ياحروفي والليالي بالندم

[طلال حمود الاسلمي]

يا حروفي والليالي بالندم = أضرب أخماسي ولا حولي مجيب
مركي ٍ كوعي على ضلع الحلم = ودمعتن طاحت تردّد بالنصيب
شاعر ٍ ما يمتلك فلس وخدم = يملك العزّه سواها ما يصيب
لو تجرّدنا وماضينا عدم = وش هو الحاضر وصاحيها عطيب
ما ملينا بالورق لحظة ألم = والألم وش لون للحرمه نسيب
لبّس الطّربوش بدماغ الجلم = وإستلم دفّة سفينه لصّحيب
خلّها قدّام سنّك تبتسم = وأقرع الكاسه على ضوّ الحبيب
النجوم اللي ضواها بالظلم = تشترق شمسن مواريها مغيب
يا ربيع الوقت والوقت انبلم = باخر الصفحات عزّن يستعيب
تبكي الصفحه مخاطيط القلم = تحت شمعه بالعزا ماله رقيب
وين راحت بالسيوف وبالقمم = مجدنا اللي بالمشارف والعريب
لا تجدّد بالورق منزوف دم = فتّق المجروح والجرح الطبيب
إسمع أنفاسي ولو مابه نسم = يارفيقن خانني وين القريب
وسط وقتن بالتشابه والكلم = كلن السانه كتم حين القنيب
وش يقولون اخويانا بل علم = رايكم معلوم ما عنه نخيب
كلنا وسط ابدماهم نستحم = والمضاحك بالنفل والريح طيب
سدّد اذنك وارتقص بين النغم = ما علينا دام للبترول بيب
وش تبينا للعشا نذبح غنم = ونختم الكبسه على طاسة حليب
السوالف ماهي ابقولت نعم = مذهبك ينجيك من سوط اللهيب
باكر اتدور الليالي والطعم = مرها حالي وحاليها مشيب


وسلامتكم أخوكم / طلال الشمري
تعليقاتكم ونقدكم شرف لي ..

[محمـد الشمري]

طلال الشمري صح لسانك يالنشمي

[أبو كادي]

طلال الشمري
صح لسانك وبيض الله وجهك يابعدي.
تقبل تحياتي،،،

[أتعبني غلاك]

صح لسانك وعلاشانك راقت لي اخوي الله يحفظك ننتظرجديدك لاهنت

[المشرف العام]

الشاعر القدير طلال الشمري
عوداً حميد فاضلي والحمد لله على السلامة نورت منتداك يالنشمي
صح السانك يالعزوة
خالص التحايا لسمو شخصك النبيل

[مطلق البخيتان]

طلال

ومشاعر التحسر على المجد التليد ومقارنته بالوضع السيء الحاضر للأسف

هاهي الدنيا غالينا نزولاً وارتحال

وأصحاب العقول في ذهول

تحياتي لك

[عويد المغيليث]

صح لسانك اخي طلال
وسلم بنانك
وكل عام وانت بخير

[طلال حمود الاسلمي]

عسى الله لا يهينكم وتسلمون على المرور الراقي
واعذرونا يا بعدي على تقصيرنا معكم


لآ هنتوا