قصه وابيات

قـصه وابيات من الماضي

انقلها لكم متمنياً ان تؤخذ منها العبره والاستفاده وان تروق لكم .

القصه جرت على (عدوان الهربيد) من السويد من قبيلة شمر شاعر مجيد واشتهر بمكارم الاخلاق والبر باهله وجماعته وعشيرته وهذه العادة عادة حميدة من عوايد العرب والواحد لازم يتصف في شي من البر ,, المهم أن عدوان الهربيد له أخ اكبر منه وكان عدوان يعزه ويغليه ومع مرورالزمن قدر الله وتوفى اخيه الكبير وخلف ولد وحيد أسمه ((جريس)) ,, وبعد ماتوفى أبو جريس اللي هو أخو عدوان الهريبد الكبير ارادت ام جريس ان تتزوج ,, وخاف عدوان على ولد اخيه من العيلة وسوء التربية وقال انا أتزوجها علشان احافظ على الولد عن لا يلحقه ظيم ويراعيه وفعلاً تزوج عدوان الهربيد من ام جريس وقام عدوان يربي ولد اخوه جريس تربية حسنة ويعتني به وكانه ولده الذي ظهر من صلبه وكونه ولد اخيه ,, المهم كبر جريس وصار رجال على امل ان يشد به الظهر وصار عمه عدوان الهربيد شايب يالله يقوم ويتحرك ولكن الغريب أن جريس بدأ يتنكر لعمه ويعاملة معاملة ماهيب زينه بس العم ماله الا ان يصبر ويتحمل أبن اخيه ,, ووجهه عدوان الهربيد الى ابن أخيه جريس هذه القصيدة التي يقول فيها :

ياجريس يامشكاي شاكن واشــاكيك = وأشوفها من يم الاصحاب ضاقه
ياجريس أخذت أمك على شان تاليك = مامعجــبن زينه ولاهـي عشاقه
عمــك ولــو بي تنشده كــان ينبيــك = وش حق من رباك طفــل حواقه
ياما على مــتني تعـقــبت بيــديـــك = تنقــل كمـا تنقــل خطـاه العــلاقه
وياما بعــدلات الشــبايـا نعـشــيــك = واعطـيك من زود الخـزيزه لحاقه
بارباعى إليا ثــار حســه يشـــويـك = في ليـلةً ذوق العشــا بـــه شـفاقـه
ويـوم الذي بذقون ربعـك ظهر فيك = واظـن فـي نبــت اللحـي افـتـراقه
اليوم أشــوفـك يوم كـبرن عـلابـيك = جمعت مــع خبث الطبايـع نـزاقـه
ولاعــاد بالــدنيـا صديـقً يخـليــك = مامن ورى عوج النصايب صداقه
ياجـريس مــالى بالاداني واقاصيك = لاهــل فـوقى محـزم مـن دقــاقــه
ســـبع العوذ ياجريس خلن واخليك = وياجـريس مابعيال الاخـوان فـاقـه
تيسً يحطـه وال الاقــدار بيــديـك = أحـلى مـن الشـرشوح عـنـد الرفاقـه

وقد سمع واحدً من اهــل بقعاء قصــيدة عــدوان الهربيـد فقـال :

ياليت بالــدنيا صديقـك يخــليــك = وكــفــاك شـــره ماتبي لــه صــداقــه
ميرالبلا لا جـنب الحق ناصيــك = تــومي ركــابــه ماعــليـهــا عـــلاقــه
دلى يبـيعــك بالمكاتـب ويشــريك = ويحـــط دون الله عــلــومً دقــاقـــه

وسـلامتكـم .