ديوان الشاعر / غالب الشلاقي

[غالب الشلاقي]

سألني عسكري بأحد النقاط اثناء عودتي من احدى المناطق لحفرالباطن
وقد فاجأني بالسؤال الغريب حيث قال من اين فين؟ قلت ياليتني فهمت ماتريد حتى اجيبك.
واراد تفتيش السيارة وعندما فتح الباب شاهد بدلة الجيش معلقة وغير رايه واعطاني الاثبات
وبعد مامشيت من عنده طرأعلى بالي اجابة السؤال حيث كان يسأل من انا ومن اي منطقة
فأجبته بالابيات التاليه
ولانستغني عن توجيهاتكم ونقدكم

لابتي شمر!!!

لابتي شمر ولايهون كل السامعين=باللقاء لـلـدم الاحمر ياجاهل نشربي
لابتي شمر كعام الرجال المعتدين=علمهم عدا وتعدي لـــدار الاجنبي
لابتي شمر ياقايل على من وين فين=من جبل شمر هل الجود ريف اليعربي
أهل الطولات والجود ذربين اليمين=والصدور اوساع وديارهم هي مطلبي
أهل الخوة نعين الفقير المستعين=وبالشدايد كــم ورانا جموعاً تختبي
لابتي شمر عن الكرب لي درعٍ حصين=ويل ويل اللي لــدار الطنايا يقربي
غالباً والله ياهيه فوق الظالمين=الشلاقي ياهيه سليم المذهبي
ربع قرن قد قضيته من اعجاف السنين=خادمٍ لـلـدين والدار والشعب الأبي
افتخر في لابتي صدق وحماة العرين=شف شعار الجيش حاضر وشاله منكبي
بان لك واظن قــد لك عرفته يافطين=الرداء ماهو بطبعي ولاهو مطلبي

[غالب الشلاقي]

http://www.youtube.com/watch?v=rY0mvVZsmFQ&feature=player_embedded

[غالب الشلاقي]

رأس (ماهر) و(بشار)
مجرد تسجيل حضور بهذا القسم بهذه الابيات المتواضعه
لانستغني عن توجيهاتكم للأستمرار في الاتجاه الصحيح والوصول للهدف المطلوب

رأس (ماهر) و(بشار)!!!

بشار كانه صادقٍ في تحديه=حنا هدفنا رأس ماهر وبشار
ننصر عرين الدين غيره نوطيه=يشهـــد لنا التاريــــخ ياصـار ماصـار
حماة الوطن حنا وبالأرواح نفديه=لأجل الوطن نرخص زكيات الأعمار
طـــابـورنــا يامــــر وكـلن يحـيـــيـــه=للـــدار عــــز وذل من يقــــرب الدار
والــراجمـة تسعين كيلو تغطيه=صــــاروخــها ياثــار شبة به الـنـار
كم حاكمٍ من عز نومه نسريه=شرس الاسود قبالنا صاركالفأر
حـنـا لها واللي دعانا نلبيه=حـنـا لها مليون مليون تكرار

[غالب الشلاقي]

حلوم الليل/ارشيفية
حلوم ليل!!!

في لذة المرقاد جتني طيوفكـ=تشكي لي الغربال واقدار دنياك
تشكي من اللوعات وهمٍ يلوفكـ=مايرحمك ياشوق وبالليل بلواك
تشكي زمانك مايقدّر ظروفكـ=وبدموع عينك دايم الدوم شكواك
افزعتني باللي تقوله حروفكـ=بالدمع والحرمان همّك وسلواك
فزّيت من نومي بطعنة سيوفكـ=ترسية بالجوف من كف يمناك
كنت افتكر اني حقيقي اشوفكـ=مادريت اني بطيفك وذكراك
يارسول الشوق وش به هنوفكـ=وش جرى للزين ياطيف رجواك
هو صحيحٍ ماطوتبه كشوفكـ=وإلا حلوم الليل بخانات الارباك

[غالب الشلاقي]

حاله تعيسه والجسم جلد وعظام!!!

يالله يامــنزل تبــارك والانعــام=يالوالي العـالي رفيع المـقامــي

تفرج لمن مثلي سهير(ن)ولانام=بارض الحفرماذاق لذ المـنامي

بارض الحفر يقضي لياليه باحلام=تمـضي الـساعـات كـنه عوامي

حاله تعيسه والجسم جلد وعظام=حاله كما المسجون بارض الظلامي

في كاتمات الصوت له عدة اعوام=واليوم يصدر فيه حكم العدامي

يــالله يامرســل نبيك بالأســلام=يامتمم اركانه بشهر الصيامي

انك تعين اللي شكى جور الايام=من جـور وقته صاب حاله هيامــي

وتشفي غليله من حواسد ولوام=اهل الحسد ومسممين السهامي

وتعـزيالله كل خيّر وضــرغام=شبيه حر(ن) ياشلــع ثم حامــي


وسلامتكم

[غالب الشلاقي]

وده لخو عليا رفيع المقامي

ابيات متواضعه موجهه لشاعر العاصي (مرزوق الشلاقي)

اخو عليا رفيع المقامي !!!

يارعي الالمان وصل سلامي=وصل سلامي والتحية لمرزوق
وده لخو عليارفيع المقامي=من لابةيافوا الطاق مطبوق
شلقان من شلقان والعز قامي=في صفحة التاريخ راياتهم فوق
وقله ترى غالب كواه الهيامي=قلب العناء ياخوك ولّع به الشوق
سهران يالعاصي جفيت المنامي=متساوي عندي غيابه مع شروق
تلعب بي الافكار والقلب ضامي=والنفس تسلى شوي بمشاهد النوق
الله على من صابني بالغرامي=اللي مزع وسط المعليق معلوق


رد الشاعر العاصي (مرزوق الشلاقي)




حي السلام وحي راع السلامي=حي الجواب اللي به العطر مرفوق
فزيت له من وافر الاحترامي=واخترت له من عذب الفريدات والذوق
اخو عزيز ونادرن بالمقامي=حشيم قدره اسهمه بالسماء فوق
ياغالب امواج الهوى ماه طامي=تغرق سديد الرأي ماينفع الطوق
مابه ملام ولايفيد الملامي=الله يلوم اللي يلومك ولك عوق
تشكي هوى اللي حاربك بالسهامي=ارث غلاه ويندبه لاأبعد الشوق
اصبر لوان الصبرمثل الحرامي=يسرق مسرة نيم من قبل مايفوق
والثانية وان كان لي به كلامي=ماحللك وانا باخص السوق
أشّر وتلقى بالمهمة عصامي=عده سلاحن لك بيمناك موثوق

[غالب الشلاقي]

ارسل لي احد الاخوان رسالة يستشيرني في امراً ما وارسلت له رايي ولكن عاد وارسل لي مرة اخرى وقال انه استشار زيداً وكان راية مخالف لرأيي

وارسل لي مرة ثالثة وقال لي انه استشار عبيد وكان رأيه مخالفاً لرأيي.

قمت بدرس رأي زيد وعبيد فوجدت انهم غير جادين في ردهم وانهم يدسون السم في العسل

ويضحكون على بعض.حبيت ان يكون ردي له في هذه الابيات المتواضعه.لعلها تأصل الى زيد وعبيد ومنهم على شاكلتهم

البوم ماينفعك لو قيل له طير


شئ(ن) كتبه الرب لابد مايصير=اللي كتب رب المخاليق صــاير


ماينفعك بالهرج شايرولامشير=ياصارمايصدق مشيرن وشاير


لو كثروا بالهرج تر مابها خير=ليااختلف عن ماتكن الضماير


لياهرج هرجه كما البنج تخدير=وليا نصيته بارد الوجه باااااااير


الـبـوم ما ينفعك لو قيل له طـير=مابه شبه للحر لـو شيف طـايـر



وسلامتكم



زيد وعبيد:اسماء غير حقيقية كنية فقط

[غالب الشلاقي]

بعض المقصرين اشغلهم التسويف كل سنة يقول هالسنة الجاية ابي اتوب وابي اتسنع وابي
استقيم لكن الحاصل العكس كل سنة اردى من اللي قبلة. كتبت هذه المشاركة المتواضعة
عسى ان تصل الى من يهمه الامر نسأل الله ان يتجوز عن تقصيرنا


العام يقضي واكثر الخلق غافين

العام يقضي واكثر الخلق غافين=ساهيٍ ولاهيٍ غاط في غفوةٍ له

مقصر بنفسه وحق القريبين=وامور دينه ماهو بحاسبن له

الله يعفو عن جميع المسيئين=وكل عبدٍ يرفي ويغفر زلتن له

ويالله تنصر جندنا بالميادين=وتكفي وطنا من غدر كل شله

ونحفظ ملكنا هو زعيم السلاطين=عبدالله اللي حايز المجد كله

[غالب الشلاقي]

ارشيفيه متواضعة.

يوم عيد الاضحى طلعت رايح لدوام وشفت اهل الحي يذبحون اضاحيهم ويتعايدون فقمت اندب الحظ الأقشر بهذه الابيات المتواضعة.




ضاع الأمل وآمال غالب به الياس

يالله يارازق رقيقات الأنفاس=يامرسيٍ بالقاع سود الرواسي

رجواك في دنياي ماشفت الأوناس=حتى بنهار العيد مالي وناسي

عيّدت بالبدلة حزينٍ ومنحاس=تحضير يومي ولايحصل به تناسي

حظي شقي وحط بالقلب هوجاس= حظي عنيد وقام يجذب حماسي

يلعنك ياحظٍ ملأ القلب وسواس=حشاي نار. وفي عيوني عماسي

لامال بالمخباء يبي يرفع الرأس=ولادبرتن تنجي بحر الشماسي

ضاع الأمل وآمال غالب به الياس=راحة حياتي بين سجة وداسي

ضاع الأمل وآمال حظي بلولاس=مار الأمل بالله يجلى دماسي

[غالب الشلاقي]

ارشيفية متواضعة

ابو وجهين

هنيت من هو مــيت (ن) باربعينه=يــوم اربعينه حط بين النصايـــب

مــيـت فــرط يشفع على والديــنه=ماعــاش بالدنيا وشاف العجايــب

ولاشاف ابــو وجهين ومجامليــنه=ولاقيل جاء(غالب)ولا قيل غايب

لــيه الــردي مابيننا تــاركيــنه !!!=يقفي ويقــبل مثل صلــف الهبايـب

دااااارن وطــابـه يـنـدمـر ساكنينـه=يـقـرب العـدوان ويـبعـد قـــرايــب

بـيـن البـدو واهـل القـرى والمـديـنه=هرجه صحيح وهرج غيره كذايــب

الـى متى هـالحـال يـامـشـاهديـنـه!!=مافـيكم اللي قـال عيـب(ن)وعايـب

آن الأوآن اقـف بـوجـهـه وأهيـنـه=آن الأوآن اشعل فتـيـل الحـرايــب

آن الأوآن أحــــط عـيـنـي بعـيـنـه=واقــراء عليـه مـذلـلات الصعايـب