اللي تغنج غنج واللي جماله يهيل
عليك كم حسرتٍ شقت صدور العيال=اللي تمنا وصالك وانت ليلك طويل
ياللي ردعت الخطا لامن حصلك مجال=يامعدل المايله لامن بلاك الهبيل
يامقدم الطيبات اللي تحب النزال=لامن دعاها هجوسٍ مايحب البخيل
الله مكبر غلاتك ماتعادل بمال=عند العقول العظيمة تصنع المستحيل
يامعطر الوارده لاصار تبغى ضلال=يامثبت الصادره شهادتك ماتميل
يامجمل وجيه ناسك بالحلا والقبال=تكبر بعين العرب عطاك مثل النخيل
ماقل شانك ولا هبت هبوب الشمال=على بروجك ولا مرك قطار الرحيل
في مامنن عن جهل ولابوادر زوال=ماغاب ذكرك ولا يطلع بدالك بديل
والمعذرة كان تقصر عن دليك حبال=ماكل من ساق ذوده يشرب من الصميل

[علوش الشمري]

هذه ابيات متواضعه في رثاء ابوفهد مطر بن خلف البشير الجفعر الشمري
وهو من رجالات شمر المحسوبين ومشهودله في المواقف البطوليه
وصاحب نخوة وفزعه وشيمه قلت هذه الابيات وحبيت ان اذكر بعض من صفاته اللي اعرفها
رحمة الله عليه
مطر بن خلف البشير الجعفر الشمري!!! ..

يارب عفوك ونت فوق السماولات=تلطف بنا عن الجهل والظلامي
نتوسلك يارب في كل الاوقات=ونطمع بعفوك في شديد الزحامي
يارب يارحمن رحمتك لوجات=تضفي على المخلوق برد وسلامي
انت الذي تغفر كبار الخطيات=وترحم بمن يسجد وصلا وصامي
جاك الذي مازود الناس سيات=ماحصل الا الطيب والاحترامي
ترحم مطر عن كل غلطه وزلات=وتضفي عليه من الستر ثوب خامي
من حيث مارافق علوم الرديات=ابيض نقى والراس عالي مقامي
ماشال حقد ولاقطع بالعلاقات=ولاشجع النمام ولا الحرامي
الاجودي ذكره مع كل مافات=مايذكرونه غير طيب وهمامي
مانمدح الخايب ليا عاش او مات=ولاينذكر في علم بين الانامي
لكن رجال الطيب فيهم علامات=لابد مانذكر كبار الاسامي
ابوفهد من ساس مجد وبطولات=من روس شمر من علو السنامي
محشوم من ربعه وكل الجماعات=قدم من المعروف شرقٍ وشامي
الضيغمي راع الشرف والمروات=مادورو خلفه علوم وكلامي
مثل الجبل مواقفه بالصعوبات=حرٍ ولد حرٍ سلالة قطامي
وافي وصادق مايخون الامانات=شريف من ناسٍ اشراف الاثامي
ماقص عرقوب العرب بالتشمات=ولاقال بالغياب هرج وعلامي
اصفى من الصافي ولافيه غلطات=ماجاب غير الطيب والراس زامي
معروف في طيبه وصدق العبارات=وبالمد ماقالو شحيح الطعامي
يارب ماغيرك رحومٍ على الذات=ارحم عبادك عن سنا النار حامي