ديوان / الشاعر ممدوح بن زايد القدهي

[ممدوح بن زايد القدهي]

مصافحه أولى لكم منسوبي شبكة نشامى شمر
أتمنى أن ترتقي لذائقتكم

سفير العز !!!
إن صرت في دار ٍ مهي دار ربعك=تصير وجه الربع في دار الأجناب
إن طبت قالو طبت من طيب نبعك=وإن خبت حتى اللي هقابك ترى خاب
خلك سفير العز والخير طبعك=إجعل لخطواتك مقاضيب وحساب
لاتتبع اللي ضل ويصير وقعك=إتبع طريق اللي نجى خل الأنشاب
إجعل كتاب الله نورك وردعك=وسنة محمد خلّه لدربك حجاب
لاتترك النتاش يقرب لصبعك=لايستفزك ناقل القيل مغتاب
خل التكانه تردع سيوف فزعك=أركد وعالج ماورد خذ بالأسباب
وسر البشر لايصير ياشيخ سبعك=ضحيته من حطك إلسره كتاب
وعين العدو لاتنظر لسوء زرعك=ماتكسب ألا فرحته وإنت منصاب
وإحذر ردي النفس لا لا يخدعك=اللي إلمصلوحه يجي بيع الأصحاب

ممدوح بن زايد القدهي

[ممدوح بن زايد القدهي]

سوريا تنزف ياأمة الإسلام حصريآ !!!

دلال الفكر أركيتهن لين فاحن=من حر مابالقلب والصدر مشحون
هاضن قوافي خاطري مأستراحن=من بعد ماشافن هلا الشام يدعون
من يوم قوات النظام إستباحن=نساء والأعظم مغطى ومدفون
صاحن وصاحن ثم صاحن وصاحن=الكل منهن تنتخي تنتظر عون
وين الذي كالمعتصم يوم ناحن=يفكهن من شلتن شبه فرعون
ياأمة الإسلام زاد التشاحن=وحنا ورى اللي بالتفاريق يسعون
عدونا بإخواننا صار طاحن=نشوف شوف العين والناس يدرون
إلى متى والصمت بالصدر شاحن=وعيوننا تبصر بصر كل مغبون
وش ذنب أرواح البراءات راحن=حتى النساء وش ذنبهن ليه يطغون
لكن أملنا فيك ياالله راحن=يمك دعاوي خلقك اللي يعانون
ندعيك وآمال التباشير لاحن=بشرى النصر ياالله في كاف مع نون

[ممدوح بن زايد القدهي]

نايف بن عبدالعزيز ال سعود رحمه الله قصيده مرثيه !!!

حتى القوافي حزّنت في رحيله=الصارم اللي للصعيبات مدهال
كم صعبت ٍ صارت بعينه نثيله=بالعزم والحكمه وتقديم الأفعال
أربك جميع مخططات الفشيله=وأركى على منهو عن الدرب ميّال
يزمي ليامن العدو زاد سيله=ويصمد صمود العز في وجه من عال
وقفاته اللي في صفوف الفضيله=تبقى على مر الليالي والأحوال
تأييده ودعمه حصد به نفيله=وتوجيهه اللي يخرس أفواه الأنذال
اللي هدفهم كيف تفشى الرذيله=وكيف القيم تنحط والدين ينشال
هم حاولو لكن بليا حصيله=ماحصلو ألا التعب والتبهذال
الكل منهم راح ويجر ذيله=مادريو إن الدار بيدين عقــّال
يالله عسى اللي قدمه لك يجيله=ولاتحرمه من رحمتك يالله العال
وأجزه جنان ٍ يستظل بظليله=عبدك يبي في رحمتك خير منزال

[ممدوح بن زايد القدهي]

المصطفى محمد صلى الله عليه وسلم الصادق الأمين !!!

بديت بإسم الواحد الخالق العال=اللي وعد خلقه بنار ٍ وجنّه
من بعد ذكر الله بادي بالأمثال=لاصاح فكري بالقوافي عطنّه
قيفان له لب الجزيلات منهال=إليانتخى فكري شمام ٍ يجنّه
جبت القلم والحبر من مدمعه سال=من حر شي ٍ في ضميري يكنّه
يالله دخيلك عن رديات الأعمال=وقهر الرجال آعوذ بالله عنّه
شفنا تطاول شرذمه حثلة حثال=شفنا العدو للصفوه الحرب شنّه
تجمعو حقارة الغرب الأنذال=والكل أحقاده لرسمه سقنّه
سبّو رسول الله رذلين الأجيال=حشا وكلا ّ كلهم تحت منّه
والله فلا يسوون ذره بمثقال=والكل منهم وصف خنزير كنّه
هذي سياسة غرب وحنّا لها جبال=نصمد بوجه الغرب من أجل سنّه
من دون عرض المصطفى تنهض رجال=والروح ساحات المنايا شرنّه
نفديك بأرواح ٍ تحبك وتختال=وأرواحنا من زود حبّه تبعنّه
ياعزنا يوم القيامه والأهوال=يوم النساء ينسن به من أرضعنّه
تركت فينا محجتك تهدى الضال=من هو عمل فيها لنهجك هدنّه
قرآن مع سنّه من الخير نكتال=من فضل رب العرش لطفه ومنّه
ليله نهار ومن مشى فيه مامال=مامال غير اللي هلك خاب ظنّه
والحق شمس ولايغطى بغربال=حتى النفوس الهالكه ماغطنّه
وصلاة ربي عد ماهل همّال=على الشفيع بيوم وضع الأجنّه
ممدوح بن زايد القدهي


.

[ممدوح بن زايد القدهي]

بلاد الحرمين ومهبط الوحي وانطلاق الرساله ومهد الإسلام
شعارها لاإله إلا الله محمد رسول الله
ونهجها وحكمها كتاب الله وسنة نبيه صلى الله عليه وسلم
فهنيئآ لنا بهذه البلاد وحفظها الله من كيد الكائدين ورد كيدهم في نحورهم

أطهر بقاع الأرض !!!

يابلاد أطهر بقاع الأرض يامهبط وحِي=لايهمك من تنكر لك يحَسْب إنه صواب
نفتديك بروحنا لكن طلبناك إفرحِي=لا يكدر خاطرك من سمموه أهل الخراب
مانظر أيّت مسالم والمواقف تشرحِي=لكن إنا ماقبلنا للخيانه وإنقلاب
ديننا يامر بوقت القدره إنا نسمحِي=والتغاضي دام نقدر شي في وجه الحساب
من تأدب ماتعنى للمشاكل يمرحِي=يبشر بقدره وحتى يبشر بلين الجناب
ومن تعدى الحد والطرقه يبي يلقى محِي=يتعض به كل واحد شاف وشلون العقاب
ماتحسفنا على اللي للخيانه يسرحِي=كل هافي لاتعاوج عندنا كنّه سراب
يابلادي كل من حاول بعرضك يجرحِي=علّمي الجاهل بأن السيف باقي بالجراب
علّميهُم يابلادي علّميهُم صرحِي=إننا سلْم المسالم والصعايب مانهاب
وإن دعانا قايد الأمه ترى لانبرحِي=نطحن أعدائك وطنا مثلهم مثل التراب

ممدوح بن زايد القدهي

[ممدوح بن زايد القدهي]

حشمة الضيف !!!

للقاف مدهال ٍ بساس المواقيف=والشعر عندي صارم ٍ مايجاجي
وإن شفت ضول ٍ بالموارد مهاديف=أصد عن ضول ٍ بجوه عجاجي
وأنا قوافيي مثل حشمة الضيف=أحطها بأقصى الحشا لإحتياجي
أعوم به وسط البحر كالمجاديف=وأشرب قراح ٍ ماخـَـلـَـطـْـه الهماجي
بحر الشعر ماهو خيالات مع زيف=قاعه صعيبه للذي بإدْراجي
ماياصله من يملي الوقت بالحيف=يتيه ليله مايشوف إنبلاجي
يروح وقته ممتلي بالتحاسيف=لا واصل ٍ حروه ولامن ملاجي
وأنا قوافي خاطري عن هواء الصيف=ألقى بها طب ٍ يسمّى علاجي

[ممدوح بن زايد القدهي]

http://www.rofof.com/img2/6nzevc19.jpg

الحمد لله على سلامة خادم الحرمين الشريفين . طهور بإذن الله . !!!

طهور بـإذن الله وبإذنـه يشافيـك=وعسى الله بحفظه يحفظك ويحميك
ياخادم البيتيـن طلْـق الحجاجيـن=يامتعب ٍ غيرك لوصلـت حراويـك
خدمت بيوت الله بشتـى المجـالات=ياعلْهـا تثقـل مـوازن حسانيـك
حتـى الأجانـب ياملكنـا دعولـك=دعولـك أن الله بخيـره يجـازيـك
وإن العوافـي فالـكـم ياملكـنـا=وإن الله يوفـق بدربـك خطاويـك
وحنّا بعـد ياسيـدي لـك دعينـا=ندعيلك المولى عسـى الله يعافيـك
ياسيدي وإنت تعرف حـب شعبـك=يفز شعب المملكـه عنـد طاريـك
ياللي من أجل الشعب سهْرت عيونك=تسهر وشعبك محتضنهـم بأياديـك
ياللي هموم الشعـب كلّـه حملتـه=ولاجت على صعب المهمه مشاكيك
ياللي تحمّلت الثقيلـه علـى شـان=يرتاح شعبـك والثقيلـه تخاويـك
ياسيـدي والعلْـم يكفـي قليـلـه=عسى الولي يحفظ سموك ويشفيـك
وعسى صواديـف الزمـن ماتدلّـك=وإن كان جاتك بأمر ربي تعدّيـك

[ممدوح بن زايد القدهي]

قصيده بالشهم / جزاء حجاج ظاهر الأسلمي الشمري
منقذ الذين تاهو في نفود الدهناء بالقرب من سد الشحمه في تمير

الشهم جزاء حجاج الأسلمي !!!

تسان القوافي ماتشوش وتزومي=في موقف اللي ساق روحه فدايا
جزاء ولد حجاج نسل القرومي=مستارث ٍ طيبه ولاهي حذايا
من لابة ٍ علمه رقى للنجومي=أهل النخاوي والعزاوي طنايا
تحرك بجيبه بقو العزومي=من ديرته حايل وحث النوايا
حتى وصل حد الهدف بالرسومي=وأمرح يبي بكرى يحث المطايا
يوم أذن الفجر ونوى إنه يقومي=قام وتوضأ لأجل رب البرايا
وصلى الفجر على ضياح النجومي=ودعى الإله إنه يسوق الخطايا
ومشى على نيه به الخير كومي=ثم وفقه ربي بطيب النوايا
خلا تباشير السعاده تحومي=بين البشر ولا طلب له عطايا
يأهل الوطن جازو جزاء بالسلومي=وأعطوه يستاهل كثير الجزايا
الله يبيض وجه راع العلومي=اللي على طرياه نضرب تحايا
وكان القصايد ماوفت للقرومي=لاخير فيها كان مابه حمايا

.
ممدوح بن زايد القدهي الغريري..
.

[ممدوح بن زايد القدهي]

قصيدة العروس

سر يا قلم واوصيك جـزل القوافـي=للديرة اللـي طيبهـا مـن اهلهـا
هذيـك حايـل مابـه اي اختلافـي=هذيـك دار أمجادهـا مـن عملهـا
يسعد سما حايـل وذيـك الفيافـي=يسعد سهوله والذي هو سكنهـا
من بادي الوقت حبه داخلي خافـي=واليـوم بعلنهـا وأبعلـن غزلهـا
لاجيت أبوصـف حايـل يزين قافـي=عروس من مثلـه وربـي قبلهـا
فيها سكن حاتـم هـذاك السنافـي=غرسه كرم واليوم نجنـي ثمرهـا
فيها النفوداللي على القاع ضافـي=وجباله اللي يبتهج من نظرهـا
في جوها الشتوي ترى الجو دافـي=وفي صيفها محلا نسايـم سهلهـا
حتى هواء حايل يجي عذب صافـي=مامـر دخـان المصانـع شملهـا
وماها شخاليـل الجبـال النظافـي=أجا و سلمى منهـو اللـي جهلهـا
عسى السحاب اللي على النوف نافي=يمطـر علـى ريفانهـا مـع فللها
إليـن ماتـروى وتعيفـه عيافـي=ويصير نبته مختلط مع نفلهـا
واليوم ياحايل لـي أوفـي وابافـي=داري أنـا حايـل ولابـي بدلـهـا
انا غريري لابتي دوم تافـي=أخوة عدي كفو الصعايب جملهـا

ممدوح بن زايد القدهي

[ممدوح بن زايد القدهي]

شدن قصيد اللي رفيع ٍ محله * إبن نمش والقاف جاله صعديا


حبل المشاعر من ضميري يتله=صوت الذي لديار حايل ودديا
شدن قصيد اللي رفيع ٍ محله=إبن نمش والقاف جاله صعديا
أنشهد إن القاف كنك تسله=يومك دفعته يم حايل سنديا
الديره اللي مستحيل ٍ تمله=ديرة هلا الطولات وأهل السعديا
بأكناف ظلعانه إلى ساح ظله=ياماحلا الجلسه وظله مدديا
وتـزيـــّــن الفنجال ثم ٍ تزله=للي معك في مجلسك بالعدديا
أحد ٍ يجيب السالفه من سجله= وأحد ٍ من جزال المثايل نقديا
يطرب له اللي يسمعه مايمله=في جلسة ٍ منه الجميع إستفديا
وإليا نشت مزن ٍ تداحم وطله=ولمحت برقه والسعد بالرعديا
ثم إستوت فوق الجبل مستهله=وشلال ظلعانه سوات الهدديا
تزين فوق الزين في كل حله=وأنفاسها متشبعه بالشهديا
أنشهد إن الزين فيها جبلّه=والزين فيها كل يوم ٍ جدديا