ديوان الشاعر / مطلق البخيتان

[مطلق البخيتان]

السلام عليكم ورحمة الله وبركاته..صباحكم/مسائكم سرور..يشرفني انضمامي لكم في هذا الصرح الشامخ..بدعوةٍ من الشاعر الكبير أبا فراس(احمدالجريفاني).. أرجو أن أكون من أصحاب القبول بينكم.. وهذه مشاركتي الأولى من الارشيف :

تعاااااااااااااااااااااااال !!!

حلمت أنه يقول اللي على بـــــالي نبي ناصلك = ولكن وش تقول بحقنا يـــــــا صاحبي..دوبك؟
وقلت : الله يردك وألتقيــــبك وأشربك وآآآآكلك = غــــلا..وأتنفسك وأحيي هلا من قلب بدروبك
عطشتك ليــــــن حننت العطش للي سكن حايلك= وجاعتك العيون اللي تخيل المسج من صوبك
تعال أبجهلك وأعلمك..تعـــــال أبعلمك وأجهلك = تعال إسئل رياح الشبط فيني وش عمل شوبك
تعال ونششد المسريت عني يوم طــــاح السلك = (أمــــــــانة).. لعنبوهـــا كلمةٍ تفدع بمحبوبك
حياتي مزح بغيابك..رضاء لأ هزلك قبل أجزلك =لوأني وسط سلمى وأهل سلمى شـــاربٍ كوبك
ولكن يـــــــاغريب الجنس عز أتلاك مثل أولك = ومن ينكرك عندي مـــايساوي دوس عرقوبك
أنا هذي عناويني وهذا هــــــــــــاتفي وآصلك = وعنـوانك وصلته .. والغرانيــق أنكروا طـوبك
تعال الوقت مــاهو وقت مسـتأجر وراعي ملك = عريبه صــــار للمستعربة (طــالبك مطلـوبك)
طفتبه نـــــــــــار شيخانٍ وشبت نار تلك وتلك = لفـــايق من هنا وهناك صــــارت تحجز قروبك
دول راحت دول حللت عسى يــادار ما تشملك = وكله سبت إمساك اللفايق مفصل ألأوووووبك
وطنا يــــــــــاوطنا.. من حلم ياصلك ماياصلك = قبل تفنا جميـــــــع أرواحـــــنا طبقاً لـمأ جوبك
تطوعنـا وهذا يــــــــــــــاوطنا واجبٍ منك إلك = ولآل ســــــعود حكام الوطن.. وولاة محسوبك
ملوك العرب وأصحاب الخلافة هم ملاذ الهلك = بعد رب البرية.. وإخس ياللـــي كبرت جنوبك
شبعت بدارهم وآمنت..بعد الجــــــوع ومجفلك = وأثرك مورثٍ لقطة (غليس الشهم ) مســلوبك
خسئت وتبّت أيمــــــانك وتفكيرك ومن راسلك =خسئت وخـــابت أهدافك وثوب الذل هو ثـوبك
عسى مثلك فداء لصويحبي وأهلك تعلكك علك=وعسى الكوثر يغسل أرض الوطن منك أنت وخلوبك
وعسى دنياك ظلمى.ريح.صرصر.فاتلة تفتلك = وعساها ضي للدار وهله... وأفراحي غروبك

[مطلق البخيتان]

مثل المزيني !!!

مني تحية يـــــــــــــــــاجماد الأول = ياللي بدايــــــــاتك ثلاث وزيه
مـــــاهي لك أنت أرجـوك لاتتهول = لاوالله إلا للرجـــــــــــال الحية
اللي تعرف العرف مـــــــــا تتمول = أهل المبـــــادي بالوفاء معنية
تخلص ولاتظلم وهـــــــــي تتجول = ماهي بحكم أهدافها الشخصية
واللي عصف من يوم شيخه خول = وفــــــاحت علينا ريحته مثنية
أصغر علامات القــــــــيامة وأول = صدمة لهقواتي وصــــدمة ليه
قلت البشر مهما غلط مـــــــاطول = لكنها طـــــــــــــــالت لحمة نية
كم جتني الاقــــــــــوال قلت تقول = وأثرالنوايـــــــــــا الطيبة مبلية
يــــــــــــاهيه كان اللي تعلا حول = تحويلته مــــــاهي مطر وسمية
في جعبته كل الخرس لامـــــــول = وشخصـــيـــــــته لادخنة واوية
أخطيت بالعنـــــوان وأنت مهول = قصيــــــــــــدتك لاوزن ..لاقافية
تبي تعــــول مــــأنت نسل معول = تبـــي تثيـــــــــر النعرة الشعبية
بــــآخر زمانك لك قرينٍ شــــول = مثل المزيني يــــــوم صار رقية

[مطلق البخيتان]

أشكره وأثني على السلحوب !!!


عبير عقدة وطيب أهله وتفكيري= توافقن عند ابن سلحوب بالدكة
عنيت له من ربى سلمى مغاتيري = ياوي والله رجالٍ مابها شكة
من حسن ذاة الرجال انشل تعبيري = حمولةٍ من غلاه عقودي انفكة
عبدالعزيز الذهب ريف المساييري= ونايف على اسمه يعل أعداه للحكة
واخوانهم وأقرباهم كلهم خيري = نقوة رجال تعز الطيب وتعكة
مني عليهم سلام ماكفخ طيري = ومادق قلب المسافر في حرم مكة
هم عرفوني على رجالٍ اكابيري= من بعد قارح يمين ولابها شكة
مثل العميد الوفي نسل المشاهيري=مديرسجن العروس معالج الضكة
اللي عقب ماحصلبه من معاثيري=جاله وسك الذهب عقب الصنق سكه
وحدد برامج هله في كل تيسيري=ومن فوضوياتهم في حكمته فكه
اشكره واثني على السلحوب تقديري=أهل النفوس الرحيبة والوفاء نكة

[مطلق البخيتان]

عش العصاااااااااااااااافير !!!

واوجودي كل ماجـت علـوم المشمليـن=وجد صقارٍ فقـد طيـر وابطـى مالقـاه

بأول المقناص هده على خـربٍ سميـن=ممسيٍ لاعـاد طيـره .ولاهـوّد دعـاه

له زمانٍ بين روس النوايف بيـن بيـن=ملّت العالـم وهـو كـن مفقـوده ظنـاه

ماتقـول الا خلـوجٍ تهجـرس بالحنيـن=والله انه يشعط القلب من وجـده غنـاه

واوجـودي مـن علـومٍ تبيّـح للكنيـن=آتشفقها وهـي ضحكـة القلـب وشقـاه

وجد شفقانٍ على الحج عودٍ قبـل حيـن=تايبٍ لكن رجع فـي خطايـا مـع خطـاه

واوجودي كـل ماجيـت أعـد الطيبيـن=وجد من هو بآخر الصيف يبحث عن كماه

مستحيله وإن لقاها لقـا ضيـم السنيـن=لاعبٍ به .وارذل العمـر سوّابـه سـواه

غير بالميّـه ثـلاث اربعـه متمركزيـن=مثل غيـدٍ شامخـة تمنـح العالـم نمـاه

كيف ؟ أدوّر من يعينن على شوف الظنين=والبشر كل أغلبـه مادهـا حالـي دهـاه

واوجودي يالله انـك تعيـن الصابريـن=بين غار ونار.ياصعب هـذا عنـد هـاه

والعمر محـدود والظـرف عيّـا لايليـن=مايذله سيف عنتـر وسيـف اللـي وراه

ولايطيع النصح مهما يكـون الناصحيـن=ولايقدر حبـة الـراس وخشـوم وجبـاه

والله اني مؤمـنٍ بالقـدر مـع مؤمنيـن=مار وجد اللي ظروفه تعوقه عـن رجـاه

واوجودي يآخر الليـل واهلـي نايميـن=والهموم اقسى من الفقر من بعـد الغنـاه

واوجودي كـل مالبـدر بالظلمـى يبيـن=وجد مسجونٍ بقا واطلقـوا كـل خويـاه

واوجودي كل ماسمع من المرضى ونيـن=وجد خيـالٍ كسيـرٍ علـى شهـمٍ نخـاه

واوجودي كل مأصبحت مدري وين ويـن=أتفرق والجهـات أربعـة واربـع جهـاة

وجد من داهم حلالـة جيـوشٍ طامعيـن=وقسّمـوه وروحوبـه وخلـوه بـخـلاه

واوجـودي كـل مانـاح نـواحٍ حزيـن=وجد من واعد حبيبه ومقسومـه عصـاه

واوجودي وجـد رجـلٍ عقيـمٍ للجنيـن=واوجـودي واوجـودي وجـودٍ مـاوراه

يادواء حالي على شوفتك وجـدي مكيـن=ياشفـاء روح المتيـم وياطعـم الحيـاة

يعلـم الله كـل ساعـة كأنـه ليلتـيـن=من فراقك والـزوارق تنكـد لـه هـواه

ياكـرز لبنـان ياعيـن ريـم الرافديـن=ياهـوى نجـد العذيـة وياقايـد ضبـاه

يادفى عـش العصافيـر يالـدر الثميـن=ياركيزة كل الأغـراء الطبيعـي يامـداه

وش بقى للي وعد واخلف الموعد سنين=في فـؤادك ياشمـوخٍ تميّـز فـي بنـاه

وأنتي ادرى بالقضية وقبل الجيـم سيـن=ياقبـال أهـل الكـرم ياشعـاره ياوفـاه

سامحينـي يعـلـم الله رب العالمـيـن=حاجتي لـك حاجـة الحـي كلـه للميـاه

ان سمحتـي طيبـة والعفـو للطيبـيـن=وان طلبتي حق. عربون عمري دوك ياه

حق راع الاولـه مايقـارن فيـه شيـن=لاتحسبين اهتمامك بأسيـرك كـد نسـاه

ناحـلٍ حالـي غرامك.ولكـن فدوتـيـن=يابعد من عرق كفـي بكفـه فـي حمـاه

اعتقد شخصك منابع سعـاده واكسجيـن=وفيـك فتنـة جاذبيـة وبلسـم لسقمـاه

ماجـداي الا الرسايـل اليـن الله يعيـن=ارسلـه تاصل.وانـا عاجـزٍ وآعزتـاه

عبر مافي الجو من ذبذبـاتٍ فـي رنيـن=وآهنـي الذبذبـة وآهنـي اللـي معـاه

من يبشرني بشوفـك علـى ماتشتهيـن=واشتهي يحرم علي حرم مانلحـق جـزاه

مستحيلة.وإن حصل:معجزة والعمر ديـن=أدري انـه حلـم يقظـة ولله مابـغـاه

آه ياوجدي من الحـب حـول الشامتيـن=وجد أسيرٍ عند خصمٍ يبـي يلعـن ثـواه

وآه ياوجدي على شوف من لامن:حزين=غارقٍ في حب من لايسـاوم فـي هـواه

لعن ابو وقتٍ علي مال ميلـة مبغضيـن=حدّني لافضال ناسٍ تغطـرس فـي بهـاه

يعلم الله لـولا الايمـان وإذنانـة ظنيـن=وألأمانـات الكثيـرة بعنقـي مـع نمـاه

لاشتري كفني واحفر اللحد وإشهد ثنيـن=والعن الدنيا من الفـه الـى مابعـد يـاه

[مطلق البخيتان]

رد: ردي على الشاعرة رمش الغلا بقصيدتة على العهد ماتصدّي..؟؟ !!!

اناباح والله يأم نواف سدي=مما كتبتي دون زورٍ وتكليف
مشاعرك عديتها ماتعدي = وانا جريحٍ كد تعرضت للحيف
لاتقلّبي دفتر حياتي وودي= طفليني اليتمان ما لأمهم طيف
راحت خذاه الموت ماله مردي=ولليوم أراجي لوذته بالغطاريف
ماني مصدق موتها صارجدي= وتهشموا يامفارقين المواليف
وضعي عويص وقصتي ويش ابدي؟= بأطراف قوقل من ظروفي سواليف
وأنتي عسى للحزن عندك ملدي=وللصبر في قلبك مساحات وارشيف
وهذي تحياتي وهذا مردي= ياعقب ابوخوذه من السمن والسيف

[مطلق البخيتان]

ياعيوني قرب الصبح نامي وارقدي !!!

ياعيونـي قــرب الصـبـح نـامـي وارقــدي=لـو دقايـق ياعيونـي تعـبـت مــن السـهـر
الـزمـن سـبّـح بحـالـي وهسـتـر بـجـهـدي=مل شعري مـن شعـوري وخاويـت السفـر
مشكـلاتـي لــو حكـاهـا كــذوبٍ مـســردي=ضاع طبع الكذب عنده من الصـدق انبهـر
عاجزٍ عن عدهـا لـو مسكـت المـاء بيـدي=ولــو تـعـد بليـلـة الـغـدر طـشـات المـطـر
وحنـتـي كــد حنـهـا نــوح ..يــارب ولـــدي=للأمل فـي قـدرة اللـي عـلـى الـقـادر قــدر
ودعـوتـي أيوب قبـلـي دعـاهـا مجـهـدي=رب مسّـن ضــر وأنــت الرحـيـم المعتـبـر
دنتي صيحـات وأشباح فـي ليـل أسـودي=وطيحتي طيحـة حـلاوة علـى بيـت القعـر
وقفتـي بيـت الشعـر يـوم طـاحـنّ عـمـدي=خطوتـي خطـوة قطـارٍ عـن السـكـة حــدر
حيلتـي حيـلات شـايـع بسـجـن الأمـجـدي=ليـن بإذن الله ظـهـر لــه صـبـيٍ ما ظـهـر
ما فزع لـه فزعـة إنسان عـادي وأجـودي=لا.. ولكن حول السحـر يسحـر مـن سحـر
من كتب هذا للأمسـح لـه أركـع وأسجـدي=وأرتجيـه بكـل عضـوٍ حـوى جسـم البشـر
في غلا أرضٍ وين ما روح فالأرض بلـدي=فـي غــلا أرضٍ ما تعـرضـت فيـهـا للقـهـر
فـي غـلا حكـام الإسلام والحـرف أبجدي=مهـبـطٍ للـوحـي وإسلامنا منـهـا انتـشـر
فـي غـلا سلمـى والأسلم وسنجر وعبدي=فـي غـلا حـايـل وأهلها ورفــافٍ خـضـر
ياالـهـي والله إني مــن الصـبـر اجــردي=بـالـغ السـيـل الـزبـى وأنت جـبّـار العـثـر
من عجل من طين سويت روحي وجسدي=من جهل من ظلم .مالي سـوى يمـك.. مفـر
كـان ذنبـي زاد عفـوك مـن الــزود ازودي=ولا لنـا مـن غيـر عفـوك مـفـرٍ مــن سـقـر
إن جزعـنـا مـــن قـدرنــا جـزعـنـا واردي=أمـة الإسلام صـارت علـى شـفـاه الحـفـر
في زمـان المـال والحـرب والغـزو الـردي=فـي زمـان العولمـة والمصـالـح والخـطـر
جابـهـوا حـكـام الإسلام غــزو المـعـتـدي=مــار وش صــد المـدافـع جــرادٍ وأنتـشـر
تـالـي الشيـشـان راحــوا شتاتٍ شـــردي=وقبـلـهـم للبوسنة كـــل ذلٍ مـــع قــهــر
ومسلمين الهند وارض الأفغاني تشهـدي=غـيـر بـغــداد وفلسـطـيـن تـاريــخٍ حـمــر
غيـر غيـر وغيـر حتيـش لــو زاد عــددي=نـارهـم جتـنـا تلـقـم مــع اليـابـس خـضـر
نصـرتـك يـا نـاصـرٍ عـبــدك المستـنـجـدي=وضعنـا مـن دون عونـك وفزعاتـك غـبـر

[مطلق البخيتان]

أرجوك...أرجوك رجوى !!!


لاتودعيني ظنوني لاتخليني = القلب للي خذاه مسلم حاله
تكفين مع دق وقتي لاتدقيني=عقبك لعبي قليل القوم وحثاله
والا اشلعي حبك اللي في شراييني= اللي نبت نبت ثيّل واحكم اقفاله
أرجوك.. أرجوك رجوى.. لاتبكيني= تحطمت حالتي مدري وش القاله
من وين جيتك ومن من وين جيتيني؟= صرتي مثل دعوة المظلوم قتاله
حاولت عنك أغتني..ماعاد يمديني= حاولت أفارق مضارب طي ماضاله
ماقول غير الله اللي فيك مشقيني= يشقيك فيني ولو ساعات ياهالة

[مطلق البخيتان]

ياصيف .. والعمر شجرة !!!

ياصيف أفز بجيتك فيك الاجازة واللقا=بين الاقارب والاحبه والسياحة والسفر
لاشك تكفى لاتعيد امس الحزن وامس الشقا=وحدة.سهر.طفل ومرة.شهرين عن مية شهر
هم النساء واطفالها ومرافقة عودٍ هقا=مع ضغطه السكر رقا لاقدام رجلينه فجر
قالوا هل الطب (انتهى الموضوع والسكر رقا=الجرح هذا قرقرينه مالها غير البتر)
قال ابتروا دام البلاء لامن بقت معها بقا=حاولت ادور غيرها قالوا بتأخيره خطر
أجامله وأسمع بصدري صوت خلجٍ مرهقا=يابوي ياعله طهور اللي تعانيه وأجر
واليوم تقريباً سنه حنا ورجليه لصقا=غير اربع سنينٍ قبل بتر القدم مد وجزر
بين (إنبي إتش) و (وآرآي) الانسولين الامحقا=ومطهرات الصيدله وعلاج صيته والحفر
واعلاج الاردن والعبس. فيهاغسيل وبه سقا=وشهد أم نايف. والطريقة شي صبخ وشي ذر
يالله تشافي والدي واللي لبنها مأتقا=بنت الولد واخت الولد زوجت ولد وأم الدرر
ياصيف كل العام عام أحزان. مابه مفرقا=الواحد وعشرين والفٍ واربعة هجري هجر
هجرهجر لاشك هاجر في عزازٍ واصدقا=هذا فجعني بخبره وهذاك شفته يحتضر
يالله عساهم عن لهيب النار يارب عتقا=ياعلهم في جنتك يوم المحاسب والحشر
واشيب عيني حسرتي ماتغرب الا تشرقا=مدري هو الحزن عشقن والا على افراحي حضر
ياصيف والعمر شجرة له محرق وله مورقا=خله تلبس وتعزف من قبل حطاب الشجر
ياصيف عام الفين ميلادي وواحد. بندقا=حراس صبري بوشت في وجه غارات القهر
مالي خصيم الا البخت باب السعادة مغلقا=مالي نديم الا الامل لولاه ..جاعني خبر
كبلني الحظ الردي .مالي سوى اسمي (مطلقا)=واضعف مثل كل البشر. والدمع لاضاق انتحر
لاضقت سلمى واسعة. زبنت روسٍ شهقا=وزعجت صوت المستجير .لعالم اسرار البشر
حتى يهدي روعتي الواقي اللي لاوقا= ينام من ياقاه مايخطرعلى باله حذر
ياصيف تكفى نسني صيف أمس وأمس المؤرقا=لايابعد كل السنين اللي عرفته والدير
عندي قناعة بالفرج والموت بس الاسبقا=مدري هذااا والاهذااا آمنت باحداث القدر
الدار هذي ساكنه موات لله البقا=يغرم بها راع السعد ويملها راع الكدر
وياصيف صف بجانبي خوه على وضح النقا=طيرٍ جناحي منكسر وبخاطري (100)كسر
ياصيف جيتك في يدي طفلٍ رضيعٍ يغرقا=وبنظرتي كبوة جواد الشيخ مكسور الظهر
في غفلتي لحظة رحيل. ورحلتي لحظة لقا=في وحدتي كل المثير من الولادة للكبر
قصدي معا قصد القصيد. عدوان مرة ورفقا=ماكنه الا عشرة ارباب المصالح والنور
انكارنا غاص البحر. واخلاصنا بالازرقا= يابيه. حجي. ياسمي .يازول. صارن يانفر
ياصيف هذي نبذةٍ والا التفاصيل اعمقا=عن سفرتي من نقطة البنشر الى [نقّا جهر]
شفني على حد الشفا .من ضلعتين ملفقا=رجمٍ ظروف التعريه له فيه بصمة لوصبر
لجل انتظارك عجل الجيّه سعدوالاشقا=انجض شواتك خبرن والناس بعدين تخبر
مالاح براق الحيا ماهل همال وسقا= على النبي الهاشمي مني صلاةٍ للحشر

[مطلق البخيتان]

أحدى مراثيي في زوجتي أم سالم رحمها الله وأسكنها فسيح جناته..

ياااااا ونتي !!!


ياونتي لوسمعها ساير الناس= تبكي عدوّي قبل تبكي صديقي
تشكي من الحرمان والحزن والياس = على الذي ضيعت عقبه طريقي
قيل أم سالم تطلب الحل لاباس = جاه القضاء والموت حق وحقيقي
فزيت مفجوعٍ بلا عقل واحساس= عجزت لأبلع يأبن عدوان ريقي
سافرت لعيالي من الضيم منداس=مثل الغريق اللي يساعد غريقي
سالم يخطّي ويتركا على الساس=يقول ياماما..ولامن فريقي
يبكي وأنا أبكي يومنا دمع وعماس=لوتدري أمه يمكن انه تفيقي
وسلطان بإمهاده وأشافيه يبّاس= دمعات عينه وسط كبدي حريقي
ياعل بالجنة بساتين والباس = للراحل اللي منه جرحي عميقي.

رابط القصيدة بصوت المنشد سلمان السلوم:
http://www.youtube.com/watch?v=UxOMUoFcetU


:


.

[مطلق البخيتان]

هلا وغلا بشاعرنا الغالي / طلال..
ياخي والله ماقصدي أزعجك ولاأزعج غيرك...لكنني أنشر مراثيي كل فترة لعلي أكسب لها الدعاء
..وكلن جاريله من الدنيا ماجرى..المصايب ماخلت بيد مادخلته لكنها تتفاوت مستوياتها وتوقيتاتهاوو...الخ.الله يلهمك الصبر عن فقيدك ويعوضك خيراً..
المهم ياعزيزي انا مسيّر يعني عندلي عرب ولكن عجزت الا أرد على قصيدتك الطيبة ولوكان ردي سريع ومتواضع.. فسامحني على القصور :

ردي على غالينا الشاعر/طلال الاحيوات !!!

هلا هلا ماناحت الورق يا أمير=وحي السلام اللي وصل منك مندوب
طلال..وجدي ماكتبته لتكدير=أبي عساي أكسب دعاكم لمحبوب
وتعبير عن مابي لشرواه تعبير=راحت وأنا في عمر عشرين منكوب
وعندي عيال ثنين مدري وش يصير=جاهل على كبر المصيبة ومكلوب
تدري جلست سنين وجروحي تغير=متواصله..والأ الى اليوم معطوب
وجربت مثلك طير ماعاضني طير=وحاولت بالأسفار لو حالتي دوب
وقنعت بعد..سنين سودٍ معاثير=أن المصايب ماله احساس وقلوب
لاتزيد همي هم..ياشيخ وتثير=حزنٍ عليّ يملك مخاليب ونيوب

[مطلق البخيتان]

بسم الله الرحمن الرحيم

السلام عليكم ورحمة الله وبركاته

احاسيس ام مهديتها الى سالم وسلطان ابناء اخي الشاعر/ مطلق البخيتان
ربي يحفظهم بعينه التي لاتنام ويحماهم بقوته التي لاتضام....!

وارجو من الله ان يقبلوني بمثابت امهم رحمها الله بواسع رحمته واسكنها فسيح جناته
جنات النعيم اللهم امين يارب العالمين ...

وحابه اقولكم ابنائي انا بحسبت امكم انتم وكل طفل من ابناء قبيلتي دون قاصر في ابنائي
ابناء القبائل الاخرى الذينا اكن لهم اهم واهاليهم كل الاحترام وتقدير


الى الشاعر/ مطـلق البخيتان وابـنائه سـالم وسلطان !!!

يالاسلمي نبضات قلبك حزينه=قامت تراجفله حنايا ضلوعي
مطلق يون ونات ويخفي ونينه=وقلبه على فرقا وليفه جزوعي
اجروح قلبه في ضميره دفينه=انا اشهد ان الحزن شيٍ يروعي
قلبه مع اللي ياعرب دافنينه=قلبه على شوفة حبيبه ولوعي
الله يعين الرمش ومطلق يعينه=مصابني صابك وربك شفوعي
سلطان بامهاده ماعدت سنينه=وسالم انا امله طوايف ربوعي
تقولها اللي تذرف الدمع عينه=سالم وخوه نزل خفايا دموعي
ولحدٍ يلوم اللي تحاتي جنينه=مثلك انا لسالم تزايد فجوعي
اقول بعال الصوت ياسامعينه=الروح تفداهم والمال طوعي
زواج سالم خص بيني وبينه=وسلطان يشرلي وتاتيه فزوعي
تم الكلام وزبدة الهرج زينه=والعذر كان بالهرج زلٍ ونوعي



شاعرتنا القديرة..
رمش الغلا
الشيخة الشامخة
مها الجربا
كلماتي مهما طالت وجالت لن تكون أمام قامة مشاعرك الإ كنقطةٍ في محيط.

على كل حال صح لسانك... وطاب فالك... وعيالي هم عيالك...وهم الحين رجال ..قرأت عليهم قصيدتك
وكان لها أثرٍ لم أتوقع 1% منه..ولكن صحيح مايخرج من القلب يصل الى القلب..
هم حملوني لك ماخلاصته :( نحن ابنائك.. ونواف اخينا ..وانتي أمنا التي غمرتنا بحنانها عن بعد.ارمينا للموت فداك لاعدمناك).

ردي على الشاعرة / رمش الغلا !!!

حي الجواب اللي لفاني بحينه = حيّه وحي مسجله بالدموعي
بنت الشيوخ اللي مُفارق ظنينه = خلاه من معدن وفاها تفوعي
وتنوح مثل الورق تصفق يدينه = تنده لأبو نواف مامن سموعي
واليا بكى نواف تظلم سنينه = تبكي ويبكن من وراها جموعي
مثل الخلوج اللي يشيّب حنينه = والموت مابه حيلةٍ ياربوعي
ورغم أنها في غب حزنه حزينه = تبي مع فجوعه تحمّل فجوعي
ياعل راسك سالمٍ يالفطينة = (خنساءالجبل) بنت الكريم البتوعي
مشاعرك مثلك علينا ثمينة = من دونه ألأرواح تنعاف طوعي
يالشامخة يالنادرة يالرزينة = يالمؤمنة في دبرة الله قنوعي
الله يعوضك خير ماتحسبينه = ويلوم من لامك بحزنٍ يروعي
وشكراً يجوب صدورنا تقبلينه = ياللي بدمك للحمي فروعي

[مطلق البخيتان]

ياااا بشت !!!

يا بشت يا جعل ألأرضه فيك تلقى دريب =وألا تنوش اللهب وألا ينوشك لهب
لا صرت يا بشت ملبوس النسب والنسيب=تكبر مع الرأس..وتكوبر على أطلق ذنب
يا بشت يا بشت دامه ماحكروك العريب=والنذل دونك جداه يقول(حامض عنب)
ماعاد لك عندنا قيمة.. عويبك عويب=لا والله عواب..لا جاوزت دقن وشنب
يا بشت لا يلبسك من كان طنبه طنيب=لا تكسي ألا أربعة..واللي سواهم كرب
اللي حياض المنايا يعتبرها كويب=والشيخ شيخ الشريعة ما يهم النسب
وراع الكرم واعسى ماينقفل له بويب=واللي بعمره ورى الستين مامن عتب
ومن غير ها ألأربعة يا بشت تصبح ذنيب=ما يلبسك غير مغرور وسفيه ورتب
البشت ما يعالج سبيبٍ براع السبيب=ولو ينذخ التيس بذنبة الخروف يعقب
وأنا ادري أن البشر بعضه طلاه الجريب=بعضه وبعضه تعمق فيه وأصبح جرب
سعّرت في سوق شرق وجيت سوق الخبيب=لقيت ذولاعرب ولقيت ذولاعرب
والسجن في (قونتنامو) فيك (يابو غريب)=بالأمس ترقص طرب واليوم تصرخ نشب

[مطلق البخيتان]

طلعت لبيّك !!!

بشااااار.... قلي وشهي الشبيحة ؟ = يأبن ألأسد.. خابت سلالة بيّك
(جيشك.. معداتك.. دمار الريحة = وروسك وصينك)..يقهره مكويّك
جتك ألأسود الي شكت تجريحة = عميا تبيع أعمارها لإبغيّك
الروس فيها ساح منهم سيحة = لكن تبي كبش الفدا كرسيّك
الراسماليين والصفّيحة = يبون غسل أوساخهم في ميّك
ابوك سبّح بالدماء تسبيحة = بالغدر.وأنت اللي طلعت لبيّك
واليوم ويح أهل التغطرس ويحه = الموت زلزاله دنى من حيّك.
ادفع فواتيرالمساء وصبيحة = دَينك ودَين ابوك والخف غيّك
مالت عليك أيامك المرجيحة = ماعاد تقدر شيلتك.. رجليّك

[مطلق البخيتان]

راااح للمقبره !!!


حزن شمس الغروب وصمت وجه اليتيم = وصرخة أم الوحيد اللي فجــاه خبره

عــــايشه في خريف عروق قلبٍ سقيم = من بعد روحة اللـــــــي راح للمقبرة

راحت أم العيـــــــال المنمهد والفطيم = ســـــــــافرت قبل ترحل واستمر سفره

وانكسرت بشبابي كسرةٍ بالصميم = كــــان عمري ثمان سنين فوق عشرة

كلمة ابو اليتامــــــا حولتني هشيم = فـــــــــوق حزني على يتم الوغد والمره

آه يــــالوعتي من بعدها يــالحشيم = لوصبرت الحنــــــــــايا كل هم صهره

مـــــــاقدرت ارسم جروحي ووضع أليم = فجر دروب عمري واقعــــــــي ودمره

عشنـــــــــا بعثره وقتٍ بغدره لئيم = شــــــــــــــال منا هوانا والكبود جمره

وحزن شمس الغروب ودمعتك يالحشيم = وصـرخة الطفل ماما..وبعيونه شره

كيف أسكت غريرٍ مـــادرى انه يتيم = نظرته حيــــــل تنخاني وحالي بره

رحمة الله على أمه رحمتك يـــــارحيم = يــــالله العفو عفوك يالله المغفرة

[مطلق البخيتان]

!!!!!
!!!
!!
!
.

آآآآآآآ سف !!!

آسف اني بليلة عيد كنت الضعيف = والله اني صبرت وطالت المسئلة
صاحب الصبر طيّب بس نوبٍ سخيف= بعض ألأحيان صبر الآدمي مهزلة
عيلةٍ باغتتني عند شبة وليف = شفت قبله وحيفة صوت دحّ روله
ورغم هذا اعتذرت الإعتذار الكليف=وعند ذاك إعتذاري زوّد المشكلة
للسوالف عمار وعمر بعضه قصيف=والرجل مايدوّر بالخطأ مرجلة
من تهاون يهين.. يهان..مثل العسيف = ومن تجاهل زعلنا جاهلين زعله.

[مطلق البخيتان]

لولا السلوم!!!

من بعد عرفي لهم محدٍ معذربني = لو جبت تسعين عيدٍ في مناكرها
العالم اللي بذكر الطيب تحربني = معلولةٍ حكيها ضيّق مناخرها
الكذب لأهل الصراحة غبن في غبني = ماكنت أحسب أول القالات بآخرها
بألأمس تزهم وتنخاني وتطلبني = واليوم شفت العجايب من عناصرها
شابت على عيبته وسلوكها يبني=نقص وجهل مع غرورٍ غار وأخرها
وياشيخ لولا السلوم اللي تأدبني = كان أطلي الجرب بالجرة وأصغرها
وأعلمه كيف تقراني وتكتبني =وأعلمه كيف شيخانة تقدرها
وأعلمه كيف مع نسوانها تبني = علاقة اللي عويباته تسترها
عقل أول الليل ماشي.وآخره جبني = هنا الخلل.. طيعوا الشورة لشايرها
تعذروا قبل موجٍ يهدم ويبني = بصمات تاريخ تحكى في منابرها..!

[مطلق البخيتان]

لد النظر!!!


سهران عاجز انام ونام من يقدر= ياليل وين الحبيب الي شغل بالي؟!!
ياليل قل للحبيب ان المحب أخطر= قل قيس يدعيك ياليلاه ويلالي
ماكنت أحسب الجمال اليوسفي يسحر=حتى خذا الموس مع تفاحه أشلالي
يابنت دوك العصى والسيف والخنجر=والخيل والرمح مع شلفاي وأموالي
والقافية والقلم والبوك والمحبر=والزاد والمي والخلفات وادلالي
والهيل والبن والجاوي مع العنبر=بس افضحيلي عيونٍ سجنها طالي
يامزنة الوسم والا ياكرم شمر=يانصر عبدالعزيز وحكمنا الحالي
خليني أشبع نظر من خدك المرمر= ومن وجنتينٍ ****ه ضيّع أقوالي
خليني أسكر بحورٍ سكرها خمر=عقلي وثقلي وفكري للخلا الخالي
خليني العب بموج الليل وأتهور= واسري على شفةٍ ماشفّه الوالي
يازول سلمى ونبت الروضة ألأخضر=ياردوف جبة ولون الطعس يالغالي
ياصيت جوزاء وزين خزينة ألأبهر=مأنت أول أحباب قلبي لكن التالي
لد النظر للغريق العاشق الاسمر = ياألطف البيض حبك ويش سوالي؟
محتاج للنوم لكن بالسهر مجبر=وآحر قلبي عليك ومنك وآحالي!!

[مطلق البخيتان]

لد النظر..( 2 ) !!

لد النظر كانك صدوقٍ بخشري = شوف الصدود بحالتي كيف سوّا؟!
الموت لحظة من مشاهيب جثري = أرحم من أغلا شخص بالصد كوّا
لاتواخذن ياروح مطلق بعذري = من لآدم المجروح لاصد حوّا؟
مالي سواك من المخاليق كثري = لابر لابحرٍ ولا حت جوّا
ياغاليّة لاينجرح فيك خبري = قالت خصيمك من طمعنا تقوّا
والا يمينٍ لوتحت ظل كبري = عيشي معاك ينافس الروح جوّا
قلت آه خيطتي جروحٍ بصدري = من لامني بك في جهنم تبوّا
ياعين من يودع حباريه نثري = من كف(دايم) هدته يوم هوّا
من كف أميراً لو تبيّن على أمري = بإذن الولي ضيمي عن العز طوّا

ألأمير المعني(دايم السف) ماقصر رد على القصيدة والمقصود في حينه..

[مطلق البخيتان]

ياتكس.. ودّن هادي الجنفاوي !!

البارحه يوم الدليخه ثاوي=ماذقت نوم الي يذوق النومه
أروح وارجع وانجضع وآراوي=ولولا الحيا شق الكسيف هدومه
ياضلع سلمى طال ليل الهاوي=كن السنه مع ليلتي ملمومه
على عزيز ٍ للجروح يداوي=مما بحالي صرت انا مغرومه
أركض ولا ادري وين هذا داوي=كلش وطنه وكل سلم سلومه
لاهو حجازي ٍ ولا نجداوي=لاهو سعودي ٍ ولا بحكومه
لاهو جماعي ٍ ولا فرداوي=به جنة ٍ خضرا .. وبه زقومه
واجد معازيبه وهو صقلاوي=سحابة ٍ مامورة ٍ مقسومه
تشوف برقه بس مانت بقاوي=تحط ماه بسهلتك وحزومه
تقدر تروح لموقعه وتراوي=لاشك مالك غير شوف رسومه
خص ٍ اليا صار الحمى للشاوي=والا الحمايل لقمته مقسومه
زرع ٍ تقافته السمايم ذاوي=جار العطش وقلّيبه مجغومه
ياتكس ودن هادي الجنفاوي=مالي عهد في شوفته وعلومه
عزيز عندي في غلاه يساوي=قبيلة ٍ متكاتفين ٍ قومه
ولد ٍ لمن تاريخهم صخراوي=فرّيس وقعات العدم معلومه
بغيت ازوره واستشير لحاوي=علم الرجال احرارها ورخومه
في عشقة ٍ والذيب دونه عاوي=على الذي باحت خفاه همومه
غدي السلوقي ياعزيزي ياوي=وغدي السبايب يرقعن ثلومه
طال انسداحه وانتظار الراوي=يالله تقوي همته وعزومه
بالعنبر الغالي وعود الجاوي=مسك الختام لصرخة ٍ مكتومه

انتظروا رد الشيخ الشاعر المبدع/ هادي الجنفاوي..



:shm :

رد الشيخ الشاعر الكبير/ هادي الجنفاوي !!

ياشاكي ٍ همك على الجنفاوي=يامطلق الظاهر صريم القومه
هذا الزمان اجوف وجوفه خاوي=وعلى الذي مثلك تبين رسومه
الي لفعل الطيب دايم هاوي=كلمة ونعم بغيبته وقدومه
الرزق ماينظر بحال وياوي=جماد مامور ٍ خفى معلومه
الذيب يقنب وال**** تعاوي=والطيب في مخبى العفن بهدومه
ان جيتله خطوه لخطوه ناوي=تجيه شفق وينطحك بسهومه
صارت دعاوينا عطش متساوي=وتموت فينا الأمنيه مكلومه
كل الطعون اليا ازهرة من راوي=قراح سالفته ملاح علومه
لو اني اقدر للجروح اداوي=داويت روحي وانت له مقسومه
مار الله الي في عباده قاوي=والنفس يامعطاة يامحرومه
حتى السراب امسى بليل ٍ طاوي=والشمس تشرق في ضحاها نومه
ورسوم خلق الله شعاع ٍ ضاوي=للأنتظار ومن تبسم صومه
ماينفعك من مايسوي حاوي=الا تصفق في يدينك لومه
والعزم لوسقته على ماتراوي=تصير سكات السفر مرسومه
محد ٍ يقول ان رحت وينه داوي=كل ٍ يطلع من ضميره رومه
ماخلوا أحد ٍ في مكانه ياوي=كل من بغى ارضه سببوله قومه
ماخلو الواقف ولا المتساوي=غريزة ٍ مبطي بهم موسومه
الأمنيات احلام صحوة غاوي=في هالحياة الفانيه مختومه
ومقسومك بعمرك معك متخاوي=واقدار عيشك بالسبب محتومه
والحظ لوهو في حياتك ذاوي=أصبر . تزين وتنجلي بغيومه


::

:

[مطلق البخيتان]

صرخة مطفوق ! بعدما رأى صورة طفلتين يتيمتين في حالةٍ يرثالها بين أطفال الفسقة ألأثرياء وفي يوم العيد (حسبنا الله ونعم الوكيل)..قال على عجل:

صرخة مطفوق.. لكن !!!

أعوذ بالله كيف اللــــــي جرالـــــي جرى =باسبـــــاب صورة كرهت النوم والمائدة
وهلت دموعي همــــــــــــاليله وكلٍ درى= العرب والعـــــــــــــاربة والعالم البائدة
جتني تزاحم تسائل والخصـــــوم خشرى = مـاذا جرى؟!.. قلت مدري.. مابها فائدة
دنيا الفناء للفناء وآخر مصيـــــــر الثرى= مـــــــــــامن سعادة وفيه أيتام له جاحدة
من بيننا دمعة اليتمـــــــــــان ليله سرى= كيف اليتيمــــــــات نستانس وهي هامده
يا دمعتي سامحيني والجروح قصرى = على شعـــــــــــــورٍ جبرن أعلنه للذائدة
عن كل عـاجز ذكر وأنثى كبار صغرى= الخيـــــــر وأهله كثر..لأثبت من يـكابدة
ياليــــــل((ودي بعيدية)) .. ترج ومراء = من نسل حـــــــكامنا اللي للصخى رائدة
بس أثبتوا صدق دعـواكم وروموا كرا = ياللي تعيشــــــــــون سفح الفقر بمجاهدة
تنـاصفوا في حمـــــــانا عيشـنا وأكثرى = حتى يصل علمكم لشيــــــــوخنا السائدة
ومن بعـدها فأبشروا عقب الفقــر بالثرى= في ذمتي حسب علمي حـــــالكم صاعدة

[مطلق البخيتان]

هبوط إضطراري...نومك على أرض الكنكري..!

نومك على أرض الكنكري = والشوك وأرض المقبرة
وتعمل صبيّ لبنشري= هيسٍ كبيرٍ مبعرة
روحتك للماء تنثري=لازم توقّع محضره
ينبح عليك ويهذري=والى دعاك بخنصره
أخير وأشرف وأطهري=من فضل خطوات المرة
قصة خجولٍ مدهري= قصّه وهو رهن قهره
غرّته بنت السرسري=حتى تولّت مكسره
يومه تورّط وأعسري= شاشت تطالب بمهره
تبي عليه تسيطري=يبي الحياء ماقاشره
قال احكميني واستري=وقامت تدوج وفوهرت
تصيح فقرٍ عرعري= وين الرجال أهل الشره؟!

[مطلق البخيتان]

غابت ضي !

يوم غابت ضي مابه ضي ثاني = سامحوني لوبكيت العمر كله
أشهد اني بعدها فاقد حناني = صار عقلي عقل طفلٍ فيه خله
أحسب اني من تجاريب الزماني = صرت رجالٍ حكيم ينفطله.
بس موت أمي جعلني شخص ثاني = كني أبراج التجارة في محله
يوم فجرها اليساري واليماني = في نهار رج كل القاع كله
حنّ عدواني عليّ مما دهاني = ليتني يأهل المبرّة فدوةٍ له
راحت اللي تملك أفذاذ المعاني = عزتي بوجودها.. ماله مذلة.
قالوا ادفنها معانا قلت ماني = ناسفٍ فوقه تراب القاع لله
حت لو موته على صدري شواني = عندي إحساس تجي يمي وأحنه.
أيّسوا منها البعايد والدواني = بس أنا برجوعها الكذب أستدله.
لأنها ماتت كذا فجأة وماني= قادر أستوعب عسى ربي يحله.
ومن يلومن تحت رجلي له مكاني= من شيوخ الناس وألا من هطلّه.
جتك يارحمن من تسكن محاني=كل شاكر للعواطف والجبلة.
وكل من حوله يعاني مايعاني=للضعيف تعين والمخطي تحله
الصبور اللي على روس المجاني=من بيوت شيوخ خلق الله تدله
اللغيصم يالدقايق والثواني=والا الاعوام تعرف دقه وجله
ولو تبعت الشعرماقصر عطاني=بس أنا جيت أختصرعن حي.فلة.

[مطلق البخيتان]

السلام عليكم جميعاً...صباحكم/مسائكم مطروسعادة .حمانا الله واياكم من الهمايللللللللللللللللللللللللللللللللللللللللللل
لللللللللل
للل
ل

الهمــــــــــــــــــــــــــــــــــــايل !!

الهمايل كثير ولاعليهم بيارق = الظروف خدمتهم في زمان السوا
يقدرينافس السباح لوكان غارق= برقبته إعوجاجٍ مايشوفه.عمى
الليالي تفتّح له جميع المفارق = لونزل حاجتين يطلعنه سما
ماله.وثلة ألأذناب روس الموارق= هم سنونه ولو ماللهميلة جما
لاحكوا حكيهم يرهب ويحرق محارق=وهم طراطيع طفل قيمته درهما
بس من خلف شاشات أجهزهتم طوارق=يالله اني دخيلك عن خشاش الكما

[مطلق البخيتان]

عفت المكاااااااااااااااان !!

عفت المكان اللي لي سنين رابيه = حتى الخسيس أليا لفاه انضباطي .
الا خسيسٍ وارثٍ خسة أبيه = لاشٍ ولد لاشٍ لقاله هياطي
تحيزمت معه العدا والمسافيه = توافق الأهداف .. لم الشطاطي
ومن يوم فيه اللاش عرضت علابيه = وقامت صراصيره تخرق ألبلاطي.
فارق زمان المرجلة والمشاريه = وكثر النفاق وسيطر الإنحطاطي.
وقتٍ تنفخبه شدوق المتاييه = وتشيخ به حتى شطوب المواطي..
الهيس ولد الهيس له من يتوليه = ولد الحموله صار بأمر السقاطي..
وقتٍ يشيّب رأس من يفتكر فيه = شعر اللحى يحكمه شعر الأباطي
ويمكن يحكمه شعر ماني بحاكيه = الحر يفهم والقواطي قواطي.
ياصاحبي بيض النوايا بلا ليه = الفوز له مهما تأخر يناطي
والناقص بن النقص نقصٍ مغانيه = رسٍ قصيٍ واطيٍ وابن واطي

[مطلق البخيتان]

لوفيه خيييييييييير !!

لو فيه خيرٍ قموه.أقرابه أدرابه = اللي يربي....... الهند ويعينه
اللي جزأء طيب ربعه خبث وحرابه = بالسر والأ العلن ماهم مخلينه
حتى زحازيح ربعه عافت ترابه = ومن يقطع الوصل جعل الخالق يهينه
حيث استغل شيب شيخٍ وأحرق أعصابه=وقام يتفاخر بضعف اللي معزينه
كرمت عنه البهام ومعه سبابه = والخنصر وبنصره وأعطيته الشينه
بالعافية وإن تقاسمها مع أصحابه= مأقول غير انه أنصفهم على دينه
وأخص لوقيّه اللي لاتعزوابه = شرهوا على شون عجزٍ من مزكينه
وحطوا تهمهم على عودٍ فخرنابه = دسايس الشر والخونات ضارينه
صبر الحمايل بفكر الهيس وأذنابه= انه غبى.. لأنهم ماهم بقاوينه
يأهل العقول( المسافر)ملّت ركابه=المعذرة لاجهلنا والسنة شينة
لولا الغلاء والله إن العذر مأبدابه=طالت وعرضت وماها زاد عن طينه
والله يحفظ البلاد اللي ولدنابه = والزود ملفاه نقصه ياخرافينه.

[مطلق البخيتان]

ياااااااااااااا... نهيّر نمش !!

قصيدةٍ عنك تقصر يانهير نمش=عزالله انه عن سلوم العرب قاصرة
عقلك وصبرك وفوقه يالسنافي بشش=وطيبك وفزعتك وحمياك متناصرة
كنّك بطبعك تنفذ قول رب العرش=(ولو كنت فظاّ غليظ القلب) حتى آخرة
حبيت أسلم على شرواك لين انتعش=من كثر عشقي لراع الطيب ومجاوره
دقن زماني وصابن من ظروفي طفش=وأقرب قريبٍ وطاني وطي في حافره
أول شبابي غرابيل وخداع وغشش=واليوم والحمد لله حالتي خاثرة
يعني عرفت ان من يضعف يشوف الدفش= ويشوف من له قوى عدوانه تناصره
ماللضمير بغياب أهل الضماير نعش=يجيلهم مايجي يتيمةٍ ساهرة
جواهر الحقد.. تخفيها مظاهر دبش=مبدأ [تمسكن تمكن] توخذ بظاهره
ياصاحبي من عرف شرواك مايبتلش=منّك تعلمت أفوّت ضحكةٍ ساخرة!


العذر من القصور يابو سالم والله يبيض وجهك ياكحيلان
حقيقه ماهي قد المقام لكن انت من يجملها طال عمرك
حقيقه في وقتها حصل بعض الظروف واعذرني من القصور



حي الله الشاعر اللي غيم شعره يرش=بجزل المعاني علينا ضافيٍ ماطره
يفداك ياطير شلوى كل خبلٍ يحش=ويفداك من يجحد المعروف مع ناكره
انت الذي يالفاك الضيف وجه يبش=لانه لقاله بشاشة عز ومفاخره
الضيف ياجاك قلت اقلط تفضل تعش=يطيب فاله ويبدا ينسمح خاطره
واللي على من لفاء يمه حجاجه يكش=كل العرب تنكره بالبر والحاضره
والناس ياصاحبي اظن فيها وقش=اشوف بعض السحر يرجع على ساحره
خلك صميدع وخل اللي كمش ينكمش=حلق على الطايره وابحر على الباخره
واللي بسوق البشر ماغير ينهش نهش=يرجع على صاحبه وتشوفه يناقره
وسلمت ياصاحبي من سو سم الحنش=وعساك ياصاحبي ماتفقد الذاكره
وبمعرفة حضرتك بالحيل انا مندهش=ونلت الفخر والشرف بالصحبه العامره

نهير النمش

[مطلق البخيتان]

الى القدير مطلق البخيتان .. من قمرا سماه !!

اوآآآه يامطلق على شوف عينه=وياويل حالي لاغشى عيني النوم
كني مجلى من ضواحي مدينه=لاغابت عيونه تحداني اللوم
ولاّ سجينآ فاقدن عزوتينه=لاقبل عليه الليل هاضتبه هموم
اوآآآه جوفي بالغلا سامرينه=وقلبي على طاريه شارد على الدوم
يابن الحرار اللي تصيد السمينه=يابن الرجال اللي تهقوابه القوم
يامطلق جروحي لروحي مهينه=وبلاي صدري بالغلا حيل مكتوم
مثل النفس للقلب , طالت سنينه=من شوف زوله صرت يالقرم محروم
كله سبب راع العلوم المشينه=اللي جلس في مجلسه واصدر علوم
يحرمه ربي من رضى والدينه=وبالاخرة جعله من النار موسوم
حرمني احلام وآمان وسكينه=وطيرّ من اسراب الهنا طيرن يحوم
ظلمني وذقت القهر والغبينه=وانا ورب البيت وافي ومظلوم
اوآآه يامطلق جروحي دفينه=والقلب في سجن المتاهات محكوم
اتخيله واسهى , واصحصح بوينه؟=اثري مشيت بهاجسن فيه معدوم
شيءٍ بصدري يجرحن في حنينه=مثل السهم بالقلب لاجاك مسموم
عيني من الهمال تسقي رزينه=تمطر على خدآ من الملح محموم
اوآآآه يامطلق على شوف عينه=ابفطر بليله وللموت بصــــــوم


عيناك ياقمرا.. رد على الشاعره قمرا سماه !!


(قمرا سماه) أهل الوطى مزعجينة=حتى الكواكب طاله النم واللوم!
كم فرقوا بين الحنون وجنينه؟= وكم فرقوا عشاق؟ كم طيروا نوم؟
ماهو مواجه بالرماح السنينة= لكن بتلفيق اتهامات وعلوم
لاغرد النمام يلقى خدينه=شلة خفافيشٍ له الليل محموم
يعجبك بالمنطق وينفض يدينه= ويطيّر عيونه من النصب مكلوم
يظهر نزاهاته ويخفي شنينه=يجيد بالتمثيل دور أشرف القوم
ذولا الذي كم خيرٍ ظالمينه = وكم ترفةٍ عقب الغلاء مالها سوم
وكم كم من أسرار الخلايق دفينة؟= وبالمقبرة كم ماتت أسرارلليوم؟
وكم عالمٍ عنده شهادات..وينه؟= صدوا وهم يدرون في حق مظلوم
انا اعتبرهم مثل راع الضغينة= آمنت بالله ..منهم الروس والروم؟
عيناك يابنت القصيد الحزينة= طبع الوفاء دينٍ وعادات وسلوم
عيناك ياقمرا تبيّح كنينه = نرم العقال ونعلن الحرب ونزوم
بس أشري وين اتجاه السفينة=وتجيك لو موج البحر ضلع وغيوم
في شاية اللي كلنا عابدينة = يابنت ماخلابي(أوااااهك) حلوم.

[مطلق البخيتان]

تعاااااااااااااااااااااااااااال !!

ودي أموت بحضن عيناك وأحياك= ياهيه ياللي بين سلمى واجاها!
اباكلك وأبرقدك وأتقهواك = واحرج ملوك الجن بك .. واتباها
وحتى ملوك الإنس من شان عيناك=تنكر كراسيها وتقرف بهاها
حياك ربي لاعدمنا محياك=ياجنةٍ قبل القيامة عطاها!!
صديت يائس.قلت أنا وين وإياك=وحولك هوامير الدراهم نراها؟!
انا بدوي أجهل مجرات الأفلاك=أقصد مجالات العقار وبناها.
والبورصة مع سوق الأسهم وألأملاك=من باعها من يملكه من شراها؟!
ومع كل هذا قمت تشّر بيمناك=صوبي وكل الغير عنهم تلاها.
دوختني وأحرقتهم في سواياك=وكبلتني وأعطيت روحي دواها.
وعدتني بعد المغادر بلقياك = وهذي سنة مرت..مريرٍ غذاها
تعال..مابي حيل من عقب فرقاك= أعمارنا نشبع جهل منتهاها !!

[مطلق البخيتان]

ردي المتواضع والعاجل على قصيدة شاعرنا المبدع/ عبدالعزيز الحشيان..في الرابط التالي:
http://www.nshama-shmr.net/vb/showthread.php?t=28801

ردي المتواضع على قصيدة شاعرنا المبدع/عبدالعزيز الحشيان!!

يابن حشيان وش سويت برقادي؟=طيّرت نومي وقبل..النوم به منه
قلّبت دفتر جروحي والهوى هادي=وهبت عليه الرياح اللي تولنه
ومع كل ذلك سلم شرواك ياستادي=وصح الله لسانكم بالشرع والسنة
وعلى توالي بيوتك يابن ألأجوادي= الله يرفع مقام اللي كتبهنه
العُود لو يحترق..عطره هو البادي=والهيل..تنتج شجرته هيل له بنه
الشك مايلحقك ياقرم ألأولادي=والنعم يغشاك والجزلات يتلنه
عز الله انك عزيز وحر وقيادي=وملهم وشايف من ألأيام ترفنه
نقلتنا من قصيد الروتن العادي= لأشعارحتى موات القلب يحييّنه
أشعارفيها خطاب الروح وقادي= من قلب للقلب كاشه رنته رنة
مني لك أعطر تحياتي بلاعدادي= ياكوكبٍ للقوافي لاعسفهنه
ومن صاحب المنتدى لك كل الاسعادي=شرواك رجل يحب الطيب ويحنه
الشيخ ابو غازي أقلقني من رقادي= يقول وشفيك مارديت؟!..شفهنه
(أبيات عبد العزيز الشاعر البادي= يمدح بنا.. وهو راع المدح لامنه
جاك صمليها..ورد جموع وأفرادي= الضيف لاينقصه واجبه بالعنة)
قلت الله أقوى وأنا يا صالح مرادي=أوفيه حقه..وأجيب الطار والشنه
لاشك بالشعر ماماده قدر مادي= شاعر يعوق القوافي مايعوقنه
خلاصة القول نعم ونعم يزدادي=يابن حشيان لك بالنار والجنة

[مطلق البخيتان]

ارجع كما كنت!!

يامل عينٍ ثمان سنين مظنونه= بالصد والهجر واللوعات شاطنها
لاقلت ياعين هيدي حمّرت نونه = قبل أتكلم لمحت الدمع يحضنها
كنه تنشد تقول:الترف وشلونه؟= وبلشت ياليتني ماجيت أفطنها
ياناعس الطرف نوب الموت ياهونه= سبع العجايب وفي قسوتك ثامنها
يومٍ ربي علينا موّنك مونة=واستسلمتلك جميع أعضاي طمنها
للي بقلبي يلين طويق ومتونه=وأجا وسلمى ورمان الحمر منها
زلزال بركان رج الغرب وركونه = والروس كبدي تفجربه مخازنها
يازين لد النظر ماهي بمأمونة=دنياك هذي مئآمنها مكامنها
ارجع كما كنت قبل الصد وجنونه=لو بإلتفاته شريته وأنت ثمنها
ارجع على اللي تنام الناس وعيونه = تنخاك بدموعها ترجيك تمكنها

[مطلق البخيتان]

غدينا بالزمن..!

يلوعن مع نسيم الصبح لايع= ويشويني شفق وقت الغروبي
وليلي ليل معدوم الذرايع = سجين ..اعدامه الصبح..محسوبي
نهاري لوسبرت القاع ضايع=شمالك يالدليلة بالجنوبي
غدينا بالزمن مثل البضايع = يقول الصين ياليابان ذوبي
زمانٍ شيّب عيون الرضايع = زمان المال خلانا نهوبي
معاك أموال ؟ جاك الصيت شايع= لوأنك سقط وعيوبك عيوبي
تجهجل عندك أشناب وربايع=لو إنك جلف ماتعطي ذنوبي
وحولك كورس الإعلام رايع = بهندامات صلفين القلوبي
لك اختاروا عبارات النفايع = يدورون الرضا لك يامحبوبي
وبعضهم والدينه للصقايع= هنا برّ.. وبهم عقّ .. الكذوبي
زمانٍ فيه ماتحفظ ودايع = وفيه الصدق لو زل مغصوبي
شف الضلعان بالغبرة رتايع= دفنها العج والدخان نوبي
وهباط ألأرض بالخضرة روايع=غذاه الصرف!.من صوبك وصوبي
هنا لأدركت تحليل الوقايع= رفعت عن أقدمي فكري وثوبي

[مطلق البخيتان]

جرح الرووووووووووووح..!

أكبر ويكبر حبها كبر عذرا =يسرع نموّي لكن أسرع نموّه
وعدة سنينٍ في مواعيد غبرا =في كل عامٍ توّه البنت توّه
وأصبر وصبري يعلم الله جبرا =أجرع مراره في رجاوي حلوّه
حبه دمرني(كاليهودي بصبرا) =دم وقهر ضعفٍ تولاه قوّه
جرح الجسد لوهو بعد وقت يبرا =لاشك جرح الروح صعبٍ بروّه
يوم الخبر جاني دبورٍ ودبرا =قالوا تزوج وسط جوٍّ مشوّه
فجئه..خصوصي..عاجلٍ.(فيه نبرا) =أمرٍ قضى مافيه:ليته ولوّه
بعد الخبر كن الفضاء صار قبرا =والا كأن القاع حولي تطوّه
أخذت وقتٍ منثبر فيه ثبرا =ماطيق أشوف الزاد وآدم وحوّه
الضيم يبرا القلب بالجرح يبرا =بري الرحى للقمح يوم الرحوّه
هم برقعوا طيري يخطّون وأقرا =ومطمنينه بالدعاء والشلوّه
وجابوا بدل صقري من البحر صقرا =وانا على مفلاي حسب التفوّه
وحطوا حباراهم بلاريش عفرا =قدام راع الطير بارضه وجوّه
الشمس غابت والغرابيل تفرا =كبدي وقلبي.شمسناغاب ضوه
لحظات خلن لذة العيش كدرا =ويامالزمن قبلي بغيري تفوّه
يامن له اشكي وأكثر الناس يزرا =وين الخوي اللي يعز الاخوّه؟
وين الحكيم اللي للاحساس يدرا =اللي يضمد جرح قلبي مروّه
ماأقدر أعدد خايفٍ لاأتخطرا =ولاكل رجلٍ جيداتٍ عروّه
وحنا بوقتٍ زاد الانذال كثرا =حتى الحمايل حاش منها حشوّه
فيهم نفاقٍ يخلف الراس كبرا =جداً بسيطة يجعل الحر بوّه
يشيلهم من شال قيصر وكسرا =اخير لارض الله منهم خلوّه
يالله ياواعد مع العسر يسرا =تفرج لحالٍ فجرتها عبوّه
متى يجي بالنون والكاف بشرا =تبرض بهااشجارالحشاعقب سوّه

[مطلق البخيتان]

صرخة .. على الصامت:

تاهت البسمة..!

كل بيرٍ جيتها ماها يغور= والعطش..يشتد في صحراء قطاع
خطوتي قدام وقفها العبور = وقاربي بالموج فارقه الشراع
أنكفت كل الأماني للدبور = تاهت البسمة بغابات الضياع
آه لولا ياهلي بعض الأمور = دام حملي صار فوق المستطاع
لأعلن الرحلة لسكان القبور= وأرتحل مجبور يادنيا..وداع


متعة غرور / صدى تاهت البسمه!!


ياعسى حظك سعاده مع سرور=يالعزيز الفاضل القرم الشجاع
هذي الدنيا ترا متعة غرور=والبخيت اللي رقاء راس الرفاع
العمر محدود والدنيا تدور=والبشر ياصاحبي فيها جياع
كم عزيزٍ ذل في وقت الثبور=السباع اليوم ماعادة سباع
ولك تحية صاحبك باقة زهور=والله المعبود ماغيره مطاع

[مطلق البخيتان]

شطحة:

!!
!
.

الطاري الطايش !

حياتي أماني وأمنياتي تنافرني = على ماش عايش عيشةٍ ملحها مفقود
أخطط ..وأنفّذ.. لكن الحظ يعثرني = وأكرر وأنوّع منجزاتي وأنا مجحود
أقاسي لباسي من يباسي يعورني = تموت الحياة بنظرتي والرسوم شهود
أساهر ظلام الليل والويل يجبرني = أذوق الدموع المالحة واسمي المقرود
تنخابي السمعة..ودمعه يخدرني = عن الطاري الطايش ..كرهت الحياة وزود
بل الحاجز المخلص.. حنونٍ تساهرني = على جرح تافه.. كيف لامت ياملهود؟!
فأنا..طين بأمواجٍ تمدن وتجزرني =تذيباً بتعذيباً الى يومي الموعود.
::
:
.

[مطلق البخيتان]

::::::
::
:
.
!

ردي على.. عطر الحكي!

حكيك خطير.. ونيتك في جنابه = مخاطرٍ لامن نشرها حيامي
عواقبه حسب الهدف في ضبابه = ممكن وجع لاشك ممكن عدامي
مدري ولايدري سوا من درابه = اللي يعرف الرسم خلف اللثامي
ان كان لك حظٍ يجيبه وجابه = عز الله أنك فوق هام الغمامي
ترجيك ناسٍ ماترجى السحابة = وتخدمك ناسٍ ماتخدم الكرامي
وتشوف شيءٍ يصدمك بانقلابه = شواربٍ بعد انعكافه نوامي
ياعطر ياعطر الحكي واللبابه= الله يوفق خطوتك وأنت سامي
جازف اذا هو ضايقٍ بك رحابه = وعند الولي ياعطر حيٍ يحامي
النايفة يسعد بها من رقابه = والطامنة مابه ىلمثلك مقامي

::
:
.
!

[مطلق البخيتان]

() ()

()
:
!

ارحل !

ما أقدر على حبس النفس . ماني على العيلة صبور = لو كان صدري يتسع لطويق ماني شايلة
بالأرض لا..مافيه أبد..أوسع مجال من البحور= لاشك ماترضى الزيوت تخشها لو حايلت
خذ مابقالك عندنا..وارحل على زورق دبور = الي فعلته بالدجاء به علمتنا القايلة
وخذ غلطتك عبرة معك.. تكبح بها جور الغرور = يمكن تفيدك ذاك إذا حاولت عدل المايلة
لاتنبهر لقمة وفت..راح الظلام وحل نور =أحرق بقايا الذكريات وكل نفسٍ زايلة

"

:

.

[مطلق البخيتان]

عفواً أيها لسادة
::
:
.

أوساخ الأظافري .... !

لاتستفز الصدور ولاتبيّح خفاه = ياناشر العلم ذاك بصفحة الناشري
خل الجروح القديمة خامدة في حشاه=لا. لاتجدد جروحه تصبح الخاسري
الوضع همّش حرارٍمايقرّب حماه=حطّ الجفن تحت عين الهيس والداشري
ياناشر العلم عط ربعك على مستواه=ماجيت أراجيك ودموعي على صابري
جيت أنصحك نصح..والناصح بعيدٍ مداه=وألا أنت واللي معاك أوساخ ألأظافري
اما تعدلت جتك علومي المبهماه = يضيق به خاطرك.يسيح به خاطري
يامختفي خلف نكٍ للتبوع وسواه =حرمتك خيذة ضحى وألأ أنت مستأجري
وأنت أنت نذلٍ هدفه أن يحتفظ بالحياه=لاحصص الحق جاب أوله وألآخري
كونك تجي في مجالي غلطةٍ ماوراه = والأ أنتحار النمل لاطار.له طايري
تف على فكرك المتخلف ومن بغاه=وتفٍ على الجهل والجهال والناخري
ياسفلة الأرض لك آخر أمل بالنجاة=لاتشيلن عرضةٍ في عالم السامري
أنا مع أهل التقدم والعقول وفضاه = وأهل الكرم والشيم من أولي لآخري
أشره وأشرّه وأهين الهيس وألعن ثواه=وأمدح كريم السجايالوطلع كافري
ذيبٍ يخاوي..وذيبٍ بس حول الشياه = وشلون والحكي حول الثعلب الماكري؟
اللي عطاه الزمن فرصة وشحّم كلاه = بين الذيابه هو الناهي هو الآمري
مدري هو استذيب السفلة وحقق مناه = والا الذيابه تثعلب حسه الظاهري؟
يمكن حصل ذا وذا والمبتغى مبتغاه=بس الوكاد ان شفاط العرب شاخري
لاشك يابالحصين أهل الحمى في حماه = ياملفق الساس مالي عندكم صاخري
أموت حرٍ على رأس النبأ منتداه = وأوصي اللي بهم لي نظرة الناظري
في حيّنا العنكبوتة ماتشيد بناه = في دار الأحرار وأهل الدار والخاطري
وملفقين النسب مثل الأحيمص..بلاه= ثلاث ألأيام تكفي شرهة العابري
يكفيه عنّا مديره كم عطاه وعطاه=مايدري انه إلا نفذلها داخري !!
عرباننا نيته بيضاء ودسمٍ ثراه=والعرق دساس.خط الاستوى ماطري
وعندي علوم..وصور..ومساجلات.ومعاه=سنتين أتابع وأخسرأموال ياساهري
يافاطري نوّخيّبي في فلاة الرعاة = عابر سبيل ومعي بيتين يافاطري
مضمونها لاقنب تيسٍ تناسا ثغاه=في روضةذيبها مصقول بالحافري
تبقى على ماهي الروضة ويبقى بهاه=والا ربيع العرب تخطيط الأباطري؟!

[مطلق البخيتان]

الى من يهمها ألأمر..هاهو طلبك على مضض :
::
:
.



مدري كيف أصبر وأنساك ؟

قالوا يامطلق وينك؟=يابناخي روف بعينك
دمعك تزويد لبينك=علمنا ماذا يبكيك
علمنا وش بك علم=دايم حالك متألم
ماتحكي ماتتكلم=يامطلق بالله وش فيك؟
مهما تضحك وتجامل =حالك ماهو متكامل
كنك غريب العامل=هندي في سجن المكسيك
قلت الدنيا تأنبني=والحظ الأسود يبني
والبر الخالي زبني=ضاقت بي المساليك
حايل ياحايل حايل=ياعلك دايم سايل
جوّك ضد القوايل=وبأريافك طب محاكيك
بأطرافك طب المعتل= واللي سل أحشايا سل
عايش ياحايل في ذل=بعد اللي مسكانه فيك
ياللي تسأل عن حالي=عل فالك ماهو فالي
فرقى حبيبٍ غالي=دونه حالت بلاجيك
دونه حال أمر وتقدير=وبعده عزربي تعزير
وكسرت العبرة تكسير=ذابحني مابه تشكيك
حبيته من قلبي حب=لايوصف ولايكتب
لايجزم ولاينصب=هم وغم ودواكيك
أنسا روحي وأذكرها=أهدم حالي وأعمرها
اتعب نفسي وأشكرها=وأقول الدنيا تفديك
وأقول الدنيا تفداك= ياللي طبي في لاماك
مدري كيف أصبر وأنساك=وأدله قلبٍ يرجيك
حالي هم وغم وشر=بردي صيف ونار وحر
عيشي سامط حامض مر=ربي ياحظ يجازيك
من لامن في حبه عل=جنبه ياعالم تنشل
تعمى عينيه ويختل=وتصيبه حمى التشويك
ياربي ترفق بالحال=حبيته وأحنا جهال
حبيته حبٍ مازال=يكبر في قلبي ويبشيك
تحبينا واحنا وغدان=نلعب وندوّر طيطان
ونتسابق وسط الريضان=حتى الدنيا قالت هيك
كنا من أول مجتمعين=نلعب بالتربة والطين
ولأهلنا المغرب سارين= ونجهم مع تأذين الديك
حتى كبرت وتغشت = من ذاك الروح انحشت
واللعابيب إنقشت=قالوا ماتجيها ولاتجيك
رحت لملعبنا مهموم=أمشي وأقع به وأقوم
صغير وحالي مضيوم=ماطاها عيني يبكيك
ماطأ رجله حبيته=ولعابيبه ضميته
ودمع عيوني كبيته=ياروحي بعده مابيك
له خي صغير وحليل=يجيب أخباره لي ويشيل
ياعل عمره طويل= ياعمري يفدى بتاليك
ويومٍ وصلنا البلوغ = وين أهرب عنك وأروغ
حبك في قلبي له بوغ=وعيوني دايم تبكيك
ينثر دمعي بعز النوم=لاجابت ذكراهاحلوم
عايش بالدنيا محروم=صابر ياربي وأرجيك
طال الصبر وزاد الهم=حان الموت وشرب السم
ضاع الحال وجف الدم=ياقلبي شرك ماضيك
ياويلي ويلٍ في ويل=ضاعت حالي مابي حيل
هم الصبح وسهر الليل=ياقلبي ضاع مداويك
واختامه يارب الناس= تحرمني حبه من ساس
دامٍ دونه حال الياس=سلم أجداد وشرابيك

[مطلق البخيتان]

() ()
()
!
.

ديرة فســــــــــــــــــــاد..!

يلومني خبلٍ كبارٍ شدوقه = ما لوعنّه فاتنات المسنين
عشرين وجبه كل يومٍ يذوقه = شهر الصيام بعين شرواه تحزين
ماقال كيف النوم ياناس أذوقه= لاحط راسه قلت نيمٍ له سنين
ولاتل قلبه هاجسٍ من عروقه = ولاقط مرت صابره دمعة العين
ولاطلّ في سطحه يخايل بروقه = ولاذكّره برق الحيا بالمحبين
ماهو مثل مطلق دموعه غبوقه=كن الطواري وسط قلبي براكين
على الذي نفسي عليه محروقه= من دونها ساسه وناسه معيين
أحبها وأقسمت بالرب فوقه= وتحبني وتحلف دينٍ بثر دين
ياناس خلّو عاشٍ لمعشوقه=ديرة فساد ولاديار الحسودين
من لامني ماساق قلبي يسوقه= آمين يارب المخاليق وآمييييين

!
()
() ()

[مطلق البخيتان]

لعيونهاااااااااااااااااااااااااااااااااا

لعيونها نضحك بوجه البغيضين = ونصبر كما يصبر على الحبس محبوس
لو كان له ناسٍ عليّ متحدين = بمنعنع المعجون نمسح على السوس
مانبادره بالمبردة والسكاكين = نحشم هاكا ألأقدام من حشمة الروس
ومن حشمة اللي بالحشى له بساتين = حبٍ على وضح النقاء غرس مغروس
بنت الرجال اللي على الطيب شفقين = حبي لها غصب وقناعة وناموس
أوصافها على الخلايق سلاطين = ماذكر مثله لابخزرج ولا أوس
وجدي عليها وجد من ضامه البين = بالسجن الأظلم نومه إن نام..كابوس
قضيته تهمة على قتل شخصين = اخته وأخوه..وشاهد الزور مدسوس
وصدر بحقه لجل الأعدام صكين = واللي قتلهم كد شرا الشيخ بفلوس
والله يبدل ساعة العسر با أللين = ويلتم شملك يالربابة مع القوس

[مطلق البخيتان]

بعد الغياب قصيدة مبعثرة بلا ترتيب
السلام عليكم ورحمة الله وبركاته
تحياتي وتقديري لكم مقدماً
حنيني للغالين أكبر من أبجديات ابو ألأسود الدؤلي وسيبويه
القصيدة:

مبعثرة... الحاجة اللي عند الأنذال..!

الحاجة اللي عند الأنذال تنعاف = كرامتك حذرا يشوقه..وطنها
افطر شري وإشرب هماجٍ وبف باف= لوحدتك بقعاء بكثرة طعنها
وش جاب جاب لجاب يالروس الأشراف=يؤُمَر ويُنهى..مثل يَأمِر ويَنهى؟
مثل الغني اللي حمل تيسه اغداف = فزعة نسيبٍ نسبته ماحصنها
نذل وبخيل وشرهته فوق الأكتاف= لقطة غليس اللي يقولون عنها
مثل الفقير اللي على رأس مشراف=صوّت كريمٍ نسبته ماغبنها؟
وجته الفزوع إخلاص من كل ألأطراف= والوضح ميّة بضحوية ضمنها
وعادت تحمل ألآف وآلآف وآلآف=من أمنيات كنّها القدر كنها
سمعتها قصة حِكم ضمن ألأعراف = خذ عبرتك ياطيب الفال منها
والمال..لوهو هيس من يملكه ناف= درت له الخلفات وأثرت لبنها
تبي الصحيح ؟ .. أكثر هل المال جلّاف= ماله معرفة.. صن علاقتك صنها
أبعد عن التجار دسمين ألأحلاف =اللي الى جادلتها تستبنها
طارت نواظرها سماء هون وسفاف=كنها تراقب فوق راسك ضعنها
مابه حَول.. لو شفت بإ بصاره إخلاف = من جورها عيناه ماتتزنها
لوكان بأيام الرخى طيبها ضاف= بأقوالها..عوباً طليقٍ رسنها
للمعتصم بحضور فزعاتها إنكاف = تطق له صبعٍ قويٍ شحنها
نبت لها من مدح نسوانها أعراف = والا بيوت الطيب ماتحتضنها
همايلٍ ماتكرم الضيف لاضاف = لوهو من أقرب مالها .. من عفنها
راع الدجاج اللي لأبوه أشعل الطاف = بالحكي لكن بالفعايل كبنها
في مجلسه ترمس وفنجال( ينعاف=المال) من شأن العفون ووهنها
واللي نسيبه شاف منه الوزا شاف = يوم استجد وصار جد افتتنها
أنكر مصافيط لها فراش ولحاف = معه الخساسة والنذالة قرنها
والا الكذوب المسرد الناقص الهاف = أزراب سمره عيلته تقتطنها
اليوم أشوفه يحكي أمجاد ألأسلاف = وأبوه مثل الجيف قرفٍ وسنها
دلاّ يدير أطراف وأطراف وأطراف = كنّا نحسب العاجنة ماتعجنها
وأثر التبوع تبوع تنقاد وتخاف = لامن تهمزها الثعل نال منها
يلقى مداخيلٍ وسيعات وصخاف = اليوم له يضحك وبكرا كفنها
والشمت وأهل الشمت حقّاد وخفاف = به يختلط قوّ البيوت ولحنها
ناسٍ شماتاته حقد جور وأهداف = وناسٍ تبي ترقى وترقي وطنها
على بلاط أبعترف شرع وأعراف = هذا الزمان..أفكاري أربك سننها
الذيب خاف التيس في وقتنا خاف = والتيس في حقد..الذيابة لعنها
أكثر نفوذ الوقت للتيس ميلاف = في ديرة العربان واللي سكنها
ماهو تشاؤم..وأقعٍ شيف ويشاف = ماهو بحاجة فاطنن يفتطنها
فيالله بسترٍ عاجلٍ دايمٍ ضاف = عن فتنة المخلوق واللي فتنها