ديوان الشاعر / محمد العواد ابن رخيص

[محمد العواد ابن رخيص]

بسم الله الرحمن الرحيم

السلام عليكم ورحمة الله وبركاته

تشرّفت وسعدت بالانضمام والتواجد مع أبناء العمومة نشامى شمّر

وكل من هو عزيز على شمّر

وأضع بين أيديكم هذه المتواضعة كمصافحة أولى لهذا الصرح الكريم
مصافحة أولى
يا ماجد اقدار الاوادم يديره = الخالق الرازق وليّ المقادير

مافات مات وكل ماصار خيره = الحمدلله يوم عدّت على خير

الادمي لازم يواجه مصيره = وربك يبدّل عسر الاحوال تيسير

لولا الخطا مافيه نفسٍ خبيره = خطاك درس وفي تجاربْك تبصير

وان صار لك عقب التجارب بصيره = ترا البلا تقصير من بعد تقصير

خطاك ما تعذَر اليا اخطيت غيره = مافيه طب ولايداويه تبرير

هذا ولك عندي مكانه كبيره = عندي وودّي عند غيري مع الغير

أوضاعنا ياطير شلوى خطيره = اخطر من المسرا بعجَ ومعاصير

لا تعاشر اللي فيه سوّ لعشيره = خلك عزيز عن الردى والمحاقير

وان كان لاصناف الدواجن حضيره = للحر ماكر فوق روس المواكير

اتعب على خوّة وجيهٍ سفيره = تر للخوي في مبدا الاخلاق تاثير

واصبر على مُرّ الصدوف المريره = دنياك هذي بين يسر ومعاسير

اعمارنا مهما حيينا قصيره = وعزّي لمن صفّت ذنوبه طوابير

في يوم ماهو يوم ربع وعشيره = يومٍ يجازى فيه بالشر والخير

محمد العواد

[محمد العواد ابن رخيص]

(( الـــشِـــعـــر ))

الشعر من غزل المشاعر يخيطه ... من كان في تفصيل الابيات خيّاط


الشعر من غــزْل الـمـشــاعـر يخـيـطــه = مـن كـان فـي تـفصـيـل الابـيـات خـيّــاط
مـا يـقـطـع بـحـور الـقـصـيـد و مـحـيطــه = كـــود الــذي فــي قــوّة بـيـوتـه افــراط
شــعـرٍ شــروكــه بـالـمـعـاني غــويـطـه = ما مات لو عصـره قـبـل عــصـــر الانـبـاط
مـن ضـاق و ضغـوط المـشاعر تحيــطـه = يـــرتـاح يـا عــدّا كـبـر طلعــة الـــــغــاط
في مرقــبٍ يـبـعـد شـقـاه و يـمـيـطـــه = يشتــاق لـه من شاف بـايـامـه احبــاط
سجتْك مــع جِـرد السـهــال البسيـطـه = اخير من جلستْــــك بـازعـاج و غــــلاط
نــزّه جنـابـك عــن جـنـاب السقــيـطــه = واتـعـب على اللـي بخوته دوم تحتـاط
يا احتجت يصـفـط لـك بـروحه صفـيطـه = مسطـــور طيب وبالمواجيب يشتـــاط
دنياك مــــع سمـح السـجايا عبـيـطــه = ما هاط شي من اخبث الناس يـنهـاط
بصدوفها يا عــــونــــة الله سلــيــطــه = توجع وهي ما تضرب الخلق باســواط
منها فطين القـلب يحـتــاط حــيـطـــه = مــــن يدرك ان ايـام دنـيـاه شـعـــواط
بين الشتاء و الصيف تطوي شـريـطـه = تفـرنـا و تـبــدّل اشــــواط بـــاشــواط
و الـيـوم مـا مـعــنـا نــفــوسٍ نشيطه = لا بـــدّ للــقرنــاس مـــن ربـط و ربـاط
مـا عـاد بـاقـي غـيـر طـيّ الـخـريـطـه = الــيــوم عـقب ايام نيسـان و شـبـاط
يـمـا طـلــوع سـهـيـل يـعـتـق ربـيطـه = ونصبح بعـد راحه مشافـيـق ونـشـاط


محمد العواد

[محمد العواد ابن رخيص]

(( يا غـايـبـه ))

يـــا غـــايــــبــه
يا غايبه لو غاب زولك عن الشوف = ما غاب طيفك عن خيالي دقيقه

كتبت لك من صادق احساسي حروف = وبخاطري من ضيقة الخِلْق ضيقه

الكل منا يالغلا مر بظروف = ذقنا من الصدمات مُرّ الحقيقه

وواقع مآسي غدر الايام معروف = ماللحزن غير التناسي طريقه

تعال انا وياك نروي ضما الجوف = ونزرع من الورد المعتّق حديقه

تعال انا لشوفك ولقياك ملهوف = تعال بُعدك ياحبيبي ما اطيقه

بين الامل والشوق والياس والخوف = النفس في بحر المشاعر غريقه

يا مرهفه نفسي ترا مالها شفوف = في غيرك وغيرك عساه بحريقه


محمد العواد

[محمد العواد ابن رخيص]

ودّك على فرقاه تذبح ذبيحه
لا تبخل بيمناك يا شفت محتاج=وانصح اليا شفته بحاجة نصيحه
والنصـح قـدام الاوادم بــه احـراج= اعلان مضمون النصيحه فضيحه
مـن غير رب الكـون لاترجي افـراج= واللي حَسَدْك اطلب من الله يبيحه
ثنتين ما ينفع بهن طـب وعــلاج=دبرة قليل العرف ويمنىً شحيحه
بعض البشر في جيتّه فلّة حجاج=وجـهٍ مثـل شروا الوجيـه الفليحه
وبعض البشر ياجاك سببّ لك ازعاج= ودّك على فرقاه تذبح ذبيحه
ماتلام لو بدّلت رفـحـا بالافـلاج=وغيرت عنوانك ورقم الشريحه


(محمد العواد)
"نديم القوافي"

[محمد العواد ابن رخيص]

(( طال المقيض ))

طال المقيض وضاق خلق الصقاقير (من الارشيف اهداء خاص للصقاقير)
الجيب عن قطع الخلا والمشاوير=ابطى يابو نوره بظل الكراجي

طال المقيض وضاق خلق الصقاقير=والجوّ بالديره يعكر مزاجي

كان الهوا يومي بروس النواوير=واليوم يا هبّت سموم و عجاجي

وامر الحكيم مدبّر الكون تدبير=استغفر الله ماعليه احتجاجي

متى يويق سهيل ويصفّي الطير=ويجي لنا عقب الرباط انفراجي

والبرق لاح وتٓبَّع الخير للخير=العشب من لوقه لعقرب دماجي

على الوعد ياهل الوجيه المسافير=نبي لنا جوله وفلّة حجاجي

ربعن لها من طيب مبداه تقدير=بالبرّ جمعتهم تزيد ابتهاجي

للصيد نجهم بالصحاري مداوير=الصبح يا جا للصباح انبلاجي

يا فِــرِّع الطلاع من بعد تدوير=وضاع القصص والكل بالطلع راجي

وقام يتطلّع يقلب الشوف ويدير=حاديه مع شفحة هداد احتياجي

على خطاة الخرب يا اعطيته السير=يسطي مثل سطوة عقاب العواجي

ياشافها بالروض ماعينت خير=فعله لمن يعشق هداده علاجي

ياقام يلقف له هبوب المعاصير=تعوج وهو ياخذ معاها انعواجي

صدّت وردّت لين حول به الطير=والاجهزه كنّك بوسط الحراجي

وجيته بالارض يمزّر الخرب تمزير=متوتّر ومفتن بحالة اهياجي

هذا غرام مقزّر القيض تقزير=تواكل بصدره فتيل السراجي

نديم القوافي
محمدالعواد

[محمد العواد ابن رخيص]

(( جور المودّه ))
(( جور المودّه ))
قدّمت باثبات وبراهين وشهود=معروض شكوى حال جور المودّه

من باب حفظ عهود وخيانة عهود=والوجد مع حرمان نوم المخدّه

اقيم دعوى إنكار للحب وجحود=ضدّ الذي في يوم ما صرت ضدّه

الصاحب اللي لشوفة عيونه السود=يجوض قلبٍ بيّح الشوق سدّه

شوفه مثل شوفة هل الذود للذود=يرفض بمنزال الحيا عقب شدّه

في خايعٍ تومي بنوّاره النود=يشوق من حاضى النداوي وهدّه

عزي لحيٍّ ماهو انسان مقرود=لا شك حظه عن مراده يردّه

يقول ليت الوقت للماضي يعود=قولة ابوه اول من اول وجدّه

نديم القوافي
محمد العواد

[محمد العواد ابن رخيص]

(( طلوع سهيل ))

قرّب طلوع سهيل وملاعب الطير (من الإرشيف)
مليت من وقتي وطول انتظاري=إلى متى والجوّ عجّ ومعاصير
أبطيت ما شبيت بالبر ناري=وابطيت عن قطع الخلا والمشاوير
القيض مع يمناي قيّد يساري=واليوم من قيده على وشْك تحرير
ياهل الولع عِدّو لوقت الحباري=قرّب طلوع سهيل وملاعب الطير
يامحلا بالجيب قطع الصحاري=بالبر مع عشّاق بر وصقاقير
النفس ولهانه لشوف البراري=وشوف المطر يا تبّع الخير للخير
السيل من ربدا للوقه خباري=وطاحت محاديره على غربي الشّيِر
والنبت ياجانا لذكره محاري=القاع بالنوّار صارت نواوير
عزّمت ثم شدّيت عزم السفاري=يحنّ ماطوره على نمرة القير
و سريت مع ناسٍ تدلّ المساري=مع الصحاري عارفين المعابير
ما حرصهم حرص الحريص المداري=الكل منهم ما يهاب المخاسير
يا عيّنو للصيد مدهل واثاري=ومع الاثر قفّو قصوص و مداوير
وتنهّض اللي للمطاليع ضاري=على الحباري عادته تلّة السير
خطوا افحجٍ جثلٍ من الريش عاري=اشقر شقار رودع صدره دواوير
نادر حرار بشد ريشه مواري=عن ماكرن ما وكّر براسه الجير
صلفٍ عديم وبالهداد انتحاري=عوق الخريش يصخّر الخرب تصخير
يا قام يلقف له هبوب الذواري=و علّق بكفٍّ فيه مثل الشناكير
هذا هواي و رغبتي واختياري=يا حسّب الدينار عبد الدنانير
لو كنّت متحضّر ووقتي حضاري=هوايتي نقل الحرار النوادير




نديم القوافي
محمد العواد

[محمد العواد ابن رخيص]

(( يـا شــوق ))
يا شوق حتى لو حصل مني غياب == انـتـي مـعـاي (( 24 )) سـاعـه
لي ديرةٍ دونه مسافات و اتـعــاب=ودّعــت قــلــبــي عــنــد اهـلـهــا وداعــه
فـي غـربـتـي عـانـيـت مـن بـعد الاحـبـاب=مــع غــيــرهــم قــانــع بــغـيـر القـناعــه
كـنّــي غــريــب الـــدار بـديــار الاجــنــاب=جـالـي و هـو مـطـلـوب عـنـد الـجـماعـه
يـاللـي غـيـابـي عنْـك لـظـروف و اسـبـاب=لا تـعـتـبـرهــا قل وصل وقــطـــاعـــه
يـا شــوق حـتــى لــو حصل منّـي غـيـاب=أنـــتـــي مــــعــــاي (((24))) ســـاعـــه
عـلـيــك لــو صــكّـت لـعــدوانــي احــزاب=عــاركـتـهـم عـركــة ضــواري سـبـاعــه
روحــي تــروح فــداك يــا ضــاف الاهــداب=اسـوقـهـا لـشـوفـتْـك ســوق البضاعـه

نديم القوافي

محمد العواد

[محمد العواد ابن رخيص]

((( مد النظر )))
مد النظر خلك بعيد الهقاوي
مد النظر خلّك بعيد الهقاوي=كل البشر فيها عذاريب وعيوب
ترا الشفاوه هي عذاب الشفاوي=عِزّي لمن دوّر بالاجواد عذروب
لا تزعلك غيبة كثير الحكاوي=ياخذ من ذنوبك على ذنوبه ذنوب
ولا تصير في كل المواقف قصاوي=ترا التجاهل بعض الاحيان مطلوب
ما يداوي الدلخ المغفّل مداوي=حتى لو الدكتور يصرفه له حبوب
والسيل يا شفته مع القاع داوي=يعطي مثال لهزربة كل زاروب
تجنّب عيار الكلام السماوي=خلك حليم وحاور الناس باسلوب
وان شفت طيبك مع رداك متساوي=ووصلت لقضب الحلق مع مقرن الثوب
خلك عديمٍ صلف مثل النداوي=وحساب عمرك عند مولاك محسوب
عن كل خوّة ما تحشم المخاوي=اجعل غيابك غيبة الشمس بغروب
اجهم على نيّتـْك يا امرحت ناوي=والرزق عند مدّبر الرزق مكتوب
العبد يا صكّت عليه البلاوي=يفرج له اللي فرّج احزان يعقوب


محمد العواد
نديم القوافي

[محمد العواد ابن رخيص]

( صوت وصدى )
جتني أبيات من الشاعر الكبير
مشفي الجرواني
يقول فيها :

تبي الوناسه والطرب والسعاده=ابعد عن الواتساب والمول والسوق
ولا ترتبط بالمختبر والعياده=إعنز على اللي تشدق الخلق له فوق
يالعبد عالج غفلتك بالعباده=لا تغضب الخالق على شان مخلوق
وسق القدم بأرضٍ يذعذع براده=مابين ربدا والحدق وإم زرنوق
في فيضةٍ يازين ريحة رشاده=متخالفٍ باطرافها كل زملوق
مدهال من تزهى رقبتها القلاده=وضحاء خيار الذود مع شمّخ النوق
مع خوة اللي ما بطبعه نكاده=صميدعٍ مايقبل الهون والبوق
لوهو بوقت الخوف يوم العقاده=له منزلٍ بين المخاليق مرموق
لا فيه لا خفه ولا به قراده=به من دها اللي بأول العيد مشنوق

مشفي الجرواني
----------------------
----------------------

و ردي عليها
جتني قصيده تستحقّ الاشاده=ابيات للي منبع ابياته الذوق
شاعر خذا لجزل القصيد السياده=له منزلٍ عندي مهو لـ اي مخلوق
ومن معنى كلامه اخذت الافاده=وين انت ياللي بكثر الاشغال مخنوق
ترا الوناسة والطرب والسعاده=فرقا الديار وزحمة الناس بالسوق
مع درب راع المعرفه والركاده=صميدعٍ ما جلعد بشور مطفوق
في خايعٍ قفرٍ يذعذع براده=يا زين مع شمس الضحى مرتع النوق
ما لوم من شفّه وغاية مراده=وضحٍ هواها ساق راع الهوا سوق
يا شافهن يرمي علاج العياده=لو كان دايم بابرة دواه مدقوق
ويدله بهن عن كل هم ونكاده=بارضن كساه النبت من كل زملوق
هذا ومن دافع هوايه وعاده=الطير له عندي مواجيب وحقوق
يعطي على دخل انبساطي زياده=فرخٍ وحش ما قيّض العام بسبوق
ان وفق المولى بفرصة هداده=ورّد على برقا الجناحين من فوق
يا ادّيت للخالق فروض العباده=سق القدم يا صار ما بالقدم عوق



محمد العواد

[محمد العواد ابن رخيص]

.
..
مجاراة قديمة من إرشيف إحدى المنتديات الأدبيّة
.
.
.

بيني وبين الشاعرة القديرة الاخت
.
.
.

شاعرة نجد
.
.
.

اتمنى أن تحوز على رضاكم
.
.
.

يا طيـر لاحطيـت عينـي بْعينـك=رويت لك بسكـات قصـة حياتـي
مدري وش اللي صار بيني وبينـك=أرتحت لـك مـن بـدّت الكائناتـي
أستعطفك ليـن أرتويـت بْحنينـك=ولمّيت من نظرة عْيونـك شتاتـي
سولفت لك من غير م أسمع رطينك=وقريـت لـك ماكـان بمْذكـراتـي
وفضفضت لك ب أسرار قلبٍ رهينك=وغنيت لك حتى وأنا فـي مباتـي
وشكيت لك همـي بْحـسٍّ يدينـك=ويعتب عليك أن كان تجهل صفاتي
لاغبت عني ف الفضاء قلت وينك؟=ويـنـك تجي يا غايتي يا مُنـاتـي
أمـا معـي ع الأرض والله يعينـك=جرّب حياة السجن واصبر سْواتـي
وأن كان واكبت المسيـره بْحينـك=والا ليا من طـرت خذنـي بْذاتـي
خذني حرام إني على أمرك ودينـك=ما بـي معـك يا طيـري الا عباتـي
هونت مـن ذاك التغطرس,لعينـك=عدّلت من طيبك عواجـة عصاتـي
كابرت يوم أطغى هوى النفس لينك=ورضيت بُعدك لاجل أجرّب غلاتـي
يكفي من الترحال!ضاعت سْنينـك=بأنعم معك باقي العمر فـي سُباتـي
وأبعتـرف يا طير بينـي وبيـنـك=بْلَيّـاك ما تسـوى رْيـالٍ حيـاتـي



شــاعــرة نــجــد
.
.
.
.

نــديــم الــقــوافــي
يـا شـاعـره مِدّي لـيـميـنـي يـميـنـك=خـوذي مـن ازهـار الـمعانـي وهـاتـي
تـسـلـم عـلى فـنّ الـكتابـه يـديـنـك=يــشـدّنـي شِـعــرك و يـثّـر بــذاتــي
شـعـرك يـجـاذب كـل مـن قال ويـنـك=تــرمـيـن للـغـرقـان حـبـل الـنـجاتـي
الله عـلـى بـلـوى الـمـحبّـه يـعيـنـك=قصـة حـيـاتـك حـول قـصـة حـيـاتـي
اللـي ذكـرتـي بيـن طيـرك و بـيـنـك=جـدّد نـزيـف الـجـرح فــي ذكـرياتـي
ذَكّـرنـي بـذكرى الـمـواجـع!...حنيـنـك=و استـرسل الدمع الغزير بـسكـاتـي
يا بنت أنا كلمتك ((ضاعت سنينك))=عـايـشـتـها بيـن انـهـيـار و ثـبـاتـي
إن كـان شفتي عين مضنون عينـك=مـا شـفـتـهـا من راح عنّـي فـواتـي
طـال الـغيـاب و خـفت بيني و بينـك=يـموت مـن شـحّ السحاب النبـاتـي




نــديــم الــقــوافــي

[محمد العواد ابن رخيص]

تغيب عن بعض القلوب البصيره
يا الآدمي محدٍ يهينك ويجرحْك=يا ابعدت عن شر المغفّل وخيره
ما كل خلق الله تقبّل نصايحْك=تغيب عن بعض القلوب البصيره
ترى الهديفه عند الاجناب يفضحْك=خبلٍ تصفّق له خباث العشيره
وترى الردي لو هو بوجهك يميدحْك=يا اقفيت بعقوبك يشبّ الذخيره
ويا احتجت ما ياقف لصالح مصالحْك=يمناه عن نيل المكارم قصيره
عليك باللي يا استشرته يصارحْك=يفزع وبه عز وشهامه وغِيِره
اطلب رضى الله يا عسى الله يسامحْك=دنياك ماهي باهتمامك جديره
تشوف ما يحزنْك فيها ويفرحْك=والادمي لازم يواجه مصيره
تر حكمة الله مقتضاها لصالحْك=اصبر عسى ما قدّر الله خِيِره



نديم القوافي
محمد العواد

[محمد العواد ابن رخيص]

يا زين ذعذاع الشمال وبراده
لا والله الا برّد الوقت يا عويض=والطير يالمرقاب قرّب هداده
عقب السموم وواهج الشمس بالقيض=يا زين ذعذاع الشمال وبراده
جوٍّ يحرّضنا على البرّ تحريض=وقطع الخلا الخالي لشرواك عاده
نبي يا قلب الذيب نعطيك تفويض=على الدلاله بالخلا والقياده
النفس بفراق النفوس المباغيض=تدله مع اللي ما بطبعه نكاده
واللي بعينه عن هل الزود تغميض=يبلغ معك يا طير شلوى مراده
قاعٍ وُمَنها الطير وامسى على البَيض=تِدخل على القلب الحزين السعاده
والعبد غير مداول السود والبِيض=محدٍ تكفّل في شرابه وزاده

نديم القوافي
محمد العواد

[محمد العواد ابن رخيص]

(( كلمة الحق ))
المكسبـْـك من بعض الاوادم زعلها
الحق ما كل المخاليق تبغاه=ما كل من شاف الحقيقه قبلها
ومن لارضي بالحق لا يهمّك رضاه=لو تزعله في كلمة الحق قلها
فرقاه عيد وراحتك يوم فرقاه=مكسبْـك من بعض الاوادم زعلها
العرف في منطق هل العرف تلقاه=واهل الجهل يِثبِتْ جهلها..جهلها
ما اشفق على اللي بدل الوقت مبداه=يا خربت الحاجه شرينا بدلها
ورزقي على اللي تبسط الرزق يمناه=الخلق ما عزّت ذليلٍ سألها
من باعنا بالرخص..بالرخص بعناه=واهل الردى لو نتجاهل عملها
لابد راع الطيب بالطيب نجزاه=نتعب على رد الجمايل لاهلها




نديم القوافي
محمد العواد

[محمد العواد ابن رخيص]

وين انت ياللي ما تمنيت غيرك
وين انت ياللي ما تمنيت غيرك=الا المنام اللي عقب غيبتك غاب
وين انت يدفعني ضماي لغديرك=عندي على غيابك مشاريه وعتاب
ليتك تشوف اليوم حالة عشيرك=اللي معك يتعب على بذل الاسباب
متى مصيري يرتبط في مصيرك = متى تلمّ اقدارنا شمل الاحباب
تجيب نسمات المحبّه عبيرك=يا ذعذع الغربي من ديار الاجناب
انا سجينك يا حبيبي واسيرك=سجني مؤبد والرجا بطلعتي خاب
في كل حالاتك بشرّك وخيرك=مهديك نظرات المحبه والاعجاب



نديم القوافي
محمد العواد

[محمد العواد ابن رخيص]

أبيات متواضعه من الأرشيف
تعبر عن نفسها





(( نظم القصيد ))



نظم القصيد وفن بدع النوادر
وهبه بمعنى الموهبه و الوراثه


وفرق الشعر من كل وارد و صادر
نحت الصخـر ولا الحراثه حراثه



يا بانت لبشرى الربيع البوادر
وبامر الولي ساق السحاب الاغاثه



دلّه على الارطى و برّاد خادر
يا زينها يا صرت ثالث ثلاثه



مع صحبةٍ للخير دايم تبادر
ما بينهم غِـيِـره و حسد و خباثه



يا صرت بالرحلات معهم مغادر
الكل سمح وفي جنابه دماثه



هذا و عادة طبع الايام غادر
يمضي مثل ماضيك عصر الحداثه



تشكيل طاقم للاطباء وكادر
ما رد نزع الروح وامر اجتثاثه



الله هو القادر على كل قادر
وكم من حضاره ما بقى الا تراثه


نديم القوافي
محمد العواد

[محمد العواد ابن رخيص]

(( تـعـلـقـت بـك حـــيل ))


ابـسـألـك يـا مــنـوة الــقــلــب ويــنــك؟!
ابـسـألـك يـا مــنـوة الــقــلــب ويــنــك=ويـنـك انـا يـِسْـهِـرنـي الـشـوق بـاللـيل

ويـنـك انـا مـحـتـاج عـطـفــك و لـيــنك=ويـنـك و ويـن مـواصـلك و الـمـراسـيل

مـدري وش اللـي صـار بيـنـي و بـيـنك=بـس الـوكـاد انــي تـعـلـقـت بـك حـــيل

واصـبـحـت لـعيـونـك و طـلّـة جـبـيـنك=أشفق من أشجار الصحاري على السيل

حكـمـتـنـي بـاحـكـام شـرعـك و ديــنك=ولولا الأمـل والله ما اصبـر على الويل

قـولـي مـتـى عـيـنـي تـنـاظـر لـعـيـنك=مـتـى يـجــي للــــواقــع الــمــرّ تـبـديل

قـولـي مــتـى تـقـضـب يـديـني يـديـنك=عــقــب الـمـواجـع و العنـا والبـهـاذيل

مـتـي يـجــيــبــك لـلـتــلاقـي حــنــينك=مـلـيـت مـن تـكـرار كـلـمـة تـسـاهــيل

ومـا دمـت خلف اسوار حـبّـك سـجـيـنك=مـا للـهجـر فـي مـعجـم العـشـق تـعليل

ان كـان مــا تـقـضـي بـقـربـي سنـينك=حـرام مـالـي فـي حـيـاتــي مـحـاصـيل


نديم القوافي
محمد العواد

[محمد العواد ابن رخيص]

يالعبد لا تِبْدي على الناس سدّك=احجب وشفِّر خافي النفس برموز
الحاجه اللي للمذلّه تحدّك=تنعاف لو بيّن على حالك العوز
والحظ لو هو دايم الدوم ضدّك=اصعد على سلّم هزايمْك للفوز
واطلب من اللي يا طلبته يمدّك=عن باب ربك منت منفي و ملزوز
ترى المهونه قرب من لا يودّك=ضيف ومكانك للمعازيب محجوز
ومن صد زي ما صد جازه بصدّك=من غير غصن اللوز ما تقطف اللوز
والصاحب اللي باللوازم يسدّك=يسوى عرب ما بَه سوى غزّة البوز


نديم القوافي
محمد العواد

[محمد العواد ابن رخيص]

( تقاعد مبكّر )
قـدّمـت عن حبـك تقاعد مبـكّـر
سهرت كالعاده لحالي افكّر=في واقعٍ يظلمْك باسم العداله

في واقعٍ خوّن بيوم و تنكّر=ماله علي غير المصايب جماله

البال ضايق والمزاج متعكّر=وعزاه يالمشتاق لاضاق باله

اشتقت للي باب وصله مسكّر=اللي مزيده بالحلى قل حاله

ياعين قرناس الحرار الموكّر=في شامخ رجوم النوايف لحاله

مازلت لايامي معاك امتذكّر=ومادام مستقبل لقاك استحاله

قدّمت عن حبك تقاعد مبكّر=وان ماتقاعدت؟! استقيل استقاله

نديم القوافي
محمد العواد

[محمد العواد ابن رخيص]

(( دافع اعجاب ))
ياهيه ياللي جيت من دافع اعجاب
يا هيه ياللي جيت من دافع اعجاب=لك غايةٍ تشّر عليها الوسيله
ترى الهوى مقفول من دونه الباب=ما لك ورى زيف المشاعر حصيله
القلب خارج تغطية جو الاحباب=والنفس من صدمات وقتي عليله
واللي مهو معطيك يا جيته حساب=ابحث بقوقل شرط تلقى بديله
ماني بعلاقاتي مع الناس لعاب=ولاني مثل ما قلت صاحب فضيله
عندي مبادي واحترم كل الاصحاب=طبعي كذا ما ارضى على الناس ميله
واسف ترى اللي قلت له عدّة أسباب=ماهي على حد اعتبارك قليله

.
.
.

نديم القوافي
محمد العواد

[محمد العواد ابن رخيص]

يا شوق لولا الشوق ما قلت وينك ..
يا شوق وينك ما يجـيـبك حنينك ؟!=بين الرجا والياس يا طول غيبتْك
..
يا شوق لولا الشوق ما قلت وينك=مشاعر المشتاق ما عمرها جتْك ؟!
..
طالت سنيني وانت طالت سنينك=دربك بعيد وديرتي غير ديرتْك

.. من شافني قال إطلب الله يعينك=ولّا انت يعلم عالم الغيب حالتْك

.. أحتاج لك واحتاج عطفك ولينك=وأحتاج فعلاً يا هوى البال شوفتْك

.. وأحتاج في دنياي طلّة جبينك=ياللي خذت من بسمة الصبح بسمتْك

.. القلب في حكم المحبّه سجينك=وانا ادري انك منت داري بقسوتْك

.. ما راح تدرك ويش بيني و بينك=إلا بنظره نفس توقيت نظرتْك

.. يا صرت قدامي وعيني بــــ عينك=ناظرت في نظرات عيني محبتْك

نديم القوافي
محمد العواد

[محمد العواد ابن رخيص]

افرح بشوفـتْـك وافرح في لقاك // فرحة الطلاب في يوم الخميس إن نشدتي : يا محمد وش بلاك ؟=واقعي يا واقع الحظ التعيس !
آآه من دنياً على جثة هواك=توّجتني في عزا حلمي عريس
يا شبيه الريم ما اظنّ يخفاك=حب من هو في سجن حبّك حبيس
الغلا و شلون تجزاه بجفاك ؟=وجوهرك يا نادر العمله نفيس !
يعني ما تدري بحبك و بغلاك ؟=وان مالي بالبشر غيرك ونيس !
ما اتمنى بين خلق الله سواك=لا تصدق هرج نمّام و خسيس
شاعرك يا نور عيني في رجاك=وغير همّي و القلم مالي جليس
الأمل في داجي اللهفه ضياك=و طلّـتك لا يا بعد طلّة لميس
افرح بشوفـتْـك وافرح في لقاك=فرحة الطلاب في يوم الخميس


➰ نديم القوافي ➰
محمد العواد

[محمد العواد ابن رخيص]

أبيات رد ثناء للزميل العزيز
طيب الخوة وطيب الصيت
الأستاذ ساير منادي المضياني العنزي
من محافظة رفحاء - الحدود الشمالية
1438/8/5 هـ
.
.
.
وهذا من أقل ما يستحقه أبو سامي
لا يا بعد من هزّ كرسيّه الخوف // وخلاه يكسب بـ..اخوياه الرزاله
كتبت من واقع معاناتي حروف=فيها لكل وافي وهافي رساله
ماني ضعيّف من مساكين وضعوف=يسكت وشوفاته على قد حاله
ولاني عمى عن يِمِّة الحق مكفوف=لا خير باللي ما يقيم العداله
رزقي على اللي يرحم العبد ويروف=ولا الحثاله طول عمره حثاله
مرّيت أنا بظروف وظروف وظروف=عسى تمر اهل الردى والنذاله
ولا شفت مثلك يابو سامي ولا اشوف=رجلٍ تقدّر (صدق) حق الزماله
يا تاج راسي لك على الراس معروف=كسبت يا ذرب اليمين الجماله
لا يا بعد من هزّ كرسيّه الخوف=وخلاه يكسب بـاخوياه الرزاله


نديم القوافي
محمد العواد

[محمد العواد ابن رخيص]

مجنون هايم بوحده مثلي مجنونه
‏أعماقي تشكي من اللي يسكن أعماقي=ما اخذت إشاعه بس ادري ضلوعي مسكونه
واللي سكنها من اول ما سكن باقي=يمارس فنون حبه اااه يا فنونه
ربيبة الفكر, شفّي, أصعب أذواقي=دستور حاكم مشاعرها وقانونه
هي سيدة شعري المكتوب باوراقي=واللي نشرته على الساحه وتقرونه
‏ما زال ينبض غلاها وسط خفاقي=‏وعواطفي مع صداه العذب مرهونه
ابعدت والنيه ابعد واشري فراقي=بس المحبه قسم بالله ملعونه
‏ماجيتها راجع الا بدافع اشواقي=مجنون هايم بوحده مثلي مجنونه
في حبها عارفه مبداي واخلاقي=وكل شي يا حيي وميتي على لونه
الحب باقي ولا ادري وش ورى الباقي=غير اني شاعر يقدّم موجز شجونه

نديم القوافي
محمد العواد

[محمد العواد ابن رخيص]

ثقل النفوس لنقص اهلها علامه
ينحط واذا صافح يمده كفيّا

انت السلامه من سلامك سلامه
حالتْك ميّت نفس حالتْك حيّا

حي من جمع منطق وطيب وفهامه
اللي لظمى من ظامه العوز ريّا

رجلٍ يبيّن بالمجالس مقامه
يا رحّب الكل بجنابه وحيّا

من لا احترم غيره يكون احترامه
أبعد عليه من الثرى للثريّا

ومن لا حشم نفسه وثمّن كلامه
ماله قبول ولا حفاوه هنيّا

لا خير في رجال ما به كرامه
ولابه على ميلة رفيقة حميّا

لولا القبال السمح والابتسامه
ما يشتهر بالجود طلق المحيّا

ولولا الاذى من كان لابس احرامه
ما يقتل بنص الحديث الحديّا

محمد العواد