ديوان / الشاعر عبدالعزيز العليوي

0000 ســـوريـــا !!!

	البارحة ماني بيم التعاليل=والهم من كثر الصواديف طايل ماغير أحط من الهواجيس وآشيل=والكبد يصلها لهيب الملايل ماهيضني زاهيات الخلاخيل=ولاشوقني ماشطات الجدايل أنهت !! وافكر فـالليال المقابيل=وزفر !! على وقت مريرٍ ومايل وقتٍ يهوّل راضع الصدر تهويل=ويكشر بنابه لولد الحمايل لافي يدي حيلة ولاعاد بي حيل=والضيم مكّن بالضلوع النحايل يا عز تالي ياهلي لأنصف الليل=ترزم علي بقعاء بهم وغلايل يا ضيقةٍ مثل الجبال المثاقيل=لو زال أجا همي فلاهو بزايل اشوف وتشوفون قهر الرجاجيل=في سوريا ما بين صايل وجايل شيبانهم تذبح كما تذبخ الحيل=واطفالهم ترمى بذيك الشعايل نسوانهم تكشفن يا هل الخيل=وصاحن يبن فزعة عريب السلايل وشبابهم تنخى الرجال المشاكيل=تبي السلاح اليوم والعمر زايل وين الرجال مزبنين الهلاهيل=وين الشيوخ موبتين الفعايل وين العرب واهل الخليج الأسابيل=وين القبايل مسرجين الأصايل (وين الطنايا وين شرابة الهيل=وين الرجال اللي تشيل الثقايل) قد قاله العوني بذيك المراسيل=ينخى الزحول مضيفين النزايل وأنا بقوله للرجال المداهيل=أهل الزنود مولعين الفتايل وينه تميم المجد وين الحلاحيل=أهل المفاخر والسيوف الصقايل وينه بني وايل هل الرمح والخيل=وينه صناديد الوغى والصلايل وينه عتيبة لاطمين المعاييل=ذبّاحة الحايل كرام السبايل وينه مطير وحرب عدالة الميل=وين العزاوي وين سبع القبايل ياآل العرب يكفي مهونة وتذليل=ليا متى والدم في حمص سايل ليا متى درعا عذاب وغرابيل=ليا متى ضيم الرجاجيل طايل ياسوريا صبراً على الغبن والويل=بمشاية الله حكم بشار زايل يالله يا منشي حقوق المخاييل=أجبر عزانا بالنفوس الرحايل وصلاة ربي عد وبل الهماليل=على النبي اعداد ما سال سايل

.



.